Mat 5
5
Yiŵajiganyisye Yesu petumbi
(5:1—7:29)
1Yesu* piŵaliweni likuga lya ŵandu ŵajinji lila, ŵakwesile petumbi. Jwalakwe piŵatemi pasi, ŵakulijiganya* ŵakwe ŵamkuyisye papopo. 2Nipo ŵatandite kwajiganya acitiji:
Ya ŵandu ŵali ŵa upile
(Luk 6:20-23)
3“Ŵana upile ŵandu ŵakulaga m'mitima mwawo mu usimu,
pakuti Ucimwene wa kwinani uli wa jemanjajo!
4Ŵana upile ŵandu ŵakulila m'mitima,#Yes 61:2
pakuti Mlungu tacatulasya.
5Ŵana upile ŵandu ŵakutulala mitima,#Mas 37:11
pakuti Mlungu tacapa cilambo capasi kuŵa cawo.
6Ŵana upile ŵandu ŵijakwete sala ni njota jakusosa kutenda lisosa lya Mlungu,#Yes 55:1-2
pakuti Mlungu tacajikutisya.
7Ŵana upile ŵandu ŵakwatendela acimjawo canasa,
pakuti nombe nawo Mlungu tacatendela canasa.
8Ŵana upile ŵandu ŵaswela mitima,#Mas 24:3-4
pakuti tacimwona Mlungu.
9Ŵana upile ŵandu ŵakwisa nawo mtendele,
pakuti tacikolanjidwa ŵanace ŵa Mlungu.
10Ŵana upile ŵandu ŵakulagasidwa ligongo lyakutenda lisosa lya Mlungu,#1 Pet 3:14
pakuti Ucimwene wa kwinani uli wa jemanjajo!
11“Ŵana upile jemanja ŵandu pakumnyosyaga, kumlagasya ni kumlambucisya yakusakala ya mitundumitundu ligongo lyakuti mli ŵakunguya ŵangu.#1 Pet 4:14 12Sangalalani, secelelani, ligongo mbote jenu jili jajikulungwa kwinani. Pakuti mwelemu ni muŵasawucisyaga soni ŵakulocesya ŵiŵapali jele ndaŵijo jemanja mkinimpagwe.#2 Mbi 36:16; Mase 7:52
Njete ni lilanguka
(Mak 9:50; Luk 14:34-35)
13“Jemanja mli mpela njete ja cilambo capasi. Nambo naga jisulwice, ana mpaka jinonye soni uli? Nganijikola soni masengo amta panandi, nambo kwamba kujijasa kusa basi, ŵandu ni kujiliŵataga.
14“Jemanja mli mpela lilanguka lya cilambo cosope. Msinda wuwutaŵidwe penani petumbi ngaŵa mkusisika kose.#Yoh 8:12; 9:5 15Pangali mundu jwakusati ali apambile nyali, ni kujiwunicila ni ciŵiga. M'malo mwakwe akusajiŵika pa malo gakuwonecela cenene, nipo jikusamulicila ŵandu wosope ŵali m'nyumbamo.#Mak 4:21; Luk 8:16; 11:33 16Myoyo soni jemanja mlosyeje lilanguka lyenu pameso pa ŵandu, kuti pitagawoneje masengo genu gambone, ŵacimbicisyeje Atati ŵenu ŵakwinani.#1 Pet 2:12
Ya Malamusi ga Mose
(Luk 16:17)
17“Mkasimganisyaga kuti yice kukumasya Malamusi ga Mose* ni yakwiganya ya ŵakulocesya. Unetu nganimbicila kukugamasya Malamusigo, nambo kuti yosope yilembedwe mwelemo yitendekwe. 18Ngumsalicisya kuti kwinani ni cilambo capasi mkiniyimale, ngasipatyoka kalemba kalikose pa Malamusigo mpaka yosope yayilembedwe mwelemo yili yitendekwe.#Luk 16:17 19Myoyo jwalijose jwakunyosya limpepe lya gele malamusiga, atamose lyalinandi lyose, ni kwajiganyaga ŵandu ŵane kuti nombe nawo atendeje myoyo, jwalakwejo taciŵa jwamnondi mu Ucimwene wa kwinani. Nambo jwalijose jwakusagapikanila ni kutenda yigakuti Malamusigo ni kwajiganyaga soni ŵandu ŵane kuti ajileje myoyo, jwalakwejo taciŵa jwamkulungwa mu Ucimwene wa kwinani. 20Ni ligongo lyakwe ngumsalila kuti naga kulupicika kwenu ngakukupunda kulupicika kwa aciŵalimu ŵa Malamusi* ni Afalisi* ngasimjinjila kose mu Ucimwene wa kwinani.
