Heˍbrehˇ li‸ 11
11
Yonˍ ve teˇ ceuˬ awˬ lawn
1Yonˍ ve teˇ ceuˬ hta‸ pa taw, ngaˬ hui dawˇ law taˍ ve teˇ hpaˍ hta‸ awˬ tehˬ awˬ na gʼa tuˬ ve hta‸ maˇ kʼoˆ, ngaˬ hui maˇ mawˬ sheˍ ve awˬ ceuˬ teˇ hpaˍ awˬ tehˬ awˬ na cawˬ taˍ ve hta‸ maˇ kʼoˆ, ngaˬ hui hkʼa deh‸ deh‸ shiˍ taˍ ve yoˬ. 2Aˍ sho-eˬ htaˇ ve chaw teˇ hpaˍ yonˍ ve pa taw, Gʼuiˬsha yawˇ hui hta‸ nyi hkʼaˇ suh ve yoˬ.
3Gʼuiˬsha ve tawˇ hkawˇ hta‸ pa taw sha hpa‸ laˬ hpa‸ htaˆ hkʼa peu-eˬ hpeh‸ la ve hta‸ ngaˬ hui gʼa shiˍ ve lehˬ, ngaˬ hui yonˍ ve hta‸ pa taw yoˬ. Hkʼe te leh, ngaˬ hui gʼa mawˬ ve awˬ ceuˬ teˇ hpaˍ lehˬ, maˇ mawˬ ve awˬ ceuˬ teˇ hpaˍ awˬ hkʼaw lo tawˆ la ve hta‸ ka‸ ngaˬ hui gʼa shiˍ ve yoˬ.
4Aˍbeˍlaˆ lehˬ, yonˍ ve awˬ hkʼaw lo, Kaˍiˉnaˆ ve tanˇ tuˬ a‸ kehˉ da‸ ve tanˇ tuˬ Gʼuiˬsha hta‸ tanˇ piˇ ve yoˬ. Yawˇ ve la‸ shawnˍ teˇ hpaˍ hta‸ Gʼuiˬsha ha‸ yuˬ ve pa taw, yawˇ hteˇ ve cawˇ ve chaw hpeh‸ ve yoˬ teh‸, Gʼuiˬsha yawˇ awˬ lawn shaˉ hkiˆ hkanˍ ve yoˬ. Hkʼe te leh, Aˍbeˍlaˆ suh peuˬ htawˇ, yonˍ ve oˇ ve hta‸ pa taw yawˇ tawˇ yaw chehˇ sheˍ ve yoˬ.
5Eˇnawˆ lehˬ, yonˍ ve hta‸ pa taw suh ve teˇ ceuˬ hta‸ maˇ gʼa hkanˍ tuˬ Gʼuiˬsha yawˇ hta‸ mvuhˇ naw ma lo yuˬ taˆ-e ve yoˬ. Gʼuiˬsha yawˇ hta‸ yuˬ taˆ-e ve pa taw, shu yawˇ hta‸ ca maˇ mawˬ. Gʼuiˬsha yawˇ hta‸ maˇ yuˬ taˆ-e sheˍ htaˇ, Yawˇ hta‸ ngaˬ nyi hkʼaˇ suh ve yoˬ teh‸ Gʼuiˬ sha shaˉ hkiˆ hkanˍ ve yoˬ. 6Chaw yaˇ lehˬ, yonˍ ve teˇ ceuˬ maˇ cawˬ ve kʼo, Gʼuiˬsha nyi hkʼaˇ suh tuˬ te maˇ gʼa. Awˬ lawn kʼo, Gʼuiˬsha geh jiˆ kʼai ve chaw lehˬ, Gʼuiˬsha cawˬ ve hta‸ maˇ kʼoˆ, yawˇ hta‸ ca ve chaw hui hta‸ awˬ bon piˇ ve hta‸ maˇ kʼoˆ, yawˇ gʼa yonˍ ve yoˬ.
7Noˉa‸ lehˬ yonˍ ve hta‸ pa taw, maˇ hpeh‸ la sheˍ ve awˬ ceuˬ teˇ hpaˍ awˬ lawn Gʼuiˬsha yawˇ hta‸ hto piˇ maˍ piˇ ve teˇ yanˇ, yawˆ yan ve awˬ hkʼaw lo na yuˬ leh, yawˇ ve yehˬ yaˇ kʼa yaˇ teˇ hpaˍ gʼa ponˬ tuˬ, yawˇ haw lo‸ kʼoˍ te ve yoˬ. Chi hkʼe yonˍ ve awˬ hkʼaw lo, yawˇ miˬguiˬ yaˇ hui hta‸ suhˉ taˆ leh, yonˍ ve hta‸ pa taw hteˇ ve cawˇ ve teˇ ceuˬ hta‸ gʼa ve yoˬ.
