ꠔꠃꠞꠣꠔ ১: ꠙꠄꠖꠣ ꠘꠣꠝꠣ 15
15
ꠢꠎꠞꠔ ꠁꠛ꠆ꠞꠣꠢꠤꠝ (ꠀ꠩) ꠅꠞ ꠟꠉꠦ ꠀꠟ꠆ꠟꠣꠞ ꠅꠀꠖꠣ
1ꠅꠔꠣ ꠊꠐꠘꠣ ꠅꠇꠟꠞ ꠛꠣꠖꠦ ꠅꠢꠤꠞ ꠝꠣꠎꠦ ꠝꠣꠛꠥꠖꠞ ꠇꠣꠟꠣꠝ ꠀꠛ꠆ꠞꠣꠝꠞ ꠉꠦꠍꠦ ꠘꠣꠎꠤꠟ ꠅꠁꠟ। ꠔꠣꠁꠘ ꠇꠁꠟꠣ, “ꠅ ꠀꠛ꠆ꠞꠣꠝ, ꠒꠞꠣꠁꠅ ꠘꠣ, ꠀꠝꠤꠃ ꠔꠥꠝꠣꠞ ꠢꠦꠚꠣꠎꠔꠇꠣꠞꠤ, ꠔꠥꠝꠣꠞ ꠛꠃꠔ ꠛꠠ ꠙꠥꠞꠥꠡ꠆ꠇꠣꠞ।” 2ꠀꠛ꠆ꠞꠣꠝꠦ ꠇꠁꠟꠣ, “ꠅ ꠝꠣꠛꠥꠖ ꠝꠃꠟꠣ, ꠀꠝꠣꠞꠦ ꠇꠤꠔꠣ ꠖꠤꠔꠣꠄ? ꠀꠝꠤ ꠔ ꠘꠤꠀꠅꠟꠣꠖꠤ। ꠀꠝꠤ ꠝꠞꠣꠞ ꠛꠣꠖꠦ ꠖꠣꠝꠦꠡ꠆ꠇꠞ ꠄꠟꠤꠄꠎꠦꠞ ꠀꠝꠣꠞ ꠡꠝ꠆ꠙꠔ꠆ꠔꠤꠞ ꠝꠣꠟꠤꠇ ꠅꠁꠛ। 3ꠔꠥꠝꠤ ꠔ ꠀꠝꠣꠞꠦ ꠇꠥꠘꠥ ꠀꠅꠟꠣꠖ ꠖꠤꠟꠣꠄ ꠘꠣ, ꠄꠞꠟꠣꠉꠤ ꠀꠝꠣꠞ ꠛꠣꠠꠤꠞ ꠉꠥꠟꠣꠝ ꠀꠝꠣꠞ ꠅꠀꠞꠤꠡ ꠅꠁꠛ।” 4ꠅꠃ ꠝꠣꠛꠥꠖꠦ ꠀꠛ꠆ꠞꠣꠝꠞꠦ ꠇꠁꠟꠣ, “ꠘꠣ, ꠢꠦ ꠘꠣꠄ, ꠔꠥꠝꠣꠞ ꠘꠤꠎꠞ ꠛꠃꠞ ꠀꠅꠟꠣꠖꠃ ꠔꠥꠝꠣꠞ ꠅꠀꠞꠤꠡ ꠅꠁꠛ।” 5ꠝꠣꠛꠥꠖꠦ ꠀꠛ꠆ꠞꠣꠝꠞꠦ ꠛꠣꠞꠦ ꠀꠘꠤꠀ ꠇꠁꠟꠣ, “ꠀꠍꠝꠣꠘꠞ ꠛꠣꠄ ꠌꠣꠅ, ꠀꠞ ꠙꠣꠞꠟꠦ ꠅꠃ ꠔꠦꠞꠣ ꠅꠇꠟ ꠉꠘꠤꠀ ꠚꠥꠠꠣꠅ, ꠔꠥꠝꠣꠞ ꠛꠋꠡꠞ ꠅꠀꠞꠤꠡ ꠅꠃꠟꠣ ꠛꠦꠢꠤꠡꠣꠛ ꠅꠁꠛ।” 6ꠀꠛ꠆ꠞꠣꠝꠦ ꠝꠣꠛꠥꠖꠞ ꠅꠃ ꠅꠀꠖꠣꠞꠦ ꠄꠇꠤꠘ ꠇꠞꠟꠣ, ꠀꠞ ꠝꠣꠛꠥꠖꠦ ꠢꠃ ꠄꠇꠤꠘꠞꠦ ꠖꠤꠘꠖꠣꠞꠤ ꠇꠣꠝ ꠢꠤꠡꠣꠛꠦ ꠇꠛꠥꠟ ꠇꠞꠟꠣ।
