ꠔꠃꠞꠣꠔ ২: ꠢꠤꠎꠞꠔ 24
24
ꠀꠟ꠆ꠟꠣꠞ ꠟꠉꠦ ꠝꠤꠟꠘꠞ ꠃꠍꠤꠟ꠆ꠟꠣ ꠙꠣꠇꠣ-ꠙꠥꠇ꠆ꠔ
1ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠀꠞ ꠢꠣꠞꠥꠘ, ꠢꠣꠞꠥꠘꠞ ꠙꠥꠀꠂꠘ ꠘꠣꠖꠣꠛ ꠀꠞ ꠀꠛꠤꠢꠥ, ꠀꠞ ꠛꠘꠤ ꠁꠍꠞꠣꠁꠟꠞ ꠡꠔ꠆ꠔꠁꠞ ꠎꠘ ꠝꠥꠞꠛ꠆ꠛꠤ ꠘꠦꠔꠣ ꠀꠝꠣꠞ ꠉꠦꠍꠦ ꠃꠑꠤꠀ ꠀꠅ। ꠀꠁꠛꠣꠞ ꠛꠣꠟꠣ ꠔꠥꠝꠞꠣ ꠖꠥꠞꠁ ꠕꠣꠇꠤ ꠀꠝꠣꠞꠦ ꠍꠁꠎꠖꠣ ꠇꠞꠤꠅ। 2ꠅꠁꠟꠦ ꠈꠣꠟꠤ ꠔꠥꠝꠤ ꠄꠇꠟꠣ ꠀꠝꠣꠞ ꠇꠣꠍꠣꠔ ꠃꠙꠞꠦ ꠀꠁꠛꠣꠄ, ꠀꠞ ꠇꠦꠃ ꠘꠣꠄ। ꠄꠞꠣꠞ ꠟꠉꠦ ꠀꠞ ꠇꠥꠘꠥ ꠛꠘꠤ ꠁꠍꠞꠣꠁꠟ ꠎꠣꠘꠥ ꠘꠣ ꠃꠑꠦ।”
3ꠝꠥꠍꠣꠄ ꠝꠣꠘꠡꠞ ꠉꠦꠍꠦ ꠀꠁꠀ ꠝꠣꠛꠥꠖꠞ ꠢꠇ꠆ꠇꠟ ꠇꠣꠟꠣꠝ ꠀꠞ ꠀꠁꠘ-ꠇꠣꠘꠥꠘ ꠢꠥꠘꠣꠁꠟꠣ, ꠁꠔꠣ ꠢꠥꠘꠤꠀ ꠢꠇꠟ ꠝꠣꠘꠡꠦ ꠄꠇꠟꠉꠦ ꠇꠁꠟꠣ, “ꠝꠣꠛꠥꠖꠦ ꠎꠔꠔꠣ ꠎꠣꠘꠣꠁꠍꠂꠘ ꠁꠔꠣ ꠢꠇ꠆ꠇꠟꠔꠣ ꠀꠝꠞꠣ ꠝꠣꠘꠝꠥ।” 4ꠝꠣꠛꠥꠖꠞ ꠢꠇꠟ ꠇꠣꠟꠣꠝ ꠝꠥꠍꠣꠄ ꠟꠦꠈꠤꠀ ꠕꠁꠟꠣ। ꠛꠣꠖꠞ ꠖꠤꠘ ꠚꠎꠞꠦ ꠃꠑꠤꠀ ꠙꠣꠠꠞ ꠟꠣꠝꠣꠔ ꠄꠇꠈꠣꠘ ꠇꠥꠞꠛꠣꠘꠤ ꠈꠣꠘꠣ ꠛꠣꠘꠣꠁꠟꠣ, ꠀꠞ ꠛꠘꠤ ꠁꠍꠞꠣꠁꠟꠞ ꠛꠣꠞꠅ ꠈꠣꠘ꠆ꠖꠣꠘꠞꠦ ꠁꠀꠖ ꠞꠣꠈꠣꠞ ꠟꠣꠉꠤ ꠛꠣꠞꠅꠉꠥ ꠈꠥꠐꠣ ꠛꠣꠘꠣꠁꠟꠣ। 