Johana 2
MIZ
2
Kana khuaa inneihna
1Tin, ni thum niah Galili rama Kana khuaah lawi chaw a awm a, chutah chuan Isua nu a awm. 2Isua leh a zirtîrte pawh lawi chaw eiah an sâwm a. 3Tin, uainin a daih ta lo va, Isua nu chuan a hnênah, “Uain an tlachham ta e,” a ti a. 4Tin, Isuan a hnênah, “Hmeichhia, nanga mi lo hriatsak tûr eng nge awm? Ka hun a la thleng lo ve,” a ti a. 5Tin, a nu chuan rawngbâwltute hnênah, “In hnêna a sawi apiang chu ti zêl ang che u,” a ti a. 6Tin, Juda-te sil fai dân angin lung tuibêl paruk, bûk sawmli hmun hnih emaw, hmun thum emaw leng ṭheuh, chutah chuan an hûng a. 7Tin, Isuan an hnênah, “Tuibêlahte tui tikhat rawh u,” a ti a. Tin, a rawng rualin an tikhat ṭheuh va. 8Tin, an hnênah, “Tûnah thâl ula, ruaiṭheh fatu hnênah kalpui rawh u,” a ti a. Tin, an kalpui ta a.
9Tin, ruaiṭheh fatu chuan tui uaina lo chang ta chu a tem a, a chhuahna chin a hre lo va (tui thâl rawngbâwltute erawh chuan an hria a), nupui nei tûra chu a ko ta a, 10a hnênah, “Mi tinin a tîrah uain ṭha an dah chhuak ṭhîn; tin, a tam deuh an in hnuin a ṭha lo deuh chu an dah chhuak ṭhîn; nang zawngin tûn thlengin uain ṭha i la vawn hi,” a ti a. 11Isuan he a chhinchhiahna tih ṭan tirhna hi Galili rama Kana khuaah chuan a ti a, a ropuizia a lantîr ta a; tin, a zirtîrte chuan ani chu an ring a.
12Tin, chumi hnuah chuan Kapernaum khuaah a zuk kal a, amah leh a nu nên, a unaute nên, a zirtîrte nên; chutah chuan ni rei lo tê an awm a. #Mt 4.13
Isuan tempul a tlawh
(Mt 21.12-13; Mk 11.15-17; Lk 19.45-46)
13Tin, Juda-te kalhlên kût a hnai tawh a, Isua chu Jerusalem khuaah a han kal a. #Ex 12.1-27 14Tin, Pathian biak ina sebâwngte, berâmte, ṭhuro zuartuho leh tangka thlengtuho ṭhu a hmu a. 15Tin, hruihrualin vuakna a siam a, berâm leh sebâwng chu a zain Pathian biak in aṭang chuan a hnawt chhuak a, tangka thlengtute tangka chu a leihbua a, an dawhkânte a nam thlûksak bawk a; 16tin, ṭhuro zuartute hnênah chuan, “Hêng thil hi heta ṭangin kalpui rawh u, ka Pa in sumdâwnna inah siam suh u,” a ti a. 17(Tin, “I ina ka ṭhahnemngaihnain mi ei zo vang,” tih ziak a ni tih a zirtîrte chuan an hre leh ta a.) #Sam 69.9 18Chutichuan, Juda-ten a hnênah, “Hêng thil i tih hi chhinchhiahna eng nge min hmuhtîr theih?” an ti a, an chhâng a. 19Isuan an hnênah, “He in hi tichhia ulang, ni thum chhûngin ka tungding leh ang,” a ti a, a chhâng a. #Mt 26.61; 27.40; Mk 14.58; 15.29
20Tin, Juda-te chuan, “He in hi kum sawmli leh kum ruk sak a ni; nangin ni thum chhûngin i tung ding ang maw?” an ti a.
21(Nimahsela, a taksa in thu sawi a lo ni zâwk si. 22Chuvângin, mitthi zîng ata a thawhlehin, chumi thu chu a sawi tawh tih a zirtîrten an hre leh ta a; tin, Pathian Lehkha Thu leh Isua thusawi chu an ring ta a.)
Isuan mihring thinlung a hria
23Tin, kalhlên kûta Jerusalem khuaa a awm lai chuan a thil mak tihte an hmu a, mi tam takin a hming an ring ta a. 24Nimahsela, Isua chu an lakah a ngampa lo, mi zawng zawng a hriata, 25mihring thu tu ma hrilh fiah a ngaih loh avângin; amahin mihring chhûnga awm apiang chu a hre si a.