7ꠀꠞ ꠔꠣꠁꠘ ꠀꠛ꠆ꠞꠣꠝꠞꠦ ꠇꠁꠟꠣ, “ꠀꠝꠤꠃ ꠝꠣꠛꠥꠖ। ꠁ ꠇꠦꠘꠣꠘ ꠖꠦꠡꠞ ꠅꠗꠤꠇꠣꠞꠤ ꠅꠁꠛꠣꠞ ꠟꠣꠉꠤ ꠀꠝꠤ ꠔꠥꠝꠣꠞꠦ ꠛꠣꠛꠤꠟ ꠖꠦꠡꠞ ꠃꠞ ꠐꠣꠃꠘ ꠕꠣꠇꠤ ꠛꠣꠞ ꠇꠞꠤꠀ ꠀꠘꠍꠤ।” 8ꠅꠃ ꠀꠛ꠆ꠞꠣꠝꠦ ꠇꠁꠟꠣ, “ꠅ ꠝꠣꠛꠥꠖ ꠝꠃꠟꠣ, ꠀꠝꠤ ꠁꠔꠣꠞ ꠝꠣꠟꠤꠇ ꠅꠁꠝꠥ ꠇꠞꠤ ꠇꠤꠟꠣ ꠛꠥꠎꠝꠥ?” 9ꠔꠣꠁꠘ ꠇꠁꠟꠣ, “ꠔꠥꠝꠤ ꠔꠤꠘ ꠛꠍꠞꠞ ꠄꠇꠐꠣ ꠇꠞꠤ ꠒꠦꠇꠤ, ꠍꠣꠉꠤ, ꠀꠞ ꠝꠦꠠꠣꠞ ꠙꠣꠑꠣ ꠀꠝꠣꠞ ꠍꠣꠝꠘꠦ ꠟꠁꠀ ꠀꠅ, ꠄꠞ ꠟꠉꠦ ꠄꠇꠐꠣ ꠒꠥꠙꠤ ꠙꠣꠈꠤ ꠀꠞ ꠄꠇꠐꠣ ꠙꠣꠞꠅꠞ ꠛꠣꠁꠌ꠆ꠌꠣꠅ ꠀꠘꠤꠅ।” 10ꠀꠛ꠆ꠞꠣꠝꠦ ꠅꠃꠟꠣ ꠇꠞꠟꠣ। ꠔꠣꠁꠘ ꠁꠔꠣ ꠢꠇꠟꠐꠤ ꠀꠘꠤꠀ ꠖꠥꠁ ꠐꠥꠇꠞꠣ ꠇꠞꠤꠀ ꠃꠟꠐꠣ-ꠃꠟꠐꠤ ꠇꠞꠤ ꠢꠣꠎꠣꠁꠀ ꠞꠣꠈꠟꠣ, ꠈꠣꠟꠤ ꠙꠣꠈꠤ ꠅꠇꠟꠞꠦ ꠐꠥꠇꠞꠣꠁꠟꠣ ꠘꠣ। 11ꠔꠦꠃ ꠢꠇꠥꠘ ꠀꠁꠀ ꠅꠃ ꠐꠥꠇꠞꠣ ꠅꠇꠟꠞ ꠃꠙꠞꠦ ꠙꠠꠟꠦ, ꠀꠛ꠆ꠞꠣꠝꠦ ꠈꠦꠖꠣꠁꠟꠣ।
12ꠡꠥꠞꠥꠎ ꠒꠥꠛꠣꠞ ꠡꠝꠄ ꠀꠛ꠆ꠞꠣꠝꠞ ꠄꠇ ꠛꠦꠃꠡꠤ ꠊꠥꠝ ꠀꠁꠟ। ꠊꠥꠝꠞ ꠝꠣꠎꠦ ꠛꠦꠕꠣꠄꠀ ꠒꠞ ꠀꠞ ꠀꠘ꠆ꠖꠣꠁꠞꠦ ꠔꠣꠘꠦ ꠀꠍꠞ ꠇꠞꠟ। 13ꠅꠃ ꠝꠣꠛꠥꠖꠦ ꠔꠣꠘꠞꠦ ꠇꠁꠟꠣ, “ꠔꠥꠝꠤ ꠘꠤꠌ꠆ꠌꠄ ꠅꠁꠀ ꠎꠣꠘꠤꠅ, ꠔꠥꠝꠣꠞ ꠅꠀꠞꠤꠡ ꠅꠇꠟꠦ ꠅꠃꠟꠣ ꠖꠦꠡꠅ ꠉꠤꠀ ꠞꠁꠛꠣ ꠎꠦꠇꠐꠣ ꠔꠣꠞꠣꠞ ꠘꠤꠎꠞ ꠘꠣꠄ। ꠢꠘꠅ ꠔꠣꠞꠣ ꠈꠥꠛ ꠎꠥꠟꠥꠝ-ꠝꠍꠤꠛꠔꠞ ꠝꠣꠎꠦ ꠞꠁꠀ ꠌꠣꠁꠞ-ꠡ ꠛꠞꠍ ꠙꠞ꠆ꠎꠘ꠆ꠔ ꠉꠥꠟꠣꠝꠤ ꠇꠞꠛꠣ। 14ꠀꠞ ꠎꠦ ꠎꠣꠔꠤꠄ ꠔꠣꠞꠣꠞꠦ ꠉꠥꠟꠣꠝ ꠛꠣꠘꠣꠁꠛꠣ, ꠀꠝꠤ ꠢꠤ ꠎꠣꠔꠤꠞ ꠛꠤꠌꠣꠞ ꠇꠞꠝꠥ। ꠛꠣꠖꠦ ꠔꠣꠞꠣ ꠛꠃꠔ ꠗꠘ-ꠖꠃꠟꠔ ꠟꠁꠀ ꠢꠘ ꠕꠘꠦ ꠛꠣꠞ ꠅꠁꠀ ꠀꠁꠛꠣ। 