Yõaannẽ 2
2
Ũũhũ Yeesu maam hĩĩ mẽrtĩ
1Ma baa urutaa cĩ waathinniook iyyio, baa aaĩ Maria aattĩ Yeesu nyahũũtaawa umwaanĩ õlõõ ꞌcĩ haĩ Kana looccaa cĩ ꞌGalileea. 2Baa avva eeta Yeesu hĩ nuyyiook#2:2 Nuyyiook: Baa ĩĩn nuyyiooha eet ꞌcĩg ẽlẽmĩ ꞌlimman cĩ Yeesu nẽ ĩthĩhĩt ĩnõõnnõ. Baa ẽbẽra Yeesu nuyyiook õmmõtõ hĩ ꞌramma, hiita hĩĩtõ ꞌthooyyiak cĩgĩnnĩg. Baa ĩꞌthõ Yeesu ĩhõõggõ makaꞌthĩta hõõt hĩdĩmanit thooꞌthiok ꞌcĩg ĩnaat eeta nẽ illimanit eet nyeemuut ꞌcĩ abũnnaa cĩ Yeesu. cĩgĩnnĩg buúk, hiita nyahũũtaawa nĩĩcĩ. 3Ma baa edeccia mẽrta cĩ viinoo, ikia uduhaak Maria Yeesu ĩĩnnĩk, “Edecciaak eeta niccieeg mẽrtĩ cĩ viinoo.”
4Ẽdẽcĩ Yeesu aattĩnnĩ anneek, “Morwahit, nga hõdõlan ꞌthaa ꞌcĩ occa hadticanĩĩ naa thõõth umwa. Ma haduhaakaa dtiic ꞌcĩ occa hadticani.”
5Nĩngĩtĩ aduhaakĩ Maria dticcianniook nĩngaata annẽẽkĩ, “Ĩdĩmanit nẽẽ niig ꞌgii vẽlẽk ꞌcĩ aduhaakuung nẽẽnĩ.”
6Baa aattĩg ijjioꞌnya tõrkõnõn ꞌcĩg abbĩꞌthĩĩ maama obokii nĩngaata, ꞌcĩg baag occa ũũnyẽnĩ eeta, hĩcĩ aduha nyattalĩ cĩ ꞌJudeei. Aꞌnyak ijjio hõdẽĩ lotorroꞌnya ꞌcĩg obbitig cĩg occa ũũppan ĩĩn ꞌwec hode tõrkõnõn.
7Ma nĩngaata, uduhaak Yeesu dticcianniook ĩĩnnĩk, “Otogooccik ijjioꞌnya niccig maam hĩbbĩtĩt.” Nĩngĩtĩ õgõõcĩkĩ nẽẽg maam hĩbbĩtĩt dhũk. Ma baa ĩbbĩtĩt ijjioꞌnya ẽlẽk, 8uduhaak Yeesu dticcianniook ĩĩnnĩk, “Idtiillia maam ũgĩ nẽ aꞌnyaktoothihu jayyio.”
Iita ĩdĩmanit nẽẽg hĩcĩ aduhaak Yeesu ho. 9Nĩngĩtĩ atarrĩ jayyiõõĩ maam iccig utuhuyyi ĩĩtõ mẽrtĩ cĩ viinoo, ꞌcĩ ahahat dtum. Baa hõllõngaa aga nẽẽ ꞌgõõl ꞌcĩ akuuni mẽrta niccieeni, tananga aga dticcianniooha baag adtĩĩla maam niccig. Ma ho, ũtũvva jayyiõõĩ nyattaraan ngadiiha 10nẽ ĩĩnnĩk, “Gõõng hakatĩ mẽrtĩ cĩ viino ꞌcĩ ahahatĩĩ ĩcĩ oou. Ma ũũppattĩ hẽẽrõnĩ, nẽẽthĩ, aꞌnyakta ꞌteeddiaha. Agunyuthi hinnia hatĩ nii mẽrtĩ ꞌcĩ ahahatĩĩ ĩꞌthõng hĩĩ noho inni?”
