يوحنا 21
21
1منْبَعْد إِ مَانَايَا يمظْهَار-د عِيْسَى عَاوذ إِ يمحْضَارن نّس خ شّطّ ن ڒبْحَر ن طَبَرْيَا. أَمُّو إِي يوْقع. 2مُوْنن ذِنِّي ڒبْعَاض ن يمحْضَارن نّس: سِمْعَان بُطْرُس ذ تُوْمَا ونِّي ؤُمِي قَّارن <أَشْنِيو>،#21.2 أَشْنِيو نتَّا ذ اَڬْنِيو. ذ نَاثْنَاهِيل نتَّا زݣ وبِيلَاج ن قَانَا ذِي ثْمُوْرْث ن لْجَالِيل، ذ ثَارْوَا ن زَبَادِي، ذ ثْنَاين نّغْنِي. 3ئِكَّر سِمْعَان بُطْرُس ينَّا-ٱسن نش اَذ رَاحغ اَذ يْمَارغ.
نَّان-اَس اَكِش نْرَاح ؤُڒَا ذ نشِّين. فّْغن، نْيِين ذِي ثْغَارَّابُوت. ذِي دْجِيڒث نِّي وَار يْمَارن وَالُو.
4وَامِي يصْبَح ڒْحَاڒ، ؤُفِين عِيْسَى يبدّ خ شّطّ ن ڒبْحَر وَلَكِن يمحْضَارن وَار ث عْقِيڒن شَا. 5ينَّا-ٱسن: "آي يحنْجِيرن، مَا ثيْمَارم شَان يسڒْمَان؟"
نَّان-اَس: "لَّا، وَالُو."
6ينَّا-ٱسن عِيْسَى: "سيّْبث ثْرَاشَّا خ وفُوْسِي ن ثْغَارَّابُوت اَذ تَافم يسڒْمَان." وَامِي ت سيّْبن وَار زمَّرن اَتِيد جبْذن عْلَاحقَّاش ثْعمَّر س يسڒْمَان اَطَّاس.
7أَمحْضَار نِّي يعِيزّن خ عِيْسَى اَطَّاس ينَّا-ٱس إِ بُطْرُس قَا وِين ذ سِيذِيثْنغ. وَامِي يسْڒَا سِمْعَان بُطْرُس قَا وِين ذ عِيْسَى، ئِكَّر يَرض تْشَامِّير نّس ڒَاحقَّاش تُوْغَا يكّس-يث، ڒخْدّنِّي ينْضو ذِي ڒبْحَر بَاش اَذ يرَاح غَار عِيْسَى. 8وَلَكِن يمحْضَارن نِّي نّغْنِي إِي كِذس يدْجَان ذْفَارن-ث-يذ س ثْغَرَّابُوْت، جبّْذن-د ثْرَاشَّا نِّي ثشُّوْر س يسڒْمَان. وَار ݣّْوِيجن شَا خ ڒْبَرّ غِير شَان مِيَّات مِيتْرُو وَاهَا. 9وَامِي د ؤُوْضن غَار ڒْبَرّ، ؤُفِين ثِمسِّي ن ڒفْحَم خَاس يسڒْمَان ذ وغْرُوْم.
10ينَّا-ٱسن عِيْسَى: "أَوِيم-د شْوَايْت ن يسڒْمَان إِي د ثيْمَارم ڒخُّو." 11ئِنْيَا سِمْعَان بُطْرُس يجْبذ-د ثْرَاشَّا نِّي غَار ڒْبَرّ، ذَايس مِيَّا و ثْڒَاثَا و خمْسِين ن يسڒْمَان ذ يمقّْرَانن. قَاع مَانَايَا، وَار ثقَّارس شَا ثْرَاشَّا نِّي.
12ينَّا-ٱسن عِيْسَى: "أَرَاحم-د اَذ تشّم." وَار يزْعِيم ؤُڒَا ذ يجّن زݣ يمحْضَارن اَث يسّقْسَا، مِين ثعْنِيذ شك؟ ڒَاحقَّاش سّْنن قَا ذ سِيذِيثْسن. 13يرُوْح عِيْسَى ييْسِي-د اَغْرُوْم نِّي ذ يسڒْمَان نِّي يفرق-يثن خَاسن. 14ثَانِيتَا ذ وِيس ثڒْت مَرَّاث إِي ذِي يتْمظْهَار-د عِيْسَى إِ يمحْضَارن نّس زݣ وَامِي إِي د يكَّر زِي ڒْموْث.