8Aˍbraˍhanˍ lehˬ yonˍ ve hta‸ pa taw, yawˇ awˬ shinˉ gʼa tuˬ ve mvuhˇmiˬ lo kʼai tuˬ Gʼuiˬsha yawˇ hta‸ kuˬ ve teˇ yanˇ, hkʼaˬ lo gʼa kʼai tuˬ ve hta‸ yawˇ maˇ shiˍ htawˇ na yuˬ leh kʼai ve yoˬ. 9Yonˍ ve hta‸ pa taw, yawˇ gʼa tuˬ ve mvuhˇmiˬ awˬ hkʼaw lo, shu mvuhˇmiˬ hkʼaw ca chehˇ ve chaw hkʼe yawˇ hkehˉ chaw te chehˇ ve yoˬ. Yawˇ geh teˇ geh mvuhˇmiˬ oˇ ve hta‸ gʼa tuˬ ve Iˉcaˆ leh Yaˍkoˆ hui geh aˉ po kʼo teˇ hpaˍ awˬ hkʼaw lo yawˇ chehˇ taˍ ve yoˬ. 10Awˬ lawn kʼo, Gʼuiˬsha kawˍ taˍ te taˍ ve, awˬ hkuiˉ puiˍ yeˬ jaˇ ve venˇ hta‸ yawˇ dawˇ law chehˇ ve yoˬ.
11Saˍraˇ htawˇ yonˍ ve hta‸ pa taw, yaˇ hu ve awˬ yanˇ leh peuˬ ve htawˇ, yawˇ yaˇ hu gʼa ve yoˬ. Awˬ lawn kʼo, ka ti‸ piˇ shehˍ hpaˇ lehˬ, ka ti‸ yeˬ ve yoˬ teh‸ yawˇ dawˇ taˍ ve yoˬ. 12Hkʼe te leh, mawˇ jaˇ leh suh paˇ neˇ ve hawˉ hkʼaˆ teˇ gʼaˇ tiˉ awˬ hkʼaw lo, awˬ yaˇ awˬ duˬ maˇ maˇ cawˬ la ve yoˬ. Yawˇ hui lehˬ, mvuhˇ naw ma lo cawˬ ve meu‸ keu shiˍ hkʼa shuˍ shuˍ maˇ jaˇ leh, laˇ tsuhˇ gʼuiˬ pfuhˍ paˇ lo cawˬ ve shehˇ shiˍ hkʼa shuˍ shuˍ gʼaw maˇ gʼa htaˇ hkʼa gaˬ cawˬ ve yoˬ.
13Chaw chi teˇ hpaˍ hkʼa peu-eˬ lehˬ, yonˍ ve awˬ hkʼaw lo suh ve yoˬ. Gʼuiˬsha yawˇ hui hta‸ piˇ tuˬ yoˬ teh‸ kʼoˆ taˍ ve awˬ ceuˬ teˇ hpaˍ hta‸ yawˇ hui maˇ gʼa sheˍ htawˇ, awˬ ceuˬ oˇ ve teˇ hpaˍ hta‸ vuiˇ kuiˬ lo yawˇ hui gʼa mawˬ leh ha lehˬ jaˇ ve yoˬ. Yawˇ hui lehˬ, miˬguiˬ hkʼoˆ lo chehˇ htaˇ, shu mvuhˇ shu miˬ lo hkehˉ chaw hkʼe hpeh‸ chehˇ ve yoˬ teh‸ yawˇ hui kʼoˆ ve yoˬ. 14Oˇ hkʼe kʼoˆ ve chaw teˇ hpaˍ lehˬ, yawˇ hui gʼa tuˬ ve mvuhˇmiˬ hta‸ ca chehˇ ve yoˬ teh‸, yawˇ hui hkʼa tawˍ lehˆ hpeu‸ maˍ laˇ ve yoˬ. 15Yawˇ hui tawˆ la ve mvuhˇmiˬ hta‸ dawˇ nawˇ chehˇ ve kʼo, yawˇ hui kʼo‸-e tuˬ awˬ yanˇ cawˬ ve yoˬ. 16Ya‸ hkʼaˇ, yawˇ hui dawˇ law taˍ ve mvuhˇmiˬ lehˬ, oˇ ve a‸ kehˉ da‸ ve mvuhˇ naw ma mvuhˇmiˬ hpeh‸ ve yoˬ. Chi hta‸ pa taw, Gʼuiˬsha lehˬ yawˇ hui ve Gʼuiˬsha hpeh‸ ve yoˬ teh‸, shu kʼoˆ ve hta‸ yawˇ maˇ ya‸ taw. Awˬ lawn kʼo, yawˇ hui chehˇ tuˬ awˬ pon venˇ hta‸ yawˇ gu taˍ peuˬ.
