Matiu 5
5
Yesu kaga kosagu lu epi'ehina
1Yesu bu gana babu boana'i mege'i lifite nebago ai kosagu tito analo nohigo koko panana'a ai metoga ete mino bego hi'ahana. 2Ya hago Yesu kaga ma luto lu epi'ehina:
Bouba gelo bilinamofihi kaga'a lu'ehina
Lk 6:20-23
3Bona'i enali komopa'anigu nani bati mehina bo nohube lite kehelite ya'ma minelata nehana enali enegelo bilo. Enali Hu'mamofihi kapo'alugu tilana'mu yabe. 4Bona'i enali eniginage figo neminana enofokehi lilo. Hu'mau enele'mo fulu hu epoloto soso hu epalalina'mu yabe. 5Agoya bona'i enali enegelo bilo. Enali kaga molo epolo'ehinalo asaga me'i lilana'mu yabe. 6Bona'i enali bebe sete hapa'ani minenogo Hu'mamofihi ka'alo mege'i melete minalana enali enegelo bilo. Hu'mau alihi asaga'na epilina'mu yabe. 7Bona'i enali luga'a bona'i eniginaga ka lu epite agoya hu epilata nehana bona'i enegelo bilo. Alihi Hu'mau enegelo bi epito agoya hu epilina'mu yabe. 8Bona'i enali komopa'ani gulu gulu ligo neminana bona'i enali enegelo bilo. Enali Hu'mamofihi bu galana'mu yabe. 9Bona'i enali luba hilune'mu nehinogomo ana luba folagaha'anigu bite kofa hu epelelata nehana bona'i enali enegelo bilo. Hu'mau ai panana'ni yabe lilina'mu yabe. 10Hu'mamofihi ka'a mege'i melete minelata nehana bona'i enali enagabu foya nelitemo enegelo bilo. Hu'mamofihi kokuluma kapo'a enali'na lolo hilina'mu yabe. 11To lenali nani'i nemege'i melete neminenogo luga'a bona'magi bu lenegelete enitaluga logo binogo foipa faipa ka li lepelete lenegene mane ite ka fato fato'mofihi lenalitoga lu nemelenogomo lenali lenegelo bilo. 12Ya nehinogomo kugufaluga laga kebesinogo kegelo bibo. Sipi minaka kokuluma hepatoga Hu'mau kaba hu keto'ehina kimilina'mu yabe. Koyapa'i ana suhi hite lu yege hose bona'i kohe tete huto hanamagihi enegene mane ite enehe'ahana yabe, luto Yesu lu epi'ehina yabe.
Bo ai hege legi to logo guluya meha'a legi huto nohibe
Mk 9:50; Lk 14:34-35
13Bona'i lenali me'mofihi hege'a legi hite nehabe. Ya hu'ehina ana hegemofihi laga'a abu su holagomo lenali aku'i hena hago ana hegemofihi laga lenalitoga olata nohibe? Ya hina hegemofihi lilina'a meminolata nohibe. Enali bati mehu'ehibe lite li nehe'migo boana'i analo lapasa ite kapo melelata nehabe.
14Lenali melugu fana mehena'a legi hite nehabe. To hepa'i mone kosagu minolata nohina ana hepa'i bona enubulo fala kito meminolata nohibe. Ai huto'i minolata nohibe. 15Bona'i enali libi'i li kulu tilete somotu ifi metalibe. Enali ifo hitalo malago nonugu nehana bonatoga kululu tuto fi besa lo baga igo be ge fana tete minelata nehabe. 16Ya huto ninagi lenali libitini ligite boana'i enali enubulo binogo lenali hetofa hapatini bu gelete to enali ana hite Sipi Bo Hu'matinifu kokuluma hepatoga nohinamofihi enegelo bite gi'a liyafa hilabe.
Keya ka hapa'amu lu enelepi'ehina
17Lenali nani kumu'i Mosehi keya ka'a hiti to lu yege hose bona'magihi ka'ani hiti li he'milube luto o'ehibe lite mekehelilo. Nani li he'milube luto meo'ohuna ana kaga'a lu'ehinamofihi pa salibe luto o'ohuna yabe. 18Ule'ale huto lusiga ma'naka luto nani lu nolepube, asaga'na ma me'i hiti kokuluma hiti su hoto bilinaya Hu'mamofihi keya ka'a kitili kitili'na su hoto mebilina analo minoba minoba hilina'mu yabe. 19Ya hu'ehinagi bo moneuba Hu'mamofihi keya ka'a nesi'asi li gofa hoto pelesa iloto luga'a bona'i ana suhi huto enelepilina kokuluma kapolo gi'a nesi'asi minalibe. To bo moneuba hetofana huto keya kamofihi liyafa huloto mege'i moloto nominoto boana'i ma kaga mege'i malalo luto enele'mo ho tiloto hetofa kapogu malalina ai kokulumalugu sipi gi'a minalina'mu yabe. 20Ya hu'ehina nani lenekesa nobube. Lenali Hu'mamofihi laga besina suhi hite hetofanaguti minalanauba Felosi bona'i hiti to keya kaga enelepise bona'magihi hapa'ani enebe liginogoko lenali kokuluma kapolo nehetilana'mu yabe luto Yesu lu epi'ehina yabe.
