Zapotec, Aloápam

La laniaguaba nua ute Jesús die yuꞌe neda lheꞌe ca yu atta te ca xua xuxtila la sá redí le ca benni Israel. Ca benni rudheti ca tisa ruleꞌe nna bisía utuncabi. Lacabi nna uchecuttebacabi iqui ca xuaha, atti uxubitteba las nácabi benniha qui utocabi. Atti biláni ca fariseo nu run ca biꞌiniha nna ráttebacana Jesús:
—¡Begüiarga! Ca benni rudheti ca tisa ruleꞌelu-na, runcana nu bittu gaꞌana unri la sá redí leri riꞌi ca benni Israel.
Ttiaca Jesús nna ráttebe cana:
—¿Si bittuba chi belabale lo ca sitsi gue Tata Do Iyyabaaha, atta rixxiꞌa gue nu beni David ttu libe atti utunbi lenbi ca nu dia lenbiha? David nna utaꞌabi lheꞌe yotu gue Tata Do Iyyabaaha, guaxxíbi ca ttaxtila chi anca leꞌa gue Benniha sia nía, qui utobi lenbi ca benni dia lenbiha. Labi nna läga dica gobi ca ttaxtilaha, niguaba ca benni dia lenbiha lhe cumu sunruba ca bixxudiha gaꞌana gocabi benniha. ¿Si bittuguaba chi belabale lo ca ley gue Tata Do Iyyabaaha bocaꞌane len Moisés atta rá dequi bittu dica unri sina ca sá gaꞌana edí leri? Ttiaca ca bixxudiha nna runbacana sina lheꞌe yotu gue Benna la sáha. Lacana nna läga ancacana nu te tulha gueni gue nu runcana. Neti ria le nna xxenirla ra le Benni du lenle-ni atti yotu-na. Lebiꞌi nna läga ritedeenle gue nu rá lo ca yitsi gue Tata Do Iyyabaaha atta rá: “Neti nna raca lasia satúa lele ca benni, lä riga gualutti ca nimala qui utele úna lo becoa quia.” Tirca ritedeenle gue unní nna lania nna läga udelha iyyale ca benni bittu tulha gueni te. Cumu neti Benni unbiyuu daa iyyabaaha, anca Benni banani sá redí leri-ni.
Dequide utee Jesús nía, utaꞌattebe lheꞌe yoꞌo atta rudheti ca benni Israel seꞌe nía ca tisa gue Tata Do Iyyabaaha. Nía du ttu unbiyuu xi ttu lhaꞌa náni. Qui aca udelhiyyacana Benniha nna unnaba tisattebacane rácane:
—¿Si gua dica eyonri ttu benni rani sá redí leri?
Jesús becabie re cana:
—Gansi ttu carneꞌe guele iyinnina lheꞌe ttu pozo sá redí leri, ¿läba ganna saleattebale nua nía? ¿Si läba dacarla ttu benni atti ttu carneꞌe? Larcala nna guagaꞌanaba uni benni nu anca tsee sá redí leri.
Laniala nna re unbiyuuha:
—¡Belhí nálu!
Unbiyuuha nna belhítteba náni. Nániha nna beacattebana attiba ancaba attu lhaꞌa nániha. Ttiaca ca fariseo seꞌe nía, cuantusiba beríacana lheꞌe yoꞌoha, udulottebacana beguila lecani gaxasná uncana utticana Jesús.

Atti chi bina Jesús gue nu rele ca nua uncana nna bedáttebe nía. Ixeru benni denocane. Lee nna iyába ca nu raniha beonie. Nianna tsitsiba belise ca nua qui bittu quixxiꞌacana gue nuxa anque. Anía uca qui guaxxína ca tisa bete Tata Do Iyyabaaha utixxiꞌa profeta Isaías atti rábi:
Nii du Ben-ni ixuu lo sina quia.
Ben-na chi becueea.
Lee racatia guee, len lee do tseea lhe.
Neti nna unia qui tsuꞌu Espíritu quia lheꞌe cuerpu guee.
Lee nna tsequie quixxiꞌanie iyárechaba benni gue gaxasná unia qui salía tseen cana.
Läga itilha tisa Benniha nuxa leni, bittuguaba tsequie ubesiꞌa lhe.
Nuttuguaba nu iyieninna tsiꞌe lo ca neda-na lhe.
Benniha nna läga ulhuxe ca benni bittu ra xxeni lecani,
bittuguaba bi udhaque ca benni chi ratu lecani lhe.
Axta qui dhee unie aca nu tsee itúba yies lo yu-ni.
Lania nna iyáxeaba ca benni seꞌe yies lo yu-ni uxxen lecani Ben-na.


