ꠔꠃꠞꠣꠔ ২: ꠢꠤꠎꠞꠔ 15
15
ꠢꠎꠞꠔ ꠝꠥꠍꠣ (ꠀ꠩) ꠅꠞ ꠡꠥꠇꠥꠞꠣꠘꠣ ꠉꠎꠟ
1ꠀꠟ꠆ꠟꠣꠞ ꠇꠥꠖꠞꠔꠦ ꠘꠤꠟ ꠖꠞꠤꠀ ꠙꠣꠞ ꠅꠁꠀ ꠀꠁꠀ ꠢꠣꠞꠟꠦ, ꠢꠎꠞꠔ ꠝꠥꠍꠣ ꠀꠞ ꠔꠣꠝꠣꠝ ꠛꠘꠤ ꠁꠍꠞꠣꠁꠟꠦ ꠝꠣꠛꠥꠖꠞ ꠘꠣꠝꠦ ꠅꠃ ꠡꠥꠇꠥꠞꠣꠘꠣ ꠉꠎꠟ ꠉꠣꠁꠟꠣ:
“ꠀꠝꠤ ꠝꠣꠛꠥꠖꠞ ꠘꠣꠝꠦ ꠉꠎꠟ ꠉꠣꠁ,
ꠢꠇꠟꠞ ꠍꠣꠝꠘꠦ ꠔꠣꠘ ꠇꠥꠖꠞꠔꠤ ꠝꠢꠤꠝꠣ ꠛꠣꠠꠤꠍꠦ,
ꠊꠥꠠ-ꠍꠅꠀꠞ ꠡꠥꠖ꠆ꠖꠣ ꠊꠥꠠꠣꠁꠘꠞꠦ ꠔꠣꠁꠘꠃ ꠖꠞꠤꠀꠞ ꠙꠣꠘꠤꠔ ꠚꠣꠟꠣꠁꠍꠂꠘ।
2ꠀꠟ꠆ꠟꠣꠃ ꠔ ꠀꠝꠣꠞ ꠛꠟ, ꠔꠣꠁꠘꠃ ꠀꠝꠣꠞ ꠉꠎꠟ,
ꠀꠝꠣꠞꠦ ꠛꠣꠌꠣꠘꠤꠞ ꠇꠟ-ꠇꠛꠎꠣ ꠔꠣꠘ ꠀꠔꠅ ꠀꠍꠦ।
ꠅꠃ ꠀꠟ꠆ꠟꠣꠃ ꠀꠝꠣꠞ ꠝꠣꠛꠥꠖ, ꠀꠝꠣꠞ ꠛꠣꠚ-ꠖꠣꠖꠣꠞ ꠝꠣꠛꠥꠖ,
ꠀꠝꠤ ꠔꠣꠘ ꠢꠣꠝꠖ ꠉꠣꠁꠝꠥ, ꠔꠣꠘ ꠟꠤꠟꠣ-ꠈꠦꠟꠣꠞ ꠛꠄꠀꠘ ꠇꠞꠝꠥ।
3ꠝꠣꠛꠥꠖ ꠅꠁꠟꠣ ꠙꠄꠟꠥꠀꠘ ꠍꠤꠙꠣꠁ, ꠔꠣꠘ ꠘꠣꠝꠃ ꠝꠣꠛꠥꠖ।
4ꠚꠦꠞꠣꠃꠘꠞ ꠊꠥꠠꠣꠞ ꠉꠣꠠꠤꠞꠦ ꠀꠞ ꠍꠤꠙꠣꠁꠞꠦ ꠔꠣꠁꠘ ꠙꠣꠘꠤꠔ ꠚꠣꠟꠣꠁꠟꠣ,
ꠔꠣꠞ ꠘꠣꠝꠇꠞꠣ ꠍꠥꠛꠦꠖꠣꠞ ꠅꠇꠟ ꠘꠤꠟ ꠖꠞꠤꠀꠔ ꠛꠥꠠꠤꠀ ꠝꠞꠟꠣ।
5ꠉꠁꠘ ꠙꠣꠘꠤꠄ ꠔꠣꠞꠣꠞꠦ ꠉꠤꠟꠤꠟ꠆ꠟ,
ꠀꠞ ꠜꠣꠞꠤ ꠙꠣꠔ꠆ꠔꠞꠞ ꠟꠣꠈꠣꠘ ꠔꠣꠞꠣ ꠖꠞꠤꠀꠞ ꠔꠟꠦ ꠉꠦꠟꠣꠉꠤ।
