Аман өһө 12
12
1Ким билиигэ тардыһар, ол сүбэлэтэрин сөбүлүүр,
оттон сэмэни иннинэн истибэт киһи ньүдьү-балай.
2Амарахха Айыы Тойон амарахтык сыһыаннаһыаҕа,
оттон уодаһыннааҕы уодьуганныаҕа.
3Сидьиҥ киһи сир үрдүгэр тирэҕириэ суоҕа,
оттон үтүө киһи бөҕө силистэниэҕэ.
4Үтүөкэн дьахтар – эрин үрдүк үөрүүтэ,
оттон сааппат сирэй – уҥуохха ириҥэ көйүүтэ.
5Кырдьыксыт кырдьыктааҕы толкуйдуур,
куһаҕан киһи уодаһыннааҕы торумнуур.
6Куһаҕан киһи тыла-өһө хааҥҥа суудайыылаах,
үчүгэй киһи тыла абыраллаах.
7Алдьархай ааҥныа да, хара дьайдаахтары имири сотуоҕа,
оттон үтүө киһи дьиэтэ-уота бигэтик туруоҕа.
8Сиэрдээх тыллааҕы хайгыыллар,
сидьиҥ санаалааҕы сирэллэр.
9Улуутумсуйар эрээри, туос аччык киһитээҕэр
үлэлээн айаҕын булунар көннөрү киһи быдан ордук.
10Үтүө киһи сүөһүтүгэр кытта кыһамньылаах,
оттон куһаҕан киһи муус сүрэхтээх.
11Сирин оҥостооччу аччыктыа суоҕа,
оттон акаары – тыалы сырса сылдьыаҕа.
12Куһаҕан киһи күүстээх кириэппэһэ сууллуоҕа,
оттон үтүө киһини туох да тулхадытыа суоҕа#12:12 Былыргы еврей тылынан суруллубут тиэкис бу кэрчигин ис хоһооно чуолкайа суох..
13Сидьиҥ киһи сымыйа тылыгар иҥниэҕэ,
оттон кырдьыксыт алдьархайтан быыһаныаҕа.
14Үтүө тылыҥ үгүс үтүөнү түстүөҕэ,
үлэҥ-хамнаһыҥ төлөбүр буолан төннүөҕэ.
15Акаары киһи көнө суолллаах-иистээх курдук сананар,
оттон муударай – сүбэни-аманы ылынар.
16Акаары өһүргэммитэ тута биллэр,
оттон өйдөөх, үөҕүллэн да баран, истибэтэх курдук туттар.
17Көнө киһи тыла кырдьыктаах,
албын туоһу тыла уодаһыннаах.
18Ардыгар, кураанах куолу да болоттуу бааһырдар,
оттон муударай тыл өрүү үтүөрдэр.
19Кырдьык үйэлэргэ барар,
оттон сымыйа үйэтэ – чыпчылҕан түгэнэ.
20Куһаҕаны торумнааччы сүрэҕэ уодаһыннаах,
эйэни тэрийээччи сүрэҕэ үөрүүлээх.
21Үтүө киһи туох да куһаҕаҥҥа түбэһиэ суоҕа,
оттон куһаҕан куруук сордонуоҕа.
22 Айыы Тойон сымыйаны абааһы көрөр,
Кини көнө дьону ылынар.
23Өйдөөх киһи билэрин-көрөрүн кистэнэр,
оттон акаары акаарытын сонно биллэрэр.
24Туруу үлэһит тойон буолуоҕа,
күөх сүрэх кулуттуоҕа.
25Дьиксинии сүрэҕи элэтэр,
оттон үтүө тыл үөрдэр.
26Үтүө киһи доҕотторугар суол ыйыаҕа#12:26 Былыргы еврей тылынан суруллубут тиэкис бу кэрчигин ис хоһооно чуолкайа суох.,
оттон куһаҕан киһи муннарыаҕа.
27Сүрэҕэ суох мас көтөрүн да өлөрүө суоҕа,
оттон хоһуун үлэһит үбэ-аһа дэлэй буолуоҕа#12:27 Былыргы еврей тылынан суруллубут тиэкис бу кэрчигин ис хоһооно чуолкайа суох..
28Кырдьык суола олоххо киллэрэр,
оттон токур суол өлүүгэ тиэрдэр#12:28 Былыргы еврей тылынан суруллубут тиэкис бу кэрчигин ис хоһооно чуолкайа суох..
Выбрано:
Аман өһө 12: СБК
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© Институт перевода Библии, 2008-2022