Priljubljene svetopisemske vrstice iz Ruma 6

Deli

Ian su ka igbayad to salo to mgo otow, ka kamatayon to waro katamanan. Di ka igbogoy to Magboboot no waro bayad, ian ka kouyagan no waro katamanan no ogligkat to ogkasagboka kinow ki Hisu Kristu.

Ian su konad on og-awoson no ogkaalap ki to mgo maroot no koiniatan su ka ogpakamaroyow kanta dio to tangkaan to Magboboot, kono ogligkat to pogtuman ta poron to Balaod, di ogligkat atag to pogkohoy-u to Magboboot kanta.

No to pogbautismu kanta, songo nalagkos kid kandin no ingkasabal on ka lawa rin no namatoy. No ian su oyow songo ogpakalagkos kinow on ki Kristu to pogkouyag din to waro katamanan su ligkat to kabogbogan to Amoy rin no ka Magboboot. Ian su oyow ogmaroyow on ka mgo batasan ta no ogkaayun on to sikan no iam no pogkouyag ta.

Ka mgo sumpul to soini no lawa ta, kono ta igbogoy no ighimu to maroot. Di atag, igbogoy ta to oyow ka Magboboot ka ogboot kanta su oyow ka mgo sumpul to lawa ta ka ighimu ta to maroyow, su sikan ian ka litos no oghimuon ta su naawo kid on to kamatayon no nabogayan kid on to iam no pogkouyag ta.

No nataga ki, su inlansang si Hisus dio to krus oyow ogkamatoy, songo nounawa to nohimatayan ka tahan no pogkootow ta no ogkoiniat to ogpakasalo. No ian to oyow ogkaawo on ka tahan no goinawa ta to oghimu to mgo maroot. No ian su oyow kono kid on ogkabootan to sikan no tahan no goinawa ta no ogkoiniat to salo.

Nò, ogkounawa rod kaniu. Og-awoson now to ogdoromdom to nalagkos kinow on to pogkamatoy ni Hisu Kristu no warad on labot ta ka poghimu to mgo maroot. Di duon on atag ka iam no pogkouyag ta no nigligkat ki Hisu Kristu. No og-awoson no ogkasayo ka Magboboot su ligkat to ogmaroyow on ka mgo batasan ta.

Nokoy ka ignangon ta? Ko dakol ka pogkohoy-u to Magboboot kanta, og-inso a ko maroyow ko ogparagason ta ro ka maroot no mgo batasan ta oyow ogkatimulan do ka pogkohoy-u rin kanta? Kono man su tongod to mgo maroot no batasan ta, warad on poron labot ta su ogkounawa ki to otow no namatoy no konad on ogpokohilabot to sikan.

su nataga ki, ko nokoy ka ogpaag-agaran ta, sikan ian ka ogpokouripon kanta no ian ogpakaboot kanta. No ko duon otow no ogpaagad-agad to mgo maroot no koiniatan din, ogkohimu on no ka sikan no batasan din no maroot ka ogpakaboot kandin. No ka ogkoumaan to sikan, ogkamatoy sikandin to waro katamanan. Di ko duon otow no ogpaagad-agad to Magboboot, ka Magboboot ka ogpakaboot to sikan no otow, no ka ogkoumaan to sikan, ogkohimu on sikandin no maroyow dio to tangkaan to Magboboot.

Nokani, nounawa kow to mgo uripon to mgo salo. Di kuntoon, konad on. Sikan ian to ogsayoon ku ka Magboboot su ligkat to tu-tuu ian no goinawa now, nigpaagad-agad kow on to sikan no ingkaanad kaniu no tu-tuu ian tongod to Magboboot. Nigbalukas din on sikaniu no naawo kow on to pogkouripon now to mgo salo, woy nohimu kow on no mgo sakup din. No kuntoon, oghimu kow on to maroyow.