6ꠅ ꠝꠣꠛꠥꠖ, ꠔꠥꠝꠣꠞ ꠒꠣꠁꠘ ꠀꠔꠈꠣꠘ ꠇꠥꠖꠞꠔꠤ ꠟꠤꠟꠣꠄ ꠜꠞꠣ,
ꠔꠥꠝꠣꠞ ꠀꠔꠦ ꠘꠤꠌ꠆ꠌꠄ ꠖꠥꠡꠝꠘꠞꠦ ꠌꠥꠞꠝꠣꠞ ꠇꠞꠍꠦ।
7ꠔꠥꠝꠣꠞ ꠛꠤꠞꠥꠖ꠆ꠖꠦ ꠎꠦꠔꠣꠄ ꠟꠣꠉꠍꠤꠟꠣ, ꠇꠥꠖꠞꠔꠤ ꠛꠟꠦ ꠔꠣꠞꠣꠞꠦ ꠉꠁꠘ ꠉꠣꠔꠅ ꠚꠣꠟꠣꠁꠟꠣꠄ।
ꠔꠥꠝꠣꠞ ꠙꠣꠑꠣꠁꠟ ꠉꠎꠛꠤ ꠀꠉꠥꠁꠘꠦ, ꠢꠥꠇꠘꠣ ꠈꠦꠞ-ꠘꠦꠞꠣꠞ ꠟꠣꠈꠣꠘ ꠔꠣꠞꠣꠞꠦ ꠎꠣꠟꠣꠁꠟꠤꠟ।
8ꠔꠥꠝꠣꠞ ꠘꠣꠇꠞ ꠖꠝꠦ ꠢꠇꠟ ꠙꠣꠘꠤ ꠖꠟꠣ ꠅꠁꠉꠦꠟ,
ꠙꠣꠘꠤꠞ ꠚꠥꠔ ꠅꠇꠟ ꠎꠣꠉꠣꠔ ꠃꠛꠣꠁ ꠞꠁꠟ,
ꠖꠞꠤꠀꠞ ꠉꠁꠘ ꠙꠣꠘꠤ ꠌꠣꠇ꠆ꠇꠣ ꠛꠘꠤꠉꠦꠟ।
9ꠖꠥꠡꠝꠘꠦ ꠇꠁꠍꠤꠟ, ‘ꠀꠝꠤ ꠁꠔꠣꠞꠦ ꠈꠦꠖꠣꠁꠀ ꠘꠤꠝꠥ,
ꠖꠃꠠꠣꠁꠀ ꠘꠤꠀ ꠗꠞꠝꠥ, ꠔꠣꠞꠣꠞ ꠢꠇꠟꠔꠣ ꠇꠣꠠꠤꠀ ꠀꠘꠤꠀ ꠛꠣꠐꠤꠝꠥ।
ꠔꠣꠞꠣꠞ ꠝꠣꠟꠖꠤ ꠀꠝꠤ ꠝꠣꠟꠖꠣꠞ ꠅꠁꠝꠥ, ꠁꠔꠣꠖꠤ ꠀꠝꠣꠞ ꠝꠘꠞ ꠈꠣꠁꠡ ꠙꠥꠞꠣꠁꠝꠥ।
ꠀꠝꠣꠞ ꠔꠟꠥꠀꠞꠖꠤ ꠝꠣꠞꠤꠀ ꠔꠣꠞꠣꠞ ꠘꠣꠝ ꠝꠤꠐꠣꠁꠟꠤꠝꠥ।’
10ꠅꠁꠟꠦ ꠔꠥꠝꠤ ꠚꠥ ꠖꠤꠀ ꠛꠣꠔꠣꠡ ꠖꠤꠟꠣꠄ,
ꠀꠞ ꠖꠞꠤꠀꠄ ꠔꠣꠞꠣꠞꠦ ꠉꠥꠞꠤꠟꠤꠟ,
ꠔꠣꠞꠣ ꠡꠤꠡꠣꠞ ꠟꠣꠈꠣꠘ ꠉꠁꠘ ꠙꠣꠘꠤꠔ ꠔꠟꠣꠁꠉꠦꠟ।
11ꠅ ꠝꠣꠛꠥꠖ, ꠇꠥꠘ ꠖꠦꠛ-ꠖꠦꠛꠤ ꠔꠥꠝꠣꠞ ꠢꠝꠣꠘ?
