1 โคลินโท 2
2
เปาโล ฒุ่น กีตู่ หฒุ ตีง เหฒียบ หฑั่ง จ๋า เญย สี่
1หฒวัง ก๋อ-โย์ว อ่า, ฒิ่น ด่าง เยีย มี่ง เม่ย บัว หน่าย ฒุ่น ทิน-ฮู่ง เกม เจี๊ยน เญย เจ๊า.#2:1 ม่าย เต๋ย โล์-ฮนอย โซว ก๊อง “เถง ทิน-ฮู่ง โหฒว ฒอง-เหฒง”. วั้ว หฒั่น เยีย ไม้ เฒ์ย หล่ง คู่ หมวัง เญย หว่า ไฟ ธง-เม่ง เญย หว่า ก๊อง. 2เยีย เหธา เม่ย บัว เยียม วั้ว หฒั่น, เยีย ตี่ง เฮญี้ยว เยีย ขูง อ๋อย ก๊อง เยซู กีตู่ หย่า ก๊อง นิ่น หฒุ ตีง เหฒียบ หฑั่ง จ๋า ไต่ เญย สี่ ฮนั้ง. กั้น หญู่ง เยีย ไม้ ก๊อง อ๊ะ. 3เยีย เถา เม่ย บัว หน่าย วั้ว หฒั่น เยีย เมา ไห่, กั้ม เหฑีย ไห่, ซิน หฒิน เจี๊ยน เยียม.#กง-โฒ่ 18:9 4เยีย ก๊อง เญย หว่า, ฒุ่น เญย โต์ ไม้ เฒ์ย หล่ง ป้าม เมี่ยน เญย ธง-เม่ง ก๊อง หว่า บย่าง, มป่า ปุน ธีง สีง ลี่ง ม่าย ต้ม ชะ. 5ฮนั้ง หน่าย, เม่ย บัว เญย เสียน ฟิม ไม้ เฒ์ย ปั่ง ป้าม เมี่ยน เญย ธง-เม่ง, เซ ปั่ง ทิน-ฮู่ง เญย ชะ.
สีง ลี่ง ปุน ต้าย เญย ธง-เม่ง
6เยีย ฒุ่น ธง-เม่ง เญย โต์-เล์ย ปุน เอย เสียน เญย เจ๊า เป๋น ต้ม เมี่ยน วั้ว เต๋ย หมวัง. เซ ไม้ เฒ์ย อี้ จ๋า เญย ธง-เม่ง, หย่า ไม้ เฒ์ย กุ๊น อี้ จ๋า เญย ป้าม เกน ม่าย หลี่ง ม่าย ชะ วั้ว เต๋ย เญย ธง-เม่ง. น้าย หญู่ง ม่าย หลี่ง ม่าย ชะ เญย อ๋อย ป่าย เหฑ่ง. 7เยีย บัว ก๊อง เญย ธง-เม่ง เซ ไม้ แก้ง บย๋าง ย่าง เญย ธง-เม่ง, ต้ง ทิน-ฮู่ง ปี๋ง เจี๊ยน เญย ธง-เม่ง. ไม้ แก้ง เหฒย ป้าม เกน วั้ว หฒั่น, ทิน-ฮู่ง ฒู้ง ตี่ง ลิ์ว หล่ง น้าย หญู่ง ธง-เม่ง ปุน บัว ตุ๊ ฌัง-หล่าง. 8กุ๊น อี้ จ๋า เญย ป้าม เกน วั้ว เต๋ย เมี่ยน ไม้ ม่าย เหยียด เต้า เม่ง แปะ น้าย หญู่ง ธง-เม่ง. สี ก๊อง นิ่น บัว เม่ง แปะ นอ, นิ่น บัว ไม้ เฒาะ ฌัง-หล่าง เญย เฒี้ยว ตีง เหฒียบ หฑั่ง จ๋า. 9มป่า ฮนั้ง กีง-โซว เฟี้ย เจี๊ยน ก๊อง.
