Priljubljene svetopisemske vrstice iz A̱romawa 4

A̱mgba̱m ma̱ng a̱nia, Ibrahim ku but mi̱ nfwuo da̱ a̱li̱ka̱uli A̱gwaza wu bah, ku ma̱ chunchwiit. A̱tsak a̱lyiat, a̱ si̱ mban nwuak fwuo da̱ A̱gwaza mi̱ chet. A̱wot a̱ni wa gu si̱ nnwuak A̱gwaza shi. Ibrahim ku nwuak a̱chuchuk ba̱t nang A̱gwaza mbyia̱ chet a̱ nyia̱ kyang nang gu nyia̱ a̱li̱ka̱uli wu a̱ni.

Si̱ huni nat cha̱chaat ma̱nang A̱gwaza nhyia̱ ma̱ng Ibrahim mami A̱lyiat A̱gwaza na a̱ni, nyia̱, “N wa ka̱n tyia̱ ang a yet a̱tsatsak a̱tyia̱ a̱khwop a̱mgba̱m nnwap ma̱ a̱di̱di̱t.” A̱lyiat nani bai da̱ a̱nu ka, mat Ibrahim nwuak fwuo da̱ A̱gwaza, a̱tyu a̱ tyia̱ á̱niet ba̱ ka̱n kwi si̱ doot ma̱ng swuan a̱ni. A̱wot nggu wa bu mat nkyang nfai, na̱ si̱ ghwut mi̱ kyang na̱ nwai nshya̱ a̱ni.

Á̱ ku tyia̱ Yesu mbwak á̱ka̱tuk á̱niet ba̱ hyat gu da̱nian a̱ka̱tuk nyia̱ nzi̱t wu. A̱wot á̱ si̱ bu ta̱ngam nggu ma̱ng swuan ma̱ á̱niet ba̱ ka̱n kwi a̱ni, da̱nian zi̱ ka yet á̱tsotswat ma̱ng sang a̱bun a̱zaghyi A̱gwaza.

Ku nang jat tyia̱ fwuo nshya̱ bah, Ibrahim si̱ ya a̱son ma̱ng tyia̱ fwuo, a̱ si̱ nwuak a̱chuchuk nang gu na ngyet a̱tsatsak a̱tyia̱ nnwap ma̱ a̱di̱di̱t. Ma̱nang A̱gwaza nnyia̱ a̱li̱ka̱uli a̱ si̱ tak ma̱ng a̱nggu a̱ni, nyia̱, “A na saat, a byia̱ kwaí ma̱ a̱di̱di̱t!”

Mat a̱nia, á̱ san a̱li̱ka̱uli wu mat nwuak fwuo hwa da̱ A̱gwaza. A̱wot A̱gwaza nyia̱ a̱li̱ka̱uli a̱wa, mat nang gu nfa̱k shok nzi̱t a̱ni. A̱wot zi̱ nwuak a̱chuchuk zi̱ na san kyang nang A̱gwaza nyia̱ a̱li̱ka̱uli wu a̱ni, ki̱ zi̱ nwuak fwuo da̱ A̱gwaza ma̱nang Ibrahim ku nnwuak fwuo da̱ nggu a̱ni. Zi̱ na san kyang nang á̱ nyia̱ a̱li̱ka̱uli wu a̱ni, kang ma̱ng si̱sak ji zi̱ nkhwi ku nwai khwi doka A̱yahudawa ji a̱ni. Mat Ibrahim wa yet a̱tsatsak a̱tyia̱ a̱khwop a̱mgba̱m nzi̱t zi̱ nwuak fwuo da̱ A̱gwaza a̱ni.

“A̱gwaza ni̱ nang á̱niet nang á̱ chi mba a̱ka̱tuk nyia̱ a̱ni a̱li̱ba̱rka. A̱wot á̱niet ba nang á̱ bwung a̱ka̱tuk nyia̱ mba wu a̱ni, ba̱ yet á̱niet a̱gwai bya. A̱tsak a̱lyiat, á̱niet ba nang A̱gwaza lyang a̱ka̱tuk nyia̱ mba wu nang gu lyuut a̱ni, ba̱ yet á̱niet a̱gwai bya!”

Ma̱nang á̱ ndyuut mami A̱lyiat A̱gwaza na a̱ni, nyia̱, “Ibrahim nwuak fwuo da̱ A̱gwaza. Huhwa A̱gwaza si̱ kyiak gu a̱tsotswat ma̱ng sang a̱bun a̱zaghyi nggu, mat nwuak fwuo nggu hu.”