Josua 2
2
Josua tomɛ nɛra ba sɔh ka nyiŋi Keenan harɛ
1Dɛ Israel tena la bwa cheme bobɛl baa dɛ yerɔ Sitim#2:1 Sitim sɔn bɛl ɡee Akaasia dɛkalkɛŋɔ ba du akaasia daa bela. dɛ so bela. Asɛ Josua sɔh dɛ le ba bini baala banɛ dɛ tom ba ŋɔ, “Hé ka sɔh nyiŋi Keenan harɛ dɛ́ na ɡɛ waa doa, bwɛjen Jeriko te fanfa.” Asɛ ba sɔh dɛ la bela, dɛ ka choɡ hanjwamane Rahab.
2Dɛ Jeriko kooro noɔ kɛŋɔ Israel tena bane sɔɔh ba jo bwɛɛ la ta awola jwaana la ne, dɛ́ ba sɔh nyiŋi harɛ la. 3Kooro la tomɛ nɛn haah la be kɛŋɔ ó ka ŋɔ o be Israel baala baa baa choɡ o dem la, ó lee ba tɛɛ ba. Ba balɔ dɛ́ ba sɔh nyiŋi ɡɛ harɛ la bwa aa doa.
4Dɛ Rahab te felo dɛ kpɔ baala banɛ la sɔh, dɛ ŋɔ, “Kpelaa, kɛ maa bela baa lea jemɛ. 5Wee aa dɛ ba joe baa ba bwɛjen doonyojen la tɔe la, ba leɔ kaa, n ta bela baa chaɡa nae. Amɔ aa do ɡɛ nɔ hé ti ba warane, he ken ɛɛ puu baa.” 6Dɛ o kpɔ ba sɔh saldoa yabi daa lɔɡa.#Hib 11:31 7Ate, kooro nɛra la le bwɛɛ la ta dɛ chiɡ leebɔɔ baa cheɡɛ o ta dɛɛ le Jɔɔdan Moo la, dɛ ti ba kaa ɡaaɡe ba bɔr. Ba den laa bwɛjen la doonyoa laa tɔ.
8Mɔɔ Israel baala la ka chɔ jwaana la, Rahab teehnɔ la ba be dea la doa, 9dɛ ŋɔ ba be ŋɔ, “N nao kɛŋɔ Korowii kpɔ ya harɛ nɔ tɛ heya, a ɡelɔ ɔmee kohona lawɛ yaa he wa. Nomɛlbwa waa lɔ harɛ nɔ ta no he wa aa, dɛ o bwara yɔrɔ.#Kaa 23:27 10Ya no ɡɛ Korowii aa ɡela Mposwɛm teŋe, asɛ he won le o baŋ ɡɛ saŋ haa le Ijipt harɛ ta dɛɛ ba la, dɛ berɛ no kpoe haa kpoo Amɔre tena koranar banɛ Sihon ne Ɔɡ Jɔɔdan Moo wee leebɔr dɛ chɔɡ ba harɛ bwa kwaraa la.#Kur 21:21-35 11Yaa no ɡɛ la, ya jum jaoh ya bambile chɔɡ ɡɛ haa ɛa la wa. Dɛkalkɛŋɔ Korowii haa dɛ tomɔ laanee nyundua ne harɛ bwa kooro. 12Rahab berɔ ŋɔ ba be ŋɔ, bá ŋwɛɛ Korowii kɛŋɔ dɛ ba dɛ ba dɛ́ ba yo Jeriko tena aa, baa na o ne o lolanar sumii ɡɛ waa na ba sum la. Dɛ ŋɔ ba ɛ we-ɛɛle bɛl ásɛ o na dɛ́ yarada kɛŋɔ 13baa baɡɔ nyoa kɛŋɔ baa lɛ o nya ne o mɛɛ ne o nimambii dɛ ba biirere nyuu ba bɛ ban kpoo.”
14Anee nɛra la baɡɔ nyoa ŋɔ, “Dɛ ya ta waa yaa bola la ta teŋaa, Korowii kpoo yaa. Dɛ he ta yaa leɛ tɛ tenaa, ya ɡee nyiŋuu dɛ bɛ ɡel bá kpo he ne he nɛn bɛlbwa awola Korowii aa kpɔ he harɛ nɔ do ya nɔn ta la.” 15Dɛ dea Rahab aa lɔ o ta la, ba ma bwɛjen la danjwɛɛ choŋi o ta. Anomanta, Rahab cheɡɛ dea la tokoro ta dɛ vɔwɛ ɡboɡbii ba ta harɛ, asɛ dɛ ŋɔ Israel baala la be ŋɔ báa won che o ta dɛ́ tu bwɛjen la dahara. 16Haah la ŋɔ ba be ŋɔ, “Hé ka sɔh deŋɡarere nɔ ta, ásɛ nɛra baa dɛ ti heyaa la bɛ heyaa na. Hé sɔh bela tɔpera atoro ka tel saŋ baa berɛ ba, ásɛ he kaa bela haa lea ba.”
17Nɛra la aa dɛ kaa la ba ŋɔ o be ŋɔ, “Yaa nyoa yaa baɡɛ laanee soh. 18Waa yaa dɛ nyin he ɛ laanee kɛŋɔ, awola ya laa tena la aa ba jo harɛ nɔ ta la, kpɔ ŋwɛnswɛm nɔ vɔwɛ he tokoro nɔ ta. Ásɛ dɛ yerɛ he nya ne hɛɛh, ne he nimambii ne he nimanar dɛ he lolanar bwa, ba jo he dem bonɔ. 19Ba bini bɛlbwa le he dem bonɔ kaa laa, dɛ o ɡbabirii ɛ o nyu dɛ nyin o seo, dɛ ya be laa a le. Kɛ dɛ bɛlbwa ta lɔ dem bela asɛ waane ɛo waa, dɛ ya bee a le.” 20Nɛra la berɔ ŋɔ Rahab be ŋɔ, “Dɛ he le yaa tɛ tenaa, amɔ te fɔo haa ɡela ya ne he fɔwɛ la aa won ɛ toma kpa.”
21Ate, haah la sɛh dɛ ta ba ŋwɛnɛ ba kaa. Baa kaala tonɛ la, o kpɔ ŋwɛnswɛm la vɔwɛ tokoro la ta.
22Israel baala la aa kaala la, ba kaa sɔh deŋɡarere la ta tɔpera atoro ɡɛ haah la aa baɡla la. Kooro nɛra la ɡe kaa ɡaaɡe ba bɔr harɛ la ta bwa ba ta ban nae, dɛ laa berɛ ba Jeriko. 23Ate, nɛra baa sɔah dɛ ka nyiŋi harɛ la le deŋɡarere la ta, dɛ ka ɛɡɛ Jɔɔdan Moo le, dɛ kaa bela baa lea. Baa laŋa la, ba kaa bol Josua be waa baa kaa na bwa. 24Ba ŋɔ o be ŋɔ, “Ya nao kɛŋɔ Korowii kpɔ harɛ la bwa do ya nɔn ta. Bela tena bwa jum jah ya wa.”#Mma 2:25
Выбрано:
Josua 2: mzw
Выделить
Копировать
Сравнить
Поделиться
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.