Ya kutumbila
(Luk 12:57-59)
21“Mwapikene kuti ŵandu ŵakala ŵala ŵalamwile kuti, ‘Mkawulaga, nipo jwalijose jwakumwulaga mjakwe taciŵilanjidwa ku nganya kukwimbidwa magambo.’#Eks 20:13; Det 5:17 22Nambo une ngumsalila kuti jwalijose jwakumpila mtima mlongo mjakwe taciŵajilwa kuŵilanjidwa ku nganya ja magambo. Jwalijose jwakumnyosya mjakwe kuti, ‘Nganimŵa kandu m'mwe,’ taciŵajilwa kuŵilanjidwa kunganya jekulungwa kukwimbidwa magambo. Nipo jwalijose jwakumkolanga mjakwe kuti, ‘M'mwe ŵangali mate,’ taciŵajilwa kuja kukuponyedwa ku moto wa Jahena.*
23“Ni ligongo lyakwe pakupeleka mtuka wenu kwa Mlungu pa malo gakupelecela mbopesi, nipo ndaŵi jijojo mkukumbucila kuti mkwete magongo ni mjenu, 24mlece mtuka wenuwo pa malo gakupelecela mbopesi papopo, nipo mjawule mkatande kaje kwilana ni mlongo mjenujo. Kaneko ni mjawule mkapelece mtuka wenu ula kwa Mlungu.
25“Mjilaneje najo mwacitema mjenu jwamlaŵilile kwa mwenye mli mwitala, mkanimyice kunganya ja magambo, kogopela kuti jwalakwejo komboleka kumjigalila m'mwejo kwa jwakulamula, nipo jwakulamulajo tacimpeleka m'mwejo kwa asilikali ŵitacimŵika m'mwejo m'nyumba ja akayidi. 26Ngumsalicisya kuti timcitama mwelemo mpaka mli mlipile mbiya syosope.
Ya cikululu
(Mat 18:8-9; Mak 9:43-48)
27“Mwapikene kuti ŵandu ŵakala ŵala ŵalamwile kuti, ‘Kasimtenda cikululu.’#Eks 20:14; Det 5:18 28Yambone, nambo une sambano ngumsalila kuti, mundu jwalijose jwakumlolecesya jwamkongwe ni kumkumbila, atesile najo kala cikululu mu mtima mwakwe. 29Myoyo, naga liso lyenu lya kumlyo likumlemwekasya, mlikolotole ni kulijasa. Kuli kwambone kuti mŵe ŵangali ciŵalo cenu cimpepe, kulekangana ni kuti cilu cenu cosope aciponye ku Jahena.#Mat 18:9; Mak 9:47 30Nipo naga mkono wenu wamlyo ukumlemwekasya, mwukate ni kuwujasa. Kuli kwambone mnope kuti mjase ciŵalo cenu cimpepe, kulekangana ni kuti cilu cenu cosope aciponye ku Jahena.#Mat 18:8; Mak 9:43
Ya kulekangana ulombela
(Mat 19:9; Mak 10:11-12; Luk 16:18)
31“Ŵandu ŵakala ŵala ŵalamwile soni kuti, ‘Naga mundu akwaleka ŵamkwakwe, ŵapeje ŵakongwewo cikalata cakulekanganila.’#Det 24:1-4; Mat 19:7; Mak 10:4 32Nambo sambano ngumsalila kuti: Naga jwamlume akwaleka ŵamkwakwe, pangaŵaga ligongo lyakuti atesile cikululu, akwatendekasya cikululu ŵakongwewo naga akulombela soni. Nipo jwamlume jutiŵalombe ŵele ŵakongwewo, nombe nawo akutenda cikululu.#Mat 19:9; Mak 10:11-12; Luk 16:18; 1 Akoli 7:10-11
Ya kulumbila
