Priljubljene svetopisemske vrstice iz Лүк 3

Deli

Бар халык суга чуму йоласын үтәгәндә, Гайсә дә аны үтәде. Йоланы үтәгәннән соң дога кылып торган чакта, күк капусы ачылды да Аңа күгәрчен рәвешендә Изге Рух иңде, һәм күкләр киңлегеннән «Син – Минем сөекле Углым; Син – Минем куанычым!» дигән өн килеп иреште.

Әмма Яхъя аларның барысына болай дип җавап бирде: – Мин сезне суга чумдырам, ләкин миннән кодрәтлерәк Берәү килә; мин Аның аяк киеме каешын чишәргә дә лаек түгелмен. Ул башкарган чумдыру Изге Рух һәм ут белән булыр.

Тәүбәгә килүегезнең ихлас күңелдән икәнен эшегез белән раслагыз. «Безнең атабыз Ибраһим бит – котылырбыз!» дип уйламагыз. Шуны әйтәм сезгә: Аллаһы әнә шул ташлардан да Ибраһимга балалар булдыра ала.

Балта инде агач тамыры янында ята: яхшы җимеш бирми торган һәр агачны кисеп утка ташлыйлар.

Ишагыйя пәйгамбәр китабында бу хакта болай дип язылган: «Чүлдә әнә бер аваз яңгырый: „Раббыга юл әзерләгез, Ул үтәсе сукмакларны турайтыгыз! Уйсу җирләр тигезләнсен, таулар һәм калкулыклар түбәнәйсен, бормалы юллар турайсын, сикәлтәләр тигезләнсен – шул чагында барча кешеләр Аллаһыдан килгән коткаруны күрерләр“».