Text: © New Life Computer Institute Audio: ℗ 2020 Hosanna

Ravula NLCI (NT) Non Drama

Ravula NLCI (NT) Drama

ഈ കാരിയമൊക്ക പറേഞ്ചുകവുഞ്ചിച്ചു ഏച്ചു ഗെലീലെ നാടിലിന്തു ഓറുദാപുവേന്റ അക്കരെകീന്റ ജൂദിയെ നാടുക്കു പോയിത്തു. ബലാബരി മയിച്ചെരമു അദുന്റ ബൊവ്വെയെ പോനരു. അയിരളെയൊക്ക അദു അവുടെബെച്ചു ചാരിമാടിത്തു.
എമ്മടെക്കു കുറെ പരീച്ചെമാരുവ ഏച്ചുവാത്തെക്കു ബന്തിച്ചു അദുനെ ചോദണെ ചെയിവ പേച്ചാണരു. അദുനെ ബാക്കിലി കുടുക്കുവബേണ്ടി അയിര ഇങ്ങാണെ കേട്ടരു: “എന്ന കാരിയകോണ്ടങ്കില ഒരുത്തെയ് അയിന്റ റാട്ടിനെ ബുട്ടുകാന്റു പോന്റെയെയ് നമിന്റ നേമത്തെക്കു ഒപ്പിനെനല?”
അയിങ്കു ഏച്ചു അയിരണ്ടൊന്റ: “ഒക്കാ മാടിന ഗളിഗെലിയെ ഈച്ചിര മയിച്ചെരളെ ‘ആണെനുമു പെണിയത്തിമാച്ചു മാടിത്തു’ എന്റു നീങ്ക ഈച്ചിരന്റ ബുക്കിലി ബായിച്ചു കീന്റെരിയില്ല. ‘അയിനെകോണ്ടു ഒരു മയിച്ചെയ് തന്റ അപ്പെന്റൊന്റമു അവ്വെന്റൊന്റമു ഇരാദെ തന്റ റാട്ടിന്റൊന്റ ബദുക്കുവൊയ്. അങ്ങാണെ അയിര രാണ്ടാളുമു ഒരു മേലാവൊരു’ എന്റുമു ഈച്ചിര പറേഞ്ചുകീന്റു. അങ്ങാണെ ഇഞ്ഞി അയിര രാണ്ടല്ല, ഒരാളാന്റു. അയിനെകോണ്ടു ഈച്ചിര ഒന്റമാടിനെരളെ മയിച്ചെയ് രാണ്ടാച്ചു തെറ്റിപിരിപ്പനാഗയ്” എന്റു പറേഞ്ചു.
അയിങ്കു പരീച്ചെമാരുവ ഏച്ചുന്റൊന്റ: “പിന്നെ എന്നെനെകോണ്ടു ഒരുത്തെയ് ബുട്ടുകാന്റുപോന്റ കടെലാച്ചു എവുദികൊടുത്തിച്ചു റാട്ടിനെ ബുട്ടുക്കപോയിക്കോവ മോച്ചെന്റ നേമത്തി പറേഞ്ചുകീന്റെയെയ്” എന്റു കേട്ടരു.
അയിങ്കു ഏച്ചു അയിരണ്ടൊന്റ: “നിങ്കട മന കല്ലുപല്ലത്തെനാന്റു. അയിനെകോണ്ടാന്റു മോച്ചെ നിങ്കടൊന്റ റാട്ടിയളെ ബുട്ടുകാന്റു പോയിക്കോവ പറേഞ്ചെയ്. എന്റെങ്കി ഈച്ചിര ഈ ലോഗ മാടിനപ്പൊ ഇങ്ങാണെയൊന്റുമു അല്ലായിന്തയ്. എന്റെങ്കി നാനു നിങ്കടൊന്റ പറേന്റെയ്: ഒരുത്തെയ് തന്റ റാട്ടി ആരുന്റൊന്റെങ്കില ചുള്ളത്തിന്റെന്റ പേരിലല്ലദെ അവോളെ ബുട്ടുകാന്റു ബേറൊരുത്തിനെ കോന്തെങ്കി അയിനു ചുള്ളത്തിന്റ ഒരുത്തെനാന്റു.”
അയിങ്കു ബൊവുകെട്ടിയ ഏച്ചുന്റൊന്റ: “റാട്ടിന്റമു റാളെന്റമു ഇടേലി ഇങ്ങാണത്ത നേമമൊക്ക ഇപ്പായിത്തെങ്കി കനിയള കവുഗത്തെനാന്റു നല്ലെയെയ്” എന്റു പറേഞ്ചരു.
അയിങ്കു ഏച്ചു അയിരണ്ടൊന്റ: “ഈ കാരിയമൊക്ക ഗൊത്തുമാടുവ ഒക്കായിക്കുമു പറ്റയ്. ഏനെ ഗൊത്തുമാടുവബേണ്ടി ഈച്ചിര ആരുനെയൊക്ക ചഗായിച്ചുകീന്റോ അയിരക്കു മാത്തിരമെ ഏനെ ഗൊത്തുമാടുവ പറ്റിന്റെയെയ്. മയിച്ചെമാരുവ കനിയള കവുഗദിപ്പ പലേ കാരിയമു കീന്റൊയ്. അമ്മെന്റ ബാറിലിന്തു പുറാന്തപ്പൊതന്നെ ആണുമു പെണ്ണുമു കെട്ടെരളായി പുറാന്തെര കീന്റൊരു. മയിച്ചെരതന്നെ ആണുമു പെണ്ണുമു കെട്ടെരളാക്കിനെരമു കീന്റൊരു. ചൊറുഗനാടിലെരളാവബേണ്ടി കനിയള ബേണ്ട എന്റു മനാമാടിനെരളുമു കീന്റൊരു. ഈ കാരിയമൊക്ക കേട്ടിപ്പ മനാകീന്റെര കേട്ടിക്കൊട്ടു.”