Enipagu logo bisemofihi hapa'a
Lk 12:57-59
21Koyapa'i kaga mone ma lite keya kagu tatatinigihi lu keye'ahana akeheli'ahabe: Bo moneuba mone bo ho fililina ana bo ai ka foyagu filina'mu yabe. 22Ya hu'ehina yatai aku nani lu nolepube. Bo moneuba gona'a ipakafa halina ai ka foya lilina'mu yabe. To bo moneuba gona'amofihi kaiya fa'mene bati mehina bo nohane luto ka emekilina kanisole bolo ho tito ka foya lilina'mu yabe. To bo moneuba gona'amofihi negi nagi noto bati mehu'ahata bo nohane luto ka emekilina aiya loba loba logo kapogu bilina'mu yabe luto Yesu lu epi'ehina yabe. 23Ya hu'ehinagi kai Hu'mamofihi lokiya fi emilube'mu hitalo oloto yata'a kogonaka ka emeki'ehilata kekesa hokolo hinogomo 24asaga'na ana hitalo nomoloto hololu luto buto kogonaka le'mo fulu huto ya huto kipakafa hoto ka emeki'ohuna yatai lubeyaga nounagihe luto li koguna ilete'atiti yalo alihi oto Hu'mamofihi hitalo lokiya fi emibo.
25To bo moneuba ka foyagu kele'mo malalube'mu kele'moto nobinogomo kapoga nebitetiti kai mele'isi hololu luto ipakafa mehoto kiya yogokolo hu emibo to ka hetofa'a lu emito koguna ito minobo. Bonaka ana bouba yasimofihi yato kele'mo melenogo to yaloti ya'mauba polisi bomofihi yato kele'mo melenogo yaloti polisi bouba naga foyagu kele'mo molo lalibe. 26Ya hinogo anaga nohutoka efahi tina hu keto'ehinamo molo emiloto nagaluguti su halane, to tinakalo emi pa mesotomo ana naga foyagu minomo buto emiletogomo su halata'mu yabe, luto Yesu lu epi'ehina yabe.
Bo alobole li sibina husemofihi hapa'a
27Lenali koyapa'i ya'ma kaga lago akeheli'ahana yabe. Lenali bo alobo gofa mehalo. 28Ya hu'ehina nani yatai ma luto lu nolepube. Bo moneuba a'i mone bu goloto bulu'i hoto ipa'a emito minalina, ai komopa'agu ya huto kehelilinauba, ai alobo huto minosemofihi keya ka'a li gofa hoto komopa'agu foipana nohibe. 29To lamagakaga kubukauba ligo foipana nohutomo li kutu hoto he'milago bubo. Kugufaka luga kegi'a fenene hinogo nohuto minoba minoba kapogu bilata bati huto yabe. To kugufaka asaga'i ni'inogo nohuto logo kapogu bilata ya bati mehu'ehibe. 30To kayahi lamaga'auba ligo foipana li huto nohutomo ana kayahi laga huto he'milago bubo. Mone kayahi laga hu he'milago ya hina bati hutita'mu asaga kugufaka ni'inogo logo kapogu bilata bati mehutita'mu yabe.
Bo alobo loko husemofihi hapa'a
Mt 19:9; Mk 10:11-12; Lk 16:18
31Koyapa'i bina kagu ka mone ma luto mino'ehina yabe: Bo moneuba liha'a he'mi etalube'mu nohutomo fayahi mone ya huto liha'ni he'mi etobe luto koyoto emibo luto nina yabe. 32Ya hu'ehina nani yatai lu nolepube. Bo mone'mofihi liha'a fato bo hiti koto ho tito mehuse bati huto nominago to ana bouba ya'ma liha'a he'mi etolenogo to yalo ana liha'auba fato bolo buto minalina ai ya'ma bomofihi hapa'auba ligo liha'auba li alobo hu'ehina keya ka gofa nohabe. To bo moneuba ana a'i lilotomo ai bo alobomagi keya ka li gofa holago foipana'a nominabe.