17Aˍbraˍhanˍ lehˬ, yonˍ ve hta‸ pa taw, Gʼuiˬsha yawˇ hta‸ lawˇ nyi ve teˇ yanˇ, yawˇ Iˉcaˆ hta‸ yuˬ leh tanˇ piˇ ve yoˬ. 18Iˉcaˆ awˬ hkʼaw lo nawˬ ve awˬ ceuˬ awˬ hkʼaˇ cawˬ la tuˬ yoˬ teh‸, ka ti‸ gʼa taˍ ve chaw teˇ gʼaˇ lehˬ, yawˇ ve yaˇ paˍ teˇ gʼaˇ tiˉ ve hta‸ tanˇ piˇ ve yoˬ.#Ahkp 21:12 19Awˬ lawn kʼo, Gʼuiˬsha lehˬ chaw yaˇ hta‸ suh kuiˬ lo kʼaw‸ te‸ tu la piˇ puiˉ ve hta‸ yawˇ yonˍ taˍ ve yoˬ. Tawˇ pa haˉ kʼoˆ ve kʼo, suh kuiˬ lo yawˇ ve yaˇ paˍ hta‸ yawˇ kʼaw‸ gʼa ve yoˬ.
20Iˉcaˆ lehˬ yonˍ ve hta‸ pa taw, Yaˍkoˆ leh Iˉsawˇ hta‸ awˬ hkʼaw‸ nawˉ gʼa tuˬ ve awˬ bon na‸ piˇ taˍ ve yoˬ.
21Yaˍkoˆ lehˬ, yonˍ ve hta‸ pa taw, suh la paˇ neˇ ve teˇ yanˇ, Yoˇseh‸ ve yaˇ paˍ nyiˇ gʼaˇ hta‸ bon na‸ piˇ leh, yawˇ ve juˇ fuiˍ awˬ meuˇ awˬ hkʼoˆ boˆ taˍ leh Gʼuiˬsha hta‸ oˉ kʼoˍ pui ve yoˬ.
22Yoˇseh‸ lehˬ yonˍ ve hta‸ pa taw, yawˇ ve a sha‸ leh la paˇ neˇ ve teˇ yanˇ, Iˉsaˍreˍlaˆ chaw teˇ hpaˍ gʼa tawˆ kʼai tuˬ ve awˬ lawn hto piˇ leh, yawˇ ve awˬ mu‸ ku hta‸ hkʼaˬ hkʼe te tuˬ ve awˬ lawn yawˇ tawˇ piˇ taˉ ve yoˬ.
23Moˉseˍ ve awˬ pa awˬ e lehˬ yonˍ ve hta‸ pa taw, Moˉseˍ paw la peuˬ hkʼaw‸ nawˉ, ha pa sheh lehˇ hkʼa gaˬ yawˇ hta‸ faˉ taˍ ve yoˬ. Awˬ lawn kʼo, yaˇ paˍ oˇ ve lehˬ awˬ hkiˇ awˬ nganˇ da‸ jaˇ ve hta‸ yawˇ huiˉ maˬ gʼa mawˬ leh, hkunˉ hawˉ hkanˇ tawˇ piˇ taˍ ve hta‸ yawˇ huiˉ maˬ maˇ kawˆ.