11Thõõth ꞌcĩ baa adtican Yeesu ĩĩcĩ oou, ꞌcĩ ĩnaat eeta ho cieeni. Baa adtican nẽẽ thõõth icci, õlõõ cĩ Kana, looccaa cĩ ꞌGalileea. Ikia ẽtẽrẽtha Yeesu bulẽẽnĩt cĩnnĩ õlõõ nĩĩca nẽ iita elemit nuyyiooha cĩgĩnnĩg ĩnõõnnõ, hĩnĩngĩtĩ thõõth icci.
12Ma urutaa cĩ, ĩtĩngaacõ Yeesu hĩ aattĩnnĩ hĩ ꞌgõtõõnõgĩ hĩ nuyyiook cĩgĩnnĩg, õõt ĩĩcĩ ꞌtaaũn cĩ Kapernaumĩ nẽ õõt aauto waathinniook ꞌcĩg abadtẽc nĩngaata.
Iiggia Yeesu tũjaarriok ꞌCieethaa cĩnnĩ
(Tigiil Maatteeo 21:12-13; Maarko 11:15-17; ꞌLuuka 19:45-46)
13Ma baa õbõhĩ Kõrra cĩ Haangittõõ,#2:13 Kõr cĩ Haangittõõ: Ĩĩn ciee kõr ꞌcĩ ammuhaanĩ eeta cĩg ꞌJudeei kõr baa urwacanĩ nẽẽg hõdẽĩ hõdẽĩ, ngadihẽẽt cĩg hattũũgetu biyyiẽẽtĩĩ cĩg mĩꞌnyoonnu. Ĩnõõ baa aku ahaangĩ Makayyioohiti olooyyiok cĩggĩĩng looccaa cĩ Ijjibi baarkit nẽ tarĩ, ummukta kõr baa aduhi nẽẽg ũbũnẽẽt ꞌcĩg aitiõõ abũũlana tõõ. Tigiil ꞌBuuk cĩ Luugithõõ 12:17-28. ikia ũũk Yeesu ĩĩcĩ ꞌJeruꞌthalẽmĩ. 14Ma halangatõõ cĩ ꞌCieeth cĩ Nyekuci,#2:14 ꞌCieeth cĩ Nyekuci: Baa ĩĩn ꞌCieeth cĩ Nyekuci hõdẽẽthõng ꞌJeruꞌthalẽma, aꞌnyak ꞌcieeth ciee nĩngĩtĩ hõdẽẽthõng ꞌcĩ ĩbbõõrĩkĩ paadĩrꞌnya Nyekuc ꞌgaarrieenit. Baa aaĩ Nyekuci bulẽẽtta ꞌCieethaa cĩnnĩ Ngaatĩ Aꞌngirannii nẽ Ẽllẽẽm Gẽrrẽẽt ko. Paadĩr cobbi dioo ꞌcĩ aduhun Nĩngĩtĩ Aꞌngirannii ho, õkõõĩ biyyi cĩg ꞌgaarrieettak, hátĩ hũũk hũtũngeek Nyekuci ꞌthẽccanẽẽt cĩg eetuk. Tigiil thõõth icci ꞌBuuhaa cĩ Levitiko 16; Ebereei 9. ũmmũdoothĩk Yeesu eet ꞌcĩg ũũtẽnĩ tĩĩn, hĩ aꞌtha, hĩ ngabuuthiꞌnya ꞌcĩg occa ũũtĩ hĩĩ ꞌbaaninit cĩ Nyekuci, hĩ eet ꞌcĩg appak ꞌrabbẽẽt, iccioloongan tẽrẽmẽẽjĩtĩ loota. 15Nĩngĩtĩ akũmanaanĩ Yeesu halli umwa ꞌlõõrõngĩtĩ nẽ itiggiaeek ĩhõõggõ hõdẽĩ hĩ aꞌtha hĩ tĩĩn vẽlẽk, hõõt battaala ꞌCieethaa cĩ Nyekuci. Ebelluukan nẽẽ tẽrẽmẽẽjĩt cĩg eet ꞌcĩg appak ꞌrabbẽẽt ko nẽ ĩꞌthaan ꞌrabbẽẽt cĩggĩĩng ꞌcĩg kũtũrĩg. 16Ma nĩngaata, uduhaak eet ꞌcĩg ũũtẽnĩ ngabuuthiꞌnya ĩĩnnĩk, “Ootti ngabuuthiꞌnya niccig battaala! Ma haarru ꞌCieeth cĩ Baaba hĩĩ ꞌcuuk!”
