Roma ma 12
12
Mborra ge giya̰l Dok zi
(Efe 4:1-16, 1Kor 12:12-27)
1Mbi moɗege aŋ ɗe, ná vya ma, ne kwa a̰se ge Dok ne ta, tyare me aŋ sḛ duur ma dimma ne tuwaleya ge ne ndwara go, ge harcal, kaŋ ge ke Dok sḛ tuli: no a ke Dok temel ge ne na viya̰ go ne. 2Ke me dimma ne naa ge dunya ge ma̰ ge ma ne ke go to#1Bit 1:14., amma ya̰ me Dok er aŋ ne hon aŋ o̰yom ge giya̰l, ne da pe aŋ ba ga kwa laar ɓyareya ge Dok ne: ndwara go, kaŋ ge kwaɗa, kaŋ ge ne ke Dok sḛ tuli, ne kaŋ ge mbyatɗa tap.
3Ago ne bobo ge a ne ho̰ mbi na ta, mbi jan ndu ge daage ge ne aŋ buwal zi go: na kaage ndu ge daage ndi tene waɗeya to, amma ká me ne haŋgal ge jwap, dimma ne varra ge hon fareba ne ge Dok ne ho̰ ndu ge daage go. 4Ne jo̰ nee duur ɗu, ne swaga ma hini hini go, nama sḛ ma pet a ke be temel ge ɗu ge pe to#1Kor 12:4-12., 5go no me, nee gḛ, nee sḛ duur ge ɗu Kris zi, nee pet nee ɓanna digi dagre ne ta. 6Ne jo̰ nee da ne bobo ma hini hini varra ge Dok ne pal, kadɗa ndu ɓo bobo ge waage fare ge Dok ne, na ke na hon fareba pal. 7Kadɗa ndu ge may ɓo bobo ge ke temel ge Dok ne, na ho̰ tene ke na, kadɗa ndu ge may ɓo bobo ge hate naa, na ho̰ tene hate naa, 8bage ne moɗege naa, na ho̰ tene moɗege naa, bage ne hon kaŋ, na ho̰ na ne laar kwaɗa, bage ne ɗame naa, na ɗame naa ne sḛ tuli, bage ne mbar naa, na ke na ne laar saal.
9Laar wanna na ka be mbuɗiya. Sḛ me kaŋ ge sone, mbarge me ne kaŋ ge kwaɗa.
10Fare ge laar wan ná vya ma ne ɗe, ke me ta pe, hormo hon ta zi, ndi me aŋ kaam ma dimma ne nama ne waɗe aŋ waɗe go.
11Há me ta digi, kaage aŋ ke uwal to, ke me temel ge Bageyal ne ne sḛ fogor.
12Ka me ne laar saal jobreya zi, wa̰ me ta yál njotɗa ma zi, ho̰ me ta kaɗeya ne á ta.
13Mbá me naa ge mbegeya ma, ame me gwasal ma.
14E me wak busu nama ge a ne ke aŋ yál ma pal, é me wak busu, amma vḛne me aŋ wak to#Mat 5:44, Luk 6:28..
15Ke me laar saal poseya ne nama ge ne ke laar saal ma, fya me poseya ne nama ge ne fyal ma.
16Ka me ne dwatɗa ge ɗu. Jegre me ta to, ke me kondore ne naa ge be a̰me pe to ma, ndi me ta dimma ne naa ge zwama ma go to#Isa 5:21..
17Gwa̰ ne ndu sone potɗa ne sone to. Ke me kaŋ ge kwaɗa naa ndwara go pet.
18Kadɗa na day day, mbyatɗa ge aŋ ne pal, ká me swaga halas ne naa pet.
19Mbi ná vya ge laar wanna ma, kaage aŋ gele ta ne aŋ pala to, amma ya̰ me sarya kunna Dok tok go. Ago a njaŋge go: «A mbi gele naa ne, a mbi mbo gwan ne naa potɗa ne#Dwa 32:35.,» Bageyal jya̰ ne.
20Amma kadɗa mo ndu ge ho̰l kyamal, ho̰ na kaŋzam, kadɗa mam njuwal ke na ne, ho̰ na njotɗa, ago swaga ke go mbe no go, mo kote uwara wak yeŋgel ma na pala digi#Frs 25:21-22..
21Yá̰ sone hal mo to, amma há sone ne kwaɗa kerra.
Selectat acum:
Roma ma 12: FGN2013
Evidențiere
Copiază
Compară
Împărtășește
Dorești să ai evidențierile salvate pe toate dispozitivele? Înscrie-te sau conectează-te
La Bible en langue Kim © Alliance Biblique du Tchad, 2013.