ꠇꠦ ꠔꠥꠝꠣꠞ ꠟꠣꠈꠣꠘ ꠅꠔ ꠙꠛꠤꠔ꠆ꠞ ꠝꠢꠣꠘ,
ꠀꠞ ꠔꠥꠝꠣꠞ ꠝꠔ ꠜꠄꠅꠋꠇꠞ ꠇꠥꠖꠞꠔꠤ ꠝꠢꠤꠝꠣ ꠇꠣꠞ ꠀꠍꠦ?
12ꠔꠥꠝꠣꠞ ꠛꠟꠀꠟꠣ ꠒꠣꠁꠘ ꠀꠔꠈꠣꠘ ꠛꠣꠠꠣꠁꠟꠣꠄ,
ꠀꠞ ꠖꠥꠘꠤꠀꠄ ꠔꠣꠞꠣꠞꠦ ꠉꠤꠟꠤꠟꠤꠟ।
13ꠔꠥꠝꠣꠞ ꠈꠣꠍ ꠝꠣꠄꠀꠄ ꠎꠦꠞꠣꠞꠦ ꠛꠣꠌꠣꠁꠍ,
ꠔꠣꠞꠣꠞꠦ ꠔ ꠔꠥꠝꠤꠃ ꠌꠣꠟꠣꠁꠞꠣꠄ,
ꠔꠥꠝꠣꠞ ꠀꠙꠘ ꠇꠥꠖꠞꠔꠤ ꠛꠟꠦ ꠔꠥꠝꠣꠞ ꠙꠛꠤꠔ꠆ꠞ ꠛꠡꠔ ꠈꠣꠘꠣꠔ ꠘꠤꠞꠣꠄ।
14ꠁꠔꠣ ꠢꠥꠘꠤꠀ ꠢꠇ꠆ꠇꠟ ꠎꠣꠔꠤꠄ ꠇꠣꠙꠤꠞꠣ,
ꠚꠤꠟꠤꠡ꠆ꠔꠤꠘꠤ ꠛꠦꠖꠤꠘ ꠅꠇꠟꠞ ꠝꠘ ꠍꠐꠚꠐ ꠇꠞꠦꠞ।
15ꠁꠖꠥꠝꠞ ꠡꠞ꠆ꠖꠣꠞ ꠅꠇꠟ ꠒꠞꠣꠁꠀ ꠛꠦꠖꠤꠡꠣ ꠟꠣꠉꠤꠉꠦꠟꠣ,
ꠝꠥꠀꠛꠞ ꠘꠦꠔꠣ ꠅꠇꠟꠦ ꠕꠞ-ꠕꠞꠣꠁꠀ ꠇꠣꠙꠤꠟꠣ,
ꠇꠦꠘꠣꠘꠤ ꠅꠇꠟ ꠒꠞꠣꠁꠀ ꠢꠞꠤꠉꠦꠟꠣ।
16ꠔꠣꠞꠣꠞ ꠜꠤꠔꠞꠦ ꠒꠞ-ꠈꠚ ꠀꠁꠀ ꠢꠣꠝꠣꠁꠍꠦ,
ꠔꠥꠝꠣꠞ ꠀꠔꠞ ꠑꠦꠟꠣꠄ ꠙꠣꠔ꠆ꠔꠞꠞ ꠟꠣꠈꠣꠘ ꠘꠤꠞꠣꠁ ꠅꠁꠉꠦꠍꠦ।
ꠅ ꠝꠣꠛꠥꠖ, ꠔꠥꠝꠣꠞ ꠙ꠆ꠞꠎꠣ ꠅꠇꠟ, ꠔꠥꠝꠣꠞ ꠈꠞꠤꠖꠣ ꠉꠥꠟꠣꠝ ꠅꠇꠟ,
ꠙꠥꠞꠣꠙꠥꠞ ꠙꠣꠞ ꠘꠣ ꠅꠀ ꠙꠞ꠆ꠎꠘ꠆ꠔ ꠔꠥꠝꠤ ꠅꠃꠟꠣ ꠞꠣꠈꠍ।
17ꠔꠥꠝꠤ ꠄꠞꠣꠞꠦ ꠘꠤꠀ ꠉꠣꠍꠞ ꠌꠦꠞꠣꠞ ꠟꠣꠈꠣꠘ,
