याकूब 2
2
भेदभाब के खिलाप चितौनी
1हे मेरे भईयौ, तुम लोग महिमा बारे हमरे परभु ईसु मसी मै बिसवास करौ हौ इसताँई भेदभाब ना करौ। 2सोचौ कै अगर कोई सेट आदमी सभा मै सौने की मुंदरिया और भारचे लत्ता पैहरकै आवै है और बहीं एक गरीब आदमी बी फटे पुराने मैले लत्ता पैहरकै आवै है। 3तौ तू भारचे लत्ता बारे आदमी को मौह देखकै कैए कै तू हिंया अच्छी जघै बैठ; और बा मैले लत्ता बारे गरीब आदमी सै कैए कै तू बहाँ खड़ो रैह, या मेरे पाँऐ के धौंरे बैठ। 4तौ का तुमनै आपस मै भेदभाब ना करो और बुरी सोच के संग नियाय कन्नै बारे ना बने? 5हे मेरे पियारे भईयौ सुनौ; का परमेसर नै जा दुनिया के गरीब लोगौ कै ना चुनो कै बे बिसवास मै पक्के और मसी के राज के अधकारी हौं, जिसको बादो बानै अपने पियार कन्नै बारौ से करो है? 6पर तुमनै बा गरीब आदमी की बेजती करी है। का सेट आदमी तुमरे ऊपर जुलम ना करै है और का बे तुमकै अदालतौं मै ना ले जावै हैं? 7का बे ईसु मसी के अच्छे नाम की बुराई ना करै हैं, जिस नाम सै तुम जाने जाबौ हौ? 8जैसो पबित्तर सास्तर मै लिखो है कै, “अपने पड़ोसी सै बैसेई पियार करौ, जैसो तुम अपने आप सै करौ हौ।” और अगर तुम परमेसर के राज की जा आगियाँ कै पूरी करौ हौ, तौ तुम अच्छो करौ हौ। 9पर अगर तुम भेदभाब करौ हौ, तौ तुम पाप करौ हौ। और नियम तुमकै दोसी ठैरागो। 10कैसेकै जो कोई सिगरी आगियाँऔ कै मानै है, मगर एक आगियाँ तोड़ै है, तौ बौ सिगरी आगियाँऔ कै तोड़नै को दोसी होगो। 11कैसेकै जिसनै जौ कैई है कै, “तू बईयरौं के संग गलत काम ना करिए,” बाई नै जौ बी कैई है कै, “तू खून बी ना करिए।” इसताँई अगर तैनै बईयरौं के संग गलत काम ना करो, मगर खून करो है, तौ तैनै आगियाँऔ कै तोड़ो है। 12तुम उन लोगौं के हाँई बोलौ और काम करौ, जिनको नियाय परमेसर के नियम के दुआरा होगो, और जौ नियम छुटकारो देगो। 13कैसेकै जो दया ना करै है, बाको नियाय दया सै ना होगो। मगर दया नियाय के ऊपर जीतै है।
बिसवास और करम
14हे मेरे भईयौ, अगर कोई कैए कै मैं बिसवास करौ हौं, मगर बौ काम ना करै है, तौ जासै बाकै का फाएदा? का ऐंसो बिसवास बाकै मुक्ति देगो? 15सोचौ अगर किसी भईया या बहन के धौंरे पैहरनै के ताँई लत्ता और खानै के ताँई हर दिन रोटी ना होए। 16और तुम्मै सै कोई उनसै कैए कै, “सान्ति सै जाऔ, परमेसर तुमरी सायता करैगो; और तुम गरम लत्ता पैहरौ और पेट भरकै रोटी खाऔ,” मगर तुम उनके सरीर के ताँई जो जरूरी है बौ चीज ना दो तौ, फिर जा बात सै का फाएदा? 17बैसेई बिसवास के संग अगर करम ना करै हैं तौ बौ बिसवास मरो भओ है। 18पर कोई कैह सकै है कै, “तेरे धौंरे बिसवास है, तौ मेरे धौंरे करम है। अब तू बिना करम के अपनो बिसवास दिखा और मैं तेकै अपनो बिसवास करमौ के दुआरा दिखांगो।” 19का तू बिसवास करै है कै परमेसर एकई है? तौ जौ अच्छी बात है; दुसट आत्मा बी जौ बिसवास करै हैं, और बे डर के मारे थरथराबै बी हैं। 20पर हे बेबकूफ आदमी, का तू जौ बी ना जानै है कै करम के बिना बिसवास बेकार है? 21जब हमरे अब्बा इब्राहिम नै अपने लौंड़ा इसहाक कै बलि कन्नै के ताँई बेदी के ऊपर चढ़ाओ, तौ का बौ अपने करमौ सै धरमी ना ठैरो? 22इसताँई तैनै देखो हो कै बाके बिसवास के संग करम बी हे और करम की बजै सै बाको बिसवास पूरो भओ। 23और पबित्तर सास्तर को जौ बचन पूरो भओ कै, “इब्राहिम नै परमेसर के ऊपर बिसवास करो, और जाई बिसवास की बजै सै धरमी ठैरो।” और बौ परमेसर को दोस्त कैहलाओ। 24इसताँई तुमनै देख लओ कै आदमी सिरप बिसवास सैई ना, पर करमौ सै धरमी बनै है। 25बैसेई राहाब नाम की बईयर बी जो रन्डी ही बौ अपने करमौ सै धरमी बनी, कैसेकै बानै उन दूतौ कै जो जासूसी कन्नै आए हे अपने घर मै लुकनै के ताँई जघै दई और उनकै दूसरी रस्ता सै बाहार भेज दओ। 26जैसे बिना आत्मा के सरीर मरो भओ है, बैसेई करम के बिना बिसवास बी मरो भओ है।
New Life Compute Institute [NLCI] - CC BY-NC-ND 4.0