ម៉ាថាយ 17

សិរី‌រុងរឿងរបស់ព្រះ‌យេស៊ូ

(ម៉ាកុស ៩.២-៨; លូកា ៩.២៨-៣៦)

1 # ២ពត្រ. ១.១៧-១៨ ប្រាំមួយថ្ងៃក្រោយមក ព្រះ‌យេស៊ូនាំលោកពេត្រុស លោកយ៉ាកុប និងលោកយ៉ូហាន ជាប្អូន ឡើងទៅលើភ្នំ ដាច់ឡែកពីគេ។ 2ពេលនោះ ព្រះអង្គប្រែជាមានទ្រង់‌ទ្រាយប្លែកពីមុន នៅមុខសិស្ស*ទាំងបី គឺព្រះ‌ភ័ក្ត្ររបស់ព្រះអង្គបញ្ចេញរស្មីចែងចាំងដូចពន្លឺថ្ងៃ ហើយព្រះ‌ពស្ដ្ររបស់ព្រះអង្គត្រឡប់ជាមានពណ៌សដូចពន្លឺ។ 3សិស្សទាំងបីបានឃើញលោកម៉ូសេ* និងព្យាការី*អេលីយ៉ាសន្ទនាជាមួយព្រះ‌យេស៊ូ។ 4លោកពេត្រុសទូលព្រះអង្គថា៖ «ព្រះ‌អម្ចាស់! យើងខ្ញុំបាននៅទីនេះប្រសើរណាស់ បើព្រះអង្គសព្វព្រះ‌ហឫទ័យ ទូលបង្គំនឹងសង់ជម្រកបី គឺមួយសម្រាប់ព្រះអង្គ មួយសម្រាប់លោកម៉ូសេ និងមួយទៀតសម្រាប់ព្យាការីអេលីយ៉ា»។ 5#លប. ២២.២; ទក. ១៨.១៥; ទំន. ២.៧; អស. ៤២.១; មថ. ៣.១៧, ១២.១៨; មក. ១.១១; លក. ៣.២២កាលលោកពេត្រុសកំពុងតែមានប្រសាសន៍នៅឡើយ ស្រាប់តែមានពពក*ដ៏ភ្លឺមកគ្របបាំងគេទាំងអស់គ្នា ហើយមានព្រះ‌សូរសៀងបន្លឺពីក្នុងពពកមកថា៖ «នេះជាបុត្រដ៏ជាទីស្រឡាញ់របស់យើង យើងគាប់ព្រះ‌ហឫទ័យនឹងព្រះអង្គណាស់ ចូរស្ដាប់ព្រះអង្គចុះ!»។ 6ពួកសិស្សឮដូច្នោះ ក៏នាំគ្នាក្រាបចុះ ឱនមុខដល់ដី ព្រោះគេភ័យខ្លាចជាខ្លាំង។ 7ព្រះ‌យេស៊ូយាងចូលទៅជិត ដាក់ព្រះ‌ហស្ដលើគេ ទាំងមានព្រះ‌បន្ទូលថា៖ «ចូរនាំគ្នាក្រោកឡើង កុំខ្លាចអី!»។ 8កាលពួកសិស្សងើបមុខឡើង ឃើញតែព្រះ‌យេស៊ូមួយព្រះអង្គប៉ុណ្ណោះ ពុំឃើញមាននរណាទៀតឡើយ។ 9ពេលព្រះអង្គយាងចុះពីលើភ្នំជាមួយសិស្ស*ទាំងបី ព្រះ‌យេស៊ូហាម‌ប្រាមគេថា៖ «កុំនិយាយប្រាប់នរណាអំពីហេតុ‌ការណ៍ ដែលអ្នករាល់គ្នាបានឃើញនេះឲ្យសោះ ត្រូវចាំរហូតដល់បុត្រមនុស្ស*មានជីវិតរស់ឡើងវិញ»។ 10#មគ. ៤.៥ពួកសិស្ស*ទូលសួរព្រះអង្គថា៖ «ហេតុដូចម្ដេចបានជាពួកអាចារ្យ*ចេះតែនិយាយថា ព្យាការីអេលីយ៉ាត្រូវអញ្ជើញមកមុន?»។ 11ព្រះអង្គមានព្រះ‌បន្ទូលតបថា៖ «ព្យាការីអេលីយ៉ាអញ្ជើញមកមែន ដើម្បីរៀបចំសព្វគ្រប់ទាំងអស់ឡើងវិញ។ 12#មថ. ១១.១៤ខ្ញុំសុំប្រាប់អ្នករាល់គ្នាថា ព្យាការីអេលីយ៉ាបានអញ្ជើញមករួចហើយ តែពួកគេមិនព្រមទទួលស្គាល់លោកទេ មិនតែប៉ុណ្ណោះសោត គេថែមទាំងបានធ្វើបាបលោកសព្វបែបយ៉ាង តាមអំពើចិត្តរបស់គេទៀតផង។ បុត្រមនុស្សក៏នឹងត្រូវគេធ្វើបាបដូច្នោះដែរ»។ 13ពេលនោះ ពួកសិស្សយល់ថា ព្រះអង្គមានព្រះ‌បន្ទូលអំពីលោកយ៉ូហាន‌បាទីស្ដ*។

