1 Yoˇhanˬ li‸ 5
5
Ngaˬ hui ve yonˍ ve teˇ ceuˬ miˬguiˬ hta‸ gʼaˇ ve
1Yeˍsuˆ lehˬ Hkri‸ hpeh‸ ve yoˬ teh‸ hkʼa yonˍ ve chaw teˇ gʼaˇ le le lehˬ, Gʼuiˬsha ve awˬ yaˇ hpeh‸ ve yoˬ. Awˬ pa hta‸ hkʼa ha‸ ve chaw teˇ gʼaˇ le le lehˬ, awˬ yaˇ hta‸ ka‸ ha‸ ve yoˬ. 2Ngaˬ hui Gʼuiˬsha hta‸ ha‸ leh yawˇ piˇ taˍ ve tawˇ hkawˇ teˇ hpaˍ hta‸ na yuˬ htaˇ, yawˇ ve awˬ yaˇ teˇ hpaˍ hta‸ ngaˬ hui ha‸ ve yoˬ teh‸ ngaˬ hui gʼa shiˍ ve yoˬ. 3Awˬ lawn kʼo, Gʼuiˬsha hta‸ ha‸ ve teh‸ kʼoˆ ve lehˬ, yawˇ piˇ taˍ ve tawˇ hkawˇ teˇ hpaˍ hta‸ ngaˬ hui na yuˬ leh te ve hta‸ kʼoˆ ve yoˬ. Chi hkʼoˆ ka‸, yawˇ piˇ taˍ ve tawˇ hkawˇ teˇ hpaˍ lehˬ, haˍ jaˇ ve teˇ ceuˬ hpeh‸ ve maˇ heˆ. 4Gʼuiˬsha ve awˬ yaˇ hkʼa hpeh‸ ve chaw hkʼa peu-eˬ lehˬ, miˬguiˬ hta‸ gʼaˇ ve yoˬ. Miˬguiˬ hta‸ gʼaˇ ve teˇ ceuˬ lehˬ, ngaˬ hui ve yonˍ ve teˇ ceuˬ yoˬ. 5Miˬguiˬ hta‸ gʼaˇ ve chaw lehˬ a shu le. Yeˍsuˆ lehˬ, Gʼuiˬsha ve Yaˇ hpu hpeh‸ ve yoˬ teh‸ yonˍ ve chaw teˇ gʼaˇ ceh tiˉ gʼaˇ hpeh‸ ve maˇ heˆ laˇ.
Awˬ ha hpu shaˉ hkiˆ hkanˍ ve
6Chi teˇ gʼaˇ lehˬ, iˉ kaˆ leh awˬ suhˍ awˬ hkʼaw lo laˬ ve Yeˍsuˆ Hkri‸ hpeh‸ ve yoˬ. Iˉ kaˆ awˬ hkʼaw lo ceh tiˉ maˇ heˆ, iˉ kaˆ leh awˬ suhˍ awˬ hkʼaw lo yawˇ laˬ ve yoˬ. 7Awˬ ha hpu lehˬ hteˇ ve cawˇ ve hta‸ pa taw, yawˇ htawˇ shaˉ hkiˆ hkanˍ shehˍ hpaˇ hpeh‸ ve yoˬ. 8Awˬ lawn kʼo, Awˬ ha hpu, iˉ kaˆ leh awˬ suhˍ, shaˉ hkiˆ hkanˍ shehˍ hpaˇ chi shehˆ ceuˬ cawˬ leh, chi shehˆ ceuˬ hawˍ da‸ ve yoˬ. 9Chaw yaˇ shaˉ hkiˆ hkanˍ ve hta‸ ngaˬ hui na ve kʼo, Gʼuiˬsha shaˉ hkiˆ hkanˍ ve teˇ ceuˬ lehˬ leuˉ leh uiˍ ve yoˬ. Awˬ lawn kʼo, Gʼuiˬsha shaˉ hkiˆ hkanˍ ve lehˬ, yawˇ ve Yaˇ hpu awˬ lawn shaˉ hkiˆ hkanˍ ve yoˬ. 10Gʼuiˬsha ve Yaˇ hpu hta‸ yonˍ ve chaw teˇ gʼaˇ lehˬ, yawˇ awˬ hkʼaw lo shaˉ hkiˆ oˇ ve cawˬ ve yoˬ. Gʼuiˬsha hta‸ maˇ yonˍ ve chaw teˇ gʼaˇ lehˬ, Gʼuiˬsha hta‸ heˍ paˍ meh piˇ ve yoˬ. Awˬ lawn kʼo, Gʼuiˬsha lehˬ yawˇ ve Yaˇ hpu awˬ lawn shaˉ hkiˆ hkanˍ ve hta‸ yawˇ maˇ yonˍ ve pa taw yoˬ. 11Gʼuiˬsha shaˉ hkiˆ hkanˍ ve oˇ ve lehˬ, yawˇ ngaˬ hui hta‸ co ti‸ ha ti‸ pe‸ laˇ leh, co ti‸ ha ti‸ chi yawˇ ve Yaˇ hpu awˬ hkʼaw lo cawˬ ve yoˬ. 12Yaˇ hpu hta‸ ha‸ yuˬ ve chaw teˇ gʼaˇ lehˬ, co ti‸ ha ti‸ cawˬ ve yoˬ. Yaˇ hpu hta‸ maˇ ha‸ yuˬ ve chaw teˇ gʼaˇ lehˬ, co ti‸ ha ti‸ maˇ cawˬ.
