Yɨzɨrelɨ a'mwe nei tɨnna jɨhɨnna wiadaa'nyɨ mwaalɨna ya'. Yɨzɨrelɨ sara kuda' Jozepɨyai Yɨpɨremɨjɨ Manaazalyɨ saraarɨ yosɨgalamakuna kya' Yɨzɨrelɨ galamujɨ'na, yɨlaaya marina yaka Jozepɨyarɨ wɨda' “ ‘Jozepɨyai pɨgaa' magwanganyadɨnyainyɨra,’ dena sa' Gotɨyai sara kya' gɨmɨjɨ kaimɨraayaraalyɨ saihɨrɨ sara yɨhwangamanɨge.” Mi'na kuda' Jozepɨyai gamɨre sɨraanga Manaazarɨ Yɨzɨrelɨmɨre angasɨrɨ wɨmwaaihɨna, Yɨpɨremɨmɨ kwanaamimagɨ wɨmwaaihɨna ya'. Wɨmwaaihɨna kya' Yɨzɨrelɨ asɨraai wovihɨralɨmwaga'nyɨna ya' kaimaleraarɨ. Sara kya' Jozepɨ dara wanganake' “Ai, nɨmware angasi dɨviyarɨ dathathɨwagalɨmwagarɨka!” Dɨna yaka gamɨre angasi lɨmwanna yaka wɨda' “Manaazai sɨraangelyɨra. Gamɨnyɨ angasɨlyɨ dɨlɨmwagaka!” Kuda' Yɨzɨrelɨ wɨda' “Aawana, kunya yawɨ'manɨgeinyɨra. Manaazare kaimɨraaya kwala naanga yɨrɨvadengɨra. Sa' Yɨpɨremɨre kwala naanga naanga yɨrɨvadengɨra.” Nabaai Yɨzɨrelɨ wɨda' “ ‘Gotɨyai Evɨraamɨjɨ Aazakɨjɨ nɨmɨjɨ sainaavɨ tewaanna sara neyakabaaibɨ' kaimɨraayaraarɨ tewaanna sara wiadelyɨra,’ yɨhɨthɨvanɨge. Jozepɨyaigɨ nɨmɨ dɨvi maalɨkegaa' balɨdera. Sarɨmɨnɨdakaavihɨlyɨ Gotɨyalyɨ saihi dɨmwaalyideihɨlyɨra. Gotɨyai sarɨmɨ Kwaaka Kainanɨna ayɨna makuna yɨhyadelyɨra. Kwaaka pɨba Amoyaraavɨreba kuka maarena kwaaka saba gɨzaawa. Gɨmɨresɨra. Ja'mweraavɨre' mɨka.”