24Moˉseˍ lehˬ yonˍ ve hta‸ pa taw, yawˇ uiˍ la ve teˇ yanˇ htaˇ, Hpaˍrawˇ yaˇ miˇ ve awˬ yaˇ paˍ teh‸ kʼoˆ ve hta‸ yawˇ maˇ hkanˍ gaˇ. 25Teˇ tcuhˉ teˇ yanˇ venˇbaˆ awˬ hkʼaw ha lehˬ chehˇ ve a‸ kehˉ Gʼuiˬsha ve awˬ yaˇ awˬ duˬ teˇ hpaˍ geh hkʼa geh gʼa tu‸ gʼa hkanˍ tuˬ ve hta‸ yawˇ leuˉ leh heuˆ gaˇ ve yoˬ. 26Hkri‸ awˬ pon gʼa tu‸ gʼa hkanˍ ve teˇ ceuˬ lehˬ, Eˇjiˇtu‸ mvuhˇmiˬ awˬ hkʼaw lo cawˬ ve da‸ jaˇ ve mawˇ jeˬ a‸ kehˉ leuˉ leh awˬ hpfuhˇ hkʼaˆ jaˇ ve teˇ ceuˬ hpeh‸ ve teh‸, yawˇ dawˇ taˍ ve yoˬ. Awˬ lawn kʼo, yawˇ gʼa tuˬ ve la‸ shawnˍ hta‸ yawˇ chiˇ nyi tcuhˉ taˍ ve yoˬ.
27Yonˍ ve hta‸ pa taw, hkunˉ hawˉ hkanˇ nyi ma zuhˆ ve hta‸ yawˇ maˇ kawˆ leh, Eˇjiˇtu‸ mvuhˇmiˬ awˬ hkʼaw lo tawˆ kʼai ve yoˬ. Awˬ lawn kʼo, mawˬ maˇ hpeh‸ ve teˇ gʼaˇ hta‸ mawˬ taˍ ve hkʼe te leh, yawˇ nyi ma yeˬ ve yoˬ. 28Yaˇ uiˍ teˇ hpaˍ hta‸ te luˬ shehˍ hpaˇ lehˬ, yawˇ hui hta‸ maˇ gʼa htawˇ tuˬ, Moˉseˍ yawˇ yonˍ ve hta‸ pa taw, Paˍsaˍhkaˍ pawehˇ te leh awˬ suhˍ hpeh‸ pfuhˍ taˍ ve yoˬ.
29Yonˍ ve hta‸ pa taw, Iˉsaˍreˍlaˆ chaw teˇ hpaˍ lehˬ goˇ lehˍ ve miˬguiˬ hkʼoˆ hta‸ juˇ kʼai ve hkʼe, Laˇ tsuhˇ gʼuiˬ nyi hta‸ hkanˍ kʼai ve yoˬ. Ya‸ hkʼaˇ Eˇjiˇtu‸ chaw teˇ hpaˍ oˇ ve hkʼa shuˍ shuˍ hkanˍ kʼai chehˇ ve teˇ yanˇ, kʼa suh peuˬ ve yoˬ.
30Yonˍ ve hta‸ pa taw, Iˉsaˍreˍlaˆ chaw hui Yeˍriˆhkoˇ venˇ hta‸ suhˍ nyi caw peuˬ hkʼaw‸ nawˉ, lanˇ venˇ paˆ ce ve yoˬ. 31Meh maˬ lanˉ Raˍhaˆ lehˬ, yonˍ ve hta‸ pa taw maˇ na yuˬ ve chaw teˇ hpaˍ geh maˇ gʼa luˬ. Awˬ lawn kʼo, jaˆ nyi shehˍ hpaˇ teˇ hpaˍ hta‸ yawˇ ha lehˬ ha kʼa ha‸ yuˬ ve hta‸ pa taw yoˬ.