17Nĩngĩtĩ ammuhaanĩ nuyyiooha cĩgĩnnĩg thooꞌthiok baag eheeddi ꞌBuuhaa cĩ Nyekuci aĩ, “Hammĩnani naa ꞌcieeth cunni gẽrrẽẽt ũdũt.”#Tigiil ꞌBuuk cĩ Tegellwaanu 69:9
18Ma ho, iita ijinit makayyiooha cĩg ꞌJudeei Yeesu ĩĩttĩk, “Thõõth iina ꞌcĩ ĩnaat eeta ꞌcĩ occa eterꞌtheekeet nii ngagĩĩt makaaꞌthĩt ꞌcĩ adticanĩĩ thooꞌthiok iccig vẽlẽk ko?”
19Ẽdẽcĩ Yeesu ĩhõõggõ anneek, “Ĩꞌthaanit ꞌCieeth icci Nyekuci ho, nẽ hatĩ hẽtẽhẽnya naa waathinnioohĩĩ ꞌcĩg ĩĩn iyyio hĩbĩl tarĩ.”
20Ẽdẽcĩ makayyiooha cĩg ꞌJudeei ĩnõõnnõ anneek, “Ẽhẽnytĩ ꞌCieeth ciee Nyekuci ho irkiꞌnyia hẽẽn ꞌwec hĩ tõrkõnõn. Ne ꞌcĩ aaꞌnyi nganiit ꞌmuuk ĩĩ, occa ehenyiti tarĩ waathinnioohĩĩ ꞌcĩg ĩĩn iyyio thõng ko?”
21Nẽẽthĩ, ꞌCieeth cĩ Nyekuci ꞌcĩ õthõõth Yeesu ho, ĩĩn ẽlẽ cĩnnĩ. 22Ma baa ũrũga Yeesu daahĩtha, iita ummuktõõthĩ nuyyiooha cĩgĩnnĩg thõõth baa aduha nẽẽ aĩ, hehenyiti hatĩ naa ꞌCieeth nicci waathinnioohĩĩ ꞌcĩg ĩĩn iyyio haaga. Nĩngĩtĩ au ẽlẽmmĩ nuyyiooha cĩgĩnnĩg thõõth ꞌcĩ eheeddi ꞌBuuhaa cĩ Nyekuci, hĩ thõõth baa aduha nẽẽnĩ.
Aga Yeesu eet vẽlẽk
23Ma baa nga aaĩ Yeesu Kõrraa cĩ Haangittõõ ꞌJeruꞌthalẽma, baa mẽẽlĩg eeta ꞌcĩg acĩn thooꞌthiok ꞌcĩg ĩnaat eeta ꞌcĩg adtican nẽẽnĩ, nĩngĩtĩ ẽlẽmmĩ ĩnõõnnõ. 24Nẽẽthĩ, baa aga Yeesu thooꞌthiok ꞌcĩg ꞌthinneeti cĩggĩĩng nẽ hõllõngaa ẽlẽmaakĩ ĩhõõggõ hĩllõõanit ĩnõõnnõ. 25Baa hõllõngaa adiim Yeesu eet umwa huduhaak ĩnõõnnõ thõõth cĩ eetu, hĩnĩngĩtĩ baa aga nẽẽ muhẽẽnĩt cĩnĩĩng vẽlẽk.
Выбрано:
Yõaannẽ 2: did
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2017, Wycliffe Bible Translators, Inc., All rights reserved.