ගණන් 11
11
ස්වාමින්වහන්සේ වෙතින් ගිනි
1තවද ස්වාමින්වහන්සේ අසා සිටියදී, ජනයා තම අපහසුතා ගැන මැසිවිලි නගන්නට වූහ. ස්වාමින්වහන්සේට ඒවා ඇසුණු කල, උන්වහන්සේගේ කෝපය ඇවිස්සිණි. එවිට ස්වාමින්වහන්සේ වෙතින් වූ ගින්න ඔවුන් අතරේ ඇවිළී, කඳවුර අවට ඇතැම් තැන් දවාලී ය. 2එවිට ජනයා මෝසෙස්ට මොරගැසූයෙන්, ඔහු ස්වාමින්වහන්සේට යාච්ඤා කළේ ය. එවිට ගින්න නිවී ගියේ ය. 3ස්වාමින්වහන්සේගේ ගින්න ඔවුන් අතරේ ඇවුළුණු බැවින්, එම ස්ථානය තබේරා#11:3 තබේරා එනම් ඇවිළීම නමින් හඳුන්වනු ලැබී ය.
ස්වාමින්වහන්සේ වෙතින් වටු රංචු
4ඉශ්‍රායෙල්වරුන් අතර සිටි මිශ්‍ර ජනයා වෙනත් දෑ කෑමට කෑදර වූහ. ඉශ්‍රායෙල් ජනයා ද යළි හඬා වැටෙන්නට වී, “අනේ අපට කන්නට මස් තිබුණා නම්! 5ඊජිප්තුවේදී වියදමක් නැතිව අප කෑ මාළු, අපට සිහි වේ. පිපිඤ්ඤා, කොමඩු, ලීක්ස්, රතුලූණු හා සුදුලූණු ද සිහි වේ. 6එහෙත් දැන් ආහාර රුචිය අපෙන් දුරු වී ගොසින්; මේ මන්නා මිස අන් කිසිවක් අපට දකින්නටවත් නැතැ” යි මැසිවිලි නැගූහ.
7මෙම මන්නා, කොත්තමල්ලි ඇට වගේ ය. එහි පැහැය දුම්මල වගේ ය. 8ජනයා ගොස්, අවටින් ඒවා එකතු කොට ගෙනවුත්, ගලෙහි අඹරා ගත්හ; නැතහොත් වංගෙඩියේ ලා, කොටා ගත්හ. ඉන්පසු ඔවුහු හැළියක ලා, ඒවා තම්බා, එයින් කැවිලි සාදා ගත්හ. ඔලීව තෙලින් පිසින ලද රසයක් එහි විණි. 9රැයෙහි කඳවුර තුළ පිනි වැටුණු කල, මන්නා ද පතිත විය.
10එක් එක්කෙනා තම තමාගේ කූඩාරම් දොරකඩ සිට හැම පවුලක ම ජනයා හඬා වැටෙනු මෝසෙස්ට ඇසිණි. ස්වාමින්වහන්සේ අතිශයෙන් කෝප වූ සේක. මෝසෙස් සංවේගයට පත් විය. 11ඔහු ස්වාමින්වහන්සේ අමතමින්, “ඔබේ සේවකයා පිටට ඔබ මේ කරදරය ගෙනාවේ ඇයි? මේ මුළු ජනතාවගේ ම බර ඔබ මා පිට පැටවූවේ, ඔබ නො සතුටට පත් කරන්නට මා කුමක් කළ නිසා ද? 12මේ මුළු ජනයා පිළිසිඳ ගත්තේ මා ද? ඔවුන් ජනිත කළේ මා ද? ඔවුන්ගේ ආදි පියවරුනට දිවුරා ඔබ පොරොන්දු වූ දේශයට කිරි මවක්, අත දරුවකු වඩාගෙන යන්නා සේ, මගේ දෝතින් ඔවුන් උසුලාගෙන යන්නැයි ඔබ මට කියන්නේ මන්ද? 13මේ සියලු ජනයාට මා මස් ගෙනෙන්නේ කොතැනින් ද? ‘අපට කන්න මස් දෙන්න’ යි කියමින් නො නැවතීම ඔවුන් හඬා වැටේ. 14මේ සියලු ජනයා මට තනි ව ගෙන ගිය නො හැක. එය මට දරන්නට බැරි බරකි. 15ඔබ මට සලකන්නට යන්නේ මේ විදියට නම්, දැන් ම මා මරා දමන්න. ඔබේ ඇස් හමුවේ මට ප්‍රසාදය ලැබෙනවා නම්, මගේ මේ විපත්තිය දකින්නට මට ඉඩ නුදුන මැනවි” යි පැවසී ය.