33“Mwapikene soni kuti ŵandu ŵakala ŵala ŵalamwile kuti, ‘Mkalumbila mwa unami, nambo myitendeje mpela yimwatite pakutenda cilanga* kwa Ambuje pakulumbila kwenu.’#Lef 19:12; Num 30:2; Det 23:21 34Yambone, nambo une ngumsalila kuti, atamose kulumbila* kweneko, kasimlumbilaga kose. Kasimlumbila kuti, ‘Kwinani!’ Pakuti kwinaniko ni kucili citengu ca Ucimwene wa Mlungu.*#Yak 5:12; Yes 66:1; Mat 23:22 35Kasimlumbila pakolanga kuti, ‘Pali cilambo capasi!’ Pakuti cilambo capasi ni pakuliŵatilapo sajo syakwe. Kasimlumbila kuti, ‘Pali Yelusalemu!’ Pakuti Yelusalemu uli msinda wa mwenye jwamkulungwa.#Yes 66:1; Mas 48:2 36Kasimlumbila atamose mtwe wenu, pakuti ngaŵa mkupakombola m'mwejo kulugalawusya luwumbo lumo kuti luŵe lweswela kapena lwepiliwu. 37Mgambeje kuti, ‘Elo,’ kapena ‘Iyayi.’ Ligongo yele yimkusajonjecesyayo, yikusatyocela kwa Satana.*
Ya kuwucisya yakusakala
(Luk 6:29-30)
38“Mwapikene kuti ŵandu ŵakala ŵala ŵalamwile kuti, ‘Liso kulipila liso, lino kulipila lino.’#Eks 21:24; Lef 24:20; Det 19:21 39Yambone, nambo une ngumsalila kuti, mundu jwakusakala ngalimbana najo. Naga mundu jwalijose akumputa pa lijeje lya kumlyo, mumgalawucisye kumpa soni lijakwelyo. 40Nipo naga mundu jwine akusaka kumjigalila ku nganya kukumjimba magambo, acisakaga kumsumula malaja genu, mumkunde ajigale ni mkanjo wenu wakwe. 41Naga mundu akumkanganicisya kwenda najo mkuli umpepe, mjende najo mikuli jiŵili. 42Naga mundu akumŵenda kandu, mumpeje. Soni naga mundu jwine akusaka kwasima kandu kwa m'mwejo, mkasimumkanya.
Ya kwanonyela amagongo
(Luk 6:27-28, 32-36)
43“Mwapikene kuti ŵandu ŵakala ŵalamwile kuti, ‘Mumnonyeleje mnasi jwenu, nikumŵenga m'magongo jwenu.’#Lef 19:18 44Cambone, nambo une ngumsalila kuti, mwanonyeleje amagongo ŵenu nipo mwapopeleleje ŵandu ŵakusamsawusya. 45Naga mkuyitenda yeleyi, tiyicilosya kuti mli ŵanace ŵasyesyene ŵa Atati ŵenu ŵali kwinani. Pakuti ŵalakwewo akusaŵalisya lyuŵa kwa ŵandu ŵambone ni ŵandu ŵakusakala, nipo akusiŵagwicisya ula, ŵandu ŵakusatenda yindu yambone ni ŵandu ŵakusatenda yindu yakusakala. 46Naga mkwanonyela ŵawowo pewo ŵakusamnonyela jemanja, ana mkwembecela kupocela mbote jamti uli? Ana ngaŵaga atamose ŵakomesya msongo akusatendaga iyoyo peyo? 47Nipo naga mkwakomasya acalongo acimjenupe, ana pelepo mtesile cici cakwapunda ŵandu ŵane? Ana ngati atamose ŵandu ŵakusa akusatendaga iyoyo soni? 48Myoyo mŵeje ŵambone mnope mpela mwaŵelele Atati ŵenu ŵakwinani.#Lef 19:2; Det 18:13
Выбрано:
Mat 5: YAWO
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Chiyawo Bible: Buku Jeswela © Bible Society of Malawi, 2014