Jònə 2
2
Ndzòʼo a Kanà
1Njyə̂ lə̀ làŋə̀ ɨpaa ndzòʼo ɨ̀ pə a mbòmpə àlaʼà Kanà amwuə àlaʼà Galìlyə̂. Mǎ pɨ Yěsû à lə̀ pə ghu. 2Pɨ lə̀ kɨ ngwuunə̀ a Yěsû pobə ɨ̀zùŋə̀ ndzùmə̀ ɨ̀pe alyiʼə nɨ̀zoʼò ghu. 3Nkwùə̀ nɨ pɨ lə̀ nônə mɨ̀lùʼù mɨ̀tsùmə̀ alyiʼə nɨ̀zoʼò ghu, mǎ pɨ Yěsû à lə̀ shwəŋə̀ ambo ze lo, “Ka mɨ̀lùʼù pirə̀ e ambo pobə.”
4Yěsû a kẅùə̀ lo, “Mə̀ngyə̌, àzâ amwuə a àkə? Nkwùə̀ mə̀ ɨ̀ pirə̀ e tɨ kùʼù.”
5Mǎ pɨ Yěsû à lə̀ tyiʼə̀ nshwəŋə̀ ambo ngàŋə àfàʼà lo, “Nɨ̂ ghɨ̀rə̀ ànwùə̀ àtsùmə̀ nɨ à shwəŋə̀nə lo nɨ̀ ghɨ̀rə̀.”
6Mɨkɨŋə mɨ nchyə ntuurə̀ nɨ pɨ lə̀ tsùŋə̀nə nɨ mɨ̀ghòorə lə̀ pə alyiʼə ghu (ntiinə à lə̀ pənə mbòomə pɨ̀Jew a nɨ chyâ nchyə amwuə nsùu mbɨ̀ŋmə̀ ɨ̀zobə ghu nkwùə̀ nɨ pobə mənə nchàʼtə̀ a Nẅùə̀). Taʼà nɨkɨŋə à lə̀ mə nkwuunə̀ tsaʼa ɨ̀təəmə̀ mɨ̀ghumə̀ mɨmbaa kə̀ mɨ̀ghumə̀ mɨntarə.
7Yěsû à lə̀ shwəŋə̀ ambo ngàŋə àfàʼà za lo, “Nɨ̀ chyâ nchyə ndẅentə̀ mɨkɨŋə mə.” Pobə kɨ nchyâ mɨ lẅentə̀. 8A shwəŋə̀ ambo ngàŋə àfàʼà za lo, “Nɨ̀ sə̂ a yɨ̀tse ngə̀ ŋŋâ ambo ŋònə̀ nɨ à mənə ngàbə̀ ɨ̀pwuumə̀.”
Pobə lə̀ kɨ nsə̂ ŋŋâ ambo ze. 9Ŋònə̀ nɨ à lə̀ mənə ngàbə̀ ɨ̀pwuumə̀ à lə̀ zhwiʼì nchyə wa ɨ tyiʼə̀ mɨ̀lùʼù. La ka à lə̀ zhyə̂ e alyiʼə nɨ mɨ furə̀nə, à lə̀ kɨ nzhyə̂ tyìʼə̀ ngàŋə àfàʼà nɨ pobə lə̀ sə̂nə nchyə ghu. Lenəla ŋònə̀ nɨ à mənə ngàbə̀ ɨ̀pwuumə̀ a tyiʼə̀ nfuŋə̀ a ndwuumə̀ ngɨ̀ɨnə̀, 10nshwəŋə̀ ambo ze lo, “Ŋwùə̀ ntsùmə̀ à wa mbyə̀ ŋŋâ pə mɨ̀lùʼù mɨ̀shìʼnə̀ pànə̀ nô zaʼà a pòŋə̀ ŋâ a mɨ tɨ̀pòŋə̀; wə̀ kùmə̀ mmyàʼtə̀ pànə̀ nô mɨ̀lùʼù tə mɨ noʼò wə̀ pòŋə̀ tô nɨ mɨ̀lùʼù mɨ̀shìʼnə̀ tɨ̀tsòŋə̀.”
11Lə lə̀ pə ntsàambyə̀ àlènə̀ ànwùə̀ yerə̀nə yerə̀nə nɨ Yěsû à lə̀ ghɨ̀rə̀nə a Kanà amwuə àlaʼà Galìlyə̂. Lenəla a furə̀ aŋunə nnèrə̀ àghuʼtə̀ e, ɨ̀zùŋə̀ ndzùmə̀ ɨ̀pe tyiʼə̀ nnùŋə̀ ntɨŋmə̀ aŋunə ze.
12Tsaʼnə zə̀ ànwùə̀ a lə̀ làŋə̀nə, Yěsû à lə̀ shwuʼə̀ ndèrə̀ a Kàpenòmə̀ pobə mǎ e, nɨ pɨlyimə ɨ̀pe pɨ mbyàŋnə̀, farə ɨ̀zùŋə̀ ndzùmə̀ ɨ̀pe, pobə pɨ pobə chyə̂ alyiʼə ghu aŋunə mɨ̀njyə̂ mɨ̀tse.