Co ti‸ ha ti‸ cawˬ ve hta‸ gʼa shiˍ ve awˬ lawn
13Gʼuiˬsha ve Yaˇ hpu awˬ meh hta‸ yonˍ ve nawˬ hui teˇ hpaˍ lehˬ, co ti‸ ha ti‸ cawˬ ve hta‸ gʼa shiˍ tuˬ, ngaˬ nawˬ hui hta‸ li‸ chi bvuh‸ laˇ ve yoˬ. 14Yawˇ mehˆ gʼuˇ suhˍ ngaˬ hui chi hkʼe nyi ma ha‸ hanˉ tuˬ cawˬ ve yoˬ. Yawˇ ve a loˍ cawˇ ve hkʼe ngaˬ hui teˇ ceuˬ ceuˬ lawˬ ve kʼo, yawˇ na yuˬ tuˬ yoˬ. 15Ngaˬ hui hkʼa lawˬ ve teˇ hpaˍ hta‸ yawˇ na yuˬ ve yoˬ teh‸ ngaˬ hui shiˍ ve kʼo, yawˇ geh hkʼa lawˬ ve teˇ hpaˍ hta‸ ngaˬ hui gʼa peuˬ teh‸ gʼa shiˍ ve yoˬ.
16Chaw teˇ gʼaˇ lehˬ, yawˇ ve awˬ viˉ awˬ nyi teˇ gʼaˇ, suh maˇ keunˍ ve venˇbaˆ te chehˇ ve hta‸ gʼa mawˬ ve kʼo, chaw oˇ ve teˇ gʼaˇ awˬ pon yawˇ lawˬ leh, suh maˇ keunˍ ve venˇbaˆ te chehˇ ve awˬ viˉ awˬ nyi oˇ ve co ha te‸ ve hta‸ Gʼuiˬsha geh yawˇ lawˬ ve hkʼe gʼa tuˬ yoˬ. Suh keunˍ ve venˇbaˆ htawˇ cawˬ ve yoˬ. Oˇ ve awˬ pon gʼa lawˬ ve teh‸ ngaˬ kʼoˆ ve maˇ heˆ. 17Te ya‸ ve hkʼa peu-eˬ lehˬ, venˇbaˆ hpeh‸ ve yoˬ. Ya‸ hkʼaˇ, suh maˇ keunˍ ve venˇbaˆ htawˇ cawˬ ve yoˬ.
18Gʼuiˬsha geh paw la ve chaw hkʼaˬ ve teˇ gʼaˇ maˇ kʼoˆ, venˇbaˆ maˇ te ve hta‸ ngaˬ hui shiˍ ve yoˬ. Gʼuiˬsha geh paw la peuˬ ve yawˇ ve Yaˇ hpu lehˬ, yawˇ hta‸ ha‸ shaˉ leh, haiˬ ve awˬ shehˍ hpaˇ yawˇ hta‸ maˇ htawˇ.
19Ngaˬ hui Gʼuiˬsha hta‸ caˉ da‸ ve hta‸ ka‸, miˬguiˬ hkʼa peu-eˬ lehˬ haiˬ ve awˬ shehˍ hpaˇ ve kanˇ paˆ awˬ hawˉ lo chehˇ taˍ ve hta‸ ka‸, ngaˬ hui shiˍ ve yoˬ.
20Peuˬ leh, Gʼuiˬsha ve Yaˇ hpu gaˬ la leh, hteˇ ve cawˇ ve awˬ shehˍ hpaˇ hta‸ ngaˬ hui shiˍ puiˉ tuˬ yawˇ cuˇ yiˍ pe‸ laˇ ve hta‸ ngaˬ hui shiˍ ve yoˬ. Hteˇ ve cawˇ ve awˬ shehˍ hpaˇ leh yawˇ ve Yaˇ hpu Yeˍsuˆ Hkri‸ awˬ hkʼaw lo ngaˬ hui chehˇ taˍ ve yoˬ. Gʼuiˬsha chi lehˬ, hteˇ ve cawˇ ve Gʼuiˬsha hpeh‸ leh, co ti‸ ha ti‸ htawˇ hpeh‸ ve yoˬ.
21Ha‸ ve yaˇ teˇ hpaˍ-oˬ, shaˉ ho‸ teˇ hpaˍ hta‸ jaw kʼai-o.
Selectat acum:
1 Yoˇhanˬ li‸ 5: LHBE
Evidențiere
Copiază
Compară
Împărtășește
Dorești să ai evidențierile salvate pe toate dispozitivele? Înscrie-te sau conectează-te
Lahu Bible Edited © Thailand Bible Society and Bible Society of Myanmar, 2010, 2020.