Mateo 5
5
Is Tutuu he Kegkezeyzey
(Mateo 5:1-12; Lucas 6:20-23)
1Ne naahà ni Jesus is mezakel he menge etew ne zutun midtekezeg sikandin te vuvungan ne zutun mebpinuu. Ne mid-uvey ziyà te kandin is menge sumusundan din, 2ne mibpenurù din sikandan.
3Ne ke sikandin te, “Utew zeyzey is nengesayud he kenà sikandan ebpekeulaula te meupiya
ke kenà sikandan edtevangan te Megbevayà su iyan sikandan egkehedian te Megbevayà.
4Utew zeyzey sikandan is ibmesakit te g̵ehinawa zan is mezaat he ulaula
su edlenganen sikandan te Megbevayà.
5Utew zeyzey sikandan is kenà mepelevawen
su egkezawat dan kes tuvad he impenaad te Megbevayà.
6Utew zeyzey sikandan is iyan dekelà te g̵ehinawa zan is kedtumana zan
te egkesuatan te Megbevayà su is Megbevayà edtavang kandan te kedtumana kayi.
7Utew zeyzey sikandan is hihizuwen te menge zuma zan
su is Megbevayà egkehizu kandan.
8Utew zeyzey sikandan is kenà egkezuwazuwa is gehinawa zan
te kedtumana zan te meupiya he ulaula su iyan sikandan ebpekeahà keuzemà te Megbevayà.
9Utew zeyzey sikandan is ebpen-ahà te melinew he kebpekesavuk te menge etew
su ed-engkenen sikandan te Megbevayà he menge anak din.
10Utew zeyzey sikandan is ed-antus te kegkepeuki kandan te menge etew tenged te edtumanen dan is egkesuatan te Megbevayà
su iyan sikandan egkehedian te Megbevayà.
11Su utew kew zeyzey emun tenged te sumusundan ku sikiyu edsulaan kew wey ebpesipelahan kew te menge etew, ne ebpenudtul zan te tarù he mezaat is menge vaal niw. 12Iyan daan heini kes mid-ulaula te menge etew zengan diyà te menge ebpeneuven te Megbevayà. Medlipey kew utew su utew zekelà is idsuhul keniyu keuzemà diyà te langit.
Is Timus wey is Sulù
(Mateo 5:13-16; Marcos 4:21; 9:50; Lucas 8:16; 14:34,35)
13Sikiyu is menge sumusundan ku, iring kew te timus he ibmeupiya te egkeenen su iyan kew ibmeupiya te tivuuk he menusiyà. Iyan, emun egkeawà diyà te timus is taam din wazè en paag̵i he egkehimu te kebpelikua te taam din. Ne wazè en pulus dutun te timus he wazà taam; idtimbag dà ne egketekutakan te menge etew.
14Iring kew te sulù he ebpeketayew te tivuuk he menusiyà. Is inged he ziyà benguna te puntur te vuvungan, kenà ebpekeeles. 15Ne wazà daan etew he edtemteman din is sulù ne ebpelengkevan din te vinevey, kekenà, idsavuk din diyà te sevukà wey meteyawi is tivuuk he seled te valey. 16Ne iring din ded daan is menge ulaula niw he meupiya; kinahanglan he kenè niw ieles. Ipeehè niw te menge etew is menge ulaula niw he meupiya ne tenged kayi ebpekezalig dan te Amey tew he Megbevayà he ziyà te langit.
Is Ketumana te Kesug̵uan
17Kenè niw isipa he iyan inhendini ku te kelibutan is id-awè ku kes kesug̵uan he imbeg̵ey kenitew pinaag̵i ki Moises wey kes menge penurù dengan he imbeg̵ey pinaag̵i te menge ebpeneuven te Megbevayà. Umba nekehendini a su wey mepurungi te edtuman. 18Su taman te kenè pa egkehanew is langit wey tanà, kenà egkehimu he id-awà is minsan sengetag̵è dà he lalag duen te kesug̵uan. Taman te kenè pa egketuman is langun, kenà daan egkeawà is kesug̵uan. Kenè niw lipati heini. 19Umba ke zuen minsan hentei he edlegkawen din is minsan utew zà deisey zuen te kesug̵uan ne ibpenurù din te zuma zin he kenà tumana haazà is midlagkew zin, iyan sikandin utew minus is pid-etawan din ke edhadì is Megbevayà he ziyà te langit. Ne iring din daan ke zuen etew he edtumanen din ebpurungi is kesug̵uan ne ibpenurù din diyà te zuma is kedtumana kayi, iyan sikandin lavew te langun he etew ke edhadì keuzemà is Megbevayà. 20Egkeg̵iyan ku sikiyu he wey kew zà egkehedii te Megbevayà ke edtumanen niw is egkesuatan te Megbevayà ne kinahanglan daan he lavew kew pa he metinumanen kenà is menge menunudlù te kesug̵uan wey is menge Perisiyu.