Yěsû a kantə̀ ngàŋə mɨ̀tàanə amwuə Ndâ Mɨ̀shwàʼà Nẅùə̀
(Mat 21.12-13; Mrk 11.15-17; Luk 19.45-46)
13Nkwùə̀ nɨ njyə̂ Nɨ̀ghaʼà Àlàŋə̀ Mmyàʼtə̀ pɨ̀Jew ɨ̀ lə̀ mənə mbaatə̀, Yěsû à lə̀ koʼò ndèrə̀ a Yèrusalèmə̀. 14À lə̀ kɨ kwuunə̀ a Ndâ Mɨ̀shwàʼà Nẅùə̀, ndzəənə̀ pə̀ənə̀ amwuə pɨ mə nshwùunə̀ mɨ̀fòŋə̀ nɨ mɨ̀mbyə̂ mɨ ndzìrə̀ pobə ɨ̀lwuʼə̀. Pànə̀ nɨ pobə lə̀ mənə nkyopə̀ nkabə̀ lə̀ kɨ mbə amwuə. 15À lə̀ lòo nkɨrə mbaʼà ngwàanə̀ ghu, nkantə̀ pànə̀ pɨ̀tsùmə̀ amwuə Ndâ Mɨ̀shwàʼà pobə furə̀ nɨ mɨ̀fòŋə̀ ɨ̀mobə pobə mɨ̀mbyə̂ mɨ ndzìrə̀ ɨ̀mobə. Lenəla mbə̀ŋə̀ pɨ̀tepèrə̀ pɨ nkabə̀ ɨ̀pobə nkumnə̀ a ɨ̀shyə̂, nkabə̀ ɨ̀ tyiʼə̀ ndzaanə̀ amwuə ndâ. 16À lə̀ shwəŋə̀ ambo pànə̀ nɨ pobə lə̀ pənə nshwèntə̀ ɨ̀lwuʼə̀ lo, “Nɨ̀ lòo a pèrə ndòo furə̀; kò nɨ̀ lòo ndâ Tǎ ɨwəə ngɨ̀rə̀ ndâ mɨ̀tàanə ghu!” 17Ɨ̀zùŋə̀ ndzùmə̀ ɨ̀pe pa lə̀ zəənə̀ ànwùə̀ nɨ Yěsû à lə̀ ghɨ̀rə̀nə la nkẅempə̀ ànwùə̀ nɨ a pənə amwuə àŋwàʼnə̀ Nẅùə̀ lo, “Tǎ Nẅùə̀, ǹdanə nkòŋə̀ lo ànwùə̀ ndâ o â pə amwuə ntɨŋmə̀ mə̀ nkɨrə̀ tsaʼa ɨ̀mǔ.” 18Pɨ̀Jew lə̀ pyiitə̀ e lo, “Mbə̀ʼə wə̀ nèrə̀ a zèrə àlènə̀ lo wə̀ chyə̂ nɨ ɨ̀tɨ̀ŋnə̀ a nɨ ghɨ̀rə̀ ànwùə̀ zə?” 19Yěsû a kẅùə̀ ambo pobə lo, “Nɨ̀ shàʼtə̀ Ndâ Mɨ̀shwàʼà Nẅùə̀ zə, mbɨ lòo njyə̂ ɨtarə korə̀ a zèrə.” 20Pɨ̀Jew pyiitə̀ lo, “Pəə lə̀ lòo nguʼu mɨ̀ghumə̀ nɨ̀kwàa ntsòbə̀ ntuurə̀ a nɨ korə̀ ndâ zə, wə̀ kùmə̀ mbə lòo njyə̂ ɨtarə korə̀ a zèrə?” 21À lə̀ mə nshwəŋə̀ Ndâ Mɨ̀shwàʼà Nẅùə̀ nshwəŋə̀ la mbɨ̀ŋmə̀ e. 22Nkwùə̀ nɨ Yěsû à lə̀ zhwuumə̀nə a nɨ̀wɨghə̀, ɨ̀zùŋə̀ ndzùmə̀ ɨ̀pe kẅempə̀ ànwùə̀ nɨ à lə̀ shwəŋə̀nə; lenəla, ntyiʼə̀ mbyiimə̀ àshwəŋnə̀ Nẅùə̀ pobə àshwəŋnə̀ nɨ Yěsû à lə̀ shwəŋə̀ mə.
Yěsû à zhyə̂ ànwùə̀ nɨ a pənə a ntɨŋmə̀ ŋwùə̀ ntsùmə̀
23Tsaʼnə Yěsû à lə̀ pənə a Yèrusalèmə̀ aŋunə njyə̂ Nɨ̀ghaʼà Àlàŋə̀ Mmyàʼtə̀, pànə̀ pɨ̀noʼnə lə̀ nùŋə̀ ntɨŋmə̀ aŋunə ze ntii ɨ̀lènə̀ ɨ̀nwùə̀ nɨ à lə̀ mənə ngɨ̀rə̀. 24La ka Yěsû à lə̀ nùŋə̀ e ntɨŋmə̀ e aŋunə pobə ntiinə à lə̀ zhyə̂nə a ghobə pɨ̀tsùmə̀. 25Ka à lə̀ chi ntàʼà e lo ŋònə̀ ɨ̀tse â tiitə̀ ànwùə̀ mbə̀ʼə ŋwùə̀ ambo ze ntiinə à lə̀ zhyə̂nə ànwùə̀ àtsùmə̀ nɨ a lə̀ pənə amwuə ntɨŋmə̀ ŋwùə̀ ntsùmə̀.
Выбрано:
Jònə 2: pny
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2017, Cameroon Association for Bible Translation and Literacy