Priljubljene svetopisemske vrstice iz METIU 6

Deli

Cmpige:la maa:danna Bvk migom dokodcm mapo:lang odokkc Bvk dormo agomdcm odokkc cdc appv:dcm nolum biycpc.

“Cdcmpidag yamporomkc lcgangc mc:dvryoka, kapila:nc yampodc avkcpc yampo mc:suycpc. Longcdok mc:dvrdcm longcdokkcpc pv:motoka.

“Cdcmpidag ngo nolum lubidung, noluk turra du:nam lcgangc mc:dvryoka, nolu okkom dodonc cdcmanggom okkom tv:ycnc, cdcmpcmanggom noluk amvr lcgangc, okkom gcycn cmna. Turra du:namdc donamdcmyam bottaya:ma:lang, odokkc amvrdc gasor-galugcmyam bottaya:ma:lang?

Cmpige:la cdvlo nolu kumdonc, noluk soyarlo:pc gva:lang odokkc yabgom mokapsulang odokkc noluk Abudcm kumnang sc:kobv kinmango:pc du:dagnc; odokkc noluk Abubv kinmango:pc ka:ncdc nolum amancm biycpc.

Cdcmpidag scmpc kumtoka: Ngoluk taycng amo:tok du:nc Abba, Nokkc amincm kumnampc ika:langka. Nok migom dotcngc pvngangka:langka, tani:mo:pvso:sin taycngamo:tok ikampc nok mc:namdcmpc ingapka:langka.

Silo ngolum lo:dcm donamdcm bi:ka

Odokkc ngoluk narnam mc:yinsuteika, Ngolusin ngoluk narnckvdv:dcm kapc mc:yinamsutonc

Odokkc ngolum ka:bomc:bokolo:p gvboyoka, cmpige:la ngolum aima:nc yalodokkcm moya:langka.

“Kapila:nc nolu tani:kvdv:dcm buluk imursiyarcm mcyinsumvlo, noluk taycng amo:tok Abubv:sin nolum mc:yinsuyc

Do:mvrtok dcnggo:nc pcttangkvdv:dcm kangkvtoka: bulu pidmang cdcmanggom gadmang cdcmanggom kumsu:lo:sin jongkumsumang, odokkc ckvdaggom noluk taycngamo:tok Abubv bulum domodag. Nolu bulumyam arc kaya:ma:lang?

“Mo:pvso avkc lcgangc murkongcm lcngkumsuyoka, okolo tapumclang argomc dopakdagnc odokkc dopsongkvdv:dc:sin gvala dopso:dagnc, Cmpige:la nok lcga:pc taycng amo:to murkongcm mckumtoka, okolo tapum manggom argomc domang odokkc okolo dopsongc gva:mang odokkc dopso:mang. Kapila:nc okoloi nok murkongcm mckumsuycnc, oddoi nok asindc:sin du:yc.

“Sc:kosin ru:tum anyilok agom tadla agercm gerbila:mang; bv akoncm tayumyc odokkc akondcm aipc mc:yc, cdcmanggom akondc aipakpc mc:yc odokkc akondcm aima:pc mc:la mcpakyc. Nolu Ru:ncpvncmc odokkc murkong uidok agercm lckko:pc gerra:mang.

Ckvdaggom Ru:ncpvncbv arvgolok ncsinkvdv:dcm cdcmpc galuk-gasorcm molvgdagmvlo, okodc silo turra dung cmpige:la yamporom mcramnok vmvlo cra:lvgdonc, Bv nolum bojcru:yangko attarcm moru:lvgma:yclang, c:i adji:ko mc:jvgnc tani:kvdvnga?

Cmpige:la nolu cdvlo cmpc binamcm bidonc, noluk lagbvg alagdc okkom idu:nc noluk lakkek alagdcm kinmoyok, Odomvlo noluk cpv:pc binamdc kinmango:pc binampc iyc; odokkc noluk Abudc sc:kobv kinmango:pc ka:dagnc amancm biycpc.

“Ansulangka noluk Ru:ncpvncmc kumnamcm tani:kvdvngc ka:ycpc cmna kumma:pcka; kapila:nc odomvlo noluk taycng amongkc Ba:bukolok amancm pa:ma:yc.

“Odokkc cdvlo nolu menna doma:pc du:donc, nappangcm napvnarc:ma:pc kangkosuyoka, agom lc:sula lunckvdv:dcmpc, kapila:nc bulu dumsi migmom ka:nyi:modag buluk menna du:namdcm tani:kvdv:dc ka:begycpc cmna. Aropakpc, ngo nolum lubidung, buluk amancm bulu pa:toibong. Cmpige:la nolu cdvlo menna doma:pc du:donc, tukkudo tulangcm yonsulang odokkc nappangcm mopu:sulang, nok menna doma:pc du:namdcm tani:kvdv:dc ka:begmaycpc ckvdaggom nok Abubv ka:begycpc sc:ko kinmango:pc ka:la du:nc; odokkc nok Abubv sc:kobv kinmango:pc ka:dagnc nom amancm biycpc.