5ꠛꠣꠖꠦ ꠔꠣꠁꠘ ꠛꠘꠤ ꠁꠍꠞꠣꠁꠟꠞ ꠎꠥꠀꠘ ꠅꠇꠟꠞꠦ ꠙꠣꠑꠣꠁꠟꠣ ꠀꠞ ꠔꠣꠞꠣ ꠝꠣꠛꠥꠖꠞ ꠘꠣꠝꠦ ꠛꠃꠔ ꠎꠣꠟꠣꠁꠟ ꠇꠥꠞꠛꠣꠘꠤ ꠖꠤꠟꠣ, ꠀꠞ ꠛꠃꠔ ꠛꠤꠍꠣꠟ ꠎꠛ ꠇꠞꠤꠀ ꠍꠣꠟꠣꠝꠔꠤ ꠇꠥꠞꠛꠣꠘꠤꠅ ꠖꠤꠟꠣ। 6ꠝꠥꠍꠣꠄ ꠇꠥꠞꠛꠣꠘꠤꠞ ꠟꠃꠞ ꠅꠞ꠆ꠗꠦꠇ ꠘꠤꠀ ꠇꠄꠐꠣ ꠛꠣꠐꠤꠔ ꠕꠁꠟꠣ, ꠀꠞ ꠛꠣꠇꠤ ꠅꠞ꠆ꠗꠦꠇ ꠘꠤꠀ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠍꠤꠐꠣꠁ ꠖꠤꠟꠣ। 7ꠛꠣꠖꠦ ꠔꠣꠁꠘ ꠀꠟ꠆ꠟꠣꠞ ꠟꠉꠦ ꠝꠤꠟꠘꠞ ꠃꠍꠤꠟ꠆ꠟꠣꠞ ꠘꠤꠅꠝ-ꠇꠣꠘꠥꠘ ꠟꠦꠈꠣ ꠇꠤꠔꠣꠛꠈꠣꠘ ꠔꠤꠟꠣꠅꠔ ꠇꠞꠤ ꠝꠣꠘꠡꠞꠦ ꠢꠥꠘꠣꠁꠟꠣ। ꠁꠔꠣ ꠢꠥꠘꠤꠀ ꠝꠣꠘꠡꠦ ꠎꠥꠀꠙ ꠖꠤꠟꠣ, “ꠀꠝꠞꠣ ꠝꠣꠛꠥꠖꠞ ꠢꠇꠟ ꠢꠥꠇꠥꠝ ꠢꠥꠘꠝꠥ, ꠔꠣꠁꠘ ꠎꠔꠔꠣ ꠇꠁꠍꠂꠘ ꠢꠇꠟꠔꠣ ꠝꠣꠘꠝꠥ।” 8ꠅꠈꠣꠘ ꠢꠥꠘꠤꠀ ꠝꠥꠍꠣꠄ ꠟꠃ ꠟꠁꠀ ꠝꠣꠘꠡꠞ ꠃꠙꠞꠦ ꠍꠤꠐꠣꠁꠀ ꠇꠁꠟꠣ, “ꠁ ꠟꠃ ꠅꠁꠟ ꠀꠟ꠆ꠟꠣꠁ ꠝꠤꠟꠘꠞ ꠢꠃ ꠃꠍꠤꠟ꠆ꠟꠣꠞ ꠟꠃ, ꠎꠦ ꠃꠍꠤꠟ꠆ꠟꠣ ꠝꠣꠛꠥꠖꠦ ꠔꠣꠘ ꠢꠇꠟ ꠡꠞ꠆ꠔ ꠝꠣꠚꠤꠇ ꠔꠥꠝꠞꠣꠞ ꠟꠉꠦ ꠛꠅꠀꠁꠟ ꠇꠞꠍꠂꠘ।”