ഏച്ചു മക്കണ്ട മേലുക്കു കയിബെച്ചു പുറാത്തിപ്പബേണ്ടി കുറെ മയിച്ചെര തങ്കട മക്കളെ അദുവാത്തെക്കു കോന്തരു. അയിനെ മെലേഞ്ചിച്ചു ബൊവുകെട്ടിയ അയിരളെ പഡാക്കിനരു.
അയിങ്കു ഏച്ചു ബൊവുകെട്ടിയണ്ടൊന്റ: “ചെറിയ മക്കളെ എന്നാത്തെക്കു ബരുവ ബുടുമി. അയിരളെ തടുക്കൊണ്ടമി. എന്നെഗെന്റെങ്കി ചെറിയ മക്കളെപല്ലെ കീന്റെരളെയാന്റു ഈച്ചിര ചൊറുഗനാടിലെരളാക്കിന്റെയെയ്.” പിന്നെ ഏച്ചു ആ മക്കക്കു നല്ലെയെയ് ബരോട്ടെന്റൊണ്ടു അയിരണ്ട മേലുക്കു തന്റ കയിബെച്ചു. അയികവുഞ്ചിച്ചു അദു അവുടിന്തു പോയിത്തു.

ഒരു ജിന ഒരു ബാലിയകാറെയ് ഏച്ചുവാത്തെക്കു ബന്തിച്ചു അദുന്റൊന്റ: “ഗുരുവേ, എപ്പൊണെക്കുമു ബദുക്കുവകീന്റ ഉഗിരു കിട്ടുവബേണ്ടി നാനു എന്ന നല്ലകാരിയ ചെയ്യൊണു” എന്റു കേട്ടയ്.
അയിങ്കു ഏച്ചു അയിന്റൊന്റ: “നല്ലകാരിയത്തിനെപറ്റി എന്നെഗു നീ എന്റൊന്റ കേളുക്കിന്റെ. ഈച്ചിര ഒരുത്തെയ് മാത്തിരമെ നല്ലദായി കീന്റെയെയ്. നീക്കു ആളാഗത്ത ഉഗിരു ബേണിക്കി ഈച്ചിരന്റ നേമമൊക്ക കേട്ടിന്തുനടാക്കൊണു” എന്റു പറേഞ്ചു.
അയിങ്കു അയിനു: “ഏ നേമമാച്ചു നാനു കേട്ടിന്തുനടാക്കൊണ്ടെയെയ്” എന്റു കേട്ടയ്.
അയിങ്കു ഏച്ചു അയിന്റൊന്റ പറേഞ്ചു: “ആരുനെമു കൊല്ലുവനാഗയ്, ചുള്ളത്തുവനാഗയ്, കള്ളുപ്പനാഗയ്, കള്ളതെളിവു പറേവനാഗയ്, അപ്പെനെമു അവ്വെനെമു ബലിയെരളെന്റു ബെക്കൊണു, നീ ഇഞ്ഞെ ചിനേഗിക്കിന്റപല്ലെ ബേറെകീന്റെരളെമു ചിനേഗിക്കൊണു.”
അയിങ്കു ആ ബാലിയകാറെയ്: “ഈ നേമമൊക്ക നാനു കേട്ടിന്തുനടാക്കിന്റെയ്. ഇഞ്ഞി നാനു ഏ നേമമെങ്കില കേട്ടിന്തുനടാക്കൊണ്ടെനായി കീന്റൊനോ” എന്റു കേട്ടയ്.
അയിങ്കു ഏച്ചു അയിന്റൊന്റ: “ഒക്കാ കാരിയത്തിമു തിഗേഞ്ചെനായിപ്പ നീക്കു അലാപ്പിന്തെങ്കി നീ പോച്ചു നീക്കു കീന്റെനൊക്ക മാറികാന്റു ആ പയിച്ചെ പാവപട്ടെരക്കു കൊടു. എന്റെങ്കി ചൊറുഗത്തി നീക്കു നിദി ഉണ്ടാവൊയ്. പിന്നെ നീ എന്റ ബൊവ്വെ ബാഗു” എന്റു പറേഞ്ചു.
