Provebs 6
6
Samfala toktok moa fo mekem man hemi wekap
1San, sapos yu promis fo peimaot kaon blong nara man,
2toktok blong yu bae hemi holem yu olsem trap wea yu nomoa bin wakem.
3Sapos yu duim olsem, yu mas hambol an go kuiktaem fo aotem promis blong yu.
Duim diswan mekem yu fri bikos yu stap finis long paoa blong man ya.
4Yu mas no slip, yu mas duim distaem nao.
5Kamaot from trap ya olsem wanfala bed wea hemi flae aot,
o animol wea hemi ranawe from man i laek sutim hem.
6Les man, go lukim olketa anis.
Yu mas waes olsem olketa.
7Olketa anis no garem lida, o sif, o gavman,
8bat i redim kaikai fo hadtaem.
9?Hao long nao bae les man hemi liu?
?Hao long nao bae hemi gohed fo slip?
10Hemi tok olsem, “Bae mi jes leidaon lelebet fo res.”
11Bat wea, bae hemi pua fogud,
olsem man fo stil hemi tekem evrisamting finis.#Provebs 24:33-34.
12Olketa nogud man i save laea olobaot long olketa pipol.
13Olketa ya gohed fo satae, an tok long han fo mekem trik.
14Olketa ya tingim enikaen wei fo duim ravis samting an mekem trabol long evri ples.
15So seknomoa, trabol bae kasem olketa,
an bae olketa dae from.
16-19Siksfala samting nao Yawe hemi les long olketa,
hem nao wei fo praod, wei fo laea, kilim man dae fo nating,
man mekem olketa ravis plan, man duim olketa ravis samting, man laea long kot.
Bat mekseven samting nao Yawe hemi barava les tumas long hem,
hem nao man i mekem pipol fo raoa.
No durong wetem eniwan
20San blong mi, yu mas obeim evri strongfala toktok wea dadi hemi givim,
an no fogetem evri tising wea mami hemi givim long yu.
21Oltaem, kipim long haat blong yu.
Somaot long laef blong yu olsem wanfala nekles.
22Taem yu wakabaot, bae hemi lidim yu,
taem yu slip, bae hemi kipim yu,
an taem yu wekap, bae hemi tok long yu.
23Evri strongfala toktok ya nao laet,
an disfala tising nao hemi laet.
Hem save stretem yu, mekem yu kasem laef.
24Hem save mekem yu sef from suit toktok blong nogud waef blong nara man.
An hem stopem yu fo no go long woman hu hemi laek fo durong wetem yu.
25Nomata woman ya hemi luknaes tumas, yu no daedae fo hem.
Nomata hemi satae fo suitim yu, no letem hem winim yu.
26Durong wetem juri woman, bae yu lusim seleni.
Bat durong wetem waef blong nara man, bae yu lusim laef.
27?Waswe, sapos yu putum faea long sest blong yu,
yu tingse hemi no bonem yu?
28?Waswe, sapos yu wakabaot antap long hot ston,
yu tingse hemi no bonem yu?
!Man! Bae hem bonem yu ya.
29Yu save, man hemi durong wetem waef blong nara man,
bikfala panis nao bae kasem hem.
30Sapos man hemi stil bikos hemi hanggre, pipol no tingdaonem hem tumas.
31Bat sapos olketa kasholem hem, hemi mas peimbaek sevenfala taem,
an maet hemi givim evrisamting blong hem fo stretem disfala nogud samting.
32Bat man hu hemi durong wetem waef blong nara man,
hemi nating garem stretfala tingting, an hemi spoelem hem seleva.
33Pipol bae wipim an meksem long hem,
an nem blong hem bae nogud olowe nao.
34Sapos man hemi durong wetem waef blong nara man,
bae hasban ya barava kros tumas.
Fo sensim disfala rong, hasban ya bae hemi nating kaen taem hemi sensimbaek.
35Bae hemi les long kompensesin,
nomata hemi bik fogud, hemi no save finisim kros blong hem.
Solomon Islands Pijin Bible © Bible Society of the South Pacific, 2008.