NDS 2
2
Lawa a Yiri Fu a daa boo
1 #
LWS 23.15-21; TDP 16.9-11 Zɔ́n mɛn bɛ́ n zɛnɛɛ kiɛ̃mala ǹ wɔ kɛ a kiɛ̃ lɛawaa posooro pinaa, a tɔ n *Pantikɔti, bɛ dɔ. Kialandɛnan lɛn tumaa lɛ na á goã soe-n kɔn kun. 2Bǎã goon ne, màn wuu bɔ lon ka piɛ̃ gole wuu bɛ́ boe lɔn. Ǹ lɛ bɛ́ soe-n kɔn kion mɛn nɛ lɛn, bɛ́ pã ka màn wuu lɛ nɛ. 3Ǹ yii mànan kɔnɔn yɛ ka tɛ lɛwɔnɔn bɛ́ lɔn. Bɛa tɛ lɛwɔnɔn lɛn nə́ n gigii kɔn, ǹ nə́ mɛ kialandɛnan lɛn gogoonmaa mìi la. 4Lawa a Yiri Fu daa ǹ tumaa kũ, yǎa ǹ mɛ la ǹ nə́ bɔlɔ kɔsɔn pii, a n kɔnpii ka Yiri Fu lɛ din a boo wɔ ǹ lɛ-n nɛ.
5Á daa yaa, Zeruzalɛmu kiwi lɛ nɛ, Zuifu nyɛ́ɛbaa Lawa yii-n wolen tan, ǹ nə́ bɔ kanaa a gánan tumaa nɛ ǹ nə́ daa. 6Bɛa màn wuu kɛ lɛ bɛ́ á bɔ, zaman lɛ nə́ n lɛ sɔkɔn. Á yiri lɔlɔkɔn da ǹ ganaa parsiini, a giala, didie na á goã ǹ lɛ miɛ boo diɛ ka a din a yɛ ǹ bɔlɔ nɛ. 7Á kaãbaa gole da ǹ ganaa, ǹ nə́ goã pii kɔn nɛ: «Minin kɛn lɛn boo diɛ, ǹ tumaa bie Galilee gána minin lɛa wa ya? 8A n siɛ lɔn wɔsɛn gogoonmaa tá ǹ lɛ miɛ boo diɛ ka wɔ bɔlɔ nɛ? 9Wɔsɛn mɛnɛn bɛ́ boe Parti gána nɛ, ka Mɛdi laanka Elamu gána nɛ, ka Mezopotamii gána nɛ, Zudee gána-n ka Kapadɔɔsi gána nɛ, Pɔn gána-n ka Azii wɔ nɛ, 10Frizii ni ka Panfilii gána nɛ, Ezipti ni ka Liibii a Sirɛni gána nɛ, Rɔmu minin ni 11ka Krɛti laanka Larabu gána minin ni. Wɔsɛn tumaa, a Zuifu taãnan nɛ, ka tɔrɔ kɔsɔn mɛnɛn nə wɔ Zuifubaa nɛ. Á ke, wɔsɛn tumaa dɔ nə ǹ lɛ miɛ, ǹ nə́ Lawa a dí dadaran kɛn boo diɛ ka wɔsɛn gogoonmaa a bɔlɔ nɛ.»
12Ǹ tumaa nə́ n kaãbaa parsiini, ǹ goã doɛ̃ ǹ bɛ́ re màn mɛn taasɛ sii kɛ wɔ gɔn la wa. Maǹ nə́ goã pii kɔn nɛ: «Kɛ n wàa sii lɛa ke kəni?»
13Sɛnɛ min tɛnɛn man nə́ goã yaa we kialandɛnan lɛn-a, bɛ̀ ǹ nə́ pii: «Duvɛ̃ nə ǹ yii ganaa.»
Piɛrɛ Lawa a boo mɛn pɛ zaman nɛ
14Piɛrɛ tɔ́n yoo, kun ka dia dí-a wole fulugoon gialakun kɛ nɛ, á n lɛ bũ á pɛ zaman lɛ nɛ:
– Zudee gána minin lɛn, ka minin mɛnɛn tumaa bɛ́ giã-n Zeruzalɛmu kiwi, ka n too kɔ masɛ lon ka dɔ̃. 15Ka bɛ́ màn mɛn taasɛ, bɛ bie wa. Minin kɛn lɛn nə duvɛ̃ mi wa. Táa wɔ n baayɛlɛ a wasa kaa biikoo dinsɔɔ̃ gɔ́ɔ̃ nɛ. 16Sɛnɛ, ka yii bɛ́ sii mɛn-a ke, Lawa a boo gii-dali Zowɛli boo mɛn pɛ lɛlɛ, bɛ lɛ pã ǹ sii ni. 17#Zow 3.1-5 A màn mɛn pɛ, bɛ n ka kɛ nɛ Lawa pɛ:
«Biikoo a nya waáraa ma á re ma yiri kɛ koe min tumaa la.
