MATIEE 'BƆGƲ 2
2
'Bɔgʋjingwa -wa 'kpɩa-a -zɛlɩ yɛ Zezwi yɩlɩ kwla'a ji
1Laa do'o nɩkpɛ wa la-a Elodɩ nyini la-a Zwidee dʋdʋ, -bha wa gwalɩ-a Zezwi -ma Zwidee -glɔ wa la-a Bɛtɩlɛmö. Wa gwalɩɔ-a, -zɛlɩjingwa 'bhönɩ-ɛ -ma 'ylʋɔ gluwlʋnʋbhɛyɩ 'n wa ji-e -ma Zelwizalɛmö ji. 2Wa nyini-e -ma, 'n wa ji-a nɩkpa ngli 'jɩbha naa: “'Zwiföaa dʋdʋnyininyɔ wa gwalɩ-a 'lili'i, la ɔ -wʋ-a 'nɩ? -Ma 'ylʋɔ gluwlʋnʋbhɛyɩ -ma -a yɩlɩ-a ɔ -zɛlɩjeyi, wʋ yɛ -a ji -bha -a 'kɔ bʋbɔ.” 3Dʋdʋnyininyɔ Elodɩ 'nʋ-a wɛlɩ la'a, ɔ -yɛ Zelwizalɛmöö nɩkpa 'bhuo 'sɔ dlɩ-ɩ wʋlɔnʋʋa-a 'mö. 4-Bha -gaganɩlɩ'ɩ 'n ɔ ji-a -Lagɔbʋbɔngwaa 'bhitɩbhangwa -yɛ -Lagɔɔ gböö nglipangwa 'sɔ 'wlu 'titanɩ, 'n ɔ jua-a -glɔ -mʋʋ 'wʋ wa ji la-a Puanyɔ -ɔ -Lagɔ -sa-a -bha gwalɩnɩɛ yɛ ngli 'jɩbha. 5Wa nɛ -bha ɔ de naa: “Ma'a Zwidee dʋdʋ -gömöö -glɔ wa la-a Bɛtɩlɛmö -bha. -Wʋʋ yɛ-a, sa'a -Lagɔɔ 'mögbanɩnyɔ 'cɛlɩ-ɛ sa'a -ma ɔ -Lagɔbɔgʋ 'mö naa:
6-Nmö Zwidee dʋdʋ -gömöö -glɔ Bɛtɩlɛmö,
-n ji 'kikeyi 'mö -wʋ oo,
-ma Zwidee dʋdʋ -gömöö -gwlɩ 'kadɩ gla'a
-nn -lɛ 'wʋfɩnaglɔ.
-Wʋʋ yɛ-a, -ɔ ji-a Izlayɛlɩɛ ngëyi n -sa-a -bhaa
'yuganɩnyɔ glɩnɩɛ ɔ 'kɛ -su,
-ma -na 'mö ɔ ji-a 'wlʋɔ.”
7Wa gba-a sa'a Elodɩɛ de-e, ɔ wɔzɩ-a 'wi 'mö -zɛlɩjingwa la'a 'n ɔ jua-a ngli 'jɩbha naa, wa -yɛ la 'mɛ -zɛlɩjeyie lɩlɩlɩ yɩlɩ, -bhaa 'ylɩɛ ya-a la'a 'nɩ? 8Wa -sanɩɔ-a 'dɩ-ɛ, ɔ nɛ -bha wa de naa: “A mö -ma Bɛtɩlɛmö, la ɔ glɩ-a 'tɩɩ a 'yɛ -bha yɩlɩ. A -kɔɔ yɩlɩ 'bhë-ë, a ji a ka'a 'dɩ -sanɩ n 'yɛ 'yɛ na-a mö n 'kɔ bʋbɔ.”
