Priljubljene svetopisemske vrstice iz Klei Kbiă 32

Deli

Tơdah phung ƀuôn sang ƀuh Y-Môis sui trŭn mơ̆ng čư̆, diñu bi kƀĭn jŭm Y-Arôn leh anăn lač kơ gơ̆, “Ngă brei kơ drei sa čô yang srăng nao ti anăp drei; kyuadah Y-Môis anăn, pô bi kbiă leh drei mơ̆ng čar Êjip, drei amâo thâo ôh ya klei truh leh kơ ñu.”

Yêhôwa lač kơ Y-Môis, “Trŭn bĕ, djăl kyuadah phung ƀuôn sang ih, phung ih bi kbiă leh mơ̆ng čar Êjip, bi čhŏ leh diñu pô. Diñu djăl klah leh mơ̆ng êlan Kâo mtă kơ diñu. Diñu tuh mjing leh kơ diñu pô sa boh rup êđai êmô. Diñu kkuh mpŭ kơ rup anăn leh anăn myơr mnơ̆ng ngă yang kơ gơ̆, leh anăn diñu lač, ‘Ơ Israel, nĕ anei yang ih, pô bi kbiă ih leh mơ̆ng čar Êjip.’ ”

Tơdah Y-Arôn ƀuh klei anăn, ñu mdơ̆ng sa boh knưl ti anăp gơ̆; leh anăn ñu ur hưn, “Mgi srăng mâo klei knăm mpŭ kơ Yêhôwa.” Mgi diñu kgŭ pĭt ưm aguah, leh anăn diñu myơr mnơ̆ng myơr čuh leh anăn mnơ̆ng myơr kơ klei êđăp ênang. Phung ƀuôn sang dôk gŭ čiăng ƀơ̆ng huă mnăm, leh anăn diñu kgŭ čiăng hlăp.

Ti hruê mgi Y-Môis lač kơ phung ƀuôn sang, “Diih ngă leh sa klei soh prŏng. Ară anei kâo srăng đĭ nao kơ Yêhôwa. Năng ai kâo dưi ngă klei bi doh kơ klei soh diih.”