Priljubljene svetopisemske vrstice iz โล​มา 6

Deli

เหว่ย หฒุ ฒุ์ย เญย กง-ฒิ่น เซ ปุน เมี่ยน หฒุ ไต่, มป่า ทิน-ฮู่ง แปะๆ ปุน เญย ฒี่ง เหญ่ย เซ บัว เหธา บัว เญย เฒี้ยว กี​ตู่ เย​ซู จวั่ง แหม่ง เฒี่ยง ฯฒฯ ตุ๊ เหยียด ลิ์ว เญย แหม่ง.

ฒุ์ย ไม้ ตุ๊ แอ๋ง โหฒว เม่ย บัว เญย เฒี้ยว, เหว่ย หฒุ เม่ย บัว ไม้ เยียม เล์ย-หลัด กะเดี๊ย. เม่ย บัว เยียม ทิน-ฮู่ง เญย เอน กะเดี๊ย.

ฮนั้ง หน่าย, บัว เจี๋ย ววม เญย เล์ย, บัว เหธา กี​ตู่ ไต่ มี่ง ปย๊บ เจี๊ยน เหว่ย ปุน บัว ตุ๊ เซียง-เฒี่ยง แหม่ง, ฮนั้ง กี​ตู่ ไต่ มี่ง หฒั่ง เตี๋ย หย่า หล่ง ฌัง-หล่าง เญย ต้ม ชะ ปุน นิ่น แอ๋ง นั่ง ต้าย เฒี่ยง เจี๊ยน วั้ว นอ.

ไม้ ตู๋ง ปุน ซิน หฒั่ง เญย หาย หญู่ง โหฒว ฒุ์ย, หล่ง โหฒว หว่าย ไห่ เญย สี่. ต๋าว หฑวน อ๋อย หฒุ ฝูง กั้น ปุน ทิน-ฮู่ง, ฮนั้ง ไต่ มี่ง มป่า ทิน-ฮู่ง ปุน แอ๋ง นั่ง ต้าย เญย เมี่ยน นอ. หย่า เฒาะ ซิน เญย หญู่งๆ ปุน ทิน-ฮู่ง หล่ง โหฒว หอบ เญย เจ๊า.

บัว หย่า ฮิ้ว ตุ๊ บัว เญย โล์-เฮญี้ยว หฒุ เหธา กี​ตู่ ตีง วั้ว เหฒียบ หฑั่ง จ๋า เหว่ย ปุน ป์าม ฒุ์ย เญย เฮญี้ยว หฒุ เหมียด. บัว หย่า ไม้ หฒุ แอ๋ง โหฒว ฒุ์ย เญย โน่ว.

เม่ย บัว ฟี่ ฮนั้ง เญย, อ๋อย หฒุ ฝุน กั้น ฮนั้ง ไต่ หมี่ อ๊ะ นอ, ฒุ์ย กุ๊น ไม้ เจี๊ยน. มป่า เม่ย บัว เหธา กี​ตู่ เย​ซู จวั่ง แหม่ง เฒี่ยง ฯฒฯ เหว่ย ทิน-ฮู่ง เฒี่ยง เจี๊ยน.

วั้ว หญู่ง, บัว อ๋อย หฒุ ฮนั้ง หาย นอ ก๊อง? บัว หธ่อ อ๋อย หฒุ ป์าม เจี๊ยน ฒุ์ย มี่ง ทิน-ฮู่ง หธีง ต้าย ไฮ่ เหธย เอน ธั้ม เจี๊ยน ฝาว ไฟ? ฒู้ง ไม้ เฒ์ย! เอย โหฒว ฒุ์ย เญย เจ๊า บัว ฒู้ง ไต่ หมี่ อ๊ะ. วั้ว หญู่ง บัว ฮนั้ง หาย นอ ไฮ่ โหฒว เจี๊ยน ฒุ์ย มี่ง?

เม่ย บัว ไม้ ฮิ้ว ตุ๊ ไฟ? สี ก๊อง ฝูง กั้น โหฒว หาย เต้า เญย โน่ว, หมวัง วั้ว เต้า เญย หว่า, เม่ย บัว ฯฒฯ โหฒว ต้ง เม่ย บัว หมวัง วั้ว เต้า เญย โน่ว. ฮนั้ง หน่าย, เม่ย บัว โหฒว ฒุ์ย เญย โน่ว ฯฒฯ อ๋อย หฒุ ไต่. มป่า เม่ย บัว หมวัง ทิน-ฮู่ง ฯฒฯ ตุ๊ เหธา นิ่น หอบ เฮญี้ยว.

แล์ง ฒี่ง ทิน-ฮู่ง! ไม้ กุ๊น ฒิ่น ด่าง เม่ย บัว โหฒว ฒุ์ย เญย โน่ว, อี้ หฒั่น เม่ย บัว หล่ง เหฑ่ง เฮญี้ยว หมวัง หฌาว ปุน เม่ย บัว เญย เล์ย. ทิน-ฮู่ง ปู๋ง เม่ย บัว เล่ย ดุ๊ด ฒุ์ย เญย ชะ, โหฒว หอบ เญย เจ๊า ฯฒฯ กุ๊น เม่ย บัว.