16 ස්වාමින්වහන්සේ මෝසෙස් ඇමතූ සේක්, “ජනතාව අතරේ නායකයින් හා නිලධාරීන් වශයෙන් ඔබ දන්නා ඉශ්‍රායෙල් වැඩිහිටියන් හැත්තෑ දෙනකු මා වෙත පමුණුවන්න. හමුවීමේ කූඩාරම වෙත ඔවුන් කැඳවා, ඔබ පසෙකින් ඔවුන්ට එහි සිටගන්නට සලස්වන්න. 17මම පහළට බැස අවුත්, එහිදී ඔබ හා කතා කරන්නෙමි. ඔබ මත පිහිටා සිටින ආත්මයාණන් ගෙන, මම ඔවුන් මත්තෙහි ද තබන්නෙමි. ජනතාවගේ බර ඔබට තනි ව උසුලාගෙන යෑමට සිදු නො වන පරිදි, ඔවුන් ද ඒ බරට උර දෙනු ඇත.
18“ජනතාවට මෙසේ කියන්න: ‘හෙට දවසට සූදානම් වෙමින්, පවිත්‍ර වන්න. ඔබට කෑමට මස් ලැබෙනු ඇත. “අනේ අපට මස් ටිකක්වත් කෑමට ලැබුණා නම්! ඊජිප්තුවේ අප මොන තරම් හොඳින් සිටියා ද!” කියමින් ඔබ හඬා වැටෙනු ස්වාමින්වහන්සේට ඇසිණි. දැන්, ස්වාමින්වහන්සේ ඔබට මස් දෙන සේක. ඔබ ඒවා අනුභව කරනු ඇත. 19ඔබ ඒවා අනුභව කරනු ඇත්තේ හුදෙක් දවසක්, දෙකක්, දින පහක්, දහයක් හෝ දින විස්සක් හෝ නො වේ. 20පුරා මසක් ම ඒවා ඔබේ නහයෙන් කටින් එන තෙක්, ඒවා ඔබට පිළිකුල් වන තෙක් ම කනු ඇත. මන්ද ඔබ අතරේ සිටින ස්වාමින්වහන්සේ ප්‍රතික්ෂේප කොට, “කුමක් නිසා අපි ඊජිප්තුව හැර ආවෙමු ද?” කියමින් උන්වහන්සේ ඉදිරියේ ඔබ හඬා වැලපුණු බැවිනි.’ ”
21එහෙත්, මෝසෙස් කතා කරමින්, “මා සිටින්නේ හයලක්ෂ පාබළ ජනකායක් සමඟිනි, ‘පුරා මසක් ම මම ඔවුන්ට මස් කන්නට දෙන්නෙමි’ යි ඔබ කියන සේක. 22මේ එළු, බැටළු, ගව රංචු මැරුවත් එය ඔවුනට ප්‍රමාණවත් වේ ද? නැතහොත් මුහුදේ සියලු මසුන් ඇල්ලුවත් ඔවුනට ප්‍රමාණවත් වේ දැ?” යි ඇසී ය.
23 ස්වාමින්වහන්සේ මෝසෙස්ට පිළිතුරු දෙමින්, “ස්වාමින්වහන්සේගේ බාහු බලය සීමා වෙලා ද? මා ඔබට කී මගේ වචන සැබෑ වේ ද, නො වේ ද කියා දැන් ඔබ දකිනු ඇතැ” යි පැවසූ සේක.
24එබැවින් මෝසෙස් පිටතට ගොස්, ස්වාමින්වහන්සේ පැවසූ දෑ ජනතාවට පැවසී ය. ජනතාවගේ වැඩිහිටියන් හැත්තෑ දෙනකු එක් රැස් කළ මෝසෙස්, මණ්ඩපය වටා ඔවුන් සිටෙව්වේ ය. 25එවිට ස්වාමින්වහන්සේ වලාකුළින් පහළ බැස ආ සේක්, ඔවුන් හා කතා කොට, මෝසෙස් මත පිහිටා සිටින ආත්මයාණන්ගෙන් ගෙන, වැඩිහිටියන් හැත්තෑදෙනා මත්තෙහි ද ඒ ආත්මයාණන් තැබූ සේක. ආත්මයාණන් ඔවුන් මත පිහිටි කල, ඔවුහු දිවැස් වැකි පැවසූහ. එහෙත් ඔවුහු යළිත් එසේ නො කළහ.