Is Ketudluanan Mehitenged te Kegkepauk
21Netuenan niw kes impenurù dengan diyà te menge lukes tew he indawey is kebpememunù; su is ebunù ne edhukuman te silut. 22Ne iyan kedì he penurù is: minsan sikan is egkepauk dà te zuma zin, edhukuman daan sikandin te Megbevayà. Ne sikan is edsulà te zuma zin te, ‘Wazè nu pulus he etew!’ ne egkeuwit sikandin diyà te husayen. Ne sikan is edsulaan din is duma zin he egkag̵i te, ‘Tulebung ka he wazè nu pulus,’ ne zait sikandin he egkeuwit diyà te hapuy te Impirnu. 23Umba ke ziyè ke en te lama te Valey te Megbevayà su ebpemuhat ka ziyà te Megbevayà ne egketenuzan nu he zuen salè nu te zuma nu, 24itag̵ak nu zè pa haazà is ibpemuhat nu ne beyai nu haazà is duma nu wey kew medhusey. Ne zutun ke ebpeked-uliey kew en te meupiya he g̵ehinawa, likù ka human ne leusa nu haazà is kebpemuhat nu ziyà te Megbevayà.
Is Husayen
(Mateo 5:25,26; Lucas 12:57-59)
25Ne emun duen etew he insumbung ke zin ne egkeuwit ka ziyà te hukmanan, meupiya ke ebpekidhusey ka kandin te kenè kew pa ebpekeetuvang te huwes. Su emun ebpekeetuvang kew en te huwes kela ke ipalad ka zutun te huwes diyà te pulis ne egkepirisu ka. 26Ne kenà duwazuwa he zutun ka ebpekeubpà taman te egkeg̵empusan nu is multa kenikew.
Is Ketudluanan Mehitenged te Kedselselai te Esawa
27Nezineg niw kes impenurù dengan he, ‘Kenè nu selselai is esawa nu.’ 28Ne iyan kedì he penurù is: ke zuen minsan hentei he maama he edtengteng dà te vahi he kenè din esawa ne egkeerig̵an en dutun, ne haazà is maama, nekesalè en dutun te esawa zin. 29Ne emun iyan nu igkepenulayi is kewanan he mata nu, lug̵ita nu wey itimbag! Meupiya pa ke wazè nu mata, kenà ke igkeagbur ka ziyà te hapuy he Impirnu is tivuuk he lawa nu. 30Emun iyan nu igkepenulayi is kewanan he velad nu ne tempeza nu wey itimbag. Meupiya pa ke wazè nu velad, kenà ke igkeagbur te Impirnu is tivuuk he lawa nu.
Is Ketudluanan Mehitenged te Kebpesuwayà
(Mateo 19:9; Marcos 10:11,12; Lucas 16:18)
31Impenurù daan dengan he emun duen maama he ed-engkezan din is esawa zin ne kinahanglan he veg̵ayi zin haazà is bahi te kemetuuzan he iyan tuus te kebpesuwayè dan. 32Ne iyan kedì he penurù is: emun ed-engkezan te maama is esawa zin he wazà sikandin is maama selselai zutun te esawa zin, heini he maama, ne ebpekesalà su pinaag̵i kayi ibpesavut din he nekesalà kandin is esawa zin. Ne ebpekesalà daan is maama he ebpengesawa zutun te vahi he mid-engkezan te esawa zin.