Kaa nɛgiĩn laanka kaa nɛlɔn tá re maa boo gii diɛ.
Ma á re boo diɛ kaa min golen manɛ ka narɛɛn nɛ,
ma á re boo diɛ kaa nɛ tenən manɛ ka sii-yɛn nɛ.
18 Bɛa biikoo lɛ li,
haalɛ bɛ̀rɛgiĩn laanka bɛ̀rɛ ɔn nɛ,
ma á re ma yiri koe bɛn dɔn la,
ǹ tá re maa boo gii-dalin biɛ.
19 Ma á re kaãbaa ǹ siin zɛnɛɛ lon,
ma á re ǹ zɛnɛɛ tán.
Minin tá re mà yii,
ka tɛ nɛ, ka tɛmaa bara nɛ.
20 Dɛnaa Lawa a lɛawaa lɛ laan bɛ̀ a n doe,
bɛa lɛawaa gole kɛ lɛ,
a sii ń nyɛ́ɛ diɛ,
wasa á re n bɔyɛɛ a tii ka wɔlɔ tì bɛ́ lɔn,
mui á re n bɔyɛɛ a taã ka mà bɛ́ lɔn.
21 Sɛnɛ, min woo min bɛ́ re Dɛnaa Lawa tɔ bíi,
bɛa dɛnaa á re kirisibiɛ.»
22Piɛrɛ pɛ ǹ nɛ doo:
– Izirayeli minin lɛn, masɛ bɛ́ re màn mɛn pii ka nɛ ka n too kɔ bɛ ganaa. Nazarɛtin Yezu lɛ, Lawa na á dia ka bii a din a dí a lɛa. Lawa na á bɛ nyaa ka nɛ, ká dɔ̃ kaãbaa ǹ sii laanka sii-nyaa ǹ sii dadara tɔrɔ tumaa li, Lawa din mànan mɛnɛn zɛnaa a gɔn. Ka dinin tumaa bɛ dɔ̃, 23#Mat 27.35; Mar 15.24; Luk 23.33; Zaã 19.18 sɛnɛ, ká n tã, ká toa Lawa doɛ̃ baãnaan nə́ dere gɔn ganaa ǹ nə́ dɛ. Sɛnɛ, Lawa din na á saa lɛlɛ á bɛ yɔrɔ bɔ á koa. 24#Mat 28.5-6; Mar 16.6; Luk 24.5 Lawa gɔsɛ gɛ̀ gɔn á si, á wusoo á yiikoonaabaa kɔ la. A giala, pàã goã gɛ̀ lon a Yezu lɛ kurəə wusoo a da yiikoonaabaa ganaa wa. 25#Loe 16.8-11 Sonbore, kii Davida goã á pɛ a wɔ gɔn la:
«Ma yii na á goã Dɛnaa ganaa
biikoo tumaa li ma yɔrɔ-a.
A na á goã ma para li,
màn mɛn bɛ́ toɛ,
màn kɔ́n baran ma yiri lɔlɔkɔn wa.
26 Bɛ lɛ-n ma foo á kɔɔ̃nɛ,
ma á nyɛnyɛɛ ǹ loe loe.
Ta man giɛ̃,
ma foo n doa nɛ n din Lawa ganaa,
27 máa n ba re ma toɛ geren li wa,
ma bɛ́ n din a dí-nyali bɔlɔgoondɛnaa lɛa,
n ba re toɛ ma gere bɔɔ̃ wa.
28 Ma nə́ n yiikoonaabaa ǹ zii nyaa ma nɛ.
N din a tá kun ma-n tá re ma foo kɔɔ̃n koe taãn-taãnɛ.»
29Piɛrɛ pɛ:
– Ma dɔɔ̃nɔn lɛn, ka toa ma pɛ ka nɛ wɔsɛn digolo Davida wɔ gɔn la, á gã, ǹ ná a gere bĩ, a yala tá tɔn na a tan wɔsɛn bii ka pelo yii ni. 30#Loe 132.11; Sam2 7.12-13 Sɛnɛ, Davida na á goã Lawa a boo gii-dali lɛa, á dɔ̃ mà Lawa nə́ n liɛ asɛ nɛ ka sonbore tumaa nɛ, mà á re a tɔrɔ min boe a nɛnyaanan bii, a koa a kii dankan la. 31Lawa bɛ́ re sii mɛn zɛnɛɛ, Davida na á saa lɛlɛ á bɛ yɛ. Á yɛ mà Lawa á re Minin Nyin-sili yii kiɛ. A na á bɛ lɛ boo da mà «Lawa ba re toɛ geren li wa, a re toɛ a gere bɔɔ̃ wa.» 32Bɛa Yezu kɛ lɛ, Lawa ná a yii kaa á bɔ geren bii, wɔsɛn tumaa n bɛa siéren lɛa. 33Lawa saa á da gugurubaa ǹ bǎã nɛ a din gusin. A Díi nə n lɛ kɔ la ka Yiri Fu mɛn nɛ, á bɛ kɔ la á dia wɔ la. Ka yii bɛ́ sii mɛn tumaa ganaa, ka nə ǹ mɛn tumaa dɔ miɛ, a din Yiri Fu lɛ a dí ni. 34#Loe 110.1 Davida dinmaa bie á dii lon wa, sɛnɛ, a na á pɛ:
«Maa Dɛnaa Lawa pɛ maa Dɛnaa nɛ:
Giã ma gusin,
35 yǎa ma gɔ̀lɔ̀baa lɛ piɛ̃ koe n la,
n zɔ́ɔn nə die kiɛ tán n gòãn giulun.»