15ꠀꠞ ꠔꠥꠝꠤ ꠡꠣꠘ꠆ꠔꠤꠄ ꠔꠥꠝꠣꠞ ꠛꠣꠚ-ꠖꠣꠖꠣꠞ ꠉꠦꠍꠦ ꠎꠣꠁꠛꠣꠄ। ꠔꠥꠝꠤ ꠙꠥꠞꠣ ꠝꠥꠞꠛ꠆ꠛꠤ ꠛꠄꠅꠡꠅ ꠇꠄꠛꠞꠅ ꠢꠣꠝꠣꠁꠛꠣꠄ। 16ꠔꠥꠝꠣꠞ ꠌꠣꠁꠞ ꠍꠤꠠꠤ ꠛꠣꠖꠦ ꠄꠞꠣ ꠅꠘꠅ ꠚꠤꠞꠤꠀ ꠀꠁꠛꠣ, ꠇꠣꠞꠘ ꠀꠝꠥꠞꠤ ꠅꠇꠟꠞ ꠉꠥꠘꠣ ꠅꠈꠘꠅ ꠙꠥꠞꠣ ꠅꠁꠍꠦ ꠘꠣ।”
17ꠡꠥꠞꠥꠎ ꠒꠥꠛꠤꠀ ꠎꠦꠛꠟꠣ ꠀꠘ꠆ꠖꠣꠁꠞ ꠅꠁꠉꠦꠟ ꠅꠃ ꠡꠝꠄ ꠗꠥꠝꠣꠄ ꠜꠞꠣ ꠄꠇ ꠃꠘ꠆ꠖꠣꠟ ꠀꠞ ꠀꠉꠥꠘꠤꠞ ꠝꠥꠡꠣꠟ ꠢꠃ ꠢꠣꠎꠣꠁꠀ ꠞꠣꠈꠣ ꠇꠥꠞꠛꠣꠘꠤꠞ ꠐꠥꠇꠞꠣꠁꠘ꠆ꠔꠞ ꠝꠣꠎꠦꠖꠤ ꠉꠦꠟ। 18ꠝꠣꠛꠥꠖꠦ ꠢꠃ ꠖꠤꠘꠃ ꠀꠛ꠆ꠞꠣꠝꠞ ꠟꠉꠦ ꠅꠃꠟꠣ ꠅꠀꠖꠣ ꠇꠞꠟꠣ, “ꠝꠤꠡꠞꠞ ꠉꠣꠋ ꠕꠘꠦ ꠛꠠ ꠉꠣꠋ ꠚꠥꠞꠣꠔ ꠙꠞ꠆ꠎꠘ꠆ꠔ ꠀꠡ꠆ꠔꠣ ꠖꠦꠡ ꠀꠝꠤ ꠔꠥꠝꠣꠞ ꠅꠀꠞꠤꠡꠞꠦ ꠖꠤꠟꠣꠝ। 19ꠁꠇꠐꠣ ꠅꠁꠟ ꠇꠦꠘꠤ, ꠇꠘꠤꠎꠤ, ꠇꠖꠝꠥꠘꠤ, 20ꠢꠤꠐ꠆ꠐꠤ, ꠚꠣꠞꠤꠎꠤ, ꠞꠚꠣꠄꠁ, 21ꠀꠝꠥꠞꠤ, ꠇꠦꠘꠣꠘꠤ, ꠉꠤꠞ꠆ꠉꠣꠡꠤ ꠀꠞ ꠎꠤꠛꠥꠎꠤ ꠅꠇꠟꠞ ꠖꠦꠡ।”
Trenutno izbrano:
ꠔꠃꠞꠣꠔ ১: ꠙꠄꠖꠣ ꠘꠣꠝꠣ 15: sylN
Označeno
Kopiraj
Primerjaj
Deli
Želiš, da so tvoji poudarki shranjeni v vseh tvojih napravah? Registriraj se ali se prijavi
© Ahle Kitab Society. All rights reserved.