ꠔꠥꠝꠣꠞ ꠘꠤꠎꠞ ꠙꠣꠠꠅ ꠞꠥꠁꠛꠣꠄ।
ꠅ ꠝꠣꠛꠥꠖ, ꠢꠈꠣꠘꠃ ꠔꠥꠝꠣꠞ ꠛꠡꠔ ꠈꠣꠘꠣ,
ꠔꠥꠝꠣꠞ ꠀꠙꠘ ꠀꠔꠞ ꠉꠠꠣ ꠢꠦꠞꠦꠝ ꠡꠞꠤꠚ।
18ꠅ ꠝꠣꠛꠥꠖ, ꠎꠥꠉ ꠎꠥꠉ ꠗꠞꠤ ꠔꠥꠝꠤꠃ ꠈꠣꠟꠤ ꠛꠣꠖꠡꠣꠁ ꠇꠞꠛꠣꠄ।”
19ꠚꠦꠞꠣꠃꠘꠞ ꠊꠥꠠꠣꠁꠘ, ꠔꠣꠞ ꠊꠥꠠꠣꠞ ꠉꠣꠠꠤꠘ ꠀꠞ ꠊꠥꠠ-ꠍꠅꠀꠞ ꠅꠇꠟ ꠎꠦꠛꠟꠣ ꠖꠞꠤꠀꠞ ꠝꠣꠎꠦ ꠢꠣꠝꠣꠁꠉꠦꠟ, ꠝꠣꠛꠥꠖꠦ ꠔꠣꠞꠣꠞ ꠃꠙꠞꠦ ꠖꠞꠤꠀꠞ ꠙꠣꠘꠤ ꠚꠤꠞꠣꠁ ꠀꠘꠟꠣ, ꠅꠁꠟꠦ ꠛꠘꠤ ꠁꠍꠞꠣꠁꠟ ꠢꠇꠟ ꠔ ꠢꠥꠇꠘꠣ ꠙꠕꠦ ꠖꠞꠤꠀꠞ ꠝꠣꠎꠦꠖꠤ ꠀꠉꠦ ꠀꠐꠤꠀ ꠉꠦꠍꠟꠣꠉꠤ।
20ꠢꠣꠞꠥꠘꠞ ꠛꠁꠘ ꠢꠎꠞꠔ ꠝꠞꠤꠅꠝꠅ ꠘꠛꠤ ꠀꠍꠟꠣ, ꠔꠣꠁꠘ ꠒꠥꠉꠤ ꠀꠔꠅ ꠟꠁꠀ ꠛꠣꠎꠣꠁꠟꠣ, ꠀꠞ ꠛꠣꠇꠤ ꠢꠇꠟ ꠛꠦꠐꠤꠘ꠆ꠔꠦꠅ ꠔꠣꠘ ꠈꠞꠦꠖꠤ ꠒꠥꠉꠤ ꠟꠁꠀ ꠘꠣꠌꠤ ꠘꠣꠌꠤ ꠛꠣꠞ ꠅꠁ ꠀꠁꠟꠣ। 21ꠀꠞ ꠝꠞꠤꠅꠝꠦꠅ ꠝꠣꠘꠡꠞ ꠍꠣꠝꠘꠦ ꠅꠃꠟꠣ ꠉꠣꠁꠟꠣ:
“ꠔꠥꠝꠞꠣ ꠝꠣꠛꠥꠖꠞ ꠘꠣꠝꠦ ꠉꠎꠟ ꠉꠣꠅ,
ꠢꠇꠟꠞ ꠍꠣꠝꠘꠦ ꠔꠣꠘ ꠇꠥꠖꠞꠔꠤ ꠝꠢꠤꠝꠣ ꠛꠣꠠꠤꠍꠦ,
ꠊꠥꠠ-ꠍꠅꠀꠞ ꠡꠥꠖ꠆ꠖꠣ ꠊꠥꠠꠣꠁꠘꠞꠦ ꠔꠣꠁꠘꠃ ꠖꠞꠤꠀꠞ ꠙꠣꠘꠤꠔ ꠚꠣꠟꠣꠁꠍꠂꠘ।”