36Izirayeli minin tumaa doamaa nɛ ǹ dɔ̃ taãn-taãnɛ mà ǹ Yezu mɛn dere gɔn-a ke lɛn, mà Lawa na á bɛ lɛ baa minbuiin tumaa a Dɛnaa laanka a Nyin-sili lɛa.
Minin golee Lawa li giala kɔ
37Ǹ bɛ́ ǹ nə́ bɛa boon kɛn ma, á ǹ foo kũ parsiini, ǹ nə́ nɔ̀n da Piɛrɛ laanka dia dí-a wole gialakunun lɛn la: «Dɔɔ̃nɔn lɛn, wɔsɛn man die wàa zɛnɛɛ kəni?»
38Piɛrɛ nə́ ǹ lɛ si: «Ka wusoo kaa sii baraan kio. Kaa didie lɛ kɔ, wɔsɛn nə batɛmu kɛ da ka ganaa ka Yezu *Krita tɔ nɛ, màn mɛn bɛ́ toɛ, Lawa kaa sii baraan toa ka nɛ. Bɛa biikoo li, Lawa á die a Yiri Fu gisĩ ka la. 39A giala, Lawa din bɛ́ á n lɛ kɔ ka màn mɛn nɛ, bɛ ǹ ka dinin wɔ lɛa ka kaa nɛnyaanan nɛ, ka minin mɛnɛn tumaa wɔlɔ bɛ́ tɔn sɔsɔɔ, Lawa n die ǹ bíi.»
40Piɛrɛ boo gigiã kɔsɔn da á Lawa a boo nyaa nɛ, á minin lɛn dɔn nyankɔ, á pɛ ǹ nɛ: «Ka baa si, ka n bɔ busii kɛ li die mɛnɛɛ min kɔkɔrɔn kɛn la.» 41Min gigiã golee a boo li, ǹ nə́ batɛmu da ǹ ganaa. Bɛa pinaa kɛ lɛ nɛ, minbuiin duu sɔɔ (3 000) kɛ miã yɛ, ǹ nə́ kaa kun Lawa a zaman lɛ nɛ.
Lawa a zaman bibinaa
42Bɛa minin kɛn lɛn man nə́ goã woe dia dí-a wolen minin daraa ǹ bǎã-n kun, ǹ nə́ goã dɔɔ̃nbaa ǹ kɔn-narɛɛ we, ǹ nə́ goã màn bii ǹ nə́ Lawa nyankoe kun. 43Dia dí-a wolen lɛn man nə́ goã kaãbaa ǹ sii dadara gigiã zɛnɛɛ. Nyɛ́ɛ min tumaa kũ. 44#NDS 4.32-35 Min mɛnɛn tumaa golee Lawa li, bɛn man nə́ goã kun, maǹ nə́ goã ǹ màn tumaa kiɛ kun. 45Maǹ nə́ goã ǹ wurun siɛ̃ ka ǹ gɔn mànan nɛ, ǹ ná a giɔ̀mɔ gii kɔn, a n kɔnpii ka didie laadoo ne. 46Ǹ goã nyaabiɛ Lawa a kion wa. Maǹ nə́ goã n lɛ kiɛ kun bɛ̀ ǹ wo baraabaraa. Maǹ nə́ goã màn bii kɔn a piɛn nɛ kun, ka nyɛnyɛɛ nɛ ka foo sonbore ne. 47Maǹ nə́ goã Lawa tɔ boe, min tumaa dɔ goã boo sonbore diɛ ǹ wɔ gɔn la. Lawa bɛ́ min mɛnɛn kirisibiɛ, a na á goã bɛn kiɛ a din a zaman lɛ li baraabaraa.
දැනට තෝරාගෙන ඇත:
NDS 2: SBPE2011
සළකුණු කරන්න
පිටපත් කරන්න
සසඳන්න
බෙදාගන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
San Bible Protestant Edition © Bible Society of Burkina Faso, 2011.