9Dʋdʋnyininyɔ 'nyɛ-ɛ sa'a -zɛlɩjingwa la'a 'dɩ, 'n wa ji-a mö. Wa-a 'mö 'le, -zɛlɩjeyi -ɛ ka la-a 'nglɩ 'n wa ji-e -ma 'ylʋɔ gluwlʋnʋbhɛyɩ 'bhönɩ, 'n wa jiɛ-a yɩlɩ 'sɔ. Ɛ -ganʋa 'yu 'n wa ji-e -ma Bɛtɩlɛmö nyini. -Budu -ʋʋ 'mö 'gu pö la-a ɛ nyini-e -bha ʋ 'wliyawʋ, 'n ɛ ji-a 'nɩgbö. 10Wa yɩlɩ-a 'mɛ -zɛlɩjeyi la'a, 'mʋna 'kada 'lɩbhʋa -bha. 11Wa pla-a -ma -budu la'aa 'mö, 'n wa ji-e -ma 'gu -yɛ ɔ -da Mali 'sɔ ghlɩ. 'N wa ji-e -bha 'gu dlɩ'ɩ -kokomunigbö glu 'pa, 'n wa jio-a bʋbɔ. Wa kalɩ-a wa 'gbluku 'wʋ, wa -sa -ma lɔlʋ, wa -sa -ma 'wlɩ, wa -sa 'yɛ -ma yatlikpö -ɩ mö-a 'nglɩ wa la-a milɩ, -li la'aa 'dwi ta 'n wa jio-a 'ye 'nyɛ. 12-Lagɔ 'nyʋa-a 'jɩla 'mö 'dɩ naa, wa 'na-a mö -ma Elodɩɛ 'bhɛyɩ nimï -nɩɛ yɛ, wa nʋ-a wa 'yɛ nimï mö kaböyuogblʋ wa 'libhï-a 'wʋ 'n wa ji-a wa 'bhɛyɩ mö.
Zezwie -lowlengwa yɛ -ma Ezipötɩɛ dʋdʋ -gömö -gunʋ
13-Zɛlɩjingwa mö-a 'bhë, 'n -Lagɔzuzuko -bhlʋ ji-a 'jɩla 'mö Zozɛfö 'wʋ ghlanɩ, a nɛ -bha ɔ de naa: “'Libhï 'gu -yɛ ɔ -da 'sɔ 'wʋ -n -nyʋa 'yɛ -ma Ezipötɩɛ dʋdʋ -gömö -gunʋ. -N -nyʋa glɩ -ma yɛ, n -kamö 'dɩ 'nyɛ 'sɔ 'bhë a 'yɛ nimï ji. -Wʋʋ yɛ-a, 'nama Elodɩ ji-a 'gu ɔ 'kɔ 'lɩbhaa yɛ.” 14-Lagɔzuzuko 'nyɛ-ɛ sa'a Zozɛfö 'dɩ-ɛ, dʋdʋnyɩdɩ 'n ɔ ji-a 'gu -yɛ ɔ -da 'sɔ 'wʋ 'libhï, 'n wa ji-e -ma Ezipötɩɛ dʋdʋ -gömö mö.
15Wa glɩ -ma, Elodɩ yɛ tlɩ 'bhë 'n wa ji-a nimï ji. -Lagɔ 'plɩnɩ-a -benyido'o ʋ 'mögbanɩnyɔ Oze 'mö, wɛlɩ ʋ gba la-a ɩ 'yɛ 'wʋ 'wlenɩɛ yɛ ɩ 'plɩ-ɛ -sɩbha. Sa'a Oze gba la-a naa:
“-Lagɔ nɛ naa: N yɛ na 'gu wɔzɩ 'bhë
ɔ 'yɛ -ma Ezipötɩɛ dʋdʋ -gömö 'wʋ -sɔ.”