ព្រះ‌យេស៊ូដេញអារក្សចេញពីក្មេងម្នាក់

(ម៉ាកុស ៩.១៤-២៧; លូកា ៩.៣៧-៤៣)

14កាលព្រះ‌យេស៊ូ និងសិស្ស*ទាំងបីរូប មកដល់កន្លែងដែលបណ្ដា‌ជននៅជុំគ្នា មានបុរសម្នាក់ចូលមកគាល់ព្រះអង្គ។ គាត់លុតជង្គង់ចុះ 15ទូលថា៖ «លោកម្ចាស់អើយ សូមលោកអាណិតមេត្តាកូនប្រុសរបស់ខ្ញុំប្របាទផង វាឆ្កួតជ្រូក បណ្ដាលឲ្យវាឈឺចុកចាប់ខ្លាំងណាស់ វាដួលទៅក្នុងភ្លើង និងធ្លាក់ទឹក ជាញឹកញាប់។ 16ខ្ញុំប្របាទបាននាំវាមកជួបសិស្សរបស់លោកដែរ តែគេពុំអាចមើលវាឲ្យជាទេ»។ 17ព្រះ‌យេស៊ូមានព្រះ‌បន្ទូលតបថា៖ «នែពួកមនុស្សអាក្រក់មិនព្រមជឿអើយ! តើត្រូវឲ្យខ្ញុំទ្រាំនៅជាមួយអ្នករាល់គ្នាដល់ពេលណាទៀត! ចូរនាំក្មេងនោះមកឲ្យខ្ញុំ»។ 18បន្ទាប់មក ព្រះ‌យេស៊ូមានព្រះ‌បន្ទូលគំរាមអារក្ស អារក្សក៏ចេញ ហើយក្មេងនោះបានជាតាំងពីពេលនោះមក។

19ពេលនោះ ពួកសិស្សចូលមកគាល់ព្រះ‌យេស៊ូ ដាច់ឡែកពីគេ ទូលថា៖ «ហេតុអ្វីបានជាយើងខ្ញុំពុំអាចដេញអារក្សនោះបាន?»។ 20#មថ. ២១.២១; មក. ១១.២៣; ១ករ. ១៣.២ព្រះអង្គមានព្រះ‌បន្ទូលតបទៅគេថា៖ «មកពីអ្នករាល់គ្នាមានជំនឿតិចពេក។ ខ្ញុំសុំប្រាប់ឲ្យអ្នករាល់គ្នាដឹងច្បាស់ថា បើអ្នករាល់គ្នាមានជំនឿប៉ុនគ្រាប់ពូជមួយដ៏ល្អិត អ្នករាល់គ្នានឹងបញ្ជាទៅភ្នំនោះថា “ចូរចេញពីនេះ ទៅនៅកន្លែងផ្សេងទៅ!” ភ្នំមុខជាធ្វើតាមពាក្យអ្នករាល់គ្នាមិនខាន ដ្បិតគ្មានការអ្វីដែលអ្នករាល់គ្នាធ្វើមិនកើតឡើយ។ 21[គេអាចដេញអារក្សប្រភេទនេះឲ្យចេញបាន លុះត្រាតែអធិស្ឋាន* និងតមអាហារ]»។

