Ore i mexü̃ ga Matéu ümatüxü̃ 6
6
Ngẽxguma tüxü̃ curüngü̃xẽẽgu ya yíxema tüxü̃́ nataxúxe, rü name i bexma cunaxü
1Rü ngẽxguma ta̱xacürü mexü̃ pexü̱xgu, rü name i pexuãxẽ nax tama duü̃xü̃güpe̱xewa penaxüxü̃ i ngẽma nax duü̃xü̃gü pexü̃ dauxü̃ca̱x rü pexü̃ yacua̱xüü̃güxü̃ca̱x. Erü ngẽxguma duü̃xü̃gü pexü̃ icua̱xüü̃güxü̃ca̱x mexü̃ pexü̱xgu, rü Penatü ya daxũgucü rü taxũtáma ãmare pexna naxã.
2Rü ngẽxguma texéxü̃ curüngü̃xẽẽgu, rü tama name i nüxü̃ quixuchigaxü̃ i ngẽma cuxüxü̃, naxrüxü̃ i ngẽma nügü írümegünetaxü̃. Erü nümagü rü norü me nixĩ i ngutaque̱xepataü̃güwa rü ĩanegüarü namagüwa nüxü̃ nixuchigagü i ngẽma mexü̃ i naxügüxü̃. Rü ngẽmaãcü nanaxügü nax duü̃xü̃gü mea nachiga idexagüxü̃ca̱x. Natürü choma rü aixcüma pemaxã nüxü̃ chixu rü ngẽma nax duü̃xü̃gü nüxü̃ icua̱xüü̃güxü̃ nixĩ i norü ãmare.
3-4Natürü i cuma rü ngẽxguma tüxü̃ curüngü̃xẽẽgu ya yíxema tüxü̃́ nataxúxe, rü name i bexma cunaxü. Rü woo cumücüxüchi rü tama name i nüxü̃ nax nacuáxü̃ i ngẽma cuxüxü̃. Rü Cunatü ya Daxũgucü ya nüxü̃ daucü i ngẽma bexma cuxüxü̃, rü tá cuxna nanaxã i curü ãmare.
Ngechuchu nanangúexẽxẽ ga yumüxẽchiga
(Lc. 11.2-4)
5Rü ngẽxguma peyumüxẽgügu, rü tama name i ngẽma nügü írümegünetaxü̃rüxü̃ pixĩgü. Erü nümagü rü ngẽxguma nayumüxẽgügu, rü norü me nixĩ nax chiãcü nayumüxẽgüxü̃ i ngutaque̱xepataü̃güwa rü ĩanegüarü namagüwa nax duü̃xü̃gü nüxü̃ daugüxü̃ca̱x. Rü aixcüma pemaxã nüxü̃ chixu rü ngẽma nax duü̃xü̃gü nüxü̃ daugüxü̃xicatama nixĩ i norü ãmare.
6Natürü ngẽxguma cuyumüxẽgu, rü name nixĩ i curü ucapugu cuxücu, rü cunawãxta i curü ĩã̱x, rü ngéma quidexa namaxã ya Cunatü ya cumaxãxicatama ngéma ngẽxmacü. Rü ngẽxguma ya yimá Cunatü ya nüxü̃ daucü i ngẽma bexma cuxüxü̃, rü tá cuxna nanaxã i curü ãmare.
7Rü tama name i natüca̱xma cunama̱xẽxẽ i curü yumüxẽ naxrüxü̃ i ngẽma duü̃xü̃gü i tama Tupanaxü̃ cua̱xgüxü̃. Erü nümagü rü nagu narüxĩnüe rü ngẽma nax nama̱xẽẽgüãxü̃ca̱x i norü yumüxẽ rü Tupana tá nüxü̃ naxĩnü.
8Rü tama name i ngẽma duü̃xü̃gürüxü̃ pixĩgü, erü woo tauta naxca̱x ípecaxgu rü Penatü rü marü nüxü̃ nacua̱x nax ta̱xacü pexü̃́ taxuxü̃.
9Rü ngẽmaca̱x rü ñaãcü tá peyumüxẽgü i pemax:
‘Pa Tonatü ya Daxũgucüx, üünecü nixĩ i cuéga.
10¡Rü núma naxũ nax torü ãẽ̱xgacü quixĩxü̃ca̱x!
Rü tanaxwa̱xe i curü ngúchaü̃ nax cuxüxü̃ i ñoma i naanewa ngẽxgumarüxü̃ i daxũguxü̃ i naanewa nax curü ngúchaü̃ cuxüxü̃rüxü̃.