ഏനെ കേട്ടിന്തിച്ചു ആ ബാലിയകാറെങ്കു ചാല ചങ്കടമാച്ചു അയിനു അവുടിന്തു പോയികട്ടയ്. എന്നെഗെന്റെങ്കി അയിനു തട്ടിയൊരു പണാക്കാറെനായിന്തയ്.
പിന്നെ ഏച്ചു തന്റ ബൊവുകെട്ടിയണ്ടൊന്റ പറേഞ്ചു: “ചൊറുഗനാടിലെരളാവബേണ്ടി തങ്കളെതന്നെ ഈച്ചിരന്റ കയിക്കു ബുട്ടുകൊടുക്കിന്റെയെയ് പണാക്കാറെരക്കു ചാല ബുദ്ദിമുട്ടുകീന്റ കാരിയമാന്റു എന്റു നാനു നേരാച്ചുമു നിങ്കടൊന്റ പറേന്റെയ്. പണാക്കാറെര ഈച്ചിരന്റ നാടിലെരളാന്റെനെമുകാട്ടി ഒട്ടഗ ജൂഞ്ചിന്റ ഓട്ടെകായെ കടാക്കിന്റെയാന്റു എളുപ്പ എന്റു നാനു പിന്നെമു നിങ്കടൊന്റ പറേന്റെയ്.”
ഏനെ കേട്ടിന്തിച്ചു ബൊവുകെട്ടിയ അദിഗമെ അന്തബുട്ടൊണ്ടു: “അങ്ങാണാനെങ്കി ആരുക്കു രെച്ചപടുവ പറ്റുവൊയ്” എന്റു കേട്ടരു.
അയിങ്കു ഏച്ചു അയിരളെ മെലേഞ്ചൊണ്ടു പറേഞ്ചു: “ഈ കാരിയ മയിച്ചെരക്കു ചെയിവ പറ്റയ്. എന്റെങ്കി ഈച്ചിരങ്കു ഒക്കാ കാരിയമു ചെയിവ പറ്റുവൊയ്.”
അയിങ്കു പത്തുറോച്ചു ഏച്ചുന്റൊന്റ കേട്ടയ്: “നാങ്ക എങ്കക്കു ഇന്തെനൊക്ക ഇട്ടെറിഞ്ചുകാന്റു ഇഞ്ച ബൊവ്വെ ബന്തുകീന്റ. അയിനെകോണ്ടു എങ്കക്കു എന്നെയെയ് കിട്ടുവൊയ്?”
അയിങ്കു ഏച്ചു ബൊവുകെട്ടിയണ്ടൊന്റ പറേഞ്ചു: “ഈച്ചിര ലോഗത്തിനെ പുദിയെനാക്കുവടെക്കു മയിച്ചമഗെനാച്ചു ബന്ത നാനു അദിഗാരകീന്റ ബുളാങ്കിന്റ റാജകച്ചാലെലി ഉളേപ്പെയ്. എമ്മടെക്കു എന്റ ബൊവ്വെ ബന്ത നീങ്കളുമു റാജകച്ചാലെലി ഉളേച്ചൊണ്ടു പന്തിരാണ്ടു ഇച്ചുറായേലു കുലാത്തിനെമു ബിദിപ്പെരി എന്റു നാനു നേരാച്ചുമു നിങ്കടൊന്റ പറേന്റെയ്. എന്റ ബൊവ്വെ ബരുവബേണ്ടി കുള്ളുനെയോ, അണ്ണെരളേയമക്കളെയോ, അപ്പെനെയോ, അവ്വെനെയോ, മക്കളെയോ, ജാഗത്തിനെയോ ബേണ്ടെന്റു ബെക്കിന്റെങ്കു അയിനൊക്ക നൂറുമടാങ്കായി തിരിച്ചുകിട്ടുവൊയ്. അയിങ്കു ഈച്ചിരന്റൊന്റ എപ്പൊണെക്കുമു ബദുക്കുവകീന്റ ഉഗിരുമു കിട്ടുവൊയ്. എന്റെങ്കി ഇപ്പൊ ഒക്കായിക്കിന്തുമു മുന്തിനെരളാന പലേ മയിച്ചെരളുമു ആ ചമേയത്തി താവുന്തെരളാവൊരു. ഇപ്പൊ ഒക്കായിക്കിന്തുമു താവുന്തെരളാന പലേ മയിച്ചെരളുമു ആ ചമേയത്തി മുന്തിനെരളുമു ആവൊരു.”

Poslušaj മത്തായി 19