San Juan 4
4
Ubedichiaꞌnu Jesuse tucu unaꞌa Samaria
1Uriꞌi bee fariseo beyaꞌ nú nuꞌ huaxilá bee beneꞌ Jesuse, nu leꞌca rrinzalánu bee bene luquelá Juan, 2añinzuca nu la neca mero Jesuse enu rrinza bee bene, sino que bee beneꞌnu neca enu rriꞌnza bee bene. 3Chenu uriꞌi Jesuse beyaꞌ bee nucuaꞌ, uchiuꞌunu lu iliu Judea, nu nzanu lu iliu Galilea.
4Pero chenu nzanu lu iliu Galilea, rquiꞌña nú detenu enza lu iliu Samaria. 5Nu uriñanu tucu eyeche nú lee Sicar, nú nchiucuꞌ lu iliu Samaria axu lu yuu nú udeteꞌ Jacob lu llianaꞌlla José. 6Zeꞌe nzucu tucu tsu nú rni bee bene tsuꞌ Jacob, nu lunú ullacalaꞌ Jesuse nú seenu, chequie uzucunu ruꞌu tsu zeꞌe tucu rebibichia.
7Hora zeꞌe uriña tucu unaꞌa Samaria ruꞌu tsu zeꞌe nú nzeꞌta chiyaꞌlla inza nu uni Jesuse lulla:
―Iꞌña lleꞌna inza lulu huaꞌa.
8Nu bee beneꞌnu nzuela beella eyeche zeꞌe nzetsii beella nú acu beella.
9Nu lunú la quieteꞌ bee bene Israel bee bene Samaria, chequie ucuaqui unaꞌa zeꞌe lu Jesuse:
―Liꞌá neca bene Samaria, nu ¿xieꞌlanu bene Israel necalu nu rnacuꞌlu inza lua la?
10Nu uni Jesuse lulla:
―Tunu rriꞌilu beyaꞌ lunú niarquiꞌ Diose nú liquiꞌnu lulu, nu rriꞌilu beyaꞌ tineca enu rnacuꞌ inza lulu. Liꞌilu nacuꞌlu inza lua, nu liꞌá liquia inza nú rliquiꞌ elunehuañi lulu.
11Chequie uni unaꞌa zeꞌe lu Jesuse:
―Detá, lecaxi uyaꞌlu para nú hualu inza, nu chiquiꞌ aquié tsuquieꞌ, ¿cá chiyaꞌlu inza nú rliquiꞌ elunehuañi? 12Tsuquieꞌ neca nú utsaꞌna Jacob beneꞌru enu udetela luru, nu leꞌca inza cuaꞌ ungueꞌlla cuna bee enduꞌlla cuna bee nañiꞌbeella. ¿Xieꞌ másela neca equielu lulla la?
13Nu uni Jesuse lulla:
―Ye bee bene enu rueꞌ inza quieꞌ, bichiꞌ zecaꞌ beei stucu bese, 14pero bee enu hueꞌ inza nú detea, lecaꞌ xunga bichiꞌ nzeꞌe. Xne inza nú detea lulla liñii liñi arquiꞌlla xi neca tucu elu la tsuxe rliñi inza, nu luꞌculla elunehuañi nú leca xunga laxu.
15Nu uni unaꞌa zeꞌe lunu:
―Detá, uliꞌquiꞌ inza cuaꞌ lua para nú la bichiaꞌa stucu bese, nu la yelaꞌa ruꞌu tsuquieꞌ huaa inza.
16Che uni Jesuse lulla:
―Uquia tucu niyuꞌlu nu chu yeꞌta zecalu.
17Nu ucuaqui unaꞌa zeꞌe lunu:
―La luꞌcua niyu.
Che ucuaqui Jesuse nú uninu lulla:
―Neli rnilu nú la luꞌculu niyu, 18xne uchialálu cuna ayuꞌ niyu, nu nee niyu enu nzucunulu la nechialu cuna liꞌi. Enzeꞌe neli lunú unilu scua.