Is Ketudluanan Mehitenged te Kebpenaad
33Netuenan niw zaan kes impenurù dengan diyà te menge lukes tew he emun duen ibpenaad niw ziyà te Nengazen kenà egkehimu he kenè niw edtumanen. Kinahanglan he tumana niw. 34Ne iyan kedì he penurù is: emun duen ibpenaad niw ziyà te minsan hentei, kenè niw ipengeluambit he medlanggà is renged niw he langit wey tanà ke kenè niw egketuman is lalag niw su is langit, iyan pinuuwà te Megbevayà 35ne is tanà, iyan nesevukan te paa zin. Ne kenè niw zaan ipengeluambit he mezeeti is inged he Hiruselim ke kenè niw egketuman is lalag niw su iyan ed-ubpaan te lavew he hadì. 36Ne minsan is ulu niw, ke zuen ibpenaad niw, kenè niw keg̵iya he mebmeputì is bulvul niw ke kenè niw egketuman haazà is impenaad niw su wazè niw g̵ehem wey mehimu is minsan sevaha zà he vulvul niw he mebmeputì, ne emun kenà, ne mebmeitem. 37‘Uya’ zà ne emun kenà, ne ‘Wazà’ is keg̵iya niw. Su is minsan hengkey he lalag he egemiten niw te kedheg̵eta te menge penaad niw, diyà ebpuun te ki Setanas.
Is Ketudluanan Mehitenged te Kebales
(Mateo 5:38-42; Lucas 6:29,30)
38Netuenan niw zaan kes penurù dengan he ke zuen etew he nezeetan din is mata te zuma zin egkehimu he edèdeetan daan is kandin he mata. Ne emun duen nekezezaat te ngipen te zuma zin, egkehimu he edèdeetan daan is kandin he ngipen. 39Ne iyan kedì he penurù keniyu is: kenà egkehimu he ebelesan ta is ebpesipala kenita, kekenà, ebpurungan ta. Ne emun edtebpien din is kewanan he enaping ta, egkeg̵iyan ta he egkehimu pa ke elin din edtebpien is divaluy. 40Ne emun duen ebpenukut kenita ne edluwasen din is kemising ta, su iyan din ibpevayad, elin ta ibeg̵ey kandin is kumbalè ta. 41Ne ke zuen sundaru he edteg̵elen ki zin ibpeuwit te uwiten din te sengekilumitru, ed-uwiten ta te zezuwa he kilumitru. 42Ke zuen ebuyù, ebeg̵ayan ta; ne ke zuen edsambey, edsembayan ta.
Is Ketudluanan Mehitenged te Kebpurungi te Zuma
(Mateo 5:43-48; Lucas 6:27,28,32-36)
43Netuenan ta kes penurù dengan he is menge zuma ta, ebpurungan ta. Ne is menge kuntada ta, edtebeken ta. 44Ne iyan mulà kediey he penurù is: ebpurungan ta is menge kuntada ta wey ebpenubtuvazan ta te meupiya is ebpesipala kenita. 45Ne emun ebeelan niw heini ebpekeiring kew te Amey tew he Megbevayà he ziyà te langit. Su is Megbevayà, kenà iyan dà ebpesilaan din te andew is menge metazeng he menge etew, kekenà, elin daan is menge kenà metazeng. Ne kenà iyan dà is meupiya is ulaula zin ebeg̵ayan din te uzan, kekenà, elin daan is mezaat is ulaula zin. 46Kenè niw isipa he edsuhulan kew te Megbevayà ke iyan dà ebpurungan niw is ebpurung daan keniyu; su minsan is menge menunukut te vuhis he limbung is ulaula zan, ebpurungan dan daan is ebpurung kandan. 47Ne emun iyan niw zà idtetepian is menge emig̵u niw, hengkey is igkezelig̵i keniyu? Wazà, su minsan is menge etew he wazà med-azap te Megbevayà, ed-ul-ulahan dan is iring kayi. 48Kinahanglan he meheg̵et is kebpurungi niw te minsan hentei. Su kes Amey tew ziyà te langit, utew meheg̵et is kebpurungi zin te menusiyà.”
Выбрано:
Mateo 5: mbbNT
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2001, Wycliffe Bible Translators, Inc., All rights reserved.