Mateo 6
6
Pitapis mana willaypa faltapakuqkunata yanapanantsikpä Jesús yachatsinqan
1<<Cuidädutä runakuna rikayäshunallaykipä allikunata rurayankiman.#Mat. 23.5. Tsaynö rurayaptikiqa ciëluchö kaykaq Papäniki manam ima premiutapis qarayäshunkitsu.
2<<Faltapakuqkunata yanapar orgullösu runakunanöqa ama alabakuyankitsu. Paykunaqa cornëtata tukaqnörämi sinagögakunachö y cällikunachöpis yanapanqanta willakuyan. Rasunpam nï: Paykunapaqa runakuna alabayanqallanmi premiunkuna kanqa. 3Pitapis yanaparqa ama willakuyankitsu. 4Mana willakurlla yanapayaptikiqa Papänikim [llapanpa puntanchö] premiuta qarayäshunki.
Tayta Diosta mañakunantsikpä Jesús yachatsinqan
Lucas 11.2-4
5<<Tayta Diosta mañakur ama orgullösu runakunanöqa mañakuyankitsu.#Luc. 18.10-14. Paykunaqa runakuna rikayänallanpämi sinagögakunachö y esquïnakunachöpis ichiykur Tayta Diosta mañakuyan. Rasunpam nï: Paykunapaqa runakuna alabayanqallanmi premiunkuna kanqa. 6Tayta Diosta mañakurqa wayikiman yaykuskir punkuykita wichqarkur mañakuyanki. Pakayllapa mañakuyanqaykita rikarmi Papänikiqa [llapanpa puntanchö] premiuta qarayäshunki.
7<<Mana Israel runakunaqa tsay palabrallawanmi yapay yapay mañakuyan. Tsaynö mañakuyan Tayta Dios wiyananpä kanqanta yarparmi. Qamkunaqa ama tsaynö mañakuyankitsu. 8Manarä mañakuyaptikim Papänikiqa imata munayanqaykitapis musyaykan. 9Qamkunaqa Tayta Diosta mañakur niyanki:
<< <Ciëluchö kaykaq Papä, jutiki respitashqa katsun.
10Kay patsachö mandaq kanaykipä shamuykullay.
Ciëluchö cäsuyäshunqaykinö kay patsachöpis cäsuykuyälläshuy.
11Cada junaqpä mikuylläkuna ama faltaykutsuntsu.#Prov. 30.8-9.
12Chikimaqnïkunata perdonayanqänö noqakunatapis perdonaykayällämay.
13Ama jutsa rurayman dëjaykayällämaytsu.
Tsaypa rantinqa mana allikunapita tsapaykayällämay.
[Qampa podernikichömi imaykapis kaykan.
Llapanpäpis munayyuqmi kanki.
Imayyaqpis alabashqa kaykullay. Amén.]> >>
14<<Runa mayikita perdonayaptikiqa qamkunatapis ciëluchö kaykaq Papäniki perdonayäshunkim. 15Peru runa mayikita mana perdonayaptikim sïqa qamkunatapis perdonayäshunkitsu.#Mar. 11.25-26.
Ayünupita Jesús yachatsinqan
16<<Ayunarqa ama orgullösu runakunanö kayankitsu. Paykunaqa runakuna rikayänallanpämi llakinashqa puriyan. Rasunpam nï: Paykunapaqa runakuna alabayanqallanmi premiunkuna kanqa. 17Qamkuna ayunarqa shumaq mayllakuyanki y naqtsakuyanki. 18Tsaynö rurayaptiki runakuna manam musyayanqatsu ayunayanqaykita. Runakuna mana rikayäshuptikipis llapanta rikaq Papänikim rikaykäyäshunki. Paymi [llapanpa puntanchö] premiuta qarayäshunki.