11¡Rü toxna naxã i torü paũ i ñoma i ngunexü̃ca̱x ixĩxü̃!
12¡Rü toxü̃́ nüxü̃ irüngüma i ngẽma torü chixexü̃ i taxüxü̃ ngẽxgumarüxü̃ i toma rü tüxü̃́ nüxü̃ tarüngü̃maexü̃rüxü̃ ya yíxema chixexü̃ tomaxã ügüxe!
13¡Rü toxna nadau nax tama chixexü̃gu tayixü̃ca̱x!
¡Rü naxme̱xwa toxü̃ ínanguxü̃xẽxẽ i ngẽma chixexü̃arü üruxü̃!
Erü cuma rü guxü̃guma torü ãẽ̱xgacü quixĩ, rü guxü̃étüwa cungexma, rü cumecümaxü̃chi.
Améü̃’.
14Rü ngẽxguma pema nüxü̃́ nüxü̃ perüngümagu i ngẽma chixexü̃ i togü pemaxã ügüxü̃, rü Penatü ya daxũgucü rü tá ta pexü̃́ nüxü̃ inarüngüma i perü pecadugü.
15Natürü ngẽxguma tama nüxü̃́ nüxü̃ perüngümagu i ngẽma chixexü̃ i togü pemaxã ügüxü̃, rü Penatü ya daxũgucü rü taũtáma pexü̃́ nüxü̃ narüngüma i perü pecadugü.
Ngechuchu nanangúexẽxẽ ga aurechiga
16Rü ngẽxguma tama pechibüeãcüma peyumü̃xẽgügu rü tama name i pegü pengechaü̃chíwexẽẽgü naxrüxü̃ i ngẽma nügü írümegünetaxü̃rüxü̃. Erü nümagü rü ngẽmaãcü nanaxügü nax togü nüxü̃ nax daugüxü̃ca̱x i ngẽma nax Tupanaca̱x naxaureexü̃. Rü aixcüma pemaxã nüxü̃ chixu rü ngẽma nax duü̃xü̃gü nüxü̃ daugüxü̃xicatama nixĩ i norü ãmare.
17Natürü ngẽxguma cuma rü tama cuchibüãcüma cuyumüxẽgu rü name i mea cugü cuyauxchiwe rü mea cugü curüxĩxẽeru.
18Rü ngẽxguma i duü̃xü̃gü rü taxũtáma nüxü̃ nacua̱xgü nax tama cuchibüãcü cuyumüxẽxü̃. Rü Cunatü ya bexma cuxü̃tawa ngẽxmacüxicatama tá cuxü̃ nadau, rü tá cuxna nanaxã i curü ãmare naxca̱x i ngẽma bexma cuxüxü̃.
Tórü ngẽmaxü̃gü i daxũguxü̃ i naanewa
(Lc. 12.33-34)
19Rü tama name i pegüca̱x penanutaque̱xe i muxü̃ma i perü ngẽmaxü̃gü i ñoma i naanewa. Erü ñoma i naanewa rü naxãü̃tanü, rü naweane paxãma nanachixexẽxẽ, rü ngẽmagagu inayarüxo i perü ngẽmaxü̃gü, rü ngĩ́ta̱xagüxü̃ rü naxca̱x nangĩ̱xgü.
20Rü narümemae nixĩ i penamuxẽxẽ i perü ngẽmaxü̃gü i daxũguxü̃ i naanewa i ngextá naweane tama ínachixexẽẽxü̃wa rü tama naxãü̃tanüwa rü ngĩ́ta̱xagüxü̃ tama íchocuxü̃wa nax naxca̱x nangĩ̱xgüxü̃ca̱x.
21Erü ngextá ínangexmaxü̃wa i perü ngẽmaxü̃gü, rü ngẽxma nixĩ i perüxĩnüexü̃.
Taxü̃nearü omüchiga
(Lc. 11.34-36)
22Cuxetügü rü cuxunearü omügü nixĩ. Rü ngẽxguma yima cuxetügü yamexgu rü guxü̃ma i cuxune rü ngóonexü̃wa tá nangẽxma.
23Natürü ngẽxguma tama yamexgu ya cuxetügü rü guxü̃ma i cuxune rü ẽanexü̃wa nangẽxma. Rü ngẽxguma ngẽma ngóonexü̃ i cuwa ngẽxmaxü̃ yaxoxgu rü tá cuxca̱x nawaane. Rü ngẽma waanexü̃ rü tá nawaanexü̃chi.