Nianna ca benni nna uchecana ttu benni yuꞌu be xxegüi lheꞌe cuerpu gueni lo Jesús. Unnuha nna ancana biría, xua loni lhe. Jesús beonbe nua, larcala nna bennebana lhe belábinna lhe. Iyába ca benni bebanquinna gue nu ben Jesús, nianna rácana:
—¿Si läba Benniba nua anque Benni datía David?
Ttiaca atti bienin ca fariseo nu rá ca nua nna ráttebacana:
—Nu rinnabia ca be xxegüi-nba begüeena unná derechu qui ebeana ca be xxegüi yuꞌu lheꞌe cuerpu gue ca benni.
Jesús yuxeabe nu rulaba le ca nua, nianna ráttebe cana:
—Gansi ca benni seꞌe lheꞌe ttu yiesi rinnabia xeni ilaꞌa lheꞌe loescani de ritilhacana, yiesi rinnabia xeniha nna lhuxabana. Anáguaba gansi ca benni seꞌe lheꞌe ttu yiesi o lheꞌe ttu yoꞌo ilaꞌa lheꞌe loescani de ritilhacana, ca unnuha nna lhuxabacana. Anáguaba gansi nu xxegüiha ebeana attu loesi xxegüi-ni, ca unnuha nna seꞌe laꞌaba len loescani ganniha. Gansi anía anca, ¿galasná run nu xxegüiha qui rusiguirna rinnabiana ganna? Gansi neti rebeaya ca be xxegüi-na de rute Beelzebú-na derechu quia, ca benni rudheti ca tisa ruleꞌele-na nna ¿si nu xxegüiha guaba rutena derechu gue ca unná qui rebequicana ca be xxegüi-na? Larcala nna la ca benni ruleꞌenlenba inná dequi lebiꞌi nna läga gualínle gue nu rále-na. Ttiaca gansi neti rebeaya ca be xxegüi-na lheꞌe ca benni cumu de raca len Espíritu gue Tata Do Iyyabaaha neti, lania nna unní ruleꞌe lo chi udulo Tata Do Iyyabaaha rinnabie lebiꞌi.
’Nuttuguaba nu te dhana gaꞌana lheꞌe lisi ttu unbiyuu rea lasi qui sattúana bixa te gue nua, gansi bittuba iyaxxu lola unbiyuu rea lasiha qui ixxícana. Anía liba nna dhaa ubanaha lhanana nu te lheꞌe lis nua.
’Nu bittu du len neti nna läga raca uyú nua neti. Nu bittu runna neti yuda gaxtu adí benni qui udaxxucana neda gue Tata Do Iyyabaaha nna ruríalala nua ca benni.
’Denuala nna ria le, guadíba Tata Do Iyyabaaha elha xen lasi gue iyába ca tulha gue ca benni, gue nu rinne güeecana lhe ttiaca gansi nuxa inne güena gue Espíritu guee, unnuha nna tsa lärgabi elha xen lasi gueni te. Nuxaba benni gansi inne güena quia, neti Benni unbiyuu daa iyyabaaha, guadíba Tata Do Iyyabaaha elha xen lasi gueni, ttiaca gansi nuxa inne güena gue Espíritu guee, unnuha nna tsa lärgabi elha xen lasi gueni te, ni yies lo yu atta seꞌeri nnanna lhe ni atta esínriha lhe.
’Ttu ya xixxi tsee nna nu tseeguaba ribía gueni, nu bittu ancana yaga tsee nna lägabi nu tsee ribía gue nua. Larcala nna la nu ribía lo yagahaba ruleꞌe lona bixa yaga nua. ¡Lebiꞌi, ca nu datía belha! ¿Tti modu aca innele nu anca tsee, lebiꞌi nna ancabale nu runi nu lä anca tsee? Cumu nu re lheꞌe lastoobale unnuhaba rinnele. Benni runi nu anca tseeha nna nu anca tsee re lheꞌe lastoonihaba rinnena. Benni runi nu lä anca tseeha nna nu lä anca tsee re lheꞌe lastoonihaba rinnena. Ttiaca neti nna ria le, gansi chi bisía sá un Tata Do Iyyabaaha elha uxtisi gue ca benni, iyábacana utsá ducana qui quixxiꞌacana gue iyába ca tisa lä dica ixuu unnecana. Cumu la ca tisa biría roꞌoluhaba udelha iyyacan lu, la ca unnuhaguaba uni exúlu lhe.


