If you would like a copy of this version please contact info@davaraudiobibles.org

Kayort New Testament, CC-BY-SA-4.0, The Love Fellowship. Kayort New Testament Audio Bible, CC-BY-SA-4.0, Davar Partners International, The Love Fellowship, 2022.

Kayort New Testament

Kayort (केवट) Bible by The Love Fellowship is licensed under Creative Commons Attribution-ShareAlike 4.0 License.

तब शैतान येशूके परीक्षा करै कहिके पवित्र आत्मा येशूके सुनसान जगहमे ल्यागेलै। सुनसान जगहमे येशू चालीस दिन आर चालीस राततक कुछु नैखैल्कै। तब ओकरा खुब भुख लाग्लै। तब शैतान ओकरलगत आबिके कहैल्कै, “अगर तुहें परमेश्वरके बेटा छह ते यी पत्थलसिके रोटी बनै कहिके आज्ञा द्याके साबित कर, आर तुहें ख्या सकह।” मगर येशू जबाब देल्कै, “धरमशास्त्रमे लिख्ल छै,
‘आदमी खाली रोटीसे ही जिन्दा नैरहैछै,
मगर ऊ परमेश्वरके कहेल सभे वचनके मानिके जिन्दा रहतै।’ ”
तकरबाद शैतान येशूके पवित्र सहर, यरूशलेम सहरके परमेश्वरके मन्दिरके उच्च जगहमे लज्याके खडा करैल्कै। आर ओकरा कहैल्कै, “अगर तुहें परमेश्वरके बेटा छह ते, एत्तेसे निच्चा फानिके साबित कर, कि तोरा चोट नैलाघौं, कहिनेकी धरमशास्त्रमे यी लिख्ल छै:
‘परमेश्वर तोर रक्षाके लिए आपन स्वर्गदूतसिके आज्ञा देथौं,
आर तोर पैरीमे पत्थल ल्याके चोट नैलागै कहिके ऊसब तोरा लोकी लेथौं।’ ”
येशू ओकरा कहैल्कै, “धरमशास्त्रमे यी भी लिख्ल छै:
‘तोरा आपन परमेश्वरसे यी साबित करवाबैके कोशिश नैकरना चाही कि ऊ आपन वादाके पुरा कर्तै।’ ”
फेर शैतान येशूके एकटा बडका पहाडमे लज्याके संसारके सभे राज्य आर ओकर शान-शौकत ओकरा देखैल्कै। आर ओकरा कहैल्कै, “अगर तुहें हमर आगुमे झुकिके हमर आराधना कर्भ ते, यी सभे कुछु हमे तोरा द्या देभौं।” तब येशू ओकरा कहैल्कै, “शैतान, तुहें हमर लगतसे दूर भ्याजो! कहिनेकी धरमशास्त्रमे लिख्ल छै:
‘तुहें खाली आपन प्रभु परमेश्वरके आगुमे झुकिके ओकर आराधना करिहैं आर खाली ओकरे सेवा करिहैं।’ ”
तब शैतान येशूके छोडिके चल गेलै आर स्वर्गदूतसब आबिके ओकर सेवा कैल्कै।


बप्तिस्मा दिएवाला यूहन्नाके पक्डीके जेलमे ध्या देल्कै कहिके सुन्लके बाद येशू यहूदिया प्रदेश छोडिके गालील जिलाके नासरत गाँवमहर वापस चल गेलै। तकरबाद ऊ नासरत गाँव छोडिके कफर्नहुम गाँवमे रहे लाग्लै। कफर्नहुम गाँव उटा इलाकामे समुन्दरके किनारमे बस्ल रहै, जते जबुलुन आर नप्तालीके कुलके आदमीसब रहते रहै। परमेश्वरके वक्ता यशैयाद्वारा बहुते पहेला कहेल परमेश्वरके वचन पुरा हुऐले एरं भेलै:
“यर्दन लद्दीके उपार गालीलके समुन्दरमहर ज्यावाला रस्तामे भेल जबुलुन आर नप्तालीके कुलके इलाकामे रहेवाला आदमीसब आर
गालील जिलामे रहेवाला गैर-यहूदी आदमीसब!
परमेश्वरके चिन्हले बिना अनहारमे रहेवाला आदमीसब एकटा महान ज्योतिके देख्तै।
यी ज्योति ऊ आदमीसिके उद्धारके रस्ता देखैतै जे परमेश्वरके चिन्है बिना जीवन बिताबैछै आर अनन्तकाल तक मौतके रस्तापर छै।”
उहे समयसे येशू प्रचार कर्ते कहे लाग्लै, “पाप करैले छोड आर परमेश्वरके तरफ मन लगा, कहिनेकी स्वर्गके राज्य नज्दिक ऐल छै।”


एक दिन, गालील समुन्दरके किनार द्याके जैबेरियाँ येशू पत्रुस कहेल ज्यावाला सिमोन आर ओकर छोटका भ्या अन्द्रियासके समुन्दर किनारमे जाल फेक्ते देखल्कै, कहिनेकी ऊसब मछमारा रहै। तब येशू ओकरासिके कहैल्कै, “हमरसंगे या, आर हमर चेला बन; आब तुहें माछ नैमार्भैं, मगर हमे तोरा सिखैबौ कि आदमीसिके हमर चेला बनैले केरंके सिखाबे पडैछै।” तब ऊसब तुरन्ते आपन माछ मारेवाला काम बन्द कैल्कै, आर ओकर चेला बनैले ओकरसंगे गेलै। तकरबाद ऊसब ओत्तेसे जैते-जैते येशू जब्दियाके दीटा बेटा, याकूब आर यूहन्नाके देखल्कै। ऊसब आपन बाबु जब्दियाके संगे नावमे बैठिके आपन जाल तैय्यार कर्ते रहै। येशू ओकरासिके भी बोलैल्कै। तब तखनिहैं ऊसब नाव आर आपन बाबुके नावमे छोडिके येशूके चेला बनैले ओकरसंगे चल गेलै।


तब येशू यहूदी आदमीसिके सभाघरसिमे शिक्षा सिखैते, परमेश्वरके राज्यके खुश-खबरी प्रचार कर्ते आर आदमीसिमे भेल सभे किसिमके रोग-बेमार आर शारीरिक कमजोरी ठीक कर्ते सारा गालील जिलाभर घुम्लै। सेल्याके गालील जिलाके उत्तर दिशाके सिरिया प्रदेशभर ओकर चर्चा फैल्लै। आदमीसब सभे किसिमके रोग आर पिडासे सतैल रोगी-बेमारीसिके येशू लगत आनल्कै। ओकरासिमेसे कक्रहौ भूत लाग्ल रहै, कक्रहौ मिर्गी लाग्ल रहै आर कक्रहौ लखुवा मार्ल रहै। आर येशू सभैके ठीक कैल्कै। तब गालील जिलासे, डेकापोलिसके इलाकासे (जकर मतलब दशटा सहर), यरूशलेम सहरसे, यहूदिया प्रदेशसे आर यर्दन लद्दीके उपारके इलाकासे आदमीसिके बडका भीड येशूके पाछु लाग्लै।

Poslušaj मत्ती 4