سِيذِيثْنغ عِيْسَى يسزْعَام سِمْعَان بُطْرُس
15وَامِي ريّْقن، ينَّا-ٱس عِيْسَى إِ سِمْعَان بُطْرُس: "آ سِمْعَان آ مِّيس ن يُوْحَنَّا، مَا تْحِبِّيذ-اَيِي كْتَار زِي يِيْنَا؟"
ينَّا-ٱس سِمْعَان بُطْرُس: "وَاه آ سِيذِي، شَك ثسّْنذ قَا نش تخْسغ-ش."
ينَّا-ٱس عِيْسَى: "سشّ يزْمَارن ينُو."
16ينَّا-ٱس عِيْسَى وِيس مَرّْثَاين: "آ سِمْعَان آ مِّيس ن يُوْحَنَّا، مَا تْحِبِّيذ-اَيِي؟"
ينَّا-ٱس سِمْعَان: "وَاه آ سِيذِي، شك ثسّْنذ قَا نش تخْسغ-ش."
ينَّا-ٱس عِيْسَى: "ٱرْوس يحُوْڒِيْين ينُو."
17ينَّا-ٱس عِيْسَى وِيس ثڒْت مَرَّاث: "آ سِمْعَان آ مِّيس ن يُوْحَنَّا، مَا تخْسذ-اَيِي؟"
ئِقّس-اَس ڒْحَاڒ إِ بُطْرُس ڒَاحقَّاش ينَّا-ٱس-ث وِيس ثڒْت مَرَّاث، شك مَا تخْسذ-اَيي؟ ينَّا-ٱس: "آ سِيذِي، شك ثسّْنذ كُڒْشي. ثسّْنذ قَا نش تخْسغ-ش."
ينَّا-ٱس عِيْسَى: "سشّ يحُوْڒِيْين ينُو.
18أَقَا تسْڒِيذ ڒْحَقّ: ذِي ثمْࢲِي نّش تْحزَّامذ يخف نّش تْرَاحذ مَانِي مَا ثخْسذ. وَلَكِن خْمِي غَا ثوْسَارذ، أَذ تْضڒْقذ يفَاسّن نّش اَتَاف حَدّ نّغْنِي اَش يحزّم اَش يَاوِي مَانِي وَار تخْسذ شَا." 19ينَّا مَانَاينِّي عِيْسَى حمَا اَذ يسْبيّن مَامش غَا يمّث بُطْرُس حمَا اَذ تْمظْهَار لْعَظَمَا ن أَربِّـي. وَامِي إِي ذَاس ينَّا مَانَاينِّي، ينَّا-ٱس: "ذْفَار-اَيِي-د."
20ئِنقْڒب بُطْرُس يُوْفَا يذفَّار-يثن-د ومحْضَار نِّي يعِيزّن خ عِيْسَى اَطَّاس، يعْنِي ونِّي تُوْغَا يقِّيمن غَار وغزْذِيس ن عِيْسَى ذݣ ومنْسِي نِّي ينَّا-ٱس: آ سِيذِي، مِين يعْنَا ونِّي ش غَا يزّنْزن؟ 21وَامِي ث يࢲْرَا بُطْرُس ينَّا-ٱس إِ عِيْسَى: "آ سِيذِي، ئِي وِين مِين ذَاس غَا يوقْعن؟"
22ينَّا-ٱس عِيْسَى إِ بُطْرُس: "نش مڒَا خْسغ وِيْن اَذ يدَّر اَڒ غَا د ذوْڒغ، وَار ذَاش يرُوْح بُو ڒْحَاڒ. شك ذْفَار-اَيِي-د!" 23سّنِّي يفّغ ڒخْبَار غَار وَاوْمَاثن قَّارن: <أَمحْضَار-أَ وَار يتْمتِّي شَا.> وَلَكِن ذ صَّح عِيْسَى وَار يِينِّي شَا بلِّي اَمحْضَار-أَ وَار يتْمتِّي شَا. مِين ينَّا؟ ينَّا-ت اَمُّو: <نش مڒَا خْسغ وِيْن اَذ يدَّر اَڒ غَا د ذوْڒغ، وَار ذَاش يرُوْح بُو ڒْحَاڒ.> 24أَمحْضَار-أَ، مِين يعْنَا؟ ذ نتَّا إِݣ يشهّْذن خ ثْمسْڒَايِين-أَ ثُمَّا يُوْرِي-ثنْت. نشِّين نسّن قَا شْهَاذث نّس ن صَّح.
25أَطَّاس ن ثْمسْڒَايِين نّغْنِي إِي يݣَّا عِيْسَى. مَعْلِيك ثُوْرَا كُڒ يشْتن زَّايْسنْت يشْت-ئِشْت، حسّْبغ بلِّي اَتَاف دُّنشْت-أَ مَارَّا وَار ثْزمَّر اَذ تيْسِي لْكُتُب نِّي إِي غَا يَارِين.
Выбрано:
يوحنا 21: ريف
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
