MATEU 15
15
Bafariseu ni undimaan bukul
(Mar 7.1-23)
1A balon Bafariseu ni balon bapican-ulua pëni di Jerusalem abi tsi Yeesu, a ba jaul: 2“We ka wun bafetsu kë ro ko wi undimaan bajon pok wi? Par, bë ri ka ñaw iñan uriala bukul.” 3A na yankës bukul, aja: “A ind, we ka wun nda mobats tsi utsua Nasien-batsi, maa a nda mob tsi undimaan ind? 4#Pëp 20.12; Ulú 5.16 Pëp 21.17; Ija 20.9Par, Nasien-batsi ja: ‘Dëmbani asinu ni aninu;’ a na ja kak: ‘Ñaan na njai ba këja përim pëwutsëtsuel tsi uleka asinul oo aninul, aka na roon në fiŋa.’ 5Maa ind, nda ja nda roon nduu ja: ‘U ci bañaan ka ko wi buu tsënkna wi asin bukul oo anin bukul, a ba ja, ko wi ka ci bëtseend pa Nasien-batsi, 6bañaan ba mënts bukun kaats përëmban asin bukul.’ Ti, nda pënan përim Nasien-batsi, a nda tsu undimaan ind. 7Ind banguungu! Isaaya acar aleents uwar tsi uleka ind, a na ja:
8 #
Isa 29.13
‘Bañaan biki ka bëndanin ni iruj,
maa ngëwaas bukul alawanin.
9Pëjintëla pi ba ja pi ba roon bu kë jintëlain kaats bëkat;
par ngi bu kë jukan ngi aci ngëtsua ngi bañaan tsu ngi.’”
Ngëko ngi kan tsu ngi ñaan na tsop
(Mar 7.14-23)
10A Yeesu rui kandënd bañaan, a na ja bukul: “Nda cikëndëni ndë te! 11Cits ko wi ka niaj wi di mtum ka tsu wun ñaan na tsop; maa ko wi kan cili wi di mtum, ka tsu wun ñaan në tsop.” 12Din, a bafetsul kika awokul a ba jaul: “Me aatsum Bafariseu te përim pan a pa re bukul-a?” 13A Yesu jankma: “Bëko bi Asin nji nan cii di batsi yirats bi, ka rëtaa. 14#Lúk 6.39Nda wëtan bukul; bë ci bakuel batsëpand bakuel. Te, uci nakuel kë tsëpand nakuel, bu kee yër bëlieng baar!” 15Din a Per ja: “Pacii wund-e përim pi m tib pank.” 16A Yeesu ja bukul: “Ind buts, nda netse ka këka bëlipal-a? 17Nda meets, ko u niaj wi ba këniaj di mtum, ka parar pëpës, wii gutsa di tsëko tsan beka tsi-a? 18#Mat 12.34Maa, un cili wi tsi mtum, apënë-ni di uwaas; a ka tsu wun ñaan në tsop. 19Par, di uwaas di ngëwejats nga waraatsa ngi kë pën-ni run: Kafiŋ-ñaan, pëjub, katúk-ufuts, kakiej, pëja gi mmatirits gi ni mankarar. 20Ngëko ngi ci ngun ngi kan tsopan ngi ñaan. Maa pëñawats iñan kë riala, tsopanats ñaan.”
Uwak ŋaats nan pënë-nii Kanaan
(Mar 7.24-30)
21A Yeesu pën tsul, a na tsëp di kajara Tiiru ni Sidon. 22A nalon ŋaats nan pënë-nii Kanaan, a na ciinee ngëjara ngëmënts ngun, lie, aja: “Wi Ajug, abuk Dawid, jampësain! Ucaay anooran mak abuk nji ŋaats.” 23Maa Yeesu yankatsul; jaatsul nin përim pëloole. A bafetsul kika awokul, a ba jaul: “Ruakanul! Par aci tsi pëlie tsi ufets nja.” 24A na yankës bukul aja: “Mán yëlee këyëlee pa ngënkaanel kato Israel rin, ngan niam ngi.” 25Maa, a na bi ee jintëla tsi bërun Yeesu, a na ja: “Ajug! Tsënkin!” 26A Yeesu yankul, aja: “Pëjej bariala upäts pëgutsar ngëbuus ngëties, waraatsa.” 27A ŋaats ja: “Ee-e, Ajug; maa ŋal ngëbuus ngëties ka re icuk i ka yëri yi tsi tsëko-bariala bajug ngul.” 28Din, a Yeesu yankul, ajaul: “Ina ŋaatsi! Uwaku arëmb! U roaanu bi m ŋal bank.” A tsi uyëk umënts wun, abukul ŋaats yës.
Yeesu ayësan bamoj bacumal
(Mar 7.31-37)
29A Yeesu pën tsul, a na tsëp afets kambaŋ bërëk Galileeya. A na paya untunda, a na tsoar rul. 30Din, a indënd bañaan pëni awokul; a buu tsiji bajienk, bakuel, balab, bayilats pëleents, ni balon bamoj bacumal. A ba júkan bukul tsi bërun Yeesu, a na yësan bukul. 31A bañaan pikra, bi ba win bi bayilats pëleents kë ñakan, a balab kë yandaar, a bajienk kak ayës, a bakuel kë win. A ba bëndan Nasien-batsi Israel.
Yeesu arialan bañaan ngëmiil ngëbaakër (4.000)
(Mar 8.1-10)
32A Yeesu ru bafetsul, a na ja: “Man yëkar kandënd bañaan ki ipës; par ro wink ngënu ngëwaants, ki ba ci ki ni nji, te bu kaats ko wi bu kë re wi. Nji n ŋalats pëwëtan bukul ba tsëp ni ubon; par bë yëlan pii labatsa di bëga.” 33A bafetsul jaul: “Um dnja kë ro bun, tsi ulaalats tsi, pa pëka upom wi kan kës wi pësuetsan kandënd ka liing kink?” 34A Yeesu ja bukul: “Këpom um ki nda ka kun?” A ba yankul, aja: “Paaj ni pëlon, ni ngëtsëb ngëties.” 35Din, a Yeesu ja kandënd bañaan ba tsoar tsi utsia. 36A na jej këpom paaj kun ni pëlon, ni ngëtsëb, a na wël mbaran a nu ba, a na cëtës pul awël bafetsul, a bafetsul fa kandënd bañaan. 37A ba riala bëlieng aa ba suets, a ba rukanda këcaa paaj ni pëlon kan cum ki ni rukësar. 38Ban diala biki aci bayënts ngëmiil ngëbaakër (4.000); bakaats ni upäts pinaatsa. 39Bi Yeesu ba bi pëwëtan indënd bañaan, a na gija kanawa atsëp pëboos Magadan.
දැනට තෝරාගෙන ඇත:
MATEU 15: KPKNT
සළකුණු කරන්න
පිටපත් කරන්න
සසඳන්න
බෙදාගන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Le Nouveau Testament en langue Manjaku © Alliance Biblique du Sénégal, 2020.