Priljubljene svetopisemske vrstice iz Matío 5

Deli

Mɛ́ té lɛtté á láam páʼā, ŋ́gɔ̄ ekápte mé ŋgwʉ́ŋ ɛ́. Mɛ́ lɛtteé á láam páʼā, ŋ́gɔ̄ etshí mé athʉ́, ŋ́gɛ a ekɛ̄ʼɛ epuɔ metsem pīi, pɔ́ puú ŋgɔ́ á ŋgyā. Ndeŋ ndeŋ épúp, ŋkaʼ wɛ́ e ekɛ̄ʼɛ efʉʼ metsem, á tsetsɛlɛ epuɔ menɔŋ. Púp, pɔ́ ejʉ́ɔ menu membɔŋ mīi, pɛ é si ŋghʉ̄ɛ, ŋ́gūʼte á Mɔʼɔ́ wɛ Ndém yīi, a á athʉ́ lephū.

Pɛ é si ŋgɔ́ ŋkaʼ ŋgɔŋ ntsem. Tésɔŋ yīi a tshií á ndo lekwɛ̄t, a gɔ egaá tɛ́ ndʉ̄ɔne é?

Eshhʉ̄ mbɔŋ a á ŋiŋ yīi, ntē yí é laneé, a a fú ejʉ́ɔ á Ndém.

Eshhʉ̄ mbɔŋ a á ŋiŋ yīi, nzi leghʉ páʼ Ndém a á si ŋkɔ̄ŋɔ, e zaáŋ á yí tɛʼ. Ndém a a shʉʼ etswíte á yí á leghʉ páʼ, a á si ntsáa épúp.

Meŋ á ké mbiŋ ndé á mbū pɛ ŋ́gɛ: pɛ ekɔ̄ŋ megaŋ mbo pɛ́, éswíŋte á Ndém á athū epuɔ pīi, é lʉɔ́ʼɔ á wɛ́.

«Eshhʉ̄ mbɔŋ a á ŋiŋ yīi, a zhɛɛ́ á ntē yí á légɛ, yí é mvhɔ Ndém, ŋ́gɔ́ á te kuʼ ánɛ azō, a á ndáʼ nzī á lejūʼ á mbɔŋɔ́, á ntē Lefɔ Ndém.

Eshhʉ̄ mbɔŋ a á ŋiŋ yīi, a á si mbhīɛ apwɛne, Ndém a a shʉʼ etɔ́ŋ á yí lɛ méŋ yí.

Eshhʉ̄ mbɔŋ a á ŋiŋ yīi, a á te ŋak, a a shʉʼ enáŋ ánɛ atsáʼ zīi, Ndém a le laʼnēē.

Eshhʉ̄ mbɔŋ a á ŋiŋ yīi, mɛ́ é si ndʉɔ́ʼɔ á yí, melaʼ mīi a á si ŋghʉ̄ɛ ajū mīi, Ndém a kɔ̄ɔŋ. A a shʉʼ ejúʼ á mbɔŋɔ́, á ntē Lefɔ Ndém.

Eshhʉ̄ mbɔŋ a á ŋiŋ yīi, a á tsá‑melaʼ, Ndém a a shʉʼ etsá melaʼ mí azí.

Epuɔ é nɔŋ nzɔ̄tɛ á wɛ́, ńnɔ̄ŋ ndʉɔ́ʼɔ á wɛ́, ńnɔ̄ŋ eshúŋɔ á ntií ntiī epoó‑anu ánɛ pɛ, melaʼ mīi pɛ é epuɔ pá, mbɔ pɛ é meshhʉ̄ mbɔŋ. Á shʉʼɛ ŋgɔ́ épúp, pɛ enáŋ mé lekāk, ŋ́gáŋte, melaʼ mīi, Ndém a lē eféŋ á mía mía ntaŋá á mbū pɛ, á athʉ́ lephū. Á épúp páʼā, ŋ́gɔ́ páʼ mɛ́ le lʉɔ́ʼ metswi‑ŋke Ndém pīi, é le té njhʉ̄ ntɔ́k, á mvhɔ pɛ épúp.

Eshhʉ̄ mbɔŋ a á ŋiŋ yīi, a á tsetsɔŋɔ ndāa, Ndém a a shʉʼ eláŋte á yí.

«Pɛ é si ŋgɔ́ ŋgwāŋ á esī atsetsáʼ. Ŋgwāŋ é piŋɛ nnáŋ tɛ ncʉ́ʼɛ ndáp lapé, é gaá tɛ́ nzɛ́t ŋgwāŋ ŋ̄? Mbɔ mɛ́ gɔ le zéŋ ndɔk ŋghʉ̄ azō ɔ́, mbɔ mɛ́ e maʼ á apɛ́, epuɔ menɔŋ e egē etsia, ńnēŋte.

Pɛ púu ŋkúʼte menu muɔ mɛ́t ntsem, mbɔ pɛ e gɔ́ té alɔ́ʼ, ńdeŋ ndeŋ páʼ Mɔʼɔ́ wɛ yīi, a á athʉ́ lephū, a á té alɔ́ʼ. »

O nɔŋ eshúŋnɛ, o gē egɛ ŋŋ, á gɔ́ yīi o lɔkɔ mvéŋɛ á leghʉ. Ŋ́gē egɛ ŋgáŋ, á gɔ́ yīi o lɔkɔ ndʉ̄ʼɛ á leghʉ. Anu ndɛʼɛ zīi, o piŋɛ ntswīʼnɛ éwú lā, á cʉ́ʼɛ efhɔ́ɔ áa mbū Sɛ́ta.

«Pɛ lé júʼ páʼ mɛ́ le lé ŋ́gɛ: “Ŋiŋ a píkɛ lezēk ŋiŋ, mɛ́ zéŋ mbík etsí. Ńtsɔ́ʼ lesɔŋ ŋiŋ, mɛ́ zéŋ ntsɔ́ʼ etsí.” Meŋ á ké mbiŋ ndé á mbū pɛ ŋ́gɛ: ndɛ́ʼ ŋiŋ á pʉʼ anu á mbū ŋiŋ yīi, a á ghʉ anu tepɔŋ ánɛ yí. A cʉ́ʼɛ épúp, mbɔ ŋiŋ a témɛ apū á letuúŋ wu, á ŋkɔʼɔ́ apū ete, o ezéŋ mbēkne mmɔʼ ŋkɔʼɔ́, ŋ́gyá ŋ́gɛ, a epú emakne ntém.

Lezēk cú etsi ŋkɔʼɔ́ apū ete, é nɔŋ ntshónɛ á wú nnéŋɛ ánɛ mefa, o etsɔ́ʼ ŋgwáʼ tɛ éwú. Á mbɔŋ á mbū wu, á lepī amɔ̄ʼ ajʉʼ nnɛ̄t jú, ńtɔ́k á wú á lezɛ̄t mé mbe nnɛ̄t ju ntsem, mɛ́ piŋ mmāʼ á wú á ntē mmók, á alāʼ ŋgʉɔ̄ʼ. Apū ete jú, á nɔŋ ntshónɛ á wú nnéŋɛ ánɛ mefa, o ezáʼ ŋgwáʼ tɛ éwú. Á mbɔŋ á mbū wu, á lepī amɔ̄ʼ ajʉʼ nnɛ̄t jú, ńtɔ́k á wú á lezɛ̄t mé mbe nnɛ̄t ju ntsem, mɛ́ piŋ mmāʼ á wú á ntē mmók, á alāʼ ŋgʉɔ̄ʼ.