ꠔꠃꠞꠣꠔ ২: ꠢꠤꠎꠞꠔ 27
27
ꠎꠣꠟꠣꠁꠟ ꠇꠥꠞꠛꠣꠘꠤ ꠈꠣꠘꠣ ꠛꠣꠘꠣꠁꠅ
1ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠛꠣꠛꠟꠣ ꠟꠣꠇꠠꠤꠖꠤ ꠙꠣꠌ ꠀꠔ ꠟꠣꠝ꠆ꠛꠣ, ꠙꠣꠌ ꠀꠔ ꠙꠣꠡ ꠀꠞ ꠔꠤꠘ ꠀꠔ ꠃꠛꠤ ꠖꠤꠀ ꠌꠣꠁꠞꠇꠥꠘꠤ ꠇꠞꠤ ꠄꠇꠈꠣꠘ ꠇꠥꠞꠛꠣꠘꠤ ꠈꠣꠘꠣ ꠔꠂꠀꠞ ꠇꠞꠣꠁꠅ। 2ꠄꠞ ꠌꠣꠁꠞꠅ ꠇꠥꠘꠣꠞ ꠃꠙꠞꠦ ꠟꠣꠇꠠꠤꠖꠤ ꠌꠣꠁꠞꠐꠣ ꠢꠤꠋ ꠖꠤꠅ। ꠅꠃ ꠢꠤꠋ ꠇꠥꠘꠣꠞ ꠟꠣꠇꠠꠤ ꠈꠥꠖꠤꠀ ꠛꠣꠘꠣꠘꠤ ꠟꠣꠉꠛ, ꠁ ꠀꠡ꠆ꠔꠣꠈꠣꠘ ꠄꠇ ꠌꠤꠎ ꠅꠁꠛ। ꠛꠣꠖꠦ ꠙꠥꠞꠣ ꠇꠥꠞꠛꠣꠘꠤ ꠈꠣꠘꠣ ꠙꠤꠔꠟꠖꠤ ꠟꠦꠙꠣꠁꠅ। 3ꠇꠥꠞꠛꠣꠘꠤ ꠈꠣꠘꠣꠞ ꠍꠣꠟꠤ ꠔꠥꠟꠣꠞ ꠛꠠ ꠌꠣꠝꠌ ꠀꠞ ꠉꠣꠝꠟꠣ, ꠟꠃ ꠕꠅꠀꠞ ꠛꠣꠐꠤ, ꠉꠥꠡ꠆ꠔ ꠔꠥꠟꠣꠞ ꠛꠠ ꠇꠣꠐꠣ-ꠍꠤꠚ, ꠀꠋꠞꠣ ꠕꠅꠀꠞ ꠙꠣꠔꠤꠟ, ꠢꠇꠟꠔꠣ ꠙꠤꠔꠟꠖꠤ ꠛꠣꠘꠣꠁꠅ। 4ꠙꠤꠔꠟꠖꠤ ꠄꠇꠈꠣꠘ ꠎꠣꠟꠤ ꠛꠣꠘꠣꠁꠛꠣꠄ। ꠄꠞ ꠌꠣꠁꠞ ꠇꠥꠘꠣꠔ ꠌꠣꠁꠞꠐꠣ ꠙꠤꠔꠟꠞ ꠇꠠꠣ ꠟꠣꠉꠣꠁꠅ। 5ꠇꠥꠞꠛꠣꠘꠤ ꠈꠣꠘꠣꠞ ꠔꠟꠣ ꠕꠣꠇꠤ ꠃꠙꠞꠞ ꠝꠣꠎꠣꠝꠣꠎꠤ ꠎꠣꠉꠣꠞ ꠔꠣꠠꠤꠀꠞ ꠔꠟꠦ ꠅꠃ ꠎꠣꠟꠤ ꠛꠅꠀꠁꠅ। 6ꠇꠥꠞꠛꠣꠘꠤ ꠈꠣꠘꠣ ꠛꠁꠀ ꠘꠤꠛꠣꠞ ꠟꠣꠉꠤ ꠛꠣꠛꠟꠣ ꠟꠣꠇꠠꠤꠖꠤ ꠖꠥꠉꠥ ꠛꠦꠘ꠆ꠖꠣ ꠛꠣꠘꠣꠁꠅ, ꠛꠣꠘꠣꠁꠀ ꠖꠥꠁꠅꠉꠥ ꠙꠤꠔꠟꠖꠤ ꠟꠦꠙꠤꠅ। 