32Chi hkʼoˆ ka‸, ngaˬ aˬ hto‸ ma gʼa kʼaw‸ kʼoˆ tuˬ sheˍ le. Awˬ lawn kʼo, Giˉdonˍ, Baˍrehˆ, Saˍsonˍ, Yeˍhpaˍtaˆ, Daˍviˆ, Saˍmo-eˍlaˆ leh Gʼuiˬsha ve tcuh kaˍ paˍ teˇ hpaˍ awˬ lawn ca kʼaoˍ maˇ peuˬ taˬ. 33Chaw oˇ ve teˇ hpaˍ lehˬ, yonˍ ve hta‸ pa taw mvuhˇmiˬ teˇ hpaˍ hta‸ gʼaˇ ve, hteˇ lehˍ cawˇ lehˍ uˉ peunˍ ve, Gʼuiˬsha ve ka ti‸ tawˇ hkawˇ teˇ hpaˍ hta‸ gʼa taˍ ve, laˇ caˬ shiˉ ve maw‸ kʼaw hta‸ hoˆ taˍ ve, 34hehnˇ jaˇ ve aˬ miˍ hta‸ shiˉ pehˍ gʼaˇ ve, aˉ htaw la‸ hkʼaw gʼa ponˬ ve, awˬ gʼaˇ nuˇ ve teˇ ceuˬ awˬ hkʼaw lo awˬ gʼaˇ uiˍ ve hta‸ gʼa ve, ma‸ bawˆ ve awˬ hkʼaw lo awˬ gʼaˇ uiˍ la leh, shu mvuhˇ miˬ ve ma‸ yaˇ teˇ hpaˍ hta‸ gʼa‸ kʼoˬ ve yoˬ. 35Yaˇ miˇ teˇ hpaˍ lehˬ, suh kuiˬ lo a shu yawˇ ve chaw kʼaw‸ te‸ tu la ve hta‸ gʼa ve yoˬ.
Chaw teˇ hpaˍ hpaˍ lehˬ, hehnˇ jaˇ ve fawˉ mehˍ ve hta‸ gʼa hkanˍ ve yoˬ. Awˬ lawn kʼo, leuˉ leh da‸ ve kʼaw‸ te‸ tu la ve teˇ ceuˬ hta‸ gʼa hpeh‸ tuˬ, shu ponˬ piˇ ve hta‸ yawˇ hui maˇ hkanˍ yuˬ. 36Chaw teˇ hpaˍ hpaˍ lehˬ, shu maˇ shawˍ maˇ caˆ te leh dawˆ ve hta‸ gʼa hkanˍ ve awˬ hkʼoˆ ka‸, sho caˆ hpeh leh htawnˍ hkʼaw keu taˍ ve hta‸ gʼa hkanˍ ve yoˬ. 37Shu haˉ pui baˬ ve, liˉ leu gʼeu‸ cheˆ ve leh, aˉ htaw chaw pehˍ ve hta‸ yawˇ hui gʼa hkanˍ ve yoˬ. Haˍ gʼawˇ jaˇ ve teˇ ceuˬ, fawˉ ve mehˍ ve teˇ ceuˬ leh, tu‸ ve hkanˍ ve teˇ ceuˬ hta‸ yawˇ hui gʼa hkanˍ ve awˬ hkʼaw lo, yawˬ guiˬ kʼuˉ aˉ che‸ guiˬ kʼuˉ hta‸ veu‸ deh leh, teˇ kaˬ peuˬ teˇ kaˬ lo yawˇ hui gʼa hpaw toˇ ve yoˬ. 38Yawˇ hui lehˬ, heh puiˉ hkʼaw leh hkʼaw hkʼoˆ lawˬ hkʼoˆ lo, miˬ kʼoˍ haˉ kʼoˍ hkʼaw lo ca chehˇ toˇ ve yoˬ. Yawˇ hui da‸ ve pa taw, miˬguiˬ chi yawˇ hui hta‸ maˇ keunˍ.
39Chaw oˇ ve teˇ hpaˍ hkʼa peu-eˬ lehˬ, yawˇ hui yonˍ ve teh‸ Gʼuiˬsha shaˉ hkiˆ hkanˍ ve htawˇ, ka ti‸ piˇ taˍ ve teˇ hpaˍ hta‸ yawˇ hui maˇ gʼa sheˍ. 40Aˬ hto‸ ma hta‸ pa taw le teh‸ kʼoˆ kʼo, chaw oˇ ve teˇ hpaˍ lehˬ, ngaˬ hui geh teˇ geh maˇ heˆ kʼo, yawˇ hui biˇ ve teˇ ceuˬ hta‸ maˇ gʼa sheˍ. Awˬ lawn kʼo, Gʼuiˬsha lehˬ ngaˬ hui awˬ pon da‸ leuˉ ve teˇ ceuˬ hta‸ gu taˍ ve hta‸ pa taw yoˬ.
Selectat acum:
Heˍbrehˇ li‸ 11: LHBE
Evidențiere
Copiază
Compară
Împărtășește
Dorești să ai evidențierile salvate pe toate dispozitivele? Înscrie-te sau conectează-te
Lahu Bible Edited © Thailand Bible Society and Bible Society of Myanmar, 2010, 2020.