रोमियां 12
12
जीवन मां नरीकारा ची योजना
1ऐवास्ते हे माये भऊ, मैं तम्हानु नरीकारा ची दया याद ङिवाती कर बिनती करे पला कि, आपणे शरीरा नु जीते, ते पवित्र, ते नरीकारा नु भाता हुला बलिदान करती कर चढ़ावा, हाओ तम्ची आत्मिक सेवा छै। 2ते ऐ संसारा ची रीति उपर ना चला। पर तम्ची ब़ुध्दि चे नवें हुती जाणे लारे तम्चा चाल-चलन वी बदलता जाओ, जाये कनु तम्ही नरीकारा ची भली, ते भावणे आली, ते सेद्ध इच्छा लारे अनुभव लारे मालुम करते रिहा।
3कांकि मैं ओ अनुग्रह चे वजह जको मनु मिड़ला, तम्चे महु हर-हेक नु किहे पला, कि जिसड़े समझणे चाही छै, ओचे कनु बढ़ती कर आपणे-आप नु ना समझो, पर जिसड़े नरीकारा ने हर-हेक नु काबलीयत चे अनुसार बांटती ङिले, उसड़े ही ओचे अनुसार आपणे-आप नु समझणे चाही छै। 4#1 कुरि 12:12कांकि जिंवे अम्ची हेक देह मां ब़ोहत सारे अंग छी, ते सब अंगा चे हेक जिसड़े काम कोनी, 5यूहीं अम्ही जको ब़ोहत सारे छिऊं, मसीह मां हेक शरीर हुती कर आपस मां हेके ङुजे चे अंग छिऊं।
6 #
1 कुरि 12:4–11
ते जबकि ओ अनुग्रह चे अनुसार जको अम्हानु ङिला गेला, अम्हानु अलग़-अलग़ वरदान मिड़ले, तां जानु भविष्यवाणी चा वरदान मिड़ला आला हो, ओ विश्वासा चे अनुसार भविष्यवाणी करो। 7अगर कानु सेवा करने चा वरदान मिड़ला आला हो, तां सेवा मां लाग़ला रिहो, अगर कुई सिखावणे आला हो, तां सिखावणे मां लाग़ला रिही, 8जानु होंसला ब़न्धावणे चा वरदान मिड़ला, ओ होंसला ब़न्धाता रिहो, ते दान ङेणे आला खुले मना लारे दान करो, जको अगुवाई करे, ओ लगन लारे करो, जको दया करे, ओ खुशी लारे करो।
मसीही व्यवहार
9प्रेम निष्कपट हो, बुराई लारे नफरत करा, भलाई करने मां लाग़ले रिहा। 10भाईचारे चे प्रेम लारे हेके-ङुजे उपर दया करो, आपस मां हेके-ङुजे नु आदर चे लारे आपणे आप कनु ज्यादा समान ङिया। 11मेहनत करने मां आलसी ना बणा, आत्मा मां जोश लारे भरीती कर प्रभु ची सेवा करा। 12आपणी आस चे बारे मां खौश रिहा, क्लेश चे बारे मां तसल्ली राखा ते प्राथना चे बारे मां मजबूत रिहा। 13नरीकारा चे लौका नु जको कोच्छ जरुरी हो, ओचे मां वांची सहायता करा। मेहमाना ची सेवा करने मां लाग़ले रिहा।
14 #
मत्ती 5:44; लूक 6:28 जको तम्हानु सतावी वानु आशीष ङिया। वानु श्राप ना ङिया, पर आशीष ङिया। 15खौश हुवणे आला लारे खौश रिहा, ते रोवणे आला लारे रोवा। 16आपस मां हेक जिसड़े मन राखा, घमण्डी ना हुवा, पर दीन-ङुखिया लारे मेल-मिलाप राखा, ते आपणी नजरी मां आपणे-आप नु ब़ुध्दिमान ना समझा।
17बुराई चे बदले काई वी लारे बुराई ना करा, जको बाता सब लौका ची नजरी मां सही छी, वेही करले करा। 18जिठे तक हो सग़े, तम्ही सब इन्साना लारे मेल-मिलाप राखा। 19हे प्यारे, बदला ना गेहजा, पर नरीकारा नु क्रोध चा मौका ङिया, कांकि पवित्रशास्त्रा मां लिखले आले छै, “बदला गेहणे माये काम छै, प्रभु किहे मैं ही बदला ङिही। ” 20पर तु तां,
“अगर दुधा बैरी भुक्का छै, तां ओनु खाणे खुला,
अगर ओ तरसेला आला छै, तां ओनु पाणी पीला,
कांकि इसड़े करने लारे तु ओचे ठोङा उपर अंगारा चा ढेर लावे#12:20 तु ओचे ठोङा उपर अंगारा चा ढेर लावे; हा हेक इब्रानी कहावत छै ते ऐचा मतलब हा छै तु दुश्मना लारे भलाई करी ते ओ मना मां शर्मिन्दगी महसूस करे। ।”
21बुराई कनु ना हारा, पर भलाई लारे बुराई नु जीतती गिहा।
CC BY-NC-ND 4.0