Laniala nna ttulhe ca fariseo lencana ca nu ruleꞌe nu rá lo ca ley bocaꞌana Moisés rácana Jesús:
—Maestro, raca letu ilentu unlu ttu milagru nu uleꞌe lo gansi gualí Tata Do Iyyabaaha udhelhe lu.
Jesús becabie re:
—Lebiꞌi, ca benni runi nu lä anca tsee seꞌe nnanna nu chi bedhá iquini Tata Do Iyyabaaha lhe rinnabale unia ttu milagru nu uleꞌe lo gansi gualí Tata Do Iyyabaaha udhelhe neti, ttiaca bittu uleꞌetia le attu milagru subi gan läba loesi milagru uca len profeta Jonás. Cumu attiba Jonás uyuꞌubi tsunna ubisa nna tsunna ela nna lheꞌe ttu belha xxeni, aníaguaba neti Benni unbiyuu daa iyyabaaha, tsuꞌuguaba tsunna ubisa nna tsunna ela nna lhiꞌu yu. Gansi chi beni Tata Do Iyyabaaha elha uxtisi gue ca benni seꞌe nnanna ca benni useꞌe lheꞌe yiesi Nínive esíaguacana qui udelhiyyacana, lebiꞌi ca benni seꞌe nnanna. Cumu boduxiyyaban ca unnuha bodaxxucana neda gue Tata Do Iyyabaaha atti bienquinna ca tisa utixxiꞌa Jonás. Nnanna nna gualgüiarga, niba len lebiꞌi du ttu benni ra xxenru leni atti Jonás, lebiꞌi nna bittu roduxiyyanle. Anáguaba nuila unnabia daca sur, esíaguana gansi chi bisía sá un Tata Do Iyyabaaha elha uxtisi gue ca benni, qui udelhiyyana lebiꞌi ca benni seꞌe nnanna. Cumu nuilaha nna lheꞌe yiesi nu reru idittuli udána güiana atta do Salomón qui bedo nagani gue elha rieni gue nua, nnanna nna gualgüiarga, niba du len lebiꞌi ttu benni ra xxenru leni atti Salomón, lebiꞌi nna bittu rudo nagale gue nu ria.
’Gansi chi rería ttu be xxegüi lheꞌe cuerpu gue ttu benni, riattebana lo yu bisi atta nuttu benni seꞌe reguilana gaxa etaꞌana qui edí leni, ttiaca tsa bittu ratiꞌana. Nianna innána: “Eyequibalha neti lisia atta beríaya.” Atti eyequina esínna lania nna sattiꞌana benni beríana lheꞌeniha ancana attiba ttu yoꞌo chi luba lheꞌeni lhe chi yapa te xea lheꞌeni lhe. Lana nna tsiattebana saxxína a gasi (7) ca be xxegüi runru adí nu lä anca tsee atti lana. Nianna gaꞌatteba iyábacana tseꞌecana lhiꞌu lheꞌe benni beríana lheꞌeniha. Lania nna adíla satsa udú le nua attichula atti du leni primeroha. Aníaguaba satele, lebiꞌi, ca benni runi nu lä anca tsee seꞌe nnanna.


Sna duba Jesús rinne lanie ca benni seꞌe nía, atti chi bisína nan gue Benniha lenbi ca betsi Benniha. Níaba useꞌecabi lheꞌeliꞌa gue yoꞌoha. Lacabi nna raca lecabi inne lencabi Benniha. Ttu ca biꞌini seꞌe nía nna utixxiꞌaquinbi Jesús rácabi Benniha:
—Ni nan gueluha lenbi ca betsiluha lhe seꞌe lheꞌeliꞌa gue yoꞌo-ni. Lacabi nna raca lecabi inne lencabi lu.
Benniha nna becabittebe re benni utixxiꞌaha:
—¿Nú nua rálu dequi anca nan quia lhe betsia lhe?
Nianna bedotteba xbiná Jesús ca benni rudheti ca tisa ruleꞌe, atti re:
—Ca unní liba anca nan quia lhe betsia lhe cumu iyába ca benni rudo tisa gue Tata quia do iyyabaaha, ancacana nan quia lhe betsia lhe dana lhe.

Poslušaj San Mateo 12