Tula-tulando rasulu 3
3
Petrus nefekaꞌosa mie mokalu
3:1-10
1Seꞌoleo Petrus bhe Yohanes dokala we Lambuno Lahataꞌala. Ne naꞌa hambi tolu mata kamaꞌoleono, wakutuunomo dosambahea. 2Ne itu nandoo seemie moꞌane nokalu mpini pakalenteno. Seꞌo-seꞌoleo doꞌoweaꞌe maka dofongkohae ne fointo bhalano kapesuaꞌa weo Lambuno Lahataꞌala, koneaꞌano Fointo Mokesa. Ne itu nesalo-salo ne mie mesuano weo Lambuno Lahataꞌala. 3Nowoha Petrus bhe Yohanes damesua weo Lambuno Lahataꞌala, anoa nesalo-salo dua ne andoa ini. 4Kohoduando dotontoe maka ambano Petrus, “Ondo kainsami.” 5Mie amaitu notontoda, weo fekihino nakoniꞌawa. 6Tamaka Petrus nopugau ambano, “Miina akobulawaa, miina akoperaa, ampamo kaowu ndumandooꞌano ne inodi amaꞌangkoe: weo neano Yesus Kristus, miendo Nasaret maitu, kalaꞌo toha!” 7Petrus lasao nointaha limano suanano mie amaitu maka nofoehee. Aꞌeno bhe bhiku-bhikuno lasao noꞌosa. 8Dadiꞌanomo nopunda ngkaehe-ehe bhe nosuli kumala, maka noangkafida weo Lambuno Lahataꞌala. Nekala-kala bhe nopokapunda-punda, nopudhi Lahataꞌala. 9Kosasawindo mie dowohae nekala-kala bhe nopudhi-pudhi Lahataꞌala. 10Andoa lasao dopandeꞌaane ingka anoamo maitu gahaꞌa mie mengkoha-ngkohano bhe mesalo-salono we Fointo Mokesa. Andoa domente bhe dotongo dowoha kumadhadhiaꞌano ne mie amaitu.
Kapedatono Petrus weo Lambuno Lahataꞌala
3:11-26
11O mie amaitu noangkafi kansuhu Petrus bhe Yohanes. Dohato we tambi bhalano nekonando Tambino Salomo, mie bhahi dosipumpumo dolibuda, kaꞌosano mentendo. 12Nowoha mie bhahi maitu Petrus nopugaumo ambano, “Miendo Israel, noafa menteaneomu kadhadhia aini? Noafa ondo-ondo kainsamiomu, kao-kaomo mie aini kapooliꞌano nokala mbaꞌinomo insaodi ini mie kokuasano tawa mie lumebe? 13Lahataꞌalano Abraham, Ishak bhe Yakub, Lahataꞌalando awuaꞌintoomu nofekakalabhiamo Yesus palima-limano. Yesus ini owaeꞌomu ne kolakino liwu, tamaka mahinggamo Pilatus nokopatudhu namolapae, hintimiu mongaheꞌieꞌomu. 14Anoa mie mongkilo bhe melaano lalo, tamaka hintimiu mongaheꞌieꞌomu maka mesaloomu ne Pilatus namolapaangkoomu mie kapongko-pongkono. 15Anoamo fowaꞌaono dadi, gahaꞌa pongkoemoomu. Tamaka Lahataꞌala nofowanue nomaiꞌao ne mate. Insaodimo ini mohaꞌaono wuntano mata mani kadhadhia anaꞌa. 16Aitu wohaeꞌomu kadhadhia ne kalu aini. Anoa noꞌosamo hampano kaparasaea weo neano Yesus. Kaparasaeano ne neano Yesus mekaꞌosano mie nepandeꞌaomiu ini. Ingka wohaeꞌomu kosasawimiu.
17Bhahitieꞌiku, apandeꞌaane kahabuꞌamiu peda aitu hampano miina mandeꞌaaneomua, nopototo bhe kosasawindo neangkamiu. 18Ampamo kaowu pedamo anaꞌa Lahataꞌala nofekakoꞌula nekobhoasaꞌaono endefiꞌini. Bhoasaono naꞌa nofosampeandae ana-anabii, putae Mesias Omputo Fosalamatino maitu tetewei nakumadee-dee. 19Dadiꞌanomo dolimoomu ne Lahataꞌala, fetompaanemoomu dhosamiu, neanomo dhosamiu namekanggelaꞌiemo. 20Ane nada naꞌa, Ompu namaꞌangkomoomu dua kalalesano lalo, maka natumuduangkoomu Yesus toka nefontaa-ntaaꞌaono mpini kabhao-bhaono so Omputo Mosalamatikoomu. 21Anoa maitu tetewei naeate te surugaa ampa oleono so katipahabuꞌouniꞌano bhahi-bhahiꞌae, peda nekobhoasaꞌaono Lahataꞌala nefosampendo ana-anabii mongkilono ne dhamani wawono. 22Ingka anabii Musa nokowambaanemo wawo, ‘Ompu Lahataꞌalamiu naefoeheangkoomu seemie anabii namaiꞌao ne bhahitiemiu napototo bhe idi. Fetingkeeꞌomu sabhaha so nepugauꞌaono ne hintimiu. 23Kotika mie tapa metingkeno anabii aitu, damogampida maiꞌao ne umatino Lahataꞌala maka damekasunida.’ #Ul 18:15-18, 19 24Kosasawindo anabii mosampeno bhoasaono Lahataꞌala, notanda ne anabii Samuel ampa ana-anabii mbuhumaino, dokowambaanemo wawo so kumadhadhiaꞌano dhamani aini. 25Wambado ana-anabii naꞌa mbalimo kahunsaꞌao so hintimiu. Hintimiumo meꞌawano dawua weo podhandiꞌano Lahataꞌala bhe awuaꞌintoomu. Wakutuu anaꞌa Lahataꞌala nokowamba ne Abraham ambano, ‘Namaiꞌao ne sampuꞌamu, sabhaha bansano liwu te dhunia ini daeꞌawa kabarakati.’ #Kej 22:18, 26:4 26Dadiꞌanomo Lahataꞌala nofoehemo palima-limano, maka notudue wawo ne hintimiu neowaangkoomu kabarakati. Kabarakati anaꞌa, maꞌanano Anoamo so matokoomu metompaꞌaoꞌomu sabhaha podiu modaimiu seemie-seemie.”
Выбрано:
Tula-tulando rasulu 3: mnbSD
Выделить
Копировать
Сравнить
Поделиться
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2022, Wycliffe Bible Translators, Inc. All rights reserved.