Priljubljene svetopisemske vrstice iz Mattuw 6

Deli

Dedee ni kàpyɛ̀ mashɔ́ áwúwàsàsà wàhwoi fu Chɔ̀ Shidɔ lá, mazyi ni sá wúwàsàsà waa u yi fú lá, mazyi ú lò wúsásá wànàti waa ni hwoi fú lá yí'ni.

Yimamala ni káwa zánwú ishina ákyɛ̀ yɔ̀, dizyi ákyɛ̀ yi zánwú ishina dia. Sásá nyunu bā nwúzáàzá'a wua kē'u.

<<Ishinali lá m zɛ̀ la, ni káwa zánwú ishina wúzyī wa zyàwā wàyí'ni hwoi shí hwoi zyoo lá yɔ̀, kwɛɛ pi ishina wúchɛ́ wàwèdì yɔ̀. Nyemgba, ánwú sàsà buu kā wúzyī yɔ̀? Àdì sàsà buu kā wúchɛ́ wàwèwè yɔ̀?

Dedee o ma yi jāndɛ̀ ní, ya kà fu tá'o, mazyi ó lò nūkyɔ́ chù, mazyi ó jāndɛ̀ yí Ada'o, waa wa hwoi wya'u yɔ̀ lá. Mazyi Ada'o wàyi wya wú wà yùyò lá, ú hwā'otɔ̄.

Yiiyi waa o yi jāndɛ̀ lá gbaa yi nì, <<Ada'i wàyii dɔ lá, àzyì'u ó lòkà zyì wànyɛnyɛ, Achɔ̀'o ú bē, áwú waa o yi fú lá, wá sá yii bēèmyɛ̄ sáyìna yiiyi waa u yii dɔ lá.

Yí'i wúzyī waa i hwoi fú lá.

Gbā'izyɔ̀ wú wàbɛbɛ waa i sá lá, sáyìna yiiyi waa i gbāzyɔ̀ wúwàbɛbɛ waa wándó wànàti sá'i lá.

Káwa chá'i ya fu pɛ́wàmbàmbà yɔ̀, dedee tɛ̄'i yiibe wúwàbɛbɛ.>

<<Nyunuwaa ni ma gbāzyɔ̀ wúwàbɛbɛ waa panku sá'ni lá ní, Ada'ni wàyii dɔ lá yi gbā'nizyɔ̀ dúdú.

Ni wya ányī wàhwoi pēèpē yii dɔ, wa hwoi tà chɛ̄wú yɔ̀, kwɛɛ wá pi be wúzyī mazyi wáhwoi wè vā yɔ̀, dedee Ada'ni wàyii dɔ lá yí'wa wúzyī, hwoi zyàwā. Áwuni kā ányī wa hwɛ̀ buu ní yɔ̀?

<<Ni kálò wúchɔ́'ni hwo kóshī yii bēèmyɛ̄ yɔ̀, yii bē waa àgɛ̀ wa dɛ́pàpà lò'wa hwoi sábɛ̄ lá yɔ̀, wa bē waa ávyú hwoi téká nūkyɔ́ kàfu ma hwoi vyí lá yɔ̀. Dedee ni hwo wúchɔ́'ni ya kóshī yii dɔ, yii bē waa àgɛ̀ wa dɛ́pàpà hwoi sábɛ̄ kà yɔ̀ lá, kàwa bē waa ávyú hwoi téká kàfu ma hwoi vyí kà yɔ̀ lá. Dizyi ánwú'u gbɛ̀n yi sā bé waa wúchɔ́'o wè hwoi ní lá.

<<Apazukponu lò yi kà nyàchɛ̄ awasendo ipyɛ kà yɔ̀, dizyi ú yi zé wàsèndo zū mazyi shó wàsèndo zū, ú yi sá wàsèndo zū sàsà ma yi sìnì wàsèndo zū. O yi wá Shidɔ wa banji sásá wú ipyɛ kà yɔ̀.

Shidɔ gbaa yi mbyā ábyɛ́ wàyii fubyɛ́ dì ní, ábyɛ́ wàyii maa zyìna waa ákyɛ̀ wa lò'u yi sōpyù lá, nyemgba pi hwoi wuni? Awuni wándó waa àbyɛ̀'ni hwo zō lá!

Dedee nyunuwaa o ma yi sá ándówànyànì lá sɔ̀ ní, sá'u mazyi àbugɛ'o wàbàzɔ̄ wa'o pyápyá lá ú ká yìnɔ̀ yɔ̀. Yiibeli àsɔ̀wàsáàsá'o ú lò kà wú wàyùyò. Mazyi Ada'o wàyi wya wú wàyùyò lá, ú hwā'otɔ̄.

<<Ni pà dini mazyi ni káwa sásɔ̀ yii pyɛ̀ panku wá wya wú waa ni sá lá yɔ̀. nyunuwaa ni ma sá mamá yii pyɛ̀ panku ní, ni hwoi dò bētòkolo'ni zukponu yi yiibe Ada'ni wàyii dɔ lá yɔ̀.

<<Dédēwaa ni ma hwoi sènū ní, ni kálò zú gbē sáyìna yiiyi waa áwándógyɛ́ hwoi sá lá yɔ̀. Wa lò zú'wa gbē mazyi ápanku wáwya la, wa hwoi sènū. Ḿ zɛ̀ yí'ni zyíbyɛ̀, wa kàpyɛ̀ lò bētòkolo'wa hwā'watɔ̄bwā mánì. Dédēwaa o ma yi sènū ní, lò byù pwò ishina'o mazyi ó lò zú'u tō, mazyi ápanku káwa yìnɔ̀ la, o yi sènū yɔ̀, mazyi ákèké Ada'o waa ápanku hwoi wya'u kà yɔ̀ lá, ú yìnɔ̀. Ada'o wàyi wya wú waa o sá yùyò lá, ú hwā'otɔ̄.