San Mateo 4
4
Lá ngun maxuꞌu gan utsabgix Jesús
(Mr. 1:12-13; Lc. 4:1-13)
1Leꞌa Espíritu ten Dios cha mbiꞌi Jesús geꞌe sa bid sa naꞌan men, sa gun maxuꞌu juers utsabgix Jesús. 2Leꞌa dub top gaꞌal wizh leꞌa Jesús lá ngaw, cha ngol gor leꞌa xa uzhebpa ndanna. 3Weꞌe leꞌa maxuꞌu cha ulen gun preb Jesús, ndab maxuꞌu ndoꞌ xa:
—Tal leꞌa lu nak Xin Dios, nat gud ndoꞌ be geꞌ baꞌ yak‑a pan.
4Leꞌa Jesús cha ukaꞌab ndab:
—Leꞌa diꞌizh ten Dios nkeaniꞌi: “Naꞌanpa nabtsa ta ndaw men nban bexa. Mas nsak nxobgek men ndoꞌ diꞌizh ten Dios, leꞌa ta wa ndun nban xa.”
5Leꞌa maxuꞌu cha mbiꞌigal Jesús gezh Jerusalén gek niꞌi ten Dios, sa ndon leꞌa gaꞌap. 6Cha ndab maxuꞌu:
—Tal leꞌa lu Xin Dios, nat btsaꞌab dub brink gast ndoꞌ yo baꞌ, leꞌa diꞌizh ten Dios nkeaniꞌi ndab‑a:
Leꞌa Dios utuꞌub be angel ten na ulaꞌach lu.
Leꞌa bexa wa goꞌo lu ndoꞌ yaꞌa na,
ndontsa ni lá ikateꞌeb lu ndoꞌ ni dub geꞌ.
7Leꞌa Jesús cha ukaꞌab ndab:
—No ndab diꞌizh ten Dios: “Lá gun lu preb Dios Xa Nibeꞌe.”
8Leꞌa maxuꞌu cha mbiꞌi Jesús gek dub geꞌe gaꞌappa, cha mluu maxuꞌu itea be gezh nde ndoꞌ gizhliyo no be ta nsak ncho be gezh wa. 9Cha ndab maxuꞌu:
—Itea be ta baꞌ usa naꞌ ikaꞌa lu tal leꞌa lu isaxib ndoꞌ naꞌ, yankea lu naꞌ.
10Leꞌa Jesús cha ndab ndoꞌ maxuꞌu:
—Bxoꞌon wats naꞌ, maxuꞌu. Leꞌa diꞌizh ten Dios nkeaniꞌi ndab‑a: “Wankea Dios Xa Nibeꞌe, no bin ta nladtsa xa.”
11Leꞌa maxuꞌu cha mlaꞌa Jesús, cha ulen be angel ten Dios mlaꞌach bexa Jesús.
Jesús usaxan ndun tiꞌin mtuꞌub Dios gun xa
(Mr. 1:14-15; Lc. 4:14-15)
12Ngol dub wizh leꞌa Jesús mbiꞌín leꞌa Juan nkea litgiꞌib, cha nseaꞌ Jesús leꞌaka Galilea. 13Parea lá ngaꞌyoꞌo xa Nazaret, ndi ngwaꞌyoꞌo xa gezh Capernaum toꞌo lagun siꞌil, yo ten bexa ras ten Zabulón no ras ten Neftalí. 14Li ngok‑a lak nkeaniꞌi diꞌizh ten Dios, ta mas polta mkeꞌa Isaías sakndoꞌ Dios, ndab xa:
15Bego ncho ndoꞌ yo ten Zabulón no yo ten Neftalí,
sa ntid nes toꞌo lagun,
lad ndaꞌas wizh sa nax yowbeꞌe Jordán;
Bego ncho Galilea,
sa ncho no bexa naꞌanpa xa judio:
16Leꞌa bego nde sa ukaw,
parea leꞌa nat uniꞌí bega dub xeꞌa siꞌil.
Leꞌa bega nde sa wa cuent dub xa ngut,
parea nat mgondoꞌ bega xeꞌa ten Dios.
17Leꞌa zha weꞌe cha usaxan Jesús ndadiꞌizh diꞌizh ten Dios ndoꞌ be men, ndab xa:
—Blaꞌa bego be ta ugap nak bega, leꞌa zha na inibeꞌe Dios ladoꞌo be men yá gaxla nak.
Jesús mti dap bexa nsen mbeal gak xmen xa
(Mr. 1:16-20; Lc. 5:1-11)
18Leꞌa dub gor nchasea Jesús toꞌo lagun siꞌil nsaleaꞌ Galilea, cha uniꞌí xa top xabgiꞌi ndeutsaꞌab red ten na len nits, leꞌa bexa wa xa nsen mbeal. Leꞌa dub xa wa Simón, xa no nsaleaꞌga Pedr. Leꞌa stub xa wa Ndres wit Simón Pedr wa. 19Cha ndab Jesús ndoꞌ bexa:
—Usankea bega tsoꞌo naꞌ, leꞌa naꞌ uluu xteꞌe yunjunt bega be men ndoꞌ Dios.
20Leꞌa bexa wa cha uxax mlaꞌa be red ten na, cha usankea bexa tsoꞌo Jesús.
21Leꞌa gor usea bexa stub tuzh sa, cha uniꞌí Jesús stop xabgiꞌi, dub xa nsaleaꞌ Jacob nsea stub xa nsaleaꞌ Juan. Leꞌa bexa wa ndeno Zebedeo xus bexa ndoꞌ dub barco, ndego bexa ramient be red ten bexa. Leꞌa Jesús cha utezh itop wit bexa. 22Leꞌa itop bexa cha uxax mchansoꞌ xus na ndoꞌ barco wa, cha usankea bexa tsoꞌo Jesús.
Jesús mluu be men no myunyakna xa kwaꞌad bexa
(Lc. 6:17-19)
23Leꞌa Jesús cha nchasea idub distrit Galilea, nluu xa be men len be niꞌi sa nzhealbe bexa judio sa wa. Mbidiꞌizh xa diꞌizh wen ten Dios ná xteꞌe nibeꞌe Dios be men, no myunyakna xa be men nsén guniꞌi xá gealgizh ná, no bexa kweaꞌ nsak. 24Leꞌa ta li ndun Jesús wa mgen idub distrit Siria. Ta weꞌe leꞌa kwaꞌad be men ulenno bexa nsén isandoꞌ be gealgizh, no bexa gizh ncho mbi bxin len ladoꞌo na, no bexa nsak gizhkaw, no bexa lá yoo gan isea. Cha myunyakna Jesús bexa wa. 25Cha usankea kwaꞌad be men tsoꞌo Jesús: bexa distrit Galilea, no distrit Decápolis, no gezh Jerusalén, no idub distrit Judea, no bexa ncho stub toꞌo yowbeꞌe Jordán.
Выбрано:
San Mateo 4: zpt
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2015, Wycliffe Bible Translators, Inc. All rights reserved.