ꠝꠞꠥꠜꠥꠝꠤꠔ ꠛꠘꠤ ꠁꠍꠞꠣꠁꠟꠞ ꠍꠚꠞ (১৫:২২—১৮:২৭)
ꠢꠎꠞꠔ ꠝꠥꠍꠣꠄ ꠔꠤꠔ꠆ꠔꠣ ꠙꠣꠘꠤꠞꠦ ꠝꠤꠑꠣ ꠛꠣꠘꠣꠁꠟꠣ
22ꠝꠥꠍꠣꠄ ꠛꠘꠤ ꠁꠍꠞꠣꠁꠟꠞꠦ ꠘꠤꠟ ꠖꠞꠤꠀ ꠕꠣꠇꠤ ꠍꠣꠝꠘꠦꠖꠤ ꠟꠁꠀ ꠞꠅꠀꠘꠣ ꠅꠁꠟꠣ, ꠀꠞ ꠡꠥꠞ ꠘꠣꠝꠞ ꠝꠞꠥꠜꠥꠝꠤꠔ ꠉꠦꠟꠣ। ꠔꠣꠞꠣꠞ ꠎꠣꠅꠀꠞ ꠙꠕꠅ ꠔꠤꠘ ꠖꠤꠘ ꠗꠞꠤ ꠇꠥꠘꠥ ꠙꠣꠘꠤ ꠙꠣꠁꠟꠣ ꠘꠣ। 23ꠛꠣꠖꠦ ꠔꠣꠞꠣ ꠝꠣꠞꠥꠀ ꠘꠣꠝꠞ ꠄꠇ ꠎꠣꠉꠣꠔ ꠀꠁꠟꠣ, ꠅꠁꠟꠦ ꠢꠤꠘꠞ ꠙꠣꠘꠤꠅ ꠈꠣꠁꠔꠣ ꠙꠣꠞꠟꠣ ꠘꠣ, ꠢꠤꠘꠞ ꠙꠣꠘꠤ ꠈꠥꠛ ꠔꠤꠔ꠆ꠔꠣ। ꠄꠞꠟꠣꠉꠤ ꠅꠃ ꠎꠣꠉꠣꠞ ꠘꠣꠝ ꠟꠣꠉꠟ ꠝꠣꠞꠥꠀ [ꠝꠣꠘꠤ, ꠔꠤꠔ꠆ꠔꠣ]। 24ꠀꠞ ꠝꠣꠘꠡꠦ ꠝꠥꠍꠣꠞ ꠛꠤꠞꠥꠖ꠆ꠖꠦ ꠇꠣꠘꠣ-ꠇꠣꠘꠤ ꠇꠞꠤ ꠇꠁꠟꠣ, “ꠀꠝꠞꠣ ꠅꠈꠘ ꠙꠣꠘꠤ ꠈꠣꠁꠔꠣꠝ ꠇꠤꠟꠣ?” 25ꠝꠥꠍꠣꠄ ꠝꠣꠛꠥꠖꠞ ꠉꠦꠍꠦ ꠚꠞꠤꠀꠖ ꠇꠞꠟꠣ, ꠝꠣꠛꠥꠖꠦ ꠔꠣꠘꠞꠦ ꠄꠉꠥ ꠉꠣꠍ ꠖꠦꠈꠣꠁ ꠖꠤꠟꠣ, ꠔꠣꠁꠘ ꠢꠃ ꠉꠣꠍꠞꠦ ꠘꠤꠀ ꠙꠣꠘꠤꠔ ꠚꠣꠟꠣꠁꠟꠣ, ꠀꠞ ꠙꠣꠘꠤ ꠝꠤꠑꠣ ꠅꠁꠉꠦꠟ।