9ꠔꠦꠃ ꠝꠥꠍꠣ, ꠢꠣꠞꠥꠘ, ꠘꠣꠖꠣꠛ, ꠀꠛꠤꠢꠥ ꠀꠞ ꠛꠘꠤ ꠁꠍꠞꠣꠁꠟꠞ ꠡꠔ꠆ꠔꠁꠞ ꠎꠘ ꠝꠥꠞꠛ꠆ꠛꠤ ꠘꠦꠔꠣ ꠙꠣꠠꠞ ꠃꠙꠞꠦ ꠃꠑꠟꠣ। 10ꠔꠣꠞꠣ ꠘꠤꠎꠞ ꠌꠃꠈꠦ ꠛꠘꠤ ꠁꠍꠞꠣꠁꠟꠞ ꠀꠟ꠆ꠟꠣ ꠙꠣꠇꠞ ꠖꠤꠖꠣꠞ ꠖꠦꠈꠟꠣ। ꠔꠣꠞꠣ ꠖꠦꠈꠟꠣ, ꠀꠟ꠆ꠟꠣꠞ ꠙꠣꠅ ꠝꠥꠛꠣꠞꠇꠞ ꠔꠟꠦ ꠀꠍꠦ, ꠌꠇꠌꠇꠣ ꠟꠤꠟ ꠝꠘꠤ ꠙꠣꠔ꠆ꠔꠞꠞ ꠔꠂꠀꠞꠤ ꠍꠣꠔꠞ ꠟꠣꠈꠣꠘ, ꠀꠍꠝꠣꠘꠞ ꠘꠝꠥꠘꠣꠄ ꠍꠣꠚ। 11ꠛꠘꠤ ꠁꠍꠞꠣꠁꠟꠞ ꠝꠥꠞꠛ꠆ꠛꠤ ꠅꠇꠟꠦ ꠀꠟ꠆ꠟꠣꠞꠦ ꠖꠦꠈꠟꠦꠅ ꠔꠣꠁꠘ ꠄꠞꠣꠞꠦ ꠝꠣꠞꠣꠞ ꠟꠣꠉꠤ ꠀꠔ ꠔꠥꠟꠟꠣ ꠘꠣ। ꠔꠣꠞꠣ ꠔꠣꠘ ꠖꠤꠖꠣꠞ ꠙꠣꠁꠟꠣ ꠀꠞ ꠈꠣꠅꠀ-ꠖꠣꠅꠀ ꠇꠞꠟꠣ।
ꠢꠎꠞꠔ ꠝꠥꠍꠣ ꠄꠇꠟꠣ ꠀꠟ꠆ꠟꠣꠞ ꠖꠞꠛꠣꠞꠅ ꠞꠁꠟꠣ
12ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠅꠃ ꠙꠣꠠꠞ ꠃꠙꠞꠦ ꠀꠝꠣꠞ ꠇꠣꠘ꠆ꠖꠣꠔ ꠀꠅ, ꠀꠁꠀ ꠇꠄꠖꠤꠘ ꠞꠅ। ꠝꠣꠘꠡꠞꠦ ꠔꠣꠟꠤꠝ ꠖꠤꠛꠣꠞ ꠟꠣꠉꠤ ꠀꠝꠣꠞ ꠎꠦ ꠢꠥꠇꠥꠝ-ꠀꠢꠇꠣꠝ ꠙꠣꠔ꠆ꠔꠞꠞ ꠃꠙꠞꠦ ꠟꠦꠈꠍꠤ, ꠅꠔꠣ ꠀꠝꠤ ꠔꠥꠝꠣꠞꠦ ꠖꠤꠝꠥ।” 13ꠔꠦꠃ ꠝꠥꠍꠣꠄ ꠔꠣꠘ ꠈꠣꠖꠤꠝ ꠁꠃꠍꠣꠞꠦ ꠟꠉꠦ ꠟꠁꠀ ꠙꠣꠠꠅ ꠃꠑꠟꠣ, ꠀꠞ ꠝꠥꠍꠣ ꠀꠟ꠆ꠟꠣꠞ ꠙꠣꠠꠅ ꠉꠦꠟꠣ। 