Popular Bible Verses from Mathew 6

Share

Ahivangin amasatah-in Pathen lenggam le chonphatna hol masaovin; chuteng hichengse jong chu naki pehbe dingu ahi.

Hijeh chun jinga dingin lungkham hih-un; jing chun aman hinki ngaito nante. Ni khat hesohna chu ni khatna dingin atohbepmin ahi.

Hijeh-a chu nangho jah-a kasei ahi, i-kaneh ding hitam, i-kadon ding hitam, tin na hinna dingun; ahiloule, i-kasila kachen ding hitam, tin natahsa dingun lungkham hih-un. Anneh sanga hinkho, chule nihchen ponsil sanga tahsa thupijo hilouham?

Nang vang natao tengle, na-insung dana lutnin lang chule kot khah-in, guhthima um na Pa henga taovin; chuteng guhthima mu-a na-Pan nangma phongtah-a nasah ding ahi.

Hijeh chun hitihin taovun; Van'a um ka-Pau, namin kijahen. Nagam hung lhunghen. Van'a nalungchan akim bangin, leija jong nalungchan kimhen.

Tunin kaneh khop dingu anneh neipeuvin.

Kalei bateu kangaidam bangun, keiho bat jong ngaidamin.

Chule lhepna-a neipui hih-un, agilouva konin neihuhdoh jouvin: ajehchu lenggam, thahat, chule loupina atonsotna nanga ahi, Amen.

Ijeh-inem itile nanghon mi suhkhel nangaidam uva ahile, van'a na-Pau vin jong nangho suhkhel angaidam ding ahi.

Chunga leng vacha khu ngaitouvin, amahon tula atupouvin, atla a-at pouvin, ahinla van'a um na-Pau vin amaho khu avahnai. Nangho khuteho sanga lujo nahi lou uham?

Ngetle twi eh-in asuhmang theina, guchan aphet vanga chule aguhmang theina leiset chungah gou khol hih-un; Amavang ngetle twi eh-in asuhmang thei louna, guchan jong aphetvang theilou nale aguhmang thei louna van'ah nagou kholun; Ijeh-inem itile nagou umna-a chu nalung jong umding ahi.

Koima pakai ni soh ahi theipoi; ijeh-inem itile aman khat hotbolintin, khatjoh angailut ding ahi; ahiloule khatna hakai jintin, khatjoh anahsahmo ding ahi. Nangho Pathen le sum soh nahikop thei lou dingu ahi.

Chule jaova hampa tunia uma, jinga lhum sunga kileh lutta ding jengbon Pathen'in achuti jeple, vo tahsan lhomho, chu sanga chu Aman nangho najepjoh lou dinguham?

Nangma vangin mi thil napeh teng, nakhut jetlamin abol chu nakhut veilam hetsah hih-in, Chutilebou nathilpeh chu guhthim hintin, guhthima mu-a na-Pan phongtah-a nangma nasah ding ahi.

Nathilphabolu chu mihon amuna dinguva amasanguva nabol louna dinguvin chingtheijun; chutia nabol ule van'a na-Pau koma san ding kipaman nei lou nahiuve.

Nanghon an nangol tengule, miphalhem ho bangin kinguisah hih-un; ijeh-inem itile amahon an angolu min ahetna dingin, amaiso achom ahisah jiuvin ahi. Tahbeh-a kaseipeh nahiuve, Amahon kipaman akisanu ahitai. Nangma vangin an nangol tengle, nalu thao kinunlang, namai jong kiphet in. Chutile mihem mitmu hilouva, guhthima um na-Pa mitmu-a an ngol nabah ding ahin; chuteng guhthima mu-a na-Pan phongtah-a kipaman napeh ding ahi.