Известные библейские стихи из Якъубил кагъат 3

Поделиться

Зобалаздасан рещтӏунеб гӏакъиллъийин абуни, гьеб бацӏцӏадаб букӏуна, гьединго сабруяб, хӏалимаб, гӏадамазухъ гӏин тӏамулеб, гурхӏел-рахӏмуялъул цӏураб ва лъикӏаб пихъ тӏад бижулеб гъветӏ гӏадинаб букӏуна. Гьеб гӏакъиллъиялъул васвасдиги ххвелалги рукӏунаро.

Нужеда гьоркьов цониги гӏакъилав-цӏодорав чи ватани, гьес жиндирго лъикӏаб хьвада-чӏвадиялдалъун бихьизабизе ккела жив гӏакъилав ва гӏодове виччарав чи вукӏин.

Ракълие рачел къарал гӏадамаз ракълил хьон хьараб хуриса ритӏухълъиялъул бачӏин бакӏарула.

Цоцаздехун жахӏдаги бугони, чӏухӏун цере кӏанцӏизеги бокьулеб бугони, гьелъ рачуна гӏала-гъважаялдеги квешлъиялдеги.

Мацӏалца гьабула нилъер Эмен Аллагьасе рецц, амма гьебго мацӏалца какула жиндаго релълъун Аллагьас рижарал гӏадамал. Цого кӏалдисан рачӏуна баркалаялъулги нагӏанаялъулги рагӏаби. Гьедин букӏине бегьуларо, дир вацал.

Мацӏ – гьеб ккола цӏа. Гьаб дуниял мунагьазул цӏун бугеб гӏадин, нилъер черхалъул цогидал лугбазда гьоркьоб мунагьазул цӏураб лага буго гьеб. Гьелъ нилъер тӏолабго напс хъублъизабула ва инсанасул кинабго гӏумруялда цӏа рекӏинабула, жибгоги жужахӏалъул цӏаялъ бухӏула.

амма мацӏ мутӏигӏ гьабизе лъиданиги кӏоларо. Гьеб буго жинда чангит базе кӏолареб, хвалде рачунеб загьруялъул цӏураб квешлъи.

Нужеда гьоркьоса гӏемерал чагӏи вагӏза-насихӏат гьабизейилан лъугьин лъикӏаб иш гуро, дир вацал, насихӏатчагӏаздаса Аллагьас дагьабги цӏикӏкӏун тӏалаб гьабила.