Taxucürüwa Tupanaaxü̃́ cupuracü ega yexera curü diẽruguama curüxĩnügu
(Lc. 16.13)
24Taxucürüwa wüxíe rü tataxrearü coriã̱x. Erü wüxi i tümaarü cori rü tá nüxü̃ tangechaü̃ rü ngẽma to rü tá naxchi taxai. Rü naga tá taxĩnü i ngẽma wüxi rü ngẽma to rü taũtáma naga taxĩnü. Rü taxucürüwa Tupanaaxü̃́ cupuracü ega yexera curü diẽruguama curüxĩnügu.
Tupana rü naxacügüna nadau
(Lc. 12.22-31)
25Rü dücax, pemaxã nüxü̃ chixu rü: ¡Taxṹ i pexoegaãẽgüxü̃ naxca̱x nax ta̱xacü tá pengõ̱xgüxü̃ rü ta̱xacü tá pixaxgüxü̃, rü ta̱xacümaxã tá pexãxchirugüxü̃! ¿Tama ẽ̱xna perü maxü̃ rü õnaarü yexera namexü̃, rü pexene rü naxchiruarü yexera namexü̃?
26¡Dücax penangugü i werigü i tama toegüchiréxü̃, rü tama nanetüarü o ibuxgüxü̃, rü ngepatagüxü̃ nax namaxã nanguxü̃güxü̃ca̱x i norü õna! Natürü Penatü ya Daxũgucü rü nanaxüwemü i ngẽma werigü. Rü pema rü Tupanape̱xewa rü guxü̃ma i werigüarü yexera pixĩgü.
27¿Rü texé i petanüwa rü woo poraãcü taxoegaãẽgu rü ngẽmaãcü tá itanama̱xãchixẽxẽ i tümaarü maxü̃ i wüxi i ora?
28¿Rü ta̱xacüca̱x pexoegaãẽgü naxca̱x i pexchiru? ¡Dücax penangugü i ngẽma putüragü i ngextámare yaexü̃ i tama puracüexü̃, rü tama nügü üxchirugüxü̃!
29Natürü pemaxã nüxü̃ chixu rü woo gumá ãẽ̱xgacü ga Charomóü̃ ga tatanüxü̃ ga naxchirumaxã ãxchirucü rü taguma wüxi ga putürachacurüxü̃ nixĩ ga naxchiru.
30Rü ngẽxguma Tupana ngẽmaãcü nanga̱xãẽgu i ngẽma putüragü i ñu̱xma ngẽxmagüxü̃ rü moxü̃ rü marü taxuxü̃, rü yexera tá pexna nadau i pemax, Pa Duü̃xü̃gü i Tama Mea Yaxõgüxü̃x.
31Rü ngẽmaca̱x tama name i pexoegaãẽgü rü ñaperügügü: ‘¿Ta̱xacü tá tangõ̱xgü?’ rüe̱xna ‘¿ta̱xacü tá tixaxgü?’ rüe̱xna ‘¿ta̱xacümaxã tá taxãxchirugü?’ ñaperügügü.
32Erü ngẽma duü̃xü̃gü i tama yaxõgüxü̃ rü naxca̱x naxoegaãẽgü i guxü̃ma i ngẽma nüxü̃́ taxuxü̃. Natürü i pema rü pexü̃́ nangẽxma ya Penatü ya Daxũgucü ya nüechama nüxü̃ cuácü i guxü̃ma i ngẽma pexü̃́ taxuxü̃.
33Rü ngẽmaca̱x guxü̃arü yexera penaxwa̱xe nax naga pexĩnüexü̃ ya Tupana ya daxũwa ãẽ̱xgacü ixĩcü, rü penaxüxü̃ i ngẽma nüma pexü̃́ nanaxwa̱xexü̃. Rü ngẽxguma i nüma rü naétü tá pexna nanaxã i guxü̃ma i ngẽma pexü̃́ taxuxü̃.
34¡Taxṹ i naxca̱x pexoegaãẽgü i ngẽma moxü̃ tá üpetüxü̃! Erü moxü̃arü ngunexü̃ rü tá nüxü̃́ nangẽxma i norü guxchaxü̃gü i namaxã ínanguxü̃. Erü wüxichigü i ngunexü̃ rü nüxü̃́ nangẽxma i noxrütama guxchaxü̃gü”, ñanagürü.
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2022, Wycliffe Bible Translators, Inc. All rights reserved.