Provebs 22
22
1Gudfala biknem, hemi gud moa winim staka seleni.
Fo pipol tinghae long yu, hemi gud moa winim silva an gol.
2Nomata risman o puaman, tufala semsem nomoa.
Yawe mekem tufala evriwan.
3Man garem save, hemi lukim trabol, hem go long sef ples.
Man no garem save, hem gohed long trabol, an hemi panis.
4Yu hambol an tinghae long Yawe,
bae yu garem seleni, biknem an gudfala laef.
5Rod blong ravis man i fulap long nilagras an trap,
Man hu hemi lukaftarem laef blong hem, hemi stap farawe from kaen rod.
6Tisim pikinini fo falom stretfala wei,
taem hemi bikman, bae hemi no lusim.
7Risman kontrolem puaman.
Man tekem kaon hemi slev blong man givim kaon.
8Man plantem ravis samting, bae digim trabol.
Ravis wei blong hem, bae hemi kamap samting nating.
9Man hapi fo givim kaikai long puaman,
bae hemi hapi tumas.
10Ronemaot man hemi laek fo tokspoelem nara man,
raoa bae finis, faet bae finis, an toknogud bae finis.
11Man kipim haat blong hem klin, an hem save tok gud,
lida bae fren blong hem.
12Yawe gadem tru toktok,
bat hemi daonem laea toktok.
13Lesibon hemi sei,
“Wanfala laeon hemi stap aotsaet. Bae hemi kilim mi dae.”
14Tok blong woman fo durong, hemi hol wea i dip tumas.
Yawe bae kros long man hemi herem, an man bae foldaon long hem.
15Krangge tingting i stap long haat blong pikinini.
Panisim hem fo aotem kaen tingting ya.
16Wanfala man mekful long puaman fo kamap ris,
narafala man givim presen long risman,
tufala evriwan save lus.
Teti waes toktok
17Lisin kam gudfala long toktok blong waesman. Tingabaotem olketa samting mi tisim.
18Hemi gud yu tingim olketa oltaem, an yu baehatem.
19Mi tisim yu, bikos mi laekem yu fo trastem Yawe.
20Mi raetemdaon teti waes toktok, mekem yu garem save.
21Olketa save tisim yu tru toktok an mekem yu fit fo talem olketa gudfala ansa long olketa hu i askem enisamting long yu.
Fas waes toktok
22Yu no ravem olketa puaman.
An yu no spoelem olketa long kot.
23Bikos Yawe bae saetem olketa,
an bae hemi spoelem man hu hemi spoelem olketa.
Mektu waes toktok
24Yu no fren wetem man save kros tumas,
an yu no stap tugeta wetem man save kros kuiktaem.
25Nogud yu lanem wei blong hem, an pas long hem olsem trap.
Mektri waes toktok
26Yu no promis fo peimaot kaon blong narafala man.
27Bikos sapos yu no save peim,
bae olketa tekem evrisamting blong yu
Mekfoa waes toktok
28Yu no muvum mak blong spialaen blong pisgraon wea olketa olo bifoa kam i putum.
Mekfaev waes toktok
29Man save tumas long waka blong hem,
hemi no duim waka blong olketa man nating,
bat bae hemi duim waka blong bikman.
Solomon Islands Pijin Bible © Bible Society of the South Pacific, 2008.