“มฒีง ไม้ ปวัด เจี๋ย, มน่อม ไม้ ไฮ์ เจี๋ย,
ไม้ ม่าย หาย เต้า ฮนั้ม ตุ๊ เถา เญย สี่,
ทิน-ฮู่ง หลิ่ว เล์ย เหฒียง ปุน ฮนั้ม นิ่น วั้ว เต๋ย เมี่ยน.”#อิสะยา 64:4
10มป่า ไม้ แก้ง บย๋าง ย่าง เญย สี่, ทิน-ฮู่ง หล่ง สีง ลี่ง ปุน บัว ฮิ้ว, เหว่ย หฒุ สีง ลี่ง ฒ่า โถว หญู่งๆ. เลี่ยม ทิน-ฮู่ง โด เจี๋ย เญย หฒะเอ๋ย หย่า ฒ่า ตุ๊ โถว. 11ขูง เก๊าะ-เมี่ยน กั้น เญย เฮญี้ยว ไฮ่ ฮิ้ว ตุ๊ เก๊าะ-เมี่ยน กั้น ฮนั้ม เญย สี่. ฟี่ ฮนั้ง เญย, ขูง ทิน-ฮู่ง เญย สีง ลี่ง กั้น ไฮ่ ฮิ้ว ตุ๊ ทิน-ฮู่ง ฮนั้ม เญย สี่. 12บัว ไม้ เฒ์ย ฒิบ ป้าม เมี่ยน เญย เฮญี้ยว. บัว ฒิบ เญย เซ ทิน-ฮู่ง พ้าย ต้าย เญย สีง ลี่ง เหว่ย ปุน บัว ฮิ้ว ตุ๊ ทิน-ฮู่ง เหธย ปุน เญย หญู่งๆ.
13ฮนั้ง หน่าย, น้าย เต๋ย สี่ เยีย บัว ไม้ เฒ์ย หล่ง ป้าม เมี่ยน เญย ธง-เม่ง หฌาว เญย หว่า ก๊อง. เยีย บัว หล่ง สีง ลี่ง หฌาว เญย หว่า ก๊อง เม่ง สีง ลี่ง เญย เฒียน เล์ย ปุน ม่าย สีง ลี่ง เญย เมี่ยน หมวัง. 14หาย เต้า ไม้ ม่าย สีง ลี่ง ไม้ ไฮ่ ฒิบ ทิน-ฮู่ง ปุน ต้าย เญย ฒี่ง เหญ่ย. น้าย หญู่ง เมี่ยน ไม้ ไฮ่ เม่ง แปะ น้าย เต๋ย ฒี่ง เหญ่ย, ฒู้ง ฝุน เซ หฮงง ไห่, เหว่ย หฒุ ขูง ม่าย สีง ลี่ง ต้อ เญย เมี่ยน หธีง ต้าย ไฮ่ สัม ตุ๊ ธ้วด. 15ม่าย สีง ลี่ง เญย เมี่ยน ไฮ่ สัม ตุ๊ ธ้วด หม่าน สี่, มป่า ไม้ ม่าย หาย เต้า ไฮ่ สัม ตุ๊ ธ้วด นิ่น. 16ฮนั้ง กีง-โซว ก๊อง นอ,
“หาย เต้า ไฮ่ ฮิ้ว ตุ๊ เฒี้ยว เญย เฮญี้ยว?
หาย เต้า ไฮ่ หฌาว นิ่น?”#อิสะยา 40:13; โลมา 11:34
มป่า บัว ม่าย กีตู่ เญย เฮญี้ยว.
Trenutno izbrano:
1 โคลินโท 2: IuMiTH
Označeno
Kopiraj
Primerjaj
Deli
Želiš, da so tvoji poudarki shranjeni v vseh tvojih napravah? Registriraj se ali se prijavi
Mien Bible (Thai Script) © Thailand Bible Society, 2007