ꠝꠣꠛꠥꠖꠦ ꠢꠃ ꠎꠣꠉꠣꠔ ꠛꠘꠤ ꠁꠍꠞꠣꠁꠟꠞ ꠙꠞꠤꠇ꠆ꠇꠣ ꠟꠁꠟꠣ, ꠀꠞ ꠔꠣꠞꠣꠞ ꠟꠣꠉꠤ ꠘꠤꠅꠝ-ꠇꠣꠘꠥꠘ ꠛꠅꠀꠁꠟ ꠇꠞꠟꠣ। 26ꠔꠣꠁꠘ ꠇꠁꠟꠣ, “ꠔꠥꠝꠞꠣ ꠎꠥꠖꠤ ꠈꠤꠀꠟ ꠇꠞꠤꠀ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠇꠣꠟꠣꠝ ꠢꠥꠘꠅ ꠀꠞ ꠅꠃ ꠟꠣꠈꠣꠘ ꠀꠝꠟ ꠇꠞꠅ, ꠀꠝꠤ ꠎꠦꠔꠣ ꠙꠍꠘ꠆ꠖ ꠇꠞꠤ ꠅꠔꠣ ꠇꠞꠅ, ꠀꠝꠣꠞ ꠢꠥꠇꠥꠝ ꠝꠣꠘꠅ, ꠔꠦ ꠀꠝꠤ ꠝꠣꠛꠥꠖꠦ ꠝꠤꠡꠞꠤ ꠅꠇꠟꠞꠦ ꠎꠦꠔꠣ ꠛꠦꠝꠣꠞ-ꠀꠎꠣꠞ ꠖꠤꠍꠤ, ꠁꠔꠣ ꠇꠥꠘꠥ ꠛꠦꠝꠣꠞ ꠔꠥꠝꠞꠣꠞ ꠃꠙꠞꠦ ꠖꠤꠔꠣꠝ ꠘꠣꠄ; ꠎꠣꠘ ꠔ, ꠀꠝꠤ ꠝꠣꠛꠥꠖ ꠔꠥꠝꠞꠣꠞ ꠡꠤꠚꠣ ꠇꠞꠘꠦꠀꠟꠣ।”
27ꠢꠦꠡꠦ ꠔꠣꠞꠣ ꠄꠟꠤꠝꠅ ꠉꠤꠀ ꠙꠃꠍꠟꠣ, ꠢꠤꠘꠅ ꠛꠣꠞꠅꠉꠥ ꠙꠣꠘꠤꠞ ꠁꠘ꠆ꠖꠣꠞꠣ ꠀꠞ ꠡꠔ꠆ꠔꠁꠞꠉꠥ ꠈꠦꠎꠥꠞ ꠉꠣꠍ ꠀꠍꠤꠟ। ꠔꠣꠞꠣ ꠅꠃ ꠙꠣꠘꠤꠞ ꠇꠣꠘ꠆ꠖꠣꠔ ꠔꠣꠝ꠆ꠛꠥ ꠉꠣꠠꠤꠟꠣ।
Trenutno izbrano:
ꠔꠃꠞꠣꠔ ২: ꠢꠤꠎꠞꠔ 15: sylN
Označeno
Kopiraj
Primerjaj
Deli
Želiš, da so tvoji poudarki shranjeni v vseh tvojih napravah? Registriraj se ali se prijavi
© Ahle Kitab Society. All rights reserved.