V'nen Avrndaui 2
2
V'nen dau iv'i sei aparni ipastudau
1Natk, ipavr ti palev' v'nenak kauada mamh v'nen huak a nlm, 2a ti pav'rn a v'nen dauak karn mamh navanel na ti parndu sei, 3aau, ipavr ti pav'ara a ti parndu sei, kav'ara eia a nadl lil, sena ti parndu mamh v'nenak, 4ipavr ti parn nam'er ani ipanep'a sera silva la ulien nen ilil ha, katala ani ipanep'a sera si p'as la itutuah ha, 5arna naran nen parndu mamh navanel na ti padedrn an a Mlin Eia, kapasla navanel na ti parndu mamh Atua. 6Sena ti a Mlin Eia iani ti m'ertu irndu sei. P'kl na ti arndu sei kasapei iendan al pnn uaki. 7Hin iani ti m'ertu viviln irndu sei ip'as. Hin iv'i sil asnr m'ertu la avsapa navanel viviln ha. 8Hin iuadar arm'ertu la avsapa navanel viviln ha, kap'aur alar m'ertu p'asan. 9Dav'a ti parndu p'kl p'as m'a p'kl viviln m'a p'kl imhmah a m'ertu, aau, navanel p'as udlani.
10Naran nlm irndu sei m'a naran parn ipap'as a nlm a ti parndu sei, 11V'ahien p'as ipauadah, p'kl na ti krndu sei ipap'aurh, 12A ti aparlev'lah arna navanelar arm'ertu stu, a ti mkamima asn m'ertu la ivr sei iaviviln ha. 13Arm'ertu nen avln navanel viviln a ti apavsapa navanel na m'alk. 14Avrn ip'as a ti apavan si stu kavhavas hir naran avla m'ertu stu avan sei iaviviln. 15Navanelar ihapr, alar iaviviln. 16V'ahien p'as nen ipalev'lah arna nut hua na tav'et uraur la iv'ana m'ah kasnarh. 17Tav'et nen iln m'ertu la iv'av'ei naran iv'i vitar kavnapn a turanienan Atuan. 18Sena ti nmahan imima asn m'ien, navanelan iv'a auei asnr m'ertu avram'a. 19Ardu la avrav'a asnn ha, ahavm'alet ml, ahavuada navanel na silv'ien. 20V'ahien p'as ipani ti pasapa navanelar m'ertu p'as kauada alar m'ertu viviln. 21Sena ti m'ertu viviln apavlak arna nadep', m'ertu la si stu iahter a nlr ha apavlak aranan. 22V'eti Atua ipatrlar arm'ertu stu arna nadep' kani ti arm'ertu avan sei iaviviln apavamkma.
© 2023 Presbyterian Reformed Church of Australia