MATEU 14
14
Pëcäts Joŋ-namijan
1Uwal umënts wun, a Eroodis, nasien Galileeya, te bu kë ñakanaan uleka Yeesu, 2a na ja baleempul: “Niints nan, aci Joŋ-namijan! Anatsee di bacäts, ka wun na ka uyëlan përo ngëko bawitsa.” 3#Lúk 3.19,20Par Eroodis aro mob Joŋ-namijan, a na tanul, a na ricul di ukalabus, undo Eroodia, aar ni ba tsaari Filip. 4#Ija 18.16; 20.21Par Joŋ aro ka jaul: “M kaats pëjejul ro aaru.” 5A Eroodis ro ŋal pëfiŋ Joŋ, maa a na lal bañaan, par pa bukul, Joŋ aci nayëlia. 6Maa, tsi unu ufesta pëlesës mbukara Eroodis, a abuk Eroodia ŋaats ci tsi ukay tsi bërun bañaan banduuree biki ufesta, a Eroodis lílandërul. 7Wul ka wun na baaja, a na tsupul pëwëlul ko wi na ŋal wi ba këŋal. 8A aninul tsuul na ja: Wëliin tsi, been Joŋ-namijan tsi pëlat. 9A nasien juatsan tsi ko wan. Maa undo ubaajaul, ni undo ban tsoar biki kare ufesta, a na tsu na wëla been! 10A na tsu been Joŋ falee di ukalabus. 11A been Joŋ tsijee tsi pëlat, a ba wëla napäts ŋaats; a na rëŋan bul aninul. 12A bafets Joŋ bi, a ba tsëpand puumul ee mooy; a ba tsëp ee leents Yeesu ko un par wi.
Yeesu aro bawitsa upom
(Mar 6.30-44; Lúk 9.10-17; Joŋ 6.1-15)
13Bi Yeesu te bi ko wan, a na pën tsul ni kanawa atsëp ulaalats pii pats tsëko. A bi kandënd bañaan te bi ko wan, a ba pëni di iraasa afetsanul ni iyots. 14Bi Yeesu welee bi di kanawa, a na win kandënd bañaan, kawiak. A na yëkar bukul ipës, a na yësan bamoj bukul. 15Bi bërëm jëk bi, a bafets kikee awokul, a ba jaul: “Tsëko tsi laayatsa, te unu par, wëtani indënd bañaan, pa ba tsëp ngëntab bee ba weel bariala.” 16A Yeesu yankës bukul aja: “Bu fierats pëtsëp rul; nda wëlan bukul bariala, ind bërier ind.” 17Maa, a ba jaul: “Ko wi wund ka wi tsi, aci këpom kañan rin, ni ngëtsëb ngëtëb.” 18A na ja: “Nda da biindi a tsi.” 19A na tsu kandënd bañaan ba tsoar tsi pëtsats pëñuaw. A na jej këpom kañan kun ni ngëtsëb ngëtëb ngun, a na kat këkës akaŋan batsi, a na baran. Din, na cëtës upom awël bafetsul, a bafetsul fa kandënd bañaan. 20A ba riala bëlieng asuets, a ba tsëpand ijats untaaja ni itëb, in cum yi irukësar. 21Bañaan ban diala biki, bu ruakan bayënts ngëmiil kañan (5.000); bakaats ni upäts pinaatsa.
Yeesu ayandaar tsi ruets bërëk
(Mar 6.45-56; Joŋ 6.16-21)
22Uba bukul, tsi uyëk umënts wun, a Yeesu tsu bafetsul ba gija kanawa, bu ka yërul bërun ba tsëp kalutar, a na wama ka wëtan bañaan. 23Bi na ba bi pëwëtan bañaan, a na paya untunda pëyots tsëko, në ñaan. A bërëm kë jëk, a na ci tsul koorul. 24A kanawa tsëp ba alawan kankay aband umetaari bërëk; a ngëmaroŋ kë kobar tsi kul, par arek ufuts. 25Tsi kafa-unu a Yeesu pën pëtsëp di bafetsul; a nuu yandaar tsi ruets bërëk. 26Bi bafetsul win bi nuu yandaar tsi bërëk, a ba lënk, a ba ja: “Aci napën-upën!” A ba lënk a bu kë lië, 27din a Yeesu ja bukul: “Nda kaan katsëb! Aci nji, ind tsë lënk.” 28A Per yankësul ajaul: “Ajug! Uci u ci wi, tsuin ka yandaar tsi ruets mlik pëbi ri wi.” 29A Yeesu jaul: “Bili!” A Per welee di kanawa, a na yandaar tsi ruets mlik pëtsëp di Yeesu. 30Maa, bi na win bi ufuts buer, a na lënk; a në kur pëmij, a nalië aja: “Ajug! Bueranin.” 31Uyëk umënts, a Yeesu colan kañan amobul, a na jaul: “Natienkëts uwak! We ka wun m tsij ibats itëb?” 32A ba gija kanawa, a ufuts tsëkandar. 33A ban ci biki tsi kanawa jintëla Yeesu, a ba ja: “Ucar, wi ci-un Abuk Nasien-batsi!”
34A ba lut a kata kankay aband pëboos Genesaret. 35A bañaan tsëko tsëmënts tsun yëkërën Yeesu, a ba wëtan ikuran di ngëntab nga woki ngi bëlieng, a ba tsijiul bamoj bëlieng. 36A ba buaraul na wët bukul ba kërara ŋal kambiantëmb kaŋiul. A ban këraraul biki bëlieng yësana.
දැනට තෝරාගෙන ඇත:
MATEU 14: KPKNT
සළකුණු කරන්න
පිටපත් කරන්න
සසඳන්න
බෙදාගන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Le Nouveau Testament en langue Manjaku © Alliance Biblique du Sénégal, 2020.