ព្រះ‌យេស៊ូប្រកាសអំពីព្រះអង្គត្រូវសោយទិវង្គត

(ម៉ាកុស ៩.៣០-៣២; លូកា ៩.៤៣-៤៥)

22កាលពួកសិស្ស*នៅជុំគ្នាក្នុងស្រុកកាលី‌ឡេ ព្រះ‌យេស៊ូមានព្រះ‌បន្ទូលទៅគេថា៖ «បុត្រមនុស្សនឹងត្រូវគេបញ្ជូនទៅក្នុងកណ្ដាប់ដៃរបស់មនុស្សលោកជាមិនខាន។ 23គេនឹងសម្លាប់លោក ប៉ុន្តែ នៅថ្ងៃទីបី លោកនឹងមានជីវិតរស់ឡើងវិញ»។ ឮដូច្នោះ ពួកសិស្ស*ព្រួយចិត្តជាខ្លាំង។

ការបង់ពន្ធព្រះ‌វិហារនៅក្រុងយេរូ‌សាឡឹម

24 # នក. ៣០.១៣, ៣៨.២៦ លុះព្រះ‌យេស៊ូយាងមកដល់ក្រុងកាពើ‌ណិមជាមួយពួកសិស្ស អ្នកហូតពន្ធសម្រាប់ព្រះ‌វិហារ#១៧.២៤ ពាក្យដើម«ប្រាក់ពីរដួង»។ រៀងរាល់ឆ្នាំ ជន‌ជាតិអ៊ីស្រា‌អែលត្រូវបង់ពន្ធព្រះ‌វិហារពីរដួង។ នាំគ្នាចូលមករកលោកពេត្រុស ហើយសួរថា៖ «លោកគ្រូរបស់អ្នកបង់ពន្ធសម្រាប់ព្រះ‌វិហារឬទេ?»។ 25លោកតបវិញថា៖ «បាទ! លោកបង់!»។ កាលលោកពេត្រុសទៅដល់ផ្ទះ ព្រះ‌យេស៊ូមានព្រះ‌បន្ទូលទៅគាត់មុនថា៖ «ស៊ីម៉ូន! តាមយោបល់អ្នក ស្ដេចនៅផែនដីនេះទារពន្ធអាករពីនរណា? ពីបុត្ររបស់ស្ដេច ឬពីអ្នកផ្សេង?»។ 26លោកទូលថា៖ «ពីអ្នកផ្សេង»។ ព្រះ‌យេស៊ូមានព្រះ‌បន្ទូលទៅគាត់ថា៖ «មែន បើដូច្នេះ បុត្ររបស់ស្ដេចមិនត្រូវបង់ពន្ធឡើយ 27ប៉ុន្តែ ដើម្បីកុំឲ្យអ្នកទាំងនោះទាស់ចិត្ត ចូរទៅស្ទូចត្រីសមុទ្រ ហើយយកត្រីដែលស្ទូចបានមុនគេ មកបើកមាត់ អ្នកនឹងឃើញកាក់មួយ ចូរយកកាក់នោះទៅបង់ពន្ធឲ្យខ្ញុំ និងឲ្យអ្នកចុះ!»។

Выбрано:

ម៉ាថាយ 17: គខប

Выделить

Копировать