7ꠁ ꠛꠦꠘ꠆ꠖꠣꠁꠘ ꠇꠠꠣꠞ ꠜꠤꠔꠞꠦꠖꠤ ꠢꠣꠞꠣꠘꠤ ꠟꠣꠉꠛ। ꠔꠦꠃ ꠇꠥꠞꠛꠣꠘꠤ ꠈꠣꠘꠣ ꠛꠁꠀ ꠘꠦꠅꠀꠞ ꠛꠣꠟꠣ ꠖꠥꠁꠅ ꠛꠦꠘ꠆ꠖꠣꠁꠘ ꠇꠥꠞꠛꠣꠘꠤ ꠈꠣꠘꠣꠞ ꠖꠥꠁ ꠉꠣꠟꠣꠛꠣꠄ ꠕꠣꠇꠛ। 8ꠇꠥꠞꠛꠣꠘꠤ ꠈꠣꠘꠣ ꠔꠇ꠆ꠔꠣꠖꠤ ꠛꠣꠘꠣꠁꠀ ꠄꠞ ꠜꠤꠔꠞꠦ ꠚꠣꠇ ꠞꠣꠈꠤꠅ। ꠀꠝꠤ ꠅꠃ ꠙꠣꠠꠞ ꠃꠙꠞꠦ ꠔꠥꠝꠣꠞꠦ ꠎꠦꠟꠣ ꠘꠇꠡꠣ ꠖꠦꠈꠣꠁꠟꠣꠝ, ꠄꠇ꠆ꠇꠦꠞꠦ ꠅꠟꠣꠈꠣꠘ ꠇꠞꠤ ꠛꠣꠘꠣꠘꠤ ꠟꠅꠀꠁꠅ।
ꠀꠟ꠆ꠟꠣꠞ ꠊꠞꠞ ꠃꠑꠣꠘꠞ ꠘꠝꠥꠘꠣ
9“ꠀꠝꠣꠞ ꠊꠞꠞ ꠌꠣꠁꠞꠅꠛꠣꠄ ꠃꠑꠣꠘ ꠕꠣꠇꠛ। ꠄꠞ ꠖꠇ꠆ꠇꠤꠘ ꠉꠣꠟꠣꠛꠣꠄ ꠄꠇ-ꠡ ꠀꠔ ꠞꠣꠈꠤꠅ, ꠁ ꠝꠥꠈꠣ ꠖꠤꠛꠣꠄ ꠖꠣꠝꠤ ꠡꠥꠔꠤ ꠇꠣꠙꠠꠞ ꠙꠞ꠆ꠖꠣ। 10ꠁ ꠙꠞ꠆ꠖꠣ ꠐꠣꠘꠣꠘꠤꠞ ꠟꠣꠉꠤ ꠛꠤꠡꠉꠥ ꠈꠥꠐꠤ ꠖꠤꠛꠣꠄ। ꠈꠥꠐꠤꠞ ꠔꠟꠣꠔ ꠖꠤꠛꠣꠄ ꠄꠇꠐꠣ ꠇꠞꠤ ꠙꠤꠔꠟꠞ ꠌꠥꠘ꠆ꠉꠤ, ꠙꠞ꠆ꠖꠣ ꠐꠣꠘꠣꠘꠤꠞ ꠟꠣꠉꠤ ꠞꠥꠙꠣꠞ ꠇꠠꠣ ꠀꠞ ꠛꠣꠘ꠆ꠖꠤꠛꠣꠞ ꠔꠣꠞ ꠟꠣꠉꠣꠁꠛꠣꠄ। 11ꠃꠔ꠆ꠔꠞ ꠉꠣꠟꠣꠛꠣꠄ ꠄꠇ-ꠡ ꠀꠔ ꠃꠑꠣꠘ ꠞꠣꠈꠛꠣꠄ। ꠢꠘꠅ-ꠅ ꠙꠞ꠆ꠖꠣ ꠖꠤꠅ, ꠛꠤꠡꠉꠥ ꠈꠥꠐꠤ, ꠛꠤꠡꠉꠥ ꠙꠤꠔꠟꠞ ꠌꠥꠘ꠆ꠉꠤ, ꠈꠥꠐꠤꠞ ꠟꠉꠦ ꠟꠣꠉꠣꠁꠅ ꠞꠥꠙꠣꠞ ꠇꠠꠣ ꠀꠞ ꠔꠣꠞ। 