19Chenu ubeneꞌ unaꞌa zeꞌe nucuaꞌ, che unilla lunu:
―Detá, rriꞌá beyaꞌ nú liꞌilu necalu tucu profetaꞌ Diose. 20Bee beneꞌru enu udetela uluꞌcu beella ulaꞌna lu Diose equie dañi quieꞌ, pero liꞌihua enu neca bee bene Israel rnihua nú eyeche Jerusalén neca elu luꞌcu bee bene ulaꞌna lu Diose.
21Nu ucuaqui Jesuse:
―Unaꞌa, uchili arquiꞌ nú rnia, nú riña bichia nú luꞌcu bee bene ulaꞌna lu Diose Pa liñibe sin nú yeꞌta beella equie dañi quieꞌ, nu niꞌ la quiꞌñaꞌ nú chue beella eyeche Jerusalén. 22Liꞌihua la riꞌihua beyaꞌ ti rluꞌcuhua ulaꞌna lu. Pero liꞌiru nediyaꞌru ti rluꞌcuru ulaꞌna lu, xne lubee bene Israel nzeꞌta enu tsilaꞌa bee bene. 23Nu nee horaquieꞌ, uriñala bichia nú ye bee bene enu neli rluꞌcu ulaꞌna lu Diose, luꞌcu beella ulaꞌna lunu tucu nú rialane equie cuendaꞌ Espíritu Santo. Xne scua niarquiꞌ Diose Pa liñibe nú riꞌi bee bene enu rluꞌcu ulaꞌna lunu. 24Diose necanu Espíritu, nu bee enu rluꞌcu ulaꞌna lunu rquiꞌña nú neli luꞌcu beella ulaꞌna lunu equie cuendaꞌ Espíritu Santo.
25Chequie uni unaꞌa zeꞌe lu Jesuse:
―Liꞌá nediyaa nú nzeꞌta Mesías (enu leꞌca lee Cristo), nu chenu riñanu, liꞌinu ixiuleꞌenu yeene luaꞌahua.
26Nu uni Jesuse lulla:
―Liꞌá neca Cristo enu rnilu, nu liꞌinu necanu enu rdichiaꞌnulu nee.
27Hora zeꞌe uriña bee beneꞌnu, nu nzenu arquiꞌbeella nú rdichiaꞌnunu tucu unaꞌa. Pero niꞌ tucu beella né nedichiaꞌ beella lunu xi niarquiꞌ unaꞌa zeꞌe, urre xi rdichiaꞌnunu liꞌinchu. 28Chequie utsaꞌna unaꞌa zeꞌe ereꞌnchu ruꞌu tsuu zeꞌe nu nzanchu eyeche zeꞌe elu uya niꞌnchu, lubee bene:
29―Utehua ne lañiꞌhua tucu bene enu uni lua lu ye beenú uriꞌá. ¿Xieꞌ la necalla Cristo la?
30Che uchiuꞌu beei eyeche zeꞌe nu uyabeei elu nzu Jesuse. 31Diquila nú nza unaꞌa zeꞌe eyeche zeꞌe, uni bee beneꞌ Jesuse lunu:
―Maestro, udacu lleꞌna nú aculu.
32Pero uninu lubeella:
―Liꞌá rluꞌculá tucu elubacu nú acua, núla chuluhua.
33Nu uquixie bee beneꞌnu unidichiaꞌ beella lu saꞌbeella:
―¿Xieꞌ nuꞌti ubeꞌtayula nú udacunu la?
34Chequie uni Jesuse lubeella:
―Elubacua neca nú rriꞌá lunú niarquiꞌ Diose enu uxeꞌla liꞌá, nu tsalua lunú uninu lua nú riꞌá. 35Liꞌihua rnihua: “Rriꞌiscaꞌlá se stacu guu para nú aca ulaꞌcu.” Pero liꞌá nia luhua: Nú uletsahua luhua nu ubiꞌyacuruhua lubee yuu, nú necala bee para nú aca ulaꞌcu lubee. 36Nu bene enu rquietesaꞌ ulaꞌcu riuculla lunú rialalla equie riñaꞌ nú rriꞌilla. Nu bee ulaꞌcu nú rriꞌilla necalane para elu nuꞌ elunehuañi nú leca xunga laxu, nu scua bene enu rduꞌ nii nu bene enu rriꞌi ulaꞌcu tucutse ñia nzu arquiꞌbeella. 37Neli lunú rni bee bene: “Urene enu rduꞌ nii nu stucu enu rriꞌi ulaꞌcu.” 38Liꞌá uxeꞌla liꞌihua para nú riꞌihua ulaꞌcu elu né riꞌihua riñaꞌ, urene enu uriꞌi riñaꞌ, nu liꞌihua uyariꞌihua ulaꞌcu elu uriꞌi beella riñaꞌ.
