Provebs 16
16
1Haat blong man save mekem plan.
Yawe nomoa save talem hem oraet.
2Maet man hemi tingim wei blong hem i barava gud nomoa,
bat Yawe hemi skelem wanem hemi laekem.
3Trastem Yawe long evri waka blong yu,
bae hemi gohed gudfala.
4Yawe hemi mekem evrisamting fitim plan blong hem.
An man nogud tu, Yawe hemi mekem fo panisim hem.
5Yawe hemi les long olketa hu i praod tumas.
Yu save, bae hemi panisim olketa.
6Tinghevi long God, an falom hem olowe,
an hem bae tekemaot sin blong yu.
Tinghae long hem, an bae yu no save go kolsap long wei nogud.
7Taem wei blong man hemi mekem Yawe hapi,
Yawe hemi mekem enemi blong man fo kamap fren long hem.
8Stretfala man wetem lelebet seleni, hemi lake moa winim
ravis man wetem staka seleni.
9Haat blong man save planem wei blong hem,
bat Yawe nao hem mekem rod.
10Toktok blong lida, hemi garem paoa,
so hemi mas tok stret nomoa.
11Evri stretfala skel i blong Yawe,
bikos hem nao mekem stretfala wei fo skelem evrisamting.
12Olketa lida mas les long wei nogud,
bikos stretfala wei nomoa save mekem gavman strong.
13Olketa lida i hapi long tru toktok,
an olketa laekem tumas man hemi toktru.
14Taem lida hemi kros, hem save kilim man dae.
Waes man hemi traehad fo mekem lida hapi.
15Taem lida hemi hapi, pipol garem laef.
Hemi olsem ren wea hemi mekem gaden i grou.
16Gol hemi gud, waes hemi moabeta.
Silva hemi gud, save hemi moabeta.
17Rod blong gudfala man, hemi no go kolsap long olketa ravis wei.
Man hemi lukluk gud long rod, hemi save sevem laef blong hem.
18Praod fastaem, bagarap bihaen.
Bikhed fastaem, foldaon bihaen.
19Hambol man wetem pua pipol, hemi moabeta winim
man garem plande samting wetem pipol hu i strong tumas.
20Man hemi lisingud, bae laef blong hem hemi gud.
Man hemi trastem Yawe, bae hemi hapi.
21Man wea hemi waes, pipol save hemi garem gud tingting.
Gudfala toktok mekem plande pipol fo save moa.
22Gudfala save, hemi mekem laef hemi kamap.
Bat krangge tingting, hemi mekem panis kamap nomoa.
23Haat blong waes man hemi lidim toktok blong hem,
an hemi save tanem tingting blong nara man
24Toktok wea hemi barava kaen, hemi olsem hani.
Yu kaikaim, hemi suit an mekem yu filstrong.
25Wanfala man hemi tingse rod hemi laekem i gud nomoa,
bat hemi rod blong dae.#Provebs 14:12.
26Hanggre save mekem man hemi waka.
Hemi nidim kaikai, dastawe hem waka.
27Man nogud laek fo mekem trabol
toktok blong hem i olsem faea.
28Ravis man hemi mekem raoa kamap,
Man hemi toksmol, hemi mekem olketa fren brekaot.
29Man fo faet, hemi os-os long wantok,
hemi mekem hem go long rod wea i no stret.
30Man hemi satae, hemi planem ravis samting.
Man hemi tok haed, hemi laekem samting nogud.
31Waetfala hea blong olo, hemi olsem trufala biknem.
Yu save kasem hem long stretfala laef.
32Man hemi no kros kuiktaem, hemi strong winim nambawan soldia.
Man save kontrolem kros blong hem, hemi strong winim man hu hemi save kontrolem wanfala taon long faet.
33Man hemi trae faendemaot wanem fo duim,
Yawe nomoa hemi mekem ansa kamaot.
Solomon Islands Pijin Bible © Bible Society of the South Pacific, 2008.