33To mone keya ka tatatigi alago lenali hiti akeheli su he'ahanaya ma luto ni'ibe: Kaga mone nolutomo ana kaga faga yabe'amu le'mo amuya malalube'mu lutomo lusiga luto ifoloti nolube luto melubo. To lusiga nolutomo lusiga ma'naka nolunagihe luto lu hokolo huto lubo. 34Ya hu'ehina yatai nani lu nolepube. Lenali kaga mone le'mo amuya malalune'mu nehitemo ifo muya kokuluma hepatoti nolune lite melilo. Kokuluma'i ai Hu'mamofihi hepa'a ni'ibe. 35To lenali kaga mone le'mo amuya malalune'mu nehitemo me'i gi mehalo. Me'i Hu'mamofihi lagaso hepa'a ni'igo ai'nanalo gi'a mololata nohibe. To lenali kaga mone le'mo amuya malalune'mu nehitemo lenali Yelusale hepa'i gi'a mehalo. Yelusale hepa'i ai Sipi Bomofihi hepa'a ni'ibe. 36To kaga mone latahakalo li moloto lu amuya memolobo. Okaka legeya'a mone'isi koholina li lolo hula to nupa'na li lolo hula mehilata'mu yabe. 37Ya hu'ehinagi lenali o'yo lila, to o'e lila hite ana'asiya lilata hilo. To kaga analo lu yatama hite lilata nehana kagamoya foipa bo Satatogati olata nohibe.
Bati mehina suhi nehanalo nona'a aku'i hulatamofihi hapa'a
Lk 6:29-30
38Ya'ma kaga koyapa'i ahuto hina lenali akeheli'ahabe. Kai kubuka i polo nehinogomo ana huto enali enubu i polo hubo. To kabaga yogo'a ife nesenogomo kai ana huto enali enabaga yogo'a ife sobo. 39Ya hu'ehina nani aku'i yatai lu nolepube. Lenali bo moneuba osahi lenehenogomo lenali ana bo nona'a mehalo. Lenabaga hapa'alo lamagatiniga inogomo mone kegi'a i gelehe hu emitogo ino. 40To bo moneuba ka foyagu kele'mo malalube'mu nohuto kefeka nolinogomo guka hiti heti emitogo lino. 41To bo moneuba ana'ina'a nehe'moto lito buto emasilo limilane linogomoya kai he'moto buto ai lu'ehina be ligito foto'alo emibo. 42To bo moneuba ana'ina nimibo luto kehe inogomo kai emibo. To ana'ina kaitogati yoka'i lilune lite kehe neinogomo kai o'e luto kemegesa hu meepibo.
Fatehe bona'i enele'mo laga husemofihi hapa'a
Lk 6:27-28, 32-36
43Koyapa'i ya'ma kaga huto hu'ehina lenali akeheli'ahabe: Lenali bona'i lenalalutinigigo enele'mo bati nehite fatehatini lenipakafa ho epite enele'mo fato malalo. 44Ya hu'ehina nani yatai aku'i lu nolepube. Fatehatini enele'mo bati nehite to lenali'i lenele'mo bati mehilana bonatoga nunumu Hu'mamofitoga hu epelenogo ai enehe'malibe. 45Ya hilete yalo lenali kokulumalugu Afotinifihi panana'a lolo hilana'mu yabe. Ai bo foipa'afi to bo mana'afi enogo mone'ago huloto anabo anabo yege'amofihi fana meha'a epilata nohibe. To ana huto ko'i bo mana'a noepito bo sibina'a noepito hulata nohibe. 46To lenali bona'i enipa lepilata nehana bona'i enipa epite enele'mo bati hilata nehanaguti hena mina'a lilana ni'ibe? Enali foipa boana'i hiti takisi lilata bona'i hiti ana suhi hilata nehabe. 47To kai kalalukafinogo yahi emito be notigito fatehakamofito kubu bu go fatoga nomalata henanaloti luga'a bona'i enebe ligilata ni'ibe? To fegutoga bona'magi hiti ana suhi hilata nehabe. 48Ya hu'ehinagi lenali asaga yupahi hetofanaguti minete hetofa foya lite bebe sete kokulumalugu Afotinifu hina'a hite minalo, luto Yesu lu epi'ehina yabe.
Currently Selected:
Matiu 5: bef
Označeno
Share
Copy
Want to have your highlights saved across all your devices? Sign up or sign in
© 1982, Wycliffe Bible Translators, Inc. All rights reserved.