39Huaxi bee bene lu iliu Samaria zeꞌe uchili arquiꞌbeei Jesuse lunú uni unaꞌa zeꞌe lubeei, chenu uninchu lubeei: “Unilanu lua luye nú uriꞌá.” 40Enzeꞌe chenu uriña bee bene lu iliu Samaria zeꞌe elu nzu Jesuse, uziquie beei lunu nú yaꞌnanu cuna liꞌibeei. Nu uyaꞌnanu cuna liꞌibeei chiucu bichia. 41Nu huaxilá bee bene uchili arquiꞌbeei liꞌinu, chenu ubeneꞌbeei lunú rninu. 42Chequie unibeei lu unaꞌa zeꞌe:
―Nee laneca lunú unitsialu luru nzeli arquiꞌru liꞌinu, sino que liꞌi eꞌcuru ubeneꞌlaꞌru lunú rninu, nu nediyaꞌ nzeꞌcaru nú liꞌinu necanu Cristo enu tsilaꞌa bee bene iliulabe.
Uriyeca Jesuse llianaꞌ tucu bene enu rriꞌi riñaꞌ lu arre
43Chenu udete rucu bichia zeꞌe, uchiuꞌu Jesuse lu iliu Samaria nu nzanu enza Galilea. 44Xne leꞌca liꞌinu uninu, nú niꞌ tucu profeta la luꞌcu bee bene ulaꞌna lulla lachilla. 45Pero chenu uriñanu lu iliu Galilea, uyucu nzeꞌca bee bene lu iliu zeꞌe liꞌinu, xne leꞌca nu beei uya beei eliñi baxcu Jerusalén nu ulañiꞌ beei ye bee milagro nú uriꞌinu lu eliñi zeꞌe.
46Chequie uya zeca Jesuse eyeche Caná nú nchiucuꞌ lu iliu Galilea, elu uriꞌinu nú unga inza biñu. Nu eyeche Capernaum zeꞌe nzucu tucu beneꞌ arre enu riti llianaꞌ. 47Chenu ungabiyaꞌ beneꞌ arre zeꞌe nú uriña Jesuse Galilea, nu uchiuꞌunu lu iliu Judea. Che uyalla elu uriña Jesuse nu uziquiella lunu nú chánu riyecanu llianaꞌlla enu yamero ati. 48Nu uni Jesuse lulla:
―Liꞌihua la chili arquiꞌhua liꞌá tunu la lañiꞌhua tucu seña, urre bee milagro nú rriꞌá.
49Pero ucuaqui beneꞌ arre zeꞌe nú unilla:
―Detá, yexetsia uchaa ante nú ati llianaꞌa.
50Chequie uni Jesuse lulla:
―Ubenchilaꞌ niꞌlu, nzucu nzeꞌcala llianaꞌlu.
Nu uchili arquiꞌ bene zeꞌe lunú uni Jesuse, nu chu nzialla enza niꞌilla. 51Diquila nú nzialla, uyachaꞌcalu bee mosoꞌlla liꞌilla nu unibeei lulla:
―Nzucu nzeꞌcala llianaꞌlu.
52Chequie unidichiaꞌlla lubeei nú xiura uquixie nú uzucu nzeꞌca llianaꞌlla, nu unibeei lulla:
―Necaꞌ tucu rqui tucu uchee uchiuꞌu xleꞌi.
53Che uriꞌi bene zeꞌe beyaꞌ nú hora zeꞌe neca chenu uni Jesuse lulla: “Nzucu nzecala llianaꞌlu”, nu uchili arquiꞌlla cuna ye bee bene niꞌlla Jesuse.
54Nucuaꞌ neca milagro rrucu nú uriꞌi Jesuse lu iliu Galilea, chenu ubenchilaꞌnu nú uyanu lu iliu Judea.
Выбрано:
San Juan 4: zpl
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2010, Wycliffe Bible Translators, Inc. All rights reserved.