Elodɩ yɛ Bɛtɩlɛmöö 'gwie gbʋgblɩkaswɩ'ɩ 'lɩbha
16 Elodɩ jɩblɩnɩ-a sɛ naa -zɛlɩjingwa yʋlʋ wa nʋɔ -bha, yʋlʋ ɔ 'pa-a tenyi, -ɩ wa -sanɩɔ la-a ɔ dlɩ mönɩɩ-a yawʋ, 'n ɔ ji-a nɩkpa tia naa, wa mö -ma Bɛtɩlɛmöö 'gbë -yɛ -maa -gligbï 'sɔ 'mö, tɛnɩ 'gwie -gbëëpï 'wʋ -n 'yɛ 'ylʋbö 'sɔɔ -lʋa 'wʋ nyini wa -dʋa 'wlu 'wʋ. 17Ɩ 'plɩ-ɛ -sɩbha, wɛlɩ -ɩ -Lagɔɔ 'mögbanɩnyɔ Zelemi 'cɛlɩ la-a -ma ɔ -Lagɔbɔgʋ 'mö 'yɛ 'wʋ 'wlenɩɛ yɛ -bha. 18Sa'a ɔ 'cɛlɩɩ la-a naa:
“Jɔ-ɔ 'bhönɩ-ɛ -ma Ghlama,
'lʋgbʋ -yɛ ngazɩlinʋnʋɩɛ 'sɔ,
Ghlasɛlɩ -wʋ-a ɔ 'gwiee 'lʋgbʋ wi 'le.
Tlɩ wa tlɩ -bhaa yɛ
ɔ'ɔ -lɛ 'jɩbha wa 'kɔ dɛpö.”
Zezwie -lowlengwa -nyɔɔ yɛ -ma Ezipötɩɛ dʋdʋ -gömö 'bhö-ö
19 Elodɩ tlɩ-a, -ma Ezipötɩɛ dʋdʋ -gömö 'n -Lagɔzuzuko -bhlʋ ji-a 'jɩla 'mö Zozɛfö 'wʋ ghlanɩ. 20A nɛ -bha ɔ de naa: “Zozɛfö, -sɔ 'wʋ, 'libhï 'gu -yɛ ɔ -da 'sɔ 'wʋ a 'yɛ -ma Izlayɛlɩɛ dʋdʋ -gömö nimï mö, -wʋʋ yɛ-a, -wa nʋ la-a wa 'yɛ 'gu 'lɩbha wa yɛ tlɩ 'bhë.” 21Zozɛfö -sɔ-a 'wʋ, ɔ 'libhï-a 'gu -yɛ ɔ -da 'sɔ 'wʋ, 'n wa ji-e -ma Izlayɛlɩɛ dʋdʋ -gömö nimï mö. 22Wa nyini-e -ma, Zozɛfö 'nʋ-a naa, Akelawisɩ 'plɩnɩ-a ɔ -tɩbha Elodɩɛ 'bɩ 'wʋ mɔ-ɔ nyini-a Zwidee dʋdʋ, ɔ 'yɛ -ma sɛ glɩ-ɩ dlɩ ɔ nimïnɩɩ-a cɛ. Wʋ yɛ -Lagɔzuzuko 'nyɔ-a 'jɩla 'mö 'dɩ naa, ɔ mö -ma Galilee dʋdʋ -gömö sɛ -glɩɛ, 'n ɔ ji-e -ma mö. 23-Maa -glɔ -bhlʋ wa la-a Nazalɛtɩ, 'n wa ji-e -ma ʋ 'mö sɛ -glɩɛ mö. -Wʋʋ yɛ ɩ 'plɩ-ɛ -sɩbha, -Lagɔɔ 'mögbanɩngwaa wɛlɩ wa gba la-a naa:
“Puanyɔ -ɔ -Lagɔ -sa-a -bha,
Nazalɛtɩɛ nɩkpɛ wa jio-a laa,” ɩ 'yɛ 'wʋ 'wlenɩɛ yɛ -bha.
දැනට තෝරාගෙන ඇත:
MATIEE 'BƆGƲ 2: BNT96
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Bete New Testament © Bible Society of Côte d'Ivoire 1996