Priljubljene svetopisemske vrstice iz Акълова 2

Deli

БетӀергьаллийа̄ъ аьᵸкъиллъи ницца, Гьолцоъкьа̄йа̄ъ цӀодорлъина лъайна михъос.

Йе дие оьжо, дие йаьжбо аьᵸдалаъ йеᵸйагьда, гьула̄зу дие амро-насигьатлана ми дибола йакӀиъ йовахда, Аᵸкъиллъилахъа энекзи йахъал аьᵸгъана жухъна зогъда, аᵸкъло михъаллакьа йакӀис кулна зогъда, Аᵸкъло-насигьатна ми дудой илӀеда, аᵸкъло-лъайна дудой бокӀда, Окколас аьᵸгачой ми гьулина йиᵸзда, мизаъ йиᵸхъолло хазиналгъацой, ми гьолълъогъой муьгъалӀна эᵸкьеда, БетӀергьаллихъа гьичӀейолъи сийо жо йахъцасна йикъеш дул, Аллагьлила илмолакьана оᵸкъас ми.

ЙакӀо йаᵸцова̄ аьдамла̄л ко̄ гуцӀолал нитоназу гьаьдураб гей Гьули, гьаьлаллъилаъ мекье-гугьцалал къейо тил тухъинна эчеш Гьули. РитӀухълъилаъ эᵸкье-гогьцалас гьинодана цӀуми йовагьца Гьолцо, гьинила муъмин-сукӀос гьинодана гьинкъи гаьчча̄ йовагьца.

ЙакӀо йаᵸцова̄ аьдамла вагьалӀо Аллагьли нилӀийа мицакьа ба̄хъца, мунагьла гаьчча̄на ракьликьа кьодо гьихбалъос. ЙакӀо чикейа̄ аьдамлана дунналикьас бовахна тӀувацца, хийанатлъи йогьцас аьдамлана мицакьас хемухаъасзу боваъилца.

Аᵸкъиллъила цӀуми о̄с ми сукӀола ахъакьасна, гьолълъола бихха мицакьасна. Оьлохъанлъилаъ зукъойо гьудул эчанне̄йо гьолълъо, гьинила Аллагьли халкъилал нилӀийо йаьжена амрона шоъилло гьолълъо.