Ciëluman riquëzata churakunantsikpä Jesús yachatsinqan
Lucas 12.33-34
19<<Kay patsachö riquëzata ama qoriyaytsu. Kay patsachö riquëzataqa puyum ushan, runam apan y ismurmi ushakan.#Stg. 5.2-3. 20Tsaypa rantinqa gloriaman riquëzata churayay.#6.20 Ciëluman riquëzata churantsik imantsikkunatapis rantikuykur tsay qellaywan faltapakuqkunata yanaparmi. Tsaypita tantiyanaykipä liyinki Luc. 12.33-34. Gloriachöqa manam puyupis ushanqatsu, runapis apanqatsu ni ismunqatsu. 21Riquëzaykita churayanqaykimanmi shonquykipis yarparaykanqa.
Ñawintsik aktsinö kanqan
Lucas 11.34-36
22<<Ñawikikunam shonquykipä aktsinö. Tsaymi ñawikikuna alli kaptinqa shonquykipis aktsichö kaykan. 23Peru ñawikikuna mana alli kaptinmi sïqa paqaschö kayanki. Shonquykichö aktsi mana kaptinqa pasaypa tsakäpakushqam kaykäyanki.#6.22-23 Tsaynö parlarmi Jesucristo nirqan: Tayta Dios japallanta sirvirqa aktsichönömi alli kawayan. Peru tsaynö mana sirvirmi sïqa tsakäpakushqanö kawayan.
Rïcu kayllapä mana yarpachakunantsikpä Jesús yachatsinqan
Lucas 16.13
24<<Manam pï runapis ishkay patrontaqa sirvinmantsu. Ishkay patronyuq karqa jukaqta chikirmi jukaqta kuyanqa. Jukaqta cäsur jukaqtaqa manam cäsunqatsu. Tsaynöllam rïcu kayllapä yarpachakurqa Tayta Diosta sirviyta puëdiyankitsu.
Tayta Diosman criyikunantsikpä Jesús yachatsinqan
Lucas 12.22-31
25<<Tsaynö kaykaptinqa ama yarpachakuyaytsu: <¿Imanörä kawashä? ¿Imatarä mikushä? ¿Imatarä upushä? ¿Imatarä jatikushä?> Manam mikuyllapä ni röpallapä yarpachakunapätsu kaykantsik. 26Pishqukuna imanö kawayanqantapis tantiyakuyay. Paykunaqa manam murukuyantsu ni cosechayantsu ni churakuyantsu. Tsaynö kayaptinpis ciëluchö kaykaq Papänikim mikuyta qaran. Tayta Diospäqa pishqukunapitapis masmi väliyanki.
27<<Pasaypa yarpachakurpis ¿pirä tamäñunpita mastaqa jatunyanman? 28Tsaynö kaykaptinqa ¿imanirtä yarpachakuyanki alli röpayuq kayänaykipä? Waytakuna imanö wiñayanqantapis tantiyayay. Waytakunaqa manam arukuyantsu ni putskakuyantsu. 29Noqam nï: Waytakuna kuyayllapä kayanqannöqa manam rey Salomónpa röpankunapis kuyayllapä karqantsu.#1Rey. 10.4-7; 2Crón. 9.3-6. 30Yärakuyniynaq janan shonqu runakuna, waray warantin rupatsishqa kananpä kaptinpis qewakunata kuyayllapä wiñaykätsirqa ¿manatsurä qamkunatapis munayanqaykita Tayta Dios alistapäyäshunki?
31<<Tsaynö kaykaptinqa ama yarpachakur niyaytsu: <¿Imatarä mikushun? ¿Imatarä upushun? ¿Imatarä jatikushun?> 32Tsaynöqa llakikuyan Tayta Diosman mana criyiqkunallam. Ciëluchö kaykaq Papänikim imata munayanqaykitapis musyan. 33Imaykapitapis mas puntataqa Tayta Diospa mandakuyninchö kawayänaykipä y pay munanqannö kawayänaykipä yarpachakuyay. Tsaynö kawayaptikiqa imata munayanqaykitapis alistapäyäshunkim. 34Cada junaq imallapis yarpachakuyänaykipä kaykaptinqa waray junaqpä ama yarpachakuyaytsu.#Sal. 55.22; 1Ped. 5.7.
Выбрано:
Mateo 6: qxo
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2002, 2008, Wycliffe Bible Translators, Inc. All rights reserved.