26කෙසේ වුව ද වැඩිහිටියන් වශයෙන් ලේඛනගත එල්දාද් හා මේදාද් යන දෙදෙනා කඳවුරේ රැඳී සිටියහ. ඔවුන් මණ්ඩපය වෙත ගියේ නැත. එහෙත් ආත්මයාණන් ඔවුන් මත ද පැමිණියෙන් ඔවුහු ද කඳවුරේදී දිවැසි වැකි පැවසූහ. 27එවිට මෝසෙස් වෙත දිවූ තරුණයෙක්, “එල්දාද් හා මේදාද් කඳවුරේ දිවැස් වැකි කියති” යි කීවේ ය.
28නූන්ගේ පුත් යෝෂුවා හෙවත් යොවුන් වියේ පටන් මෝසෙස්ගේ සහායකයා කතා කරමින්, “මෝසෙස් මා ස්වාමිනි, ඔවුන් නවතාලන්නැ” යි කීවේ ය.
29එහෙත් මෝසෙස් පිළිතුරු දෙමින්, “මා උදෙසා ඔබ ඊර්ෂ්‍යා වෙනවා ද? ස්වාමින්වහන්සේගේ මුළු ජනතාව ම දිවැසිවරුන් වනවාටත්, ස්වාමින්වහන්සේ ස්වකීය ආත්මයාණන් ඒ හැම කෙනකු මත ම තබනවාටත් මම කැමැත්තෙමි” යි පැවසී ය. 30ඉන්පසු මෝසෙස් ද ඉශ්‍රායෙල් වැඩිහිටියෝ ද කඳවුරට ආපසු ගියහ.
31එවිට ස්වාමින්වහන්සේ වෙතින් සුළඟක් හමා, මුහුදින් වටුවන් ගසා ගෙන ආවේ ය. කඳවුර වටා පොළොවේ සිට රියන් දෙකක් පමණ උසට කඳවුරේ සිට කවර දිසාවකට හෝ දවසක ගමන්-දුරක් දක්වා උන් බිම වැටී තිබිණි. 32ජනයා එහි ගොස්, මුළු දවස හා රැය පුරාත්, පසු දින මුළුල්ලේ වටුවන් එකතු කර ගත්හ. හෝමෙර#11:32 හෝමෙරයක් යනු බුසල් 6ක් හෝ ලීටර් 220ක් පමණ දහයකට අඩුවෙන් එකතු කර ගත් කිසිවකුත් නො වී ය. ඉන්පසු ඔවුහු මුළු කඳවුර වටේ උන් අතුළහ. 33එහෙත් මස් ඔවුන්ගේ දත් අතරට ගෙන තිබියදී, ඒවා හපා ගිලින්නට පවා කලින්, ස්වාමින්වහන්සේගේ කෝපය ඔවුන්ට එරෙහිව ඇවුළුණේ ය. උන්වහන්සේ දැඩි ව්‍යසනයකින් ඔවුන්ට පහර දුන් සේක. 34වෙනත් ආහාරවලට ගිජු වූ ජනයා එහිදී භූමදාන කළ බැවින් ඒ ස්ථානයට කිබ්‍රොත්-හත්තාවා#11:34 කිබ්‍රොත්-හත්තාවා එනම් කෑදරකමේ සොහොන් පොළ යන නම තබන ලදී.
35ජනයා කිබ්‍රොත්-හත්තාවා වෙතින් පිටත් ව හසේරොත් දක්වා ගමන් කොට නැවතුණහ.
දැනට තෝරාගෙන ඇත:
ගණන් 11: SCV
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්‍රවේශ වීමට අවශ්‍යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Holy Bible, Sinhala Contemporary Version™ | © 1980, 1991, 1994, 2011, 2020, 2025 by Biblica, Inc. | Used with permission. All rights reserved worldwide.