Аман өһө 6

Эбии сэрэтии

1Уолум! Өскөтүн эн кими эрэ мэктиэлээн тылгын биэрбит,

туора киһи туһугар илии охсуспут буоллаххына,

2ол аата тылгыттан ылларбыккын,

баскын быһа этиммиккин –

3киһи илиитин иһигэр киирэн биэрбиккин.

Дьэ оччотугар, тоойуом, тугу да гын, өрүһүнэри эрэ толкуйдаа,

кытаат, ол киһигин, тиийэн, арахпакка ааттаа;

4утуйар уугун ончу умун,

көрбүт хараххын симимэ,

5булчуттан куотар табалыы, доҕууртан төлө көтөр чыычаахтыы,

быыһанарга эрэ дьулус.

6Кымырдаҕаһы баран көр, сүрэҕэ суох,

киниттэн муудараска үөрэн:

7ким да киниттэн ирдээбэтин,

ким да кинини кэтээбэтин, сирдээбэтин үрдүнэн,

8кыстыыр бурдугун сайыҥҥыттан хаһаанар,

аһыыр аһылыгын сыһыыттан таһынар.

9Оттон эн, күөх көппө, төһө өр күөлэһийэ сытаҕын,

төһө өр бу курдук уһуктубат буолаҕын?

10Өссө быыкаатык кум гына түһүөҥ,

нуурайан-нухарыйан ылыаҥ, быар куустан олорбохтуоҥ да,

11быстарар муҥуҥ-таҥыҥ, хаамаайы курдук, бу тиийэн кэлиэҕэ,

хаһаамматах кыһалҕаҥ, халабырдьыт курдук, кыһарыйбытынан барыаҕа.

12Хара санаалаах нэгэй киһи

албыныгар-куулдьаҕатыгар үктэтээри, киирэр-тахсар:

13хараҕынан имнэнэр, атахха тэбэн ылар,

тарбаҕынан кистээн бэлиэ биэрэр;

14уодаһыннаах суолу торумнуур,

куруутун куһаҕаны оҥорору толкуйдуур,

өһү-сааһы күөдьүтэр.

15Дьэ ол сэтигэр кини иэдээҥҥэ түбэһиэҕэ,

өрүһүммэттии, эмискэ бүдүрүйүөҕэ.

16 Айыы Тойон алта суолу абааһы көрөр,

сэттис суол эмиэ Киниэхэ сидьиҥ:

17ол сиэрэ суох үрдүктүк туттуу, сымыйаны саҥарыы,

буруйа суох дьон тыыныгар туруу,

18хара дьайдаах суолга сананыы,

сиэхситтии быһыыланарга тиэтэйии,

19суукка сымыйанан туоһулааһын,

итиэннэ ини-биилэри иирсиһиннэрии.

Содур дьахтартан сэрэтии

20Уолум! Аҕаҥ ытык тылын быһа гыныма,

ийэҥ үөрэтэн эппитин сиргэ-буорга кэбиһимэ –

21дьонуҥ сүбэтин-аматын сүрэххэр-быаргар иҥэринэн ис,

көмүс кылдьыы курдук, моонньугар кэтэн кэбис.

22Ханна да барбытыҥ иһин, эйигин ийэлээх аҕаҥ үөрэҕэ сирдиэҕэ;

утуйаары сыттаххына, тула өттүгүттэн араҥаччылыаҕа,

уугуттан уһугуннаххына, сүбэлээн-амалаан көрсүөҕэ.

23Төрөппүттэриҥ кэс тыла барар суолгун сырдатыа,

үөрэппит үөрэхтэрэ үтүө өйгүн сайыннарыа,

оттон тыйыс-дьиппиэн ыйыылара олоххо суолгун булларыа.

24Дьонуҥ сүбэтэ-амата эйигин хара саҥнаах дьахтартан,

туора киһи ойоҕун ньуолбар тылыттан харыстыаҕа.

25Эрдээх дьахтар кэрэ дьүһүнүгэр баҕарыма,

көрөн-истэн тылбыҥнаатаҕына, киниэхэ киирэн биэримэ.

26Дьэгээрбэ сыаната – биир быһыы килиэп харчыта,

оттон туора киһи ойоҕо бүтүн олоххун эрэйиэҕэ.

27Хоонньугар уоту уктан бараҥҥын,

таҥаскын-сапкын кэриэрдиэҥ суоҕа дуо?

28Уоттаах чоҕунан хаама сылдьаҥҥын,

атаххын уокка сиэтиэҥ суоҕа дуо?

29Атын киһи ойоҕунуун көссүүлэстэххинэ, эмиэ оннук буолуоҕа:

ким кинини таарыйбыт, ол накаастабылтан куотуо суоҕа.

30Ааһан-туоран, хоргуйан өлбөт туһугар уорбут уоруйаҕы даҕаны

аһына-харыһыйа барыахтара суоҕа:

31тутталлар эрэ, сэттэ бүк иэстиэхтэрэ,

баарын барытын былдьаан ылыахтара.

32Оттон дьахтардыын көссүүлэһээччи өйө суох –

оннук быһыыланан, өлөрүн оҥостунар.

33Хаһан эрэ кулугур кулгаахтанан аата-суола алдьаныа турдаҕа,

ол саата-суута саллар сааһыгар ааһыа суоҕа.

34Эр киһи, ойоҕор күнүүлээн ииримтийэ кыыһырдаҕына,

өһүн-сааһын ситиһэр күнүгэр кими да харыстыа суоҕа,

35хайдахтаах да манньаттан кыккыраччы аккаастаныаҕа,

төһө да элбэҕи киниэхэ биэрэ сатаа – эн кини сүрэҕин сымнатыаҥ суоҕа.

Выбрано:

Аман өһө 6: СБК

Выделить

Копировать

Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь

Узнать больше о Сибэтиэй Биибилийэ кинигэлэрэ