14ꠔꠣꠁꠘ ꠝꠥꠞꠛ꠆ꠛꠤ ꠅꠇꠟꠞꠦ ꠇꠁꠀ ꠉꠦꠟꠣ, “ꠀꠝꠞꠣ ꠚꠤꠞꠔ ꠀꠁꠛꠣꠞ ꠀꠉ ꠙꠞ꠆ꠎꠘ꠆ꠔ ꠀꠙꠘꠣꠞꠣ ꠀꠝꠞꠣꠞ ꠟꠣꠉꠤ ꠅꠘꠅ ꠛꠣꠞ ꠌꠣꠁꠛꠣ। ꠢꠣꠞꠥꠘ ꠀꠞ ꠢꠥꠞ ꠀꠙꠘꠣꠞꠣꠞ ꠇꠣꠍꠣꠔ ꠀꠍꠂꠘ, ꠇꠥꠘꠥ ꠇꠣꠁꠎ꠆ꠎꠣ-ꠚꠍꠣꠖ ꠟꠣꠉꠟꠦ ꠄꠞꠣꠞ ꠉꠦꠍꠦ ꠎꠣꠁꠛꠣ।” 15ꠝꠥꠍꠣ ꠙꠣꠠꠅ ꠃꠑꠔꠦꠃ ꠀꠡ꠆ꠔꠣ ꠙꠣꠠ ꠝꠦꠊꠞ ꠇꠣꠟꠘꠤꠄ ꠉꠥꠞꠤꠉꠦꠟ, 16ꠀꠞ ꠔꠥꠞ ꠙꠣꠠꠞ ꠃꠙꠞꠦ ꠝꠣꠛꠥꠖꠞ ꠘꠥꠞꠞ ꠔꠎꠟ꠆ꠟꠤ ꠎꠣꠁꠞ ꠅꠁꠟ। ꠍꠄ ꠖꠤꠘ ꠀꠡ꠆ꠔꠣ ꠙꠣꠠ ꠇꠣꠟꠘꠤꠄ ꠉꠥꠞꠣ ꠞꠁꠟ। ꠡꠣꠔ ꠘꠝ꠆ꠛꠞ ꠖꠤꠘ ꠅꠃ ꠇꠣꠟꠘꠤ ꠕꠣꠇꠤ ꠝꠣꠛꠥꠖꠦ ꠝꠥꠍꠣꠞꠦ ꠒꠣꠇꠤꠟꠣ। 17ꠛꠘꠤ ꠁꠍꠞꠣꠁꠟꠦ ꠝꠣꠛꠥꠖꠞ ꠘꠥꠞꠞ ꠔꠎꠟ꠆ꠟꠤ ꠖꠦꠈꠟꠣ, ꠔꠣꠞꠣ ꠖꠦꠈꠟꠣ ꠙꠣꠠꠞ ꠃꠙꠞꠦ ꠀꠉꠥꠘꠤꠞ ꠟꠣꠈꠣꠘ ꠎꠟꠦꠞ। 18ꠙꠣꠠ ꠛꠣꠁꠀ ꠃꠑꠤ ꠃꠑꠤ ꠝꠥꠍꠣ ꠢꠃ ꠇꠣꠟꠘꠤꠞ ꠜꠤꠔꠞꠦ ꠢꠣꠝꠣꠁ ꠉꠦꠟꠣ। ꠔꠣꠁꠘ ꠌꠣꠟ꠆ꠟꠤꠡ ꠖꠤꠘ ꠌꠣꠟ꠆ꠟꠤꠡ ꠞꠣꠁꠔ ꠢꠃ ꠙꠣꠠꠅ ꠞꠁꠟꠣ।
Trenutno izbrano:
ꠔꠃꠞꠣꠔ ২: ꠢꠤꠎꠞꠔ 24: sylN
Označeno
Kopiraj
Primerjaj
Deli
Želiš, da so tvoji poudarki shranjeni v vseh tvojih napravah? Registriraj se ali se prijavi
© Ahle Kitab Society. All rights reserved.