12ꠙꠁꠌꠝꠦ ꠙꠁꠘ꠆ꠌꠣꠡ ꠀꠔ ꠃꠑꠣꠘ ꠞꠣꠈꠤꠅ, ꠢꠘꠅ-ꠅ ꠇꠄꠈꠣꠘ ꠙꠞ꠆ꠖꠣ, ꠖꠡꠉꠥ ꠈꠥꠐꠤ, ꠙꠞꠔꠦꠇ ꠈꠥꠐꠤꠞ ꠔꠟꠣꠔ ꠄꠇꠐꠣ ꠇꠞꠤ ꠌꠥꠘ꠆ꠉꠤ ꠖꠤꠅ। 13ꠙꠥꠛꠦꠖꠤꠅ ꠙꠁꠘ꠆ꠌꠣꠡ ꠀꠔ ꠃꠑꠣꠘ ꠞꠣꠈꠤꠅ; 14ꠉꠦꠁꠐꠞ ꠄꠇ ꠉꠣꠟꠣꠔ ꠙꠘꠞ ꠀꠔ ꠟꠣꠝ꠆ꠛꠣ ꠙꠞ꠆ꠖꠣ, ꠔꠤꠘꠐꠣ ꠈꠥꠐꠤ ꠀꠞ ꠔꠤꠘꠐꠣ ꠌꠥꠘ꠆ꠉꠤ ꠟꠣꠉꠣꠁꠛꠣꠄ, 15ꠅꠟꠣ ꠖꠥꠍꠞꠣ ꠉꠣꠟꠣꠔꠅ ꠙꠘꠞ ꠀꠔ ꠙꠞ꠆ꠖꠣ, ꠔꠤꠘꠐꠣ ꠈꠥꠐꠤ ꠀꠞ ꠔꠤꠘꠐꠣ ꠌꠥꠘ꠆ꠉꠤ ꠖꠤꠅ। 16ꠃꠑꠣꠘꠞ ꠉꠦꠁꠐꠞ ꠟꠣꠉꠤ ꠌꠣꠁꠞꠐꠣ ꠈꠥꠐꠤ, ꠌꠣꠁꠞꠐꠣ ꠌꠥꠘ꠆ꠉꠤ ꠀꠞ ꠛꠤꠡ ꠀꠔ ꠟꠣꠝ꠆ꠛꠣ ꠄꠇꠈꠣꠘ ꠙꠞ꠆ꠖꠣ। ꠙꠞ꠆ꠖꠣꠈꠣꠘ ꠖꠣꠝꠤ ꠡꠥꠔꠤ ꠇꠣꠙꠠꠖꠤ ꠛꠣꠘꠣꠁꠀ ꠟꠤꠟꠥꠀ, ꠛꠣꠁꠋꠉꠘꠤ, ꠟꠣꠟ ꠡꠥꠔꠣꠖꠤ ꠘꠇꠡꠣ ꠇꠞꠣꠁꠅ। 17ꠃꠑꠣꠘꠞ ꠌꠣꠁꠞꠅ ꠉꠣꠟꠣꠞ ꠢꠇ꠆ꠇꠟ ꠈꠥꠐꠤꠞꠦ ꠛꠣꠘ꠆ꠖꠤꠛꠣꠞ ꠔꠣꠞ ꠀꠞ ꠇꠠꠣ ꠅꠁꠛ ꠞꠥꠙꠣꠞ, ꠄꠞ ꠔꠟꠦ ꠙꠤꠔꠟꠞ ꠌꠥꠘ꠆ꠉꠤ ꠕꠣꠇꠛ। 18ꠃꠑꠣꠘꠈꠣꠘ ꠟꠣꠝ꠆ꠛꠣꠄ ꠄꠇ-ꠡ ꠀꠔ ꠀꠞ ꠙꠣꠡꠦ ꠙꠁꠘ꠆ꠌꠣꠡ ꠀꠔ ꠅꠁꠛ। ꠄꠞ ꠌꠣꠁꠞꠅꠛꠣꠄ ꠙꠣꠌ ꠀꠔ ꠃꠛꠤ ꠙꠞ꠆ꠖꠣ ꠖꠤꠅ, ꠙꠞ꠆ꠖꠣ ꠅꠁꠛ ꠖꠣꠝꠤ ꠡꠥꠔꠤ ꠇꠣꠙꠠꠞ, ꠀꠞ ꠈꠥꠐꠤꠘ꠆ꠔꠞ ꠔꠟꠦ ꠖꠤꠅ ꠙꠤꠔꠟꠞ ꠌꠥꠘ꠆ꠉꠤ। 19ꠀꠝꠣꠞ ꠊꠞꠞ ꠇꠣꠝꠞ ꠢꠇꠟ ꠌꠤꠎ ꠙꠤꠔꠟꠖꠤ ꠛꠣꠘꠣꠁꠛꠣꠄ, ꠝꠥꠟ ꠔꠣꠝ꠆ꠛꠥ ꠀꠞ ꠃꠑꠣꠘꠞ ꠛꠦꠠꠣꠞ ꠐꠣꠘꠣꠞ ꠞꠡꠤꠞ ꠔꠟꠞ ꠙꠦꠞꠦꠉ ꠅꠇꠟ ꠙꠤꠔꠟꠞ ꠅꠁꠛ।
20“ꠔꠥꠝꠤ ꠛꠘꠤ ꠁꠍꠞꠣꠁꠟ ꠅꠇꠟꠞꠦ ꠢꠥꠇꠥꠝ ꠖꠤꠅ, ꠔꠣꠞꠣ ꠎꠄꠔꠥꠘ ꠍꠦꠌꠤꠀ ꠔꠦꠟ ꠛꠣꠘꠣꠁꠀ ꠔꠥꠝꠣꠞ ꠉꠦꠍꠦ ꠀꠘꠔ, ꠎꠣꠔꠦ ꠌꠦꠞꠣꠉ ꠅꠇꠟ ꠢꠣꠝꠦꠡꠣ ꠎꠣꠟꠣꠁꠟ ꠞꠄ। 21ꠝꠤꠟꠘ-ꠔꠣꠝ꠆ꠛꠥꠞ ꠡꠣꠢꠣꠖꠔ ꠡꠘ꠆ꠖꠥꠇꠞ ꠍꠣꠝꠘꠦ ꠎꠦ ꠙꠞ꠆ꠖꠣꠈꠣꠘ ꠕꠣꠇꠛ, ꠅꠃ ꠙꠞ꠆ꠖꠣꠞ ꠛꠣꠞꠦ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠦ ꠢꠣꠁꠘ꠆ꠎꠣ ꠕꠣꠇꠤ ꠚꠎꠞ ꠙꠞ꠆ꠎꠘ꠆ꠔ, ꠝꠣꠛꠥꠖꠞ ꠍꠣꠝꠘꠦ ꠌꠦꠞꠣꠉ ꠉꠥꠁꠘ ꠖꠦꠈꠣ-ꠢꠥꠘꠣ ꠇꠞꠛꠣ। ꠀꠝꠣꠞ ꠅꠃ ꠢꠥꠇꠥꠝ ꠎꠣꠘꠥ ꠛꠘꠤ ꠁꠍꠞꠣꠁꠟꠦ ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠢꠞ-ꠢꠣꠝꠦꠡꠣ ꠀꠝꠟ ꠇꠞꠦ।”
Trenutno izbrano:
ꠔꠃꠞꠣꠔ ২: ꠢꠤꠎꠞꠔ 27: sylN
Označeno
Kopiraj
Primerjaj
Deli
Želiš, da so tvoji poudarki shranjeni v vseh tvojih napravah? Registriraj se ali se